“17–23 Febwari. 2 Nifae 11–25: “Mifala I Glad long Kraes,” Kam Folem Mi—Blong Praemeri: Buk blong Momon 2020 (2020)
“17–23 Febwari. 2 Nifae 11–25,” Kam Folem Mi—Blong Praemeri: Buk blong Momon 2020
17–23 Febwari
2 Nifae 11–25
“Mifala I Glad long Kraes”
Stat blong rere blong tij taem yu ridim 2 Nifae 11–25. Kam Folem Mi—Blong Wanwan Man, Woman mo Famli i save helpem yu andastanem ol japta ia, mo aotlaen ia i save givim sam tingting long saed blong tij.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Luklukbak smol long wanem we ol pikinini oli bin lanem abaot Sevya mo Atonmen blong Hem las wik. Sapos olgeta oli bin serem wanem we oli bin lanem wetem ol famli blong olgeta, leftemap tingting blong olgeta blong tokbaot hemia.
Stap Tijim Doktrin: Ol Smol Pikinini
Tempol hem i haos blong Lod.
Profesi blong Aesea abaot “bigfala hil blong haos blong Lod” i wan janis blong tijim ol pikinini abaot tempol mo helpem olgeta blong gat tingting blong go longwe wan dei.
Samfala Aktiviti we Yu Save Mekem
-
Letem wan pikinini i leftemap wan pikja blong tempol (aotlaen blong wik ia long Kam Folem Mi—Blong Wanwan Man, Woman mo Famli i gat wan), mo askem ol pikinini blong serem wanem we oli save abaot tempol. Ridim 2 Nifae 12:3, mo eksplenem se long ves ia wan profet we nem blong hem Aesea i bin gat wan profesi se bae i gat ol tempol long las dei. Ridim ves ia bakegen, mo poenemaot strong se taem yumi go long tempol, bae Lod i “tijim yumi long ol wei blong hem” mo helpem yumi blong “wokbaot long rod blong hem.”
-
Mekem wan rod long flo, mo long en blong rod ia, putum wan pikja blong tempol mo kavremap pikja ia. Letem ol pikinini oli wokbaot folem rod ia, mo taem oli stap mekem hemia, helpem olgeta blong ripitim toktok ia “wokbaot long rod blong hem.” Taem ol pikinini oli kasem en blong rod ia, letem olgeta i karemaot wanem we i stap kavremap pikja ia. ?Wanem nao i minim blong wokbaot long rod blong God?
-
Sing wetem ol pikinini wan singsing abaot tempol, olsem “I Love to See the Temple” (Children’s Songbook, 95). Helpem olgeta blong faenem ol toktok insaed long singsing ia we i tijim wanem ia tempol mo wanem yumi stap mekem insaed.
“Mifala i glad long Kraes”
Nifae mo Aesea i gat ol testemoni abaot Sevya, mo ol testemoni blong olgeta i mekem oli glad. Helpem ol pikinini blong luk se yu stap “glad long Kraes.”
Samfala Aktiviti we Yu Save Mekem
-
Invaetem wan pikinini blong leftemap pikja blong taem we Jisas Kraes i bin (olsem Gospel Art Buk, namba 30), mo helpem ol pikinini blong faenem bebi Jisas insaed long pikja ia. Ridim 2 Nifae 19:6 o soem vidio “A Savior Is Born—Christmas Video” (ChurchofJesusChrist.org), mo askem long ol pikinini blong poenem long Jisas taem oli harem toktok ia pikinini mo boe. Eksplenem se profet Aesea, we i bin raetem ol toktok long 2 Nifae 19:6, i bin save se bae Jisas Kraes i bon plante handred yia bifo i hapen.
-
Talem wan stori abaot Jisas Kraes we i stap mekem ol nara man i glad, o soem wan vidio olsem “Jesus Heals a Man Born Blind” o “Suffer the Little Children to Come unto Me” (ChurchofJesusChrist.org). Poenemaot ol pat long stori o vidio ia we oli glad o hapi. Ridim 2 Nifae 25:26 mo tokbaot from wanem yu stap “glad long Kraes.” Askem long ol pikinini olsem wanem Jisas i mekem olgeta i glad.
Mileniom bae hem i wan taem blong pis mo glad.
Afta long Seken Kaming, Jisas Kraes bae i kambak mo stap wetem ol pipol blong hem long wan taem blong pis we oli singaotem se Mileniom.
Samfala Aktiviti we Yu Save Mekem
-
Soem long ol pikinini ol pikja blong ol animol we oli tokbaot long 2 Nifae 21:6–7, mo askem ol pikinini blong talem nem blong ol animol ia. Eksplenem se ol animol ia oli no ol fren, be olsem we Aesea i bin tijim se afta we Jisas Kraes i kambak bakegen, bae i gat wan taem blong pis, we oli singaotem se Mileniom, taem we ol animol bae oli no save faet wetem olgeta bakegen. ?Olsem wanem nao yumi save folem ol eksampol blong ol animol ia long ol fasin we yumi stap tritim yumi long hem? Invaetem ol pikinini blong dro ol pikja blong ol animol ia we oli stap laef tugeta long pis.
