Oli No Fogetem Yu, i kam long Jon McNaughton

Jun 1–7

Alma 5–7

“?Yufala I Ting se Yufala I Bin Kasem Bigfala Jenis Ia long Hat blong Yufala?”

Tingting hevi long ol prinsipol insaed long Alma 5–7 we yu filim se oli stret gud long ol pikinini we yu stap tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem pikinini blong serem wanem we oli save tingbaot we oli bin lanem abaot Yangfala Alma long sam wik we i bin pas. Eksplenem se afta we Alma i bin jenisim laef blong hem, hem i bin tijim ol pipol sam impoten samting abaot gospel. Letem ol pikinini oli serem wanem oli save abaot ol samting we hem i bin tijim.

Stap Tijim Doktrin: Ol Smol Pikinini

Alma 5:44–48

Mi save kasem testemoni blong miwan tru long Tabu Spirit.

Ol pikinini we yu stap tijim oli save bildimap ol strong testemoni blong olgetawan, iven taem olgeta oli smol yet.

Samfala Aktiviti we Yu Save Mekem

• Yusum wan pikja blong Yangfala Alma (luk long Gospel Art Buk, namba 77) blong luklukbak long stori we enjel i bin visitim hem (luk long Mosaea 27). Afta askem ol pikinini blong tokbaot gud wanem ia testemoni, mo helpem olgeta sapos i nid. Eksplenem long olgeta se Alma i bin wokhad blong kasem wan testemoni afta we enjel i bin visitim hem. Ridim sloslo Alma 5:46 plante taem, mo invaetem ol pikinini blong lisin long wanem nao Alma i bin mekem, mo olsem wanem nao hem i bin save trutok. (Maet bae yu nid blong eksplenem se fasin blong livim kakae hem i minim se yu no kakae kaekae o dring wota.)

• Soem ol pikja blong ol samting we oli stap gro sloslo mo i nidim kea oltaem, olsem wan flaoa o wan bebi animol. Askem ol pikinini blong serem olsem wanem olgeta i stap kea long ol samting olsem, mo helpem olgeta blong gro. Mekem olgeta oli tingbaot se, yumi tu, yumi mas kea oltaem long testemoni blong yumi.

• Yusum wan emti balun blong ripresentem wan testemoni, mo blo i go insaed long hem evri taem yu serem wan samting we i stap helpem testemoni blong gro. Fasem balun ia mo pasem i go raon, askem ol pikinini blong serem wan samting we oli save mekem blong helpem testemoni blong olgeta i gro. Invaetem ol pikinini blong dro olgeta bakegen we oli stap mekem ol samting we i save mekem testemoni blong olgeta i kam strong moa.

Taem yumi akseptem gospel, i olsem we yumi stap statem wan niu laef.

Alma 7:10–13

Sevya i tekem long Hemwan ol sin, ol harem nogud, mo ol hadtaem blong mi.

Ol trutok long Alma 7:10–13 oli save helpem ol pikinini blong save se Jisas Kraes i kea from olgeta mo Hem i save helpem olgeta.

Samfala Aktiviti we Yu Save Mekem

• Soem wan pikja blong Jisas long ol pikinini. Eksplenem se Hem i save wanem ia harem nogud, no glad, o fraet. Ridim sam long ol toktok long Alma 7:11–13 we i tokbaot wanem we Sevya i bin safa from, mo eksplenem ol toktok we maet ol pikinini bae oli no andastanem. Poenemaot se Jisas i save helpem mo givim kamfot long yumi sapos yumi harem nogud. Serem olsem wanem we Sevya i bin helpem mo givim kamfot long yu.

• Askem ol pikinini blong serem ol eksperiens blong taem we oli bin sik o harem bodi i soa o gat wan nara problem we i mekem oli no harem gud. Serem testemoni blong yu se Sevya i bin safa from ol samting ia tu, mo Hem i save olsem wanem blong helpem yumi.

Alma 7:19–20

Rod we i gobak long Papa long Heven hem i wan stret rod.

?Olsem wanem nao yu save yusum wei we Alma i bin tokbaot rod ia we i gobak long Papa long Heven blong helpem ol pikinini blong lanem blong stap mekem ol gudfala joes?

Samfala Aktiviti we Yu Save Mekem

• Ridim Alma 7:19 long ol pikinini, mo eksplenem se taem yumi mekem ol gudfala joes, yumi stap folem rod ia we i stap lidim yumi i gobak long Papa long Heven. Givim long ol pikinini sam joes o aksen (olsem oli no kaen long ol famli memba o oli givim seves long olgeta). Askem olgeta blong talem long yu sapos wanwan joes ia i gud mo i stap lid i gobak long God o sapos hem i nogud mo i stap lidim hem i gowe long God.

• Ridim Alma 7:20 mo helpem ol pikinini blong andastanem ol toktok long ol ves ia we i tokbaot rod we i gobak long God. Dro long bod, wan stret rod we i stat long yumi mo i go long Papa long Heven. Afta dro wan kruked rod we i gat ol rod we i no lid i go long wan ples, be i lid i gowe long God. Invaetem ol pikinini blong folem tugeta rod ia wetem ol fingga blong olgeta. ?Wijwan rod nao i moa gud? Helpem olgeta blong tingbaot ol gudfala joes we i save helpem olgeta blong stap long stret rod.

Stap Tijim Doktrin: Ol Bigfala Pikinini

Alma 5:12–14, 27–28, 57; 7:14–24

Mi mas bon bakegen, mo afta, folem rod ia we i lid i gobak long God.

?Olsem wanem nao yