I No Olsem Tingting blong Mi, be Mekem Olsem Tingting blong Yu Nomo i kam long Harry Anderson

10–16 Febwari

2 Nifae 6–10

!O! !Plan blong God blong Yumi I Bigwan Tumas!

Taem yu stap rid long 2 Nifae 6–10, lukaotem help long Tabu Spirit long saed blong wanem blong tijim. Aotlaen ia mo Kam Folem Mi—Blong Wanwan Man, Woman o Famli i save givim insperesen blong sam moa tingting.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Leftemap tingting blong ol pikinini blong gat janis blong serem wan samting we oli bin lanem abaot Jisas Kraes mo Atonmen blong Hem taem oli stap stadi long 2 Nifae 6–10 olgetawan o wetem ol famli blong olgeta.

Tijim Doktrin: Ol Smol Pikinini

2 Nifae 9:7–13, 20–23

Jisas Kraes i sevem mi aot long sin mo ded.

?Olsem wanem nao yu save yusum 2 Nifae 9:7–13 mo 20–23 blong helpem ol pikinini blong andastanem se Jisas Kraes i sevem evri man long ded mo i mekem i posibol blong yumi save sakem sin?

Samfala Aktiviti we Yu Save Mekem

• Talem long ol pikinini wan stori blong wan man we i foldaon i go insaed long wan hol we i dip tumas mo hem i no save klaem i kambak aotsaed. Wan man i kam mo i leftemap man ia aot long hol ia. Maet yu wantem dro wan pikja blong stori ia long bod mo aktemaot wetem ol pikinini. Eksplenem se hol ia hem i semmak olsem ded mo man ia we hem i kam helpem nara man ia hem i Jisas Kraes, we i sevem evri man long ded taem hem i givim presen ia we i laef bakegen long ded. Talem long ol pikinini se semmak man ia i foldaon i go insaed long wan narafala hol. Naoia man we i kam help i givim long hem wan lada blong hem i yusum blong klaem i kam aotsaed. Eksplenem se hol ia i olsem sin mo lada ia hem i Atonmen blong Jisas Kraes, we i mekem se yumi save sakem sin mo kasem fogivnes from ol sin blong yumi. Ridim 2 Nifae 9:22–23, mo serem testemoni blong yu abaot Jisas Kraes mo Atonmen blong Hem.

• Sing tugeta wan singsing abaot lav blong Jisas Kraes, olsem “I Feel My Savior’s Love” (Children’s Songbook, 74–75). Invaetem ol pikinini blong dro ol pikja blong ol samting we i stap helpem olgeta blong save se Sevya i lavem olgeta.

2 Nifae 9:49

“Hat blong mi i glad long stret mo gud fasin.”

?Olsem wanem nao yu save leftemap tingting blong ol pikinini we yu tijim blong “stap glad long stret mo gud fasin,” o glad blong stap obei long Lod? (2 Nifae 9:49).

Samfala Aktiviti we Yu Save Mekem

• Ridim 2 Nifae 9:49 long ol pikinini, mo helpem olgeta blong faenem mo andastanem wanem we Jekob i talem se hem i laekem mo no laekem. Serem ol situesen we wan pikinini i mekem wan gudfala joes o wan rabis joes, mo invaetem ol pikinini blong stanap taem wan joes ia i mekem oli hapi mo sidaon taem joes ia i mekem olgeta i harem nogud. ?From wanem nao taem yumi jusum raet i mekem yumi glad? ?Wetaem nao yu bin filim hapi from se yu bin mekem wan raet joes?

• Sing tugeta wan singsing abaot glad we i kam tru long fasin blong stap obei, olsem “When We’re Helping” (Children’s Songbook, 198), mo askem long ol pikinini blong lisin long wanem nao i mekem yumi hapi. Givim janis long ol pikinini blong aktem se olgeta i wan papa o mama mo oli stap askem long ol narafala pikinini blong mekem wan samting. Mekem ol narafala pikinini oli praktis blong glad blong obei.

Stap Tijim Doktrin: Ol Bigfala Pikinini

2 Nifae 6; 7:1–2

Lod bae i fulfilim promes blong Hem oltaem.

Blong andastanem se Lod bae i kipim ol promes blong hem i save helpem ol pikinini blong bildimap fet blong olgeta long Hem mo no fraet blong stap obei long ol komanmen blong Hem.

Samfala Aktiviti we Yu Save Mekem

• Askem ol pikinini blong tokbaot sam promes we oli bin mekem, olsem promes we oli mekem wetem wan fren o ol kavenan we oli mekem long taem blong baptaes. ?From wanem samtaem i had blong kipim ol promes? ?From wanem hem i impoten blong kipim ol promes blong yumi? Ridim toktok ia: “Lod God bae i mekem ol kavenan blong hem i hapen we hem i bin mekem wetem ol pikinini blong hem” (2 Nifae 6:12). Serem wan eksampol blong olsem wanem nao God i bin kipim promes blong Hem, iven sapos ol blesing oli no kam long semmak taem.

• Soem wan pikja blong Jisas tugeta wetem wan pikja blong wan pikinini. Ridim 2 Nifae 7:1, mo eksplenem se taem ol pipol blong God oli stop blong obei long gospel blong Hem, hem i olsem se oli “divos[em]” Hem. Muvum pikja blong pikinini ia longwe long pikja blong Jisas blong soem se taem yumi no folem ol kavenan, olsem kavenan blong baptaes, yumi stap seperetem yumi long Papa long Heven mo Sevya. (Blong luklukbak long ol kavenan blong baptaes, luk long D&K 20:37 ?Olsem wanem nao Atonmen blong Sevya i letem yumi gobak stap kolosap long Hem? Taem yu stap toktok raon long hemia, invaetem ol pikinini blong muvum ol pikja ia oli go tugeta bakegen.

2 Nifae 9:10–23

Jisas Kraes i sevem mi aot long sin mo ded.

?Olsem wanem nao yu save yusum 2 Nifae 9:10–23 blong helpem ol pikinini blong lanem se Jisas Kraes Hem i Sevya blong olgeta?

Samfala Aktiviti we Yu Save Mekem

• Askem ol pikinini blong helpem yu blong dro wan rod long bod, mo invaetem olgeta blong ademap sam problem o sam samting we i save blokem rod. Ridim tugeta 2 Nifae 9:10, mo invaetem ol pikinini blong raetem ol nem blong ol problem long rod ia wetem ol toktok long ves ia we i tokbaot ol problem we i save blokem yumi blong gobak stap wetem God. Afta tokbaot olsem wanem nao Jisas Kraes i winim ol problem ia blong yumi (luk long 2 Nifae 9:21–23), mo semtaem askem ol pikinini blong waepemaot ol problem ia.

• Soem wan pikja blong Adam mo Iv, olsem Leaving the Garden of Eden (ChurchofJesusChrist.org). Eksplenem se taem Adam mo Iv i bin kakae frut ia we God i bin talem long tufala blong no kakae insaed long Garen blong Iden, sin mo ded i bin kam long wol. Soem wan pikja blong Jisas Kraes. Blong helpem ol pikinini blong andastanem olsem wanem nao Jisas i bin winim sin mo ded, talem stori blong man ia we i bin foldaon i go insaed long wan hol, we i stap long fasfala tijing blong “Ol Smol Pikinini” long aotlaen ia. Afta askem ol pikinini blong dro ol pikja blong stori ia mo aktemaot. Ridim 2 Nifae 9:21–23, mo serem testemoni blong yu abaot Jisas Kraes mo Atonmen blong Hem.

• Helpem wanwan pikinini blong faenem wan singsing abaot Atonmen blong Sevya long Inglis hymbuk o long Singsing Tabu mo Singsing blong Ol Pikinini (ol indeks long ol buk ia i save help) Invaetem ol pikinini blong faenem mo serem wan toktok long ol singsing ia we i tokbaot wanem nao Jisas i bin mekem blong yumi. Askem ol pikinini blong serem ol tingting mo filing blong olgeta abaot Atonmen blong Sevya, o serem testemoni blong yu.

2 Nifae 9:20, 28–29, 42–43

Bae mi kasem blesing taem mi stap folem ol kaonsel blong God.

Helpem ol pikinini blong bildimap wan strong fandesen blong gat tras long God blong mekem se taem save blong olgeta blong mekem samting i kam antap, bae oli gohed blong dipen long Hem mo folem ol kaonsel blong Hem.

Samfala Aktiviti we Yu Save Mekem

• Invaetem ol pikinini blong talem long yu abaot wan samting we oli save gud long hem, olsem wan buk we oli laekem tumas o samting we oli laekem blong mekem. Askem wan pikinini blong ridim 2 Nifae 9:20, mo testifae se God “i save evri samting.” ?From wanem nao hem i impoten blong andastanem se God i save evri samting?

• Askem ol pikinini blong tingbaot wan taem we oli harem wan fren i talem se ol komanmen o tijing blong Jos oli nogud. ?Wanem nao bae olgeta i talem long fren blong olgeta? ?From wanem hem i impotem blong gat tras long ol kaonsel blong God iven taem yumi no save andastanem fulwan? Leftemap tingting blong ol pikinini blong luk long 2 Nifae 9:20, 28–29 mo 42–43 blong helpem olgeta blong tingting hevi mo tokbaot kwestin ia.

Stap Leftemap Tingting blong Lanem Samting long Hom

Helpem ol pikinini blong tingbaot wan wei we oli save tijim long famli blong olgeta wanem we oli bin lanem abaot Jisas Kraes mo Atonmen blong Hem. Eksampol, maet oli save yusum aktiviti pej blong wik ia blong eksplenem olsem wanem nao Sevya i helpem yumi blong winim sin mo ded.

Stap Kam Antap long Fasin blong Yumi blong Stap Tij

Yusum ol aktiviti pej. Taem ol pikinini oli stap wok long ol aktiviti pej, yusum taem ia blong helpem olgeta blong luksave olsem wanem nao aktiviti ia i go wetem ol stamba tingting blong lesen mo olsem wanem nao oli save yusum ol prinsipol ia long laef blong olgeta.