-
Ridim 2 Nifae 22:5, mo askem ol pikinini blong helpem yu blong faenem wan singsing we i tokbaot ol “gudgudfala samting” we Lod i bin mekem. Sam long ol eksampol i save gat insaed “Papa blong Mi long Heven i Lavem Mi” (Songbuk blong Ol Pikinini, 228–9) o “” (Ol Hym, namba 86 ). Sing long singsing ia tugeta. Eksplenem se long taem blong Milenium, evriwan bae i save ol “gudgudfala samting we Lod i bin mekem.”
Stap Tijim Doktrin: Ol Bigfala Pikinini
Tempol hem i haos blong Lod.
?Olsem wanem nao yu save yusum ol ves ia blong helpem ol pikinini blong wet from dei we bae oli save go insaed long tempol?
Samfala Aktiviti we Yu Save Mekem
-
Soem wan pikja blong tempol (aotlaen blong wik ia long Kam Folem Mi—Blong Wanwan Man, Woman mo Famli i gat wan). Askem wan pikinini blong ridim 2 Nifae 12:2–3, mo invaetem ol nara pikinini blong lisin from wanem Aesea i talem se yumi nidim tempol. Yu save eksplenem se Aesea i singaotem ol tempol se “bigfala hil blong haos blong Lod.” ?From wanem nao bigfala hil hem i wan gudfala saen blong tempol?
-
Invaetem ol pikinini blong dro wan pikja blong olgetawan i stap go long tempol. Sapos i posibol, askem wan yang man o yang woman long wod blong talem long ol pikinini se blong mekem ol baptaes blong ol ded man long tempol i olsem wanem? Yangfala ia o wan nara man long wod i save tijim ol pikinini olsem wanem blong faenem nem blong ol bubu blong olgeta we i nidim ol odinens.
Setan i traem blong giaman long mi abaot wanem we i gud mo wanem we i nogud.
Yumi stap long wan wol we, olsem Aesea i bin profesae long hem, ol man oli singaotem wanem we i nogud i gud mo wanem we i gud i nogud. ?Olsem wanem nao yu save helpem ol pikinini blong luksave ol trik olsem ia?
Samfala Aktiviti we Yu Save Mekem
-
Soem long ol pikinini wan samting we i konkon, olsem wan smol konkon kukamba wan laman, we oli kavremap insaed long wan loli pepa. Ridim tugeta 2 Nifae 15:20, mo eksplenem se Setan i stap traem blong mekem ol samting we i nogud i luk gud. Helpem ol pikinini blong tingbaot samfala wei we Setan i stap mekem hemia. ?Olsem wanem nao yumi save luksave ol giaman blong hem?
-
Soem fas minit mo haf blong vidio ia “You Will Be Freed” (ChurchofJesusChrist.org). ?From wanem nao fisaman ia i flasem huk blong hem? ?From wanem nao Setan i flasem sin?
“Mifala i stap glad long Kraes”
Ol pikinini i nid blong save se gospel blong Jisas Kraes i gat glad long hem. ?Olsem wanem nao bae yu helpem olgeta blong “stap glad long Kraes”?
Samfala Aktiviti we Yu Save Mekem
-
Helpem ol pikinini blong faenem ol nem blong Jisas Kraes insaed long 2 Nifae 17:14 mo 19:6. Maet bae yu nid blong eksplenem se “Emanuel” hem i wan long ol nem ia, mo hem i minim se “God i stap wetem yumi.” ?Wanem nao wanwan long ol nem ia i tijim yumi abaot Hem?
-
Putum wan pikja blong Sevya long bod, mo rid tugeta long 2 Nifae 25:26. ?From wanem nao Nifae i tokbaot mo raet plante abaot Jisas Kraes? Letem wanwan pikinini i raetem long bod, kolosap long pikja blong Jisas, wan samting abaot Sevya we i mekem olgeta i glad.
-
Askem ol pikinini blong tingbaot wan man we olgeta i wantem blong “winim tingting blong man blong biliv long Kraes” (2 Nifae 25:23). ?Olsem wanem nao yumi save tokbaot long ol narafala man; glad ia; we Sevya i karem i kam long ol laef blong yumi? Letem ol pikinini oli raetem o mekem wan pleiplei long samfala samting we maet olgeta i save mekem blong helpem man ia we olgeta i stap tingbaot ia blong biliv long Jisas Kraes.
Stap Leftemap Tingting blong Lanem Samting long Hom
Invaetem ol pikinini blong tingbaot wan samting we oli save mekem blong soem long ol famli blong olgeta se olgeta i “stap glad long Kraes.”
Stap Kam Antap long Fasin blong Yumi blong Tij
Letem ol pikinini i mekem samting olgetawan. “Taem yu tijim ol pikinini, letem olgeta blong bildimap samting, dro, kala, raet mo krietem wan samting. Ol samting olsem oli no ol aktiviti blong pleiplei nomo be—oli impoten long fasin blong lanem samting” (Teaching in the Savior’s Way, 25).