“13–19 Jenuware. 1 Nifae 8–10: ‘Kam mo Tekem mo Kakae Frut Ia,’” Kam Folem Mi—Blong Praemeri: Buk blong Momon 2020
“13–19 Jenuware. 1 Nifae 8–10,” Kam Folem Mi—Blong Praemeri: 2020
Drim blong Lihae, i kam long Steven Lloyd Neal
13–19 Jenuware
1 Nifae 8–10
“Kam mo Tekem mo Kakae Frut Ia”
I no blong luk yuwan nomo long visen blong Lihae be, traem blong luk ol pikinini tu we yu tijim, insaed long visen ia. ?Olsem wanem nao olgeta tu oli pat long visen ia?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Traem kasem sam pikinini bifo klas i stat mo askem olgeta blong stap tingbaot sam eksperiens o skripja we bae oli save serem, we i bin helpem olgeta blong filim lav blong God.
Stap Tijim Doktrin: Ol Smol Pikinini
Toktok blong God i stap lidim mi long God, mo i stap helpem mi blong filim lav blong Hem.
Insaed long visen blong Lihae, yumi kasem invitesen blong tekpat long lav blong God, tru long saen blong tri ia mo ol frut blong hem. ?Olsem wanem nao yu save helpem ol pikinini blong akseptem invitesen ia?
Samfala Aktiviti we Yu Save Mekem
-
Invaetem ol pikinini blong helpem yu blong talem stori blong visen blong Lihae we i stap long 1 Nifae 8:10–34. Blong helpem olgeta blong gat wan pikja long maen blong olgeta abaot stori ia, yu save soem wan pikja blong visen blong Lihae (luk long aotlaen blong wik ia long Kam Folem Mi—Blong Wanwan Man mo Famli) o ol pikja long “Japta 6: Drim blong Lihae” (Ol Stori long Buk blong Momon, 18–20, o vidio blong hem long ChurchofJesusChrist.org). Mekemsua se ol pikinini oli save se rel blong aean i ripresentem toktok blong God, we yumi stap ridim long ol skripja mo stap harem long ol profet we oli stap laef. Helpem olgeta blong andastanem se tri ia i ripresentem lav blong God long yumi.
-
Karem wan rop i kam blong ripresentem aean rel long visen blong Lihae. Askem ol pikinini blong holem rop ia taem yu lidim olgeta raonem rum ia i go long wan pikja blong wan tri. Helpem olgeta blong andastanem se toktok blong God i save karem yumi kam moa kolosap long Hem, semmak olsem we rop ia we i ripresentem aean rel i stap lidim yumi i go long tri ia. Blong soem se tri ia i ripresentem lav blong God, yu save soem sam pikja blong ol samting we God i givim long yumi we i soemaot lav blong Hem long yumi, olsem Sevya, ol famli blong yumi, mo naesfala wol ia.
-
Karem sam frut we wan hat i stap wetem. Givim long ol pikinini wan frut blong oli testem mo askem long olgeta abaot frut we oli laekem tumas. Eksplenem se frut long visen blong Lihae hem i swit bitim ol narafala frut we hem i bin testem, mo hem i fulumap sol blong hem wetem glad. Semmak olsem we ol frut we oli swit oli mekem yumi glad, yumi filim glad taem yumi folem Jisas mo gobak stap wetem Papa long Heven bakegen.
-
Ridim 1 Nifae 8:12, mo invaetem ol pikinini blong lisin gud long wanem Lihae i wantem mekem afta we hem i bin testem frut ia. Letem ol pikinini i gat wanwan janis blong aktem se olgeta i Lihae mo oli stap invaetem narafala man blong kam tekpat long frut ia. ?Wanem nao yumi save mekem blong invaetem narafala man blong kam stap glad long ol blesing blong gospel wetem yumi?
Bae God i soemaot trutok long mi tru long paoa blong Tabu Spirit.
Afta we Nifae i bin harem abaot visen blong papa blong hem, hem i bin gat wan strong tingting we yumi evriwan i mas gat—strong tingting blong save trutok hemwan.
Samfala Aktiviti we Yu Save Mekem
-
Ridim 1 Nifae 10:19, mo invaetem ol pikinini blong leftemap han blong olgeta taem oli harem toktok ia “kam blong save” mo “Tabu Spirit.” Helpem ol pikinini blong andastanem skripja ia, we i tijim se Tabu Spirit bae i helpem yumi blong save ol ansa blong ol kwestin blong yumi. Blong helpem ol pikinini blong gat wan pikja long maen blong olgeta se i minim wanem blong “kam blong save” trutok, karem wan blangket we oli foldem we i gat wan pikja blong Sevya i stap insaed, mo askem ol pikinini blong openem.
-
Singsing wan song abaot fasin blong stap lukaotem trutok, olsem “Search, Ponder, and Pray” (Children’s Songbook, 109). Soem ol pikja blong ol toktok long ol singsing ia blong helpem ol pikinini blong tingbaot olsem wanem Tabu Spirit i stap tijim yumi.
-
Tingbaot blong serem wan eksperiens long wan taem we Tabu Spirit i helpem yu blong save se samting ia i tru. Talem long ol pikinini olsem wanem nao Tabu Spirit i bin toktok long yu.
