Adam mo Iv, i kam long Douglas Fryer

3–9 Febwari

2 Nifae 1–5

“Mifala I Bin Laef Folem Fasin blong Stap Hapi”

Lihae i bin tijim ol pikinini blong hem folem wanem we wanwan long olgeta i nidim mo ol situesen blong olgeta. Folem eksampol blong hem taem yu stap mekem rere blong tijim ol pikinini long klas blong yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Afta we yu eksplenem se Lihae i bin tijim famli blong hem abaot fridom blong mekem ol joes blong yumiwan, invaetem ol pikinini blong serem ol eksperiens blong olgeta taem oli bin jusum raet. ?Oli bin filim olsem wanem afta long joes blong olgeta ia? ?Olsem wanem nao bae oli save tingbaot blong jusum raet long fiuja?

Stap Tijim Doktrin: Ol Smol Pikinini

2 Nifae 1:20

Mi kasem blesing taem mi stap obei.

Prinsipol we oli bin lanem long ves ia hem i—fasin blong stap obei i givim ol blesing—olsem we oli stap soemaot truaot long Buk blong Momon. Tingbaot olsem wanem nao yu save helpem ol pikinini blong luksave hemia long laef blong olgeta.

Samfala Aktiviti we Yu Save Mekem

• Askem ol pikinini blong helpem yu blong talem mining blong toktok ia ol komanmen mo mekem wan lis blong ol komanmen. Ridim 2 Nifae 1:20, mo poenemaot strong se bae yumi “kam antap gud” o kasem blesing, taem yumi stap folem ol komanmen. ?Yumi filim olsem wanem taem yumi folem ol komanmen?

• Soem long ol pikinini ol samting we i save givim proteksen long olgeta, olsem ol sus, ol hat, mo hanglav. Letem olgeta oli werem ol samting ia. ?Olsem wanem nao ol samting ia oli protektem yumi? Talem long olgeta se ol komanmen blong Papa long Heven i save protektem yumi long ol denja long saed blong spirit. Serem wan eksperiens we yu bin kasem proteksen from se yu bin stap folem ol komanmen.

2 Nifae 2:11, 6, 27

God i givim long mi fridom blong mekem joes.

From ol joes blong tufala, Adam mo Iv i mas aot long Garen blong Iden. ?Olsem wanem nao yu save tijim ol pikinini se joes blong Adam mo Iv i mekem se yumi save yusum fridom blong yumi blong jusum Papa long Heven tedei?

Samfala Aktiviti we Yu Save Mekem

• Dro wan pikja blong wan man we i fri mo wan pikja blong wan man we i no fri (maet wan man we i stap long kalabus), mo invaetem ol pikinini blong poenemaot stret pikja taem yu ridim ol toktok ia fri mo prisena long 2 Nifae 2:27. Talemaot strong toktok ia “raet blong jus” mo invaetem wanwan pikinini blong ripitim.

• Lukluk bak long stori blong Adam mo Iv wetem ol pikinini (luk long 2 Nifae 2:17–19; luk tu long “Chapter 3: Adam and Eve,” Old Testament Stories, 15–18, o vidio blong hem long ChurchofJesusChrist.org) mo joes we tufala i bin mekem insaed long Garen blong Iden. Helpem ol pikinini blong mekem wan lis blong ol joes we oli stap mekem evri dei. Testifae se Papa long Heven i givim fridom long yumi blong jusum bitwin gud mo nogud, mo invaetem ol pikinini blong jiam o klapem han blong olgeta blong selebretem se oli fri blong mekem joes.

• Plei wan gem we yu talem wan toktok (olsem laet) mo ol pikinini oli talem oposit blong hem (tudak). Ripitim aktiviti ia plante taem. Blong helpem ol pikinini blong andastanem olsem wanem oposit samting i save helpem yumi blong mekem ol joes, ridim fas pat blong 2 Nifae 2:11 mo 2 Nifae 2:16. Talem long ol pikinini ol stori abaot wan pikinini we hem i kasem temtesen blong mekem wan rong joes. Helpem ol pikinini blong tingbaot oposit blong joes blong olgeta, mo invaetem olgeta long aktemaot. Testifae se Papa long Heven i blesem yumi taem yumi jusum raet.

• Sing wan singsing tugeta abaot fasin blong stap jusum raet, olsem “Mi Traem blong Kam Olsem Jisas” o “Choose the Right Way” (Children’s Songbook, 78–79, 160–61), mo askem long ol pikinini wanem oli lanem abaot fasin blong stap mekem joes long ol singsing ia.

Stap Tijim Doktrin: Ol Bigfala Pikinini

2 Nifae 1:20

Mi kasem blesing taem mi stap obei.

Taem ol pikinini oli gat fet se God bae i blesem olgeta taem oli stap folem ol komanmen—iven sapos ol blesing ia oli no kam kwiktaem—hem i moa isi blong oli stap mekem ol joes we i stret mo gud.

