Yu Yu Wan Tija blong Ol Pikinini

God i singaotem yu blong yu tijim ol pikinini blong Hem long wei blong Sevya. Oli setem yu apat long koling ia tru long atoriti blong tabu prishud blong Hem. Sapos yu no wan tija we i gat eksperiens, taem yu stap laef klin inaf, prea evri dei, mo stadi long ol skripja, Papa long Heven bae i givim yu paoa ia blong lidim tingting, mo paoa blong Tabu Spirit blong helpem yu blong yu gat sakses (luk long 2 Nifae 33:1).

Olgeta we oli putum long han blong yu blong yu kea long olgeta, oli ol pikinini blong Papa long Heven, mo Hem i save wanem oli nidim mo wanem i bes wei blong tajem laef blong olgeta. Tru long Tabu Spirit, bae God i gaedem yu taem yu stap rere mo taem yu stap tij. Bae Hem i talemaot long yu wanem yu sapos blong talem mo wanem yu sapos blong mekem (luk long 2 Nifae 32:5).

Long evri saed blong laef blong olgeta, ol impoten pikinini ia oli stap tekem, evri taem, infomesen, oli stap mekem mo mekem bakegen tingting blong olgeta, mo oli stap faenem mo serem ol niu samting. Hemia i tru wetem gospel, blong ol pikinini oli rere mo wantem tumas blong lanem ol simpol trutok. Fet blong olgeta long saed blong ol samting long saed blong spirit, i strong mo i klin gud, mo oli luk eni taem olsem wan taem blong lanem samting. Oli glad blong mekem samting folem wanem oli lanem, iven sapos oli no andastanem samting fulwan yet. Hem ia hem i hao yumi evriwan i mas kasem gospel. Olsem we Sevya i tijim, “Tru mi talem long yufala. Man we i no glad blong mekem tingting blong hem i stap daon olsem pikinini, bambae hem i no save kam samtaem we God i King blong hem” (Luk 18:17).

Koling ia blong tijim ol pikinini i wan tabu tras we God i gat, mo hem i nomol blong yu filim se hem i tumas samtaem. Be tingting se Papa blong yu long Heven i bin singaotem yu, mo bambae Hem i neva save lego yu. Hemia i wok blong Lod, mo taem yu stap givim seves long Hem “wetem ful hat, ful paoa blong tingting, ful maen mo ful paoa blong yu,” (D&K 4:2), bambae Hem i mekem ol paoa, presen mo talen blong yu oli kam bigwan moa, mo seves blong yu bae i blesem laef blong ol pikinini we yu stap tijim.