Stap Tijim Doktrin: Ol Bigfala Pikinini
Toktok blong God i stap lidim mi long God, mo i stap helpem mi blong filim lav blong Hem.
Taem ol pikinini long klas blong yu oli stap lanem abaot visen blong Lihae, leftemap tingting blong olgeta blong stadi long toktok blong God mo serem lav blong God wetem ol narafala man.
Samfala Aktiviti we Yu Save Mekem
-
Taem ol pikinini oli stap ridim samfala ves long 1 Nifae 8, invaetem olgeta blong faenem wanem we i stap long ol ves ia long wan pikja blong visen blong Lihae (olsem hemia long aotlaen blong wik ia long Kam Folem Mi—Blong Wanwan Man, Woman mo Famli). O, invaetem olgeta blong dro ol pikja long bod abaot wanem we oli bin rid abaot . Afta helpem ol pikinini blong faenemaot wanem ol saen long drim ia i ripresentem (luk long 1 Nifae 11:21–22; 12:16–18; 15:23–33, 36).
-
Sapos i oraet, karem wan pis aean i kam long klas mo invaetem ol pikinini blong tokbaot gud sam samting abaot aean ia mo sam samting we yumi save yusum aean ia long hem. ?Olsem wanem nao toktok blong God i semmak olsem wan aean rel? ?Weaples nao yumi save faenem toktok blong God? ?From wanem nao aean rel i impoten tumas long visen blong Lihae?
PikjaLihae i stap kakae frut blong tri blong laef.Lihae i stap kakae frut blong tri blong laef. Tri blong Laef i kam long Marcus Alan Vincent
-
Invaetem ol pikinini blong raetemdaon long wan pis pepa, wan eksperiens we toktok blong God i bin helpem olgeta blong save wanem oli mas mekem, o i bin helpem olgeta blong filim se oli stap kolosap moa long Papa long Heven. Taem oli stap serem wanem we oli bin raetem, invaetem olgeta blong rolem pepa blong olgeta i kam olsem wan rel. Yu save skojem ol “rel” blong ol pikinini tugeta blong ripresentem aean rel long drim blong Lihae.
-
Invaetem sam pikinini blong ridim 1 Nifae 8:10–12 mo tokbaot gud wanem we Lihae i bin luk. Askem ol narawan blong ridim 1 Nifae 11:20–23 mo tokbaot gud wanem we Nifae i bin luk. ?From wanem nao enjel i soem bebi Jisas long Nifae blong tijim hem abaot lav blong God? Blong help blong ansarem kwestin ia, ridim tugeta Jon 3:16 o singsing tugeta wan song abaot Sevya, olsem “He Sent His Son” (Children’s Songbook, 34–35). Talem long ol pikinini olsem wanem nao yu filim lav blong Papa long Heven mo Pikinini blong Hem Jisas Kraes long laef blong yu.
-
Raetem long bod: ?Wanem nao yumi lanem long eksampol blong Lihae? Invaetem ol pikinini blong tingbaot visen blong Lihae mo raetemdaon plante ansa olsem we oli save tingbaot. Askem olgeta blong serem ol ansa blong olgeta wetem klas. Afta askem ol pikinini blong tingbaot wan man we oli save serem glad filing blong gospel ia wetem hem.
Bae God i soemaot trutok long mi tru long paoa blong Tabu Spirit.
Sapos yumi askem Papa long Heven wetem fet, bae [yumi] kam blong save [trutok], tru long paoa blong Tabu Spirit ” (1 Nifae 10;19). ?Olsem wanem nao yu save helpem ol pikinini we yu tijim blong andastanem trutok ia?
Samfala Aktiviti we Yu Save Mekem
-
Invaetem ol pikinini blong tokbaot ol wei we oli save faenem ol ansa blong wan kwestin. Leftemap tingting blong ol pikinini blong ridim 1 Nifae 10:17–19 mo 11:1. ?Wanem nao bae Nifae i talem sapos wan man i askem long hem olsem wanem nao yumi save faenem ol ansa blong wan kwestin long saed blong gospel? ?Olsem wanem nao God i stap tijim yumi tru long Tabu Spirit? (luk long D&K 8:2).
-
Askem ol pikinini blong tokbaot wan taem we Tabu Spirit i bin helpem olgeta blong save se wan samting i tru. Askem olgeta blong tingbaot long maen long olgeta se oli gat wan fren we i ting se hem i no save kasem ol ansa we i kam long Tabu Spirit. ?Wanem nao bae olgeta i save serem aot long 1 Nifae 10:17–19 mo 11:1 blong helpem fren ia?
Stap Leftemap Tingting blong Lanem Samting long Hom
Leftemap tingting blong ol pikinini blong yusum aktiviti pej blong wik ia blong serem wetem ol famli blong olgeta wanem we oli bin lanem abaot visen blong Lihae abaot tri blong laef.
Stap Kam Antap long Fasin blong Yumi blong Stap Tij
Ol pikinini oli stap lanem samting long plante fasin. Ol pikinini oli stap glad blong lanem samting tru long ol defren eksperiens. Yusum ol aktiviti we bae i helpem olgeta blong muv olbaot, yusum evri sens blong olgeta, mo traem ol niufala samting. (Luk long Teaching in the Savior’s Way, 25–26.)