Lihae I Stap Wokbaot Kolosap long Red Si, i kam long Gary Smith

6–12 Jenuware

1 Nifae 1–7

“Bae Mi Go mo Mekem”

Nifae i bin raetemdaon “ol samting blong God” (1 Nifae 6:3). Taem yu stap stadi long histri blong Nifae, luklukgud long ol samting blong God we yu save faenem, speseli ol tingting we oli kam long Spirit.

Raetemdaon Ol Filing mo Tingting blong Yu

Buk blong Momon i stat wetem stori blong wan ril famli we i stap gotru long ol ril hadtaem. Hem i hapen long 600 B.K.B., be i gat ol samting insaed long stori ia, we maet ol famli oli luk se i semmak long olgeta tedei. Famli ia, i bin stap laef long wan wol we fasin nogud i bin stap kam antap plante, be Lod i bin promesem long olgeta se, sapos oli folem Hem, bambae Hem i lidim olgeta i go long sef ples. Folem rod ia, oli bin gat ol gud taem, mo ol nogud taem; oli bin kasem ol bigfala blesing mo ol merikel, be tu, oli bin gat plante samting we oli no bin agri long hem mo oli gat ol raorao. Insaed long ol skripja, i no gat tumas ol bigfala stori olsem abaot wan famli we i stap traem blong laef folem gospel: wan papa we i stap traehad blong givim insperesen blong fet long famli blong hem, ol boe blong hem we oli disaed se yes o no bae oli bilivim hem, wan mama we i fraet from sefti blong ol pikinini blong hem, mo ol brata we oli stap tantanem olgeta wetem fasin blong stap jalus mo stap raorao—mo samtaem, oli fofogivim olgeta. Long bigfala pikja, i gat ril paoa blong stap folem ol eksampol blong fet we famli ia—i nomata se oli gat fulap samting we i no stret evriwan long olgeta—i traem blong soem.

Sam Aedia blong Skripja Stadi blong Yuwan

1 Nifae 1–6

Ol skripja oli gat bigfala valiu.

Ol fasfala sikis japta blong Buk blong Momon, insaed i save gat ol refrens i go long ol tabu buk, ol tabu rekod, mo toktok blong Lod. Taem yu stap ridim 1 Nifae 1–6, wanem nao yu lanem abaot from wanem nao toktok blong God, i “gat bigfala yus” blong hem? (1 Nifae 5:21). ?Wanem nao ol sentens ia oli stap tijim yumi long saed blong hamas ol skripja oli impoten? ?Wanem nao yu faenem we i givim insperesen long yu blong luklukgud insaed long ol skripja wetem moa komitmen?

Luk tu long “Scriptures Legacy” (video, ChurchofJesusChrist.org).

1 Nifae 1:7–15

Buk blong Momon i testifae abaot Jisas Kraes.

Tru stamba tingting we oli tokbaot long taetol pej blong buk ia—blong winim tingting blong evriwan se Jisas Hem i Kraes—nao Buk blong Momon i stat wetem bigfala visen blong Lihae abaot Sevya. ?Wanem nao yu lanem abaot Jisas Kraes aot long wanem we Lihae i bin luk? ?Wanem sam long ol “bigfala mo gudfala” wok we Sevya i bin mekem insaed long laef blong yu? (1 Nifae 1:14).

1 Nifae 2

Taem mi stap lukaotem mo trastem Lod, Hem i save mekem hat blong mi i sopsop.

Nomata we Leman, Lemyul mo Nifae oli bin groap long sem famli, mo oli bin gat ol semmak eksperiens, fasin blong wanwan blong mekem folem daereksen we i kam long heven we papa blong olgeta i bin kasem long japta ia, i defren. Taem yu stap ridim 1 Nifae 2, luk sapos yu save faenem from wanem hat blong Nifae i bin kam sofsof, be i no hat blong ol brata blong hem. Yu save tingting tu long hao nao yu yu stap mekem blong folem daereksen we i kam long Lod, tru long Tabu Spirit, o tru long profet blong Hem. ?Wetaem nao yu bin filim se Lod i mekem hat blong yu i sofsof blong yu save glad moa blong akseptem daereksen mo kaonsel we i kam long hem?

1 Nifae 3–4

God bambae i mekem wan rod i rere blong mi save mekem tingting blong Hem.

Taem we Lod i bin givim oda long Lihae mo famli blong hem blong go karem ol buk we oli wokem long bras aot long Leban, Hem i no talem ol stret instraksen long hao blong mekem komanmen ia. Hemia tu i wan tru samting wetem ol nara komanmen, o revelesen blong yuwan we yu kasem long God, mo hemia i save lidim yumi blong filim se, samting ia, i wan “had samting” blong mekem (1 Nifae 3:5). ?Wanem nao i givim insperesen long yu long wei we Nifae i mekem long saed blong oda we Lod i bin givim, we i stap long 1 Nifae 3:7, 15–16? ?I gat eni samting we yu filim blong “go mo mekem”?

Taem yu stap ridim 1 Nifae 1–7, lukaotem samfala wei we God i bin mekem rere rod blong Lihae mo famli blong hem. ?Olsem wanem nao Hem i mekem hemia long yu?

Luk tu long Ol Proveb 3:5–6; 1 Nifae 17:3; “Obedience,” Gospel Topics, topics.ChurchofJesusChrist.org; Ol Vidio blong Buk blong Momon long ChurchofJesusChrist.org o long Gospel Laebri ap.

1 Nifae 4:1–3; 5:1–8; 7:6–21

Taem mi stap tingbaot ol wok blong God, i save givim mi fet ia blong stap obei long ol komanmen blong Hem.

Taem we Leman mo Lemyul, tufala i filim blong stap komplen, plante taem, Nifae mo Lihae i stap kolosap blong leftemap tingting blong tufala mo blong tok strong long tufala. Taem yu filim blong komplen, sapos yu ridim ol toktok blong Nifae mo Lihae, bae i givim sam gudfala kaonsel mo defren lukluk long yu. ?Olsem wanem nao Nifae mo Lihae oli bin traem blong helpem ol memba blong famli blong bildimap fet long God? (luk long 1 Nifae 4:1–3; 5:1–8; 7:6–21). ?Wanem samting yu lanem aot long eksampol blong tufala we i save helpem yu nekis taem we yu gat temtesen ia blong komplen, o go agensem man?

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

1 Nifae 1–7

Truaot long 1 Nifae 1–7, yu save leftemap tingting blong ol memba blong famli blong luk olsem wanem ol samting i gohed bitwin ol memba blong famli blong Lihae mo ol memba blong famli blong Saraea. ?Wanem yumi save lanem aot long ol rilesensip ia we i save helpem famli blong yumi?

Nifae mo famli blong hem oli tekem ol toktok blong ol profet se oli impoten.

1 Nifae 2:20

Prinsipol we i stap long 1 Nifae 2:20 oli ripitim plante taem truaot long Buk blong Momon. ?Olsem wanem ol memba blong famli oli save yusum prinsipol ia long laef blong olgeta taem yufala i stap stadi long Buk blong Momon long yia ia? Maet yu save mekem wan posta tugeta we i tokbaot promes blong Lod we i stap insaed long ves ia, mo hangem posta long hom blong yu. Hem i save stap blong rimaenem yufala wanwan taem long hao nao yufala i bin luk Lod i mekem famli blong yufala i kam antap taem yufala i bin stap obei ol komanmen. Tingting blong raetemdaon ol eksperiens ia long posta.

1 Nifae 2:11–13; 3:5–7

Maet famli blong yu bae i lanem fulap samting taem bae oli luk wanem i defren bitwin fasin we Leman mo Lemyul, tufala i mekem folem ol komanmen blong Lod, mo fasin we Nifae i mekem. ?Wanem nao yumi save lanem aot long 1 Nifae 2:11–13; 3:5–7 abaot fasin blong stap komplen? ?Wanem blesing nao i kam taem yumi stap praktisim fet?

1 Nifae 3:19–20; 5:10–22; 6

Olgeta ves ia i save givim insperesen long famli blong yu blong kipim wan rekod blong ol impoten taem mo eksperiens blong laef blong yufala. Maet yufala i save statem wan famli jenol, semmak long ol histri we Nifae mo Lihae i holem abaot eksperiens blong famli blong olgeta. ?Wanem nao yu nidim blong raetem insaed long famli histri blong yu?

1 Nifae 7:19–21

?Wanem nao i tajem tinting blong yumi abaot eksampol blong Nifae long ol ves ia? ?Olsem wanem nao famli blong yu i gat blesing taem yumi “fofogivim wanwan long yumi wetem tru tingting”?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Stadi ol skripja oltaem. Wan ki blong save tij gud insaed long hom, hem i blong krietem wan taem blong lanem samting oltaem, blong famli blong yu. Presiden Thomas S. Monson i tijim, “Ol hariap lesen oli no wok gud tumas olsem fasin blong ridim skripja evri dei mo stap yusum ol toktok blong skripja insaed long laef blong yumi” (“Be Your Best Self,” Ensign o Liahona, Mei 2009, 68).

Mi bin Obei long Voes blong Spirit, i kam long Walter Rane