Samfala Aktiviti we Yu Save Mekem

• Helpem ol pikinini blong luklukbak long sam long ol joes we Nifae mo ol brata blong hem oli bin mekem. Eksampol, luk long 1 Nifae 2:11–16; 3:5–7; mo 18:9–11. Invaetem ol pikinini blong ridim 2 Nifae 1:20 tugeta mo serem from wanem oli ting se Lihae i mas givim mesej ia long ol pikinini blong hem.

• Raetemaot ol sentens long 2 Nifae 1:20 long ol pis pepa, mo tokbaot mining blong ol toktok ia. Invaetem ol pikinini ia blong yusum ves ia mo laenemap gud ol pis pepa ia folem stret oda. Blong soemaot wanem i defren bitwin fasin blong kam antap gud long laef mo fasin we God i katemaot yumi, soem long ol pikinini wan helti flaoa mo wan lif o branj we oli katemaot long flaoa ia. ?Wanem nao i defren long lif we i stap long flaoa mo lif we oli bin katemaot? ?Olsem wanem nao yumi semmak long ol lif blong flaoa ia taem yumi stap obei long ol komanmen blong God? Invaetem ol pikinini blong raetemdaon long wan jenol ol fasin we God i stap blesem olgeta taem oli stap jusum raet.

2 Nifae 2:22–28

God i givim mi fridom blong mekem joes.

Jisas Kraes i sevem yumi aot long ded long saed blong bodi mo spirit (kamaot long fes blong God from sin) tru long Atonmen mo Laef Bakegen long Ded blong Hem. Blong yumi save gobak mo stap wetem Papa long Heven bakegen, yumi mas yusum fridom blong yumi blong mekem joes blong gohed blong sakem sin mo traehad blong laef folem ol stret mo gud fasin.

Samfala Aktiviti we Yu Save Mekem

• Leftemap wan pikja blong Adam mo Iv (luk long Gospel Art Buk, namba 4), mo invaetem ol pikinini blong serem wanem oli save abaot wanem we i bin hapen long Adam mo Iv insaed long Garen blong Iden. Helpem ol pikinini blong faenem ol ansa long 2 Nifae 2:22–27. Eksplenem se from joes blong Adam mo Iv, yumi save kam long wol mo yusum fridom blong yumi blong mekem ol gudfala joes, mo sakem sin tru long Atonmen blong Kraes taem yumi stap mekem ol rong joes.

• Raetem ol toktok blong 2 Nifae 2:27 long bod. Helpem ol pikinini blong tingbaot ves ia taem oli stap ripitim mo wanwan i gat wan janis blong waepemaot sam toktok evri taem we oli ripitim. Helpem ol pikinini blong traem tingbaot wan laef we yumi no save mekem joes, se bae laef ia i olsem wanem. ?From wanem nao oli glad long fridom blong mekem joes?

• Invaetem ol pikinini blong serem wan eksperiens we oli bin mekem wan gudfala joes. ?Oli bin filim olsem wanem afta long joes blong olgeta ia? ?Wanem nao yumi save mekem blong helpem yumiwan blong jusum raet taem yumi gat temtesen blong mekem wan rong samting? Tingbaot blong singsing wan singsing abaot fasin blong mekem ol joes, olsem “Choose the Right” (Hymns, namba 239), mo invaetem ol pikinini blong serem wanem we oli bin lanem long singsing ia.

2 Nifae 3:6 -24

Josef Smit hem i wan “sia we oli bin jusum”

Long 2 Nifae 3 Lihae i bin tokbaot revelesen abaot Profet Josef Smit. Yu save yusum janis ia blong tijim ol pikinini abaot wok blong hem long ol las dei.

Samfala Aktiviti we Yu Save Mekem

• Invaetem ol pikinini blong luklukgud insaed long 2 Nifae 3:6–24 blong faenem samfala toktok se i stap tokbaot wijwan profet. Raetemdaon ol toktok ia long bod. ?From wanem nao oli singaotem Josef Smit se hem i “wan sia we oli bin jusum”? ?Wanem nao Josef Smit i bin mekem se “bae ol pikinini blong laen blong yu bae oli respektem hem bigwan”? (ves 7).

• Sing wan hym abaot Josef Smit, olsem “Presem Man Ia” (STSP, pej 50), o wajem wan vidio we i soem ol defren pat blong wok blong hem, olsem olgeta long history.ChurchofJesusChrist.org/article/joseph-smith-video-downloads. Askem long ol pikinini from wanem oli glad from Profet Josef Smit.

Stap Leftemap Tingting blong Lanem Samting long Hom

Leftemap tingting blong ol pikinini blong luksave ol janis blong mekem ol joes long wik ia. Invaetem olgeta blong rere blong serem long nekis wik ol joes we oli bin mekem mo ol risal blong ol joes blong olgeta.

Stap Kam Antap long Fasin blong Yumi blong Stap Tij

Ol pikinini oli save luksave paoa blong Tabu Spirit. Tijim ol pikinini se ol filing blong pis, lav, mo wom filing we oli filim taem oli stap tokbaot o sing abaot Jisas Kraes mo gospel blong Hem i kam long Tabu Spirit. Ol filing ia i save bildimap ol testemoni blong olgeta.