“20–26 Jenuware. 1 Nifae 11–15: ‘Oli Blokem Olgeta Wetem Stret Fasin mo Paoa blong God,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“20-26 Jenuware. 1 Nifae 11–15,” Kam Folem Mi—Blong Wanwan Man, Woman mo Famli: 2020
I Swit I Bitim Evri Samting we I Swit, i kam long Miguel Ángel González Romero
20–26 Jenuware
1 Nifae 11–15
“Oli Blokem Olgeta Wetem Stret mo Gud Fasin mo Paoa blong God”
?Yu yu save luk yu insaed long 1 Nifae 11–15? ?Wanem ples long skripja nao i moa impoten long yu mo famli blong yu?
Raetemdaon Ol Filing mo Tingting blong Yu
Taem God i gat wan bigbigfala wok blong profet blong Hem blong mekem, plante taem Hem i givim long profet ia, wan bigfala visen we i helpem hem blong andastanem ol stamba tingting blong God from ol pikinini blong Hem. Moses i bin luk wan visen “long saed blong wol ia, mo ol pipol we oli stap laef long hem, mo tu, long saed blong ol heven,” (Moses 1:36). Aposol Jon i bin luk histri blong wol mo Seken Kaming blong Sevya (luk long buk blong Revelesen). Josef Smit i bin luk Papa mo Pikinini (luk long Josef Smit—Histri 1:17–18). Lihae i bin luk wan visen we i bin soem rod ia we yumi mas wokbaot long hem i go long Sevya mo lav blong Hem.
Olsem we oli raetemdaon long 1 Nifae 11–14, Nifae i bin luk seves blong Sevya, fiuja laen blong Lihae long graon blong promes, mo fiuja long taem blong ol las dei blong wok blong God. Visen ia i bin help blong mekem Nifae i rere from wok we i bin stap long fored blong hem, mo hemia tu i save mekem yu i rere—from se God i gat wan wok blong yu mekem insaed long kingdom blong Hem. Yufala i stap insaed long grup blong “ol sent blong Jos blong Smol Sipsip” we Nifae i bin luk, “we i bin seraot olbaot long ful fes blong wol; mo oli blokem olgeta wetem stret fasin mo paoa blong God long bigfala glori” (1 Nifae 14: 14).
Sam Aedia blong Skripja Stadi blong Yuwan
God i sendem Jisas Kraes blong soemaot lav blong Hem.
Blong helpem Nifae blong andastanem mining blong tri ia we papa blong hem i bin luk, wan enjel i bin soem hem “Pikinini blong Papa we I No Save Finis” (1 Nifae 11:21). Hemia i lidim Nifae blong talem se tri ia i ripresentem lav blong God. Be visen ia i no finis yet. Taem yu stap ridim mo tingting hevi long 1 Nifae 11, ?wanem nao yu faenem, we i helpem yu blong andastanem from wanem nao, Jisas Kraes, Hem nao i stret wei we God i soemaot lav blong Hem?
Blong lanem moa abaot ol nara simbol insaed long drim blong Lihae, luk long 1 Nifae 11:35–36; 12:16–18; and 15:21–30.
Luk tu long John 3:16.
Lod i mekem wan rod i rere wan rod blong Restoresen i hapen.
Nifae bae i neva laef longtaem inaf blong witnesem plante long ol samting we hem i bin luk long visen blong hem. ?Yu ting se bae i from wanem nao i impoten tumas blong Nifae i mas save olgeta samting ia? ?From wanem i impoten tumas blong yu, yu save olgeta samting ia? Mebi bae yu save askem kwestin ia evri taem we yu stap rid abaot wan samting we Nifae i bin luk long visen blong hem.
Hemia sam samting we Nifae i bin luk: fiuja blong ol pipol blong hem (luk long japta 12), taem blong tekova long Ol Amerika mo Revolusen blong Amerika (luk long japta 13:12–19), bigfala Apostasi (luk long japta 13:20–29), mo Restoresen blong Gospel (luk long japta 13:32–42).
?Wijwan nao hem i “bigfala mo rabis jos” we Nifae i bin luk?
Elda Dallin H. Oaks i bin eksplenem se “bigfala mo rabis jos” ia we Nifae i tokbaot gud, i ripresentem “eni tingting o oganaesesen we i stap agensem bilif long God. Mo ‘fasin blong stap slef’ we ‘jos’ ia i wantem tekem ol sent oli go long hem, bae i no blong oli slef long saed blong bodi, be slef blong ol giaman tingting” (“Stand as Witnesses of God,” Ensign, Maj 2015, 32).
?Huia man ia we Nifae i bin luk we Spirit “i wok long hem” blong “i go aot long plante solwota”?
Nifae i bin luk se bae Tabu Spirit i givim insperesen long Christopher Columbus (Kristofa Kolombos) blong mekem trip ia i go long Ol Amerika. Long 14 Maj, 1493, Kolombos i raet abaot trip ia: “Ol bigfala mo gudfala risal ia, i no miwan we mi mekem olgeta … ; from se samting we waes blong man i no save kasem nating, nao Spirit blong God i bin givim long man, from se God i stap lisin oltaem long ol prea blong ol wokman blong Hem, we oli lavem tumas ol tingting blong Hem mekem se oli wok gogo oli mekem samting we i no posibol, oli hapen” (The Annals of America [Encyclopedia Britannica, Inc., 1976], 1:5).
Ol skripja blong lata-dei oli putumbak “plante klia mo gudgudfala samting.”
Nifae i bin luk, insaed long wan visen, se Baebol—we hem i singaotem “histri blong Ol Jiu”—i gat “plante plante klia mo gudgudfala samting we oli tekemaot long hem” (1 Nifae 13:23, 28). Be, hem i bin luk tu se God bae i putumbak olgeta samting ia tru “ol narafala buk”—we i Buk blong Momon mo ol nara lata-dei skripja (luk long 1 Nifae 13:39–40). ?Wanem nao sam long ol bigfala trutok we Buk blong Momon i stap helpem yumi blong andastanem gud moa? ?Olsem wanem laef blong yu i defren from ol klia mo gudfala samting ia we God i bin putumbak?
Buk blong Momon i putumbak ol trutok blong gospel we oli bin lus long taem blong Apostasi.
Luk tu long “Plain and Precious Truths,” Ensign, Maj. 2008, 68–73; Russell M. Nelson, “Buk blong Momon: ?Bae Laef blong Yu I Olsem Wanem Sapos Yu No Gat Buk Ia?” Ensign o https://www.ChurchofJesusChrist.org/languages/bis/content/general-conference/2017/10/the-book-of-mormon-what-would-your-life-be-like-without-it, Okt 2017.
Lod bae i ansarem mi sapos mi askem wetem fet mo wetem wan sofsof hat.
?Yu yu harem finis olsem se yu no stap kasem revelesen blong yuwan?—?se God i no stap toktok wetem yu? ?Wanem advaes nao Nifae i bin givim long ol brata blong hem taem oli bin filim olsem? ?Olsem wanem nao yu save yusum advaes blong Nifae insaed long laef blong yu, mo olsem wanem nao yu save yusum advaes ia blong helpem ol narafala man?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
1 Nifae 11–14
Taem famli blong yu i stap ridim ol japta ia, wanwan taem yufala i stop, mo askem ol kwestin olsem: ?Wanem nao Nifae i bin luk long visen blong hem ia we bae i mekem mi hapi? ?Wanem nao bae i mekem mi no hapi? ?From wanem?
1 Nifae 13:20–42
Blong helpem ol memba blong famli oli andastanem moa hamas i “ ol klia mo gudgudfala” trutok long Buk blong Momon oli impoten tumas, komperem wan mesej we oli raetem klia wetem wan mesej we i tantanem ol samting. ?From wanem Papa blong yumi long Heven i wantem se oli mas tijim ol trutok blong Hem i klia gud? Ol memba blong famli oli save talem testemoni blong olgeta abaot samfala “klia mo gudgudfala” trutok we oli bin lanem aot long Buk blong Momon.
1 Nifae 14:12–15
?From wanem nao yumi “blokem [yumi] wetem stret mo gud fasin mo paoa blong God” taem yumi stap tru long ol kavenan blong yumi wetem God?
1 Nifae 15:8–11
?Wanem eksperiens nao famli blong yu i gat taem yufala i bin “askem long Lod”? ?Wanem nao yumi lanem aot long eksampol blong Nifae?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Yusum ol help tul blong stadi. Ol futnot, Topical Guide (Topik Gaed), Gaed long Ol Skripja, mo ol nara tul blong help we oli stap blong givim yufala sam niu wei blong lukluk insaed long ol skripja. Eksampol: ?ol futnot ia, oli stap helpem yu blong andastanem wanem abaot 1 Nifae 14:20–21?
Visen blong Nifae abaot Meri , i kam long James Johnson