“Wan Paten blong Stap Tij,” Kam Folem Mi—Blong Praemeri: Buk blong Momon 2020 (2020)
“Wan Paten blong Stap Tij” Kam Folem Mi—Blong Praemeri: 2020
Wan Paten blong Stap Tij
Long risos ia, bambae yu folem ol tri step paten ia we oli ripripitim long wanwan aotlaen: invaetem man blong serem wanem oli gat, stap tijim doktrin, mo stap leftemap tingting blong lanem samting long hom. Long plante kes, taem yu stap tij, ol defren pat blong paten ia oli save joen, o oli save stap long defren oda. Eksampol: tekem se blong serem samting i wan janis blong stap tijim doktrin, mo blong stap tijim doktrin, insaed, i mas gat invitesen long man blong serem wanem oli gat. Semmak, blong stap leftemap tingting blong lanem samting long hom i save hapen long ful taem blong storian insaed long klas. Letem ol defren pat blong paten ia oli tekem ples insaed long klas, olsem we oli kam, mo folem ol kwaet toktok blong Spirit blong save lukluk long nid blong ol pikinini we yu stap tijim olgeta.
Invaetem Ol Pikinini blong Serem Wanem Oli Gat
Olsem pat blong evri klas, invaetem ol pikinini blong serem ol filing blong olgeta, ol tingting blong olgeta mo ol eksperiens abaot ol prinsipol we yu stap tijim. Wanem oli talem i save tokbaot ol eksperiens we oli bin gat blong stap lanem samting insaed long hom. Maet yu save luklukbak long wanem oli bin lanem long wik bifo mo askem olsem wanem hemia i tajem laef blong olgeta.
Stap Tijim Doktrin
Kam Folem Mi—Blong Wanwan Man, Woman mo Famli i save helpem yu andastanem gud doktrin we bae yu tijim long ol pikinini. Tingting long wanem ves long skripja, wanem kwot, eksperiens, kwestin, mo ol nara risos yu save serem blong helpem ol pikinini blong lanem mo tekem aksen folem ol prinsipol ia blong gospel. Lukaotem sam gudfala wei blong helpem ol pikinini blong oli glad long wanem we oli stap lanem.
Stap Leftemap Tingting blong Lanem Samting long Hom
From se hom i senta blong lanem gospel, wan long ol stamba tingting blong yu olsem wan Praemeri tija, hem i blong leftemap tingting blong lanem samting insaed long hom. ?Olsem wanem nao yu save helpem ol pikinini blong oli serem wanem we oli bin lanem insaed long klas? ?Olsem wanem nao yu save leftemap tingting blong ol pikinini mo blong papa mo mama blong olgeta blong gohed blong lanem samting long Buk blong Momon long hom?