“Jenuware 6–12. 1 Nifae 1–7: ‘Bae Mi Go Mo Mekem,’” Kam Folem Mi—Blong Praemeri: Buk blong Momon 2020 (2020)
“Jenuware 6–12. 1 Nifae 1–7 ” Kam Folem Mi—Blong Praemeri: 2020
Lihae I Stap Wokbaot Kolosap long Red Si, i kam long Gary Smith
6–12 Jenuware
1 Nifae 1–7
“Bae Mi Go mo Mekem”
Taem yu ridim 1 Nifae 1–7, tingbaot ol ves, ol eksperiens, ol kwestin, mo ol narafala risos we yu filim insperesen blong yu yusum blong tijim ol pikinini. Ol aktiviti long aotlaen ia, yu save jenisim blong i stret long ol bigfala mo smol pikinini.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Samfala pikinini long klas blong yu maet bae oli harem o ridim finis abaot ol eksperiens blong famli blong Nifae long 1 Nifae 1–7. Invaetem olgeta blong serem wanem we oli save. Sapos ol pikinini oli no save tumas abaot eksperiens blong Nifae, givim olgeta wan janis long en blong lesen blong oli serem wanem we oli lanem.
Stap Tijim Doktrin: Ol Smol Pikinini
Mi nidim testemoni blong miwan.
Nifae i kam blong bilif long ol toktok blong papa blong hem from se hem i gat strong tingting blong save hemwan mo hem i bin prea i go long Lod. Helpem ol pikinini blong lanem samting aot long eksampol blong hem.
Samfala Aktiviti we Yu Save Mekem
-
Karem wan bokis we i sat mo i gat pikja blong Sevya i stap insaed, mo givim janis long wanwan pikinini blong faenemaot hemwan wanem i stap insaed long bokis ia. Talem long ol pikinini se Nifae i wantem gat testemoni blong hemwan se Lod nao i bin komandem famli blong hem blong aot long Jerusalem. Askem ol pikinini blong lisin long wanem Nifae i bin mekem blong kasem testemoni blong hemwan taem yu rid long 1 Nifae 2:16. Testifae se semmak olsem we wanwan long yumi i mas openem bokis ia blong faenemaot wanem i stap insaed, yumi evriwan i nid blong askem God blong save kasem testemoni blong yumiwan.
-
Karem ol pikja o ol samting we i save ripresentem wanem we maet ol pikinini bae i nidim blong kasem wan testemoni long hem, olsem wan pikja blong Jisas Kraes, Buk blong Momon, o wan pikja blong Profet we i stap laef. Invaetem ol pikinini blong jusum wan pikja o wan samting mo serem testemoni blong olgeta long samting ia long klas.
God bae i helpem mi blong folem ol komanmen blong Hem.
?Olsem wanem nao yu save yusum ol stori ia blong helpem ol pikinini blong andastanem se God i stap helpem yumi blong folem ol komanmen blong Hem, iven long taem we i no isi blong obei?
Samfala Aktiviti we Yu Save Mekem
-
Ridim 1 Nifae 2:2–4 long ol pikinini, mo soem sam pikja blong samfala samting we maet famli blong Lihae oli tekem wetem olgeta i go long waelples, olsem wan tenet, ol blangket, mo ol bo mo aro. Askem ol pikinini blong pikjarem long maen blong olgeta olsem wanem nao bae olgeta i filim sapos olgeta i mas livim ol hom blong olgeta mo go stap long waelples. ?Wanem nao Lod i stap askem yumi blong mekem tedei blong soemaot se yumi stap obei long Hem?
-
Helpem ol pikinini blong kala mo katemaot ol pikja long pepa long aktiviti pej blong wik ia; afta askem long olgeta blong yusum ol pepa pikja ia blong talem wan sot stori blong Nifae mo ol brata blong hem taem we oli stap go bak from ol buk we oli mekem wetem bras (luk long 1 Nifae 3–4). Singsing ia “Nephi’s Courage” (Children’s Songbook, 120–21) mo “Japta 4: Ol Buk we Oli Wokem wetem Bras” (Ol Stori long Buk blong Momon, 8-12; luk tu long vidio we i go wetem long ChurchofJesusChrist.org) i save helpem yu talem stori ia.
-
Yusum ol pikja 103–15 insaed long Gospel Art Buk blong helpem ol pikinini blong tingbaot samfala samting we Lod i komandem yumi blong mekem. ?Olsem wanem nao yumi kasem blesing taem yumi stap obei long Hem? Helpem ol pikinini blong flasem gud ol baj we i talem, Bae mi go mo mekem ol samting we Lod i bin talem (1 Nifae 3:7 Ripitim sentens ia tugeta plante taem.
Ol skripja oli wan gudfala rij samting.
?Olsem wanem nao yu save helpem wan pikinini blong kasem insperesen blong laekem ol skripja, o toktok blong God?
Samfala Aktiviti we Yu Save Mekem
-
Soem long ol pikinini wan samting (o pikja blong wan samting) we i impoten tumas long yu. Tokbaot olsem wanem yu stap tritim o lukaot long samting ia. Eksplenem se long famli blong Lihae, ol skripja oli impoten tumas, olsem wan gudfala rij samting.
-
Invaetem ol pikinini blong helpem yu talem o aktemaot wanem we Nifae mo ol brata blong hem oli bin mekem blong karembak ol buk we oli mekem long bras: olgeta i travel long wan longfala rod, oli givimaot ol gol mo silva blong olgeta, mo oli bin haed insaed long wan hol blong ston blong sevem laef blong olgeta. Ridim 1 Nifae 5:21. ?From wanem nao ol skripja oli impoten tumas long famli blong Lihae? ?Olsem wanem nao yumi save tritim ol skripja olsem wan gudfala rij samting?
Lihae I Kasem Ol Buk we Oli Wokem long Bras, i kam long Clark Kelley Price
Stap Tijim Doktrin: Ol Bigfala Pikinini
Mi save gat wan testemoni blong miwan.
?Wanem nao yu lanem aot long eksampol blong Nifae blong gat wan testemoni blong yuwan? ?Olsem wanem nao yu save helpem ol pikinini blong lanem samting aot long eksampol ia?
Samfala Aktiviti we Yu Save Mekem
-
Askem ol pikinini blong luklukgud insaed long 1 Nifae 2:16, 19 mo faenemaot olsem wanem nao Nifae i bin kasem testemoni long ol toktok blong papa blong hem. Invaetem olgeta blong raetem ol aksen blong Nifae long ol blok blong wud o ol narafala samting afta bildimap wan bigfala samting blong ripresentem olsem wanem nao ol samting ia oli save helpem yumi bildimap wan testemoni.
-
Talem long ol pikinini olsem wanem nao yu bin kasem testemoni blong yu long saed blong gospel. Invaetem olgeta blong serem ol semfala eksperiens we olgeta i bin gat, mo leftemap tingting blong olgeta blong folem eksampol blong Nifae blong gohed blong stap bildimap ol testemoni blong olgeta. ?Olsem wanem nao testemoni blong yumiwan i save helpem yumi?
Mi save ansa wetem fet long ol oda blong Lod.
Blong developem wan fasin olsem hemia blong Nifae i save helpem ol pikinini long taem we Lod bae i askem olgeta blong mekem wan samting we maet i no isi blong mekem.
Samfala Aktiviti we Yu Save Mekem
-
Seraotem klas long tu grup. Invaetem wan grup blong ridim wanem Leman mo Lemyul i talem folem toktok blong Lihae (luk long 1 Nifae 3:2–5) mo narafala grup blong ridim wanem Nifae i talem (luk long 1 Nifae 3:2–4, 7). Invaetem wan pikinini blong aktem se hem i Lihae mo bae i askem long ol narafala pikinini blong aktem se bae olgeta oli gobak long Jerusalem blong karem ol buk we oli wokem long bras. Invaetem wanwan grup blong ansa long ol toktok blong olgetawan olsem se olgeta nao oli ol man ia we oli bin rid abaot olgeta. ?Wanem nao samfala samting we God i bin komandem yumi blong mekem? ?Olsem wanem nao yumi save kam olsem Nifae?
-
Singsing tugeta wan singsing abaot fasin blong stap obei, olsem “Nephi’s Courage” o “Keep the Commandments” (Children’s Songbook, 120–21, 146–47), mo askem ol pikinini blong lisin long ol sentens we oli stap tijim olsem wanem blong mekem folem toktok blong Lod.
Tabu Spirit bae i lidim mi taem mi stap lukaotem wanem nao Lod i wantem mi blong mekem.
Nifae i bin folem Spirit, “[we hem i ]no bin save yet wanem samting bae [hem] i mas mekem” (1 Nifae 4:6). ?Olsem wanem nao yu save helpem ol pikinini we yu tijim blong oli save stap folem Tabu Spirit?
Samfala Aktiviti we Yu Save Mekem
-
Invaetem ol pikinini blong oli aktem stori blong Nifae mo ol brata blong hem taem we oli stap traem blong karembak ol buk we oli wokem long bras (luk long 1 Nifae 3–4). Invaetem wan pikinini blong ridim 1 Nifae 4:6, mo askem klas blong lisin long wanem nao Nifae i bin mekem we i mekem se olgeta i bin win.
-
Serem wetem ol pikinini sam eksampol blong ol samting we God i wantem olgeta blong mekem, olsem fren wetem wan long skul we i no gat fren, fogivim wan brata o sista, o talem trutok taem yu mekem wan mistek. Askem ol pikinini blong serem olsem wanem nao Tabu Spirit i save helpem olgeta long ol situesen olsem. ?Olsem wanem nao yumi save invaetem Tabu Spirit blong helpem yumi blong stap obei long God?
Stap Leftemap Tingting blong Lanem Samting long Hom
Invaetem ol pikinini blong serem ol eksperiens wetem famli blong olgeta abaot taem we oli bin kasem blesing from se oli stap bin stap folem ol komanmen. Leftemap tingting blong olgeta blong askem long ol memba blong famli blong olgeta blong serem ol semmak eksperiens olsem.
Stap Kam Antap long Fasin blong Yumi blong stap Tij
Helpem ol smol pikinini blong lanem samting aot long skripja. Blong helpem ol smol pikinini blong lanem samting aot long skripja, lukluk moa long wan ves blong skripja fastaem o iven wan toktok nomo fastaem. Maet yu wantem invaetem wan pikinini blong stanap o leftemap han taem oli harem toktok ia. (Luk tu long Teaching in the Savior’s Way, 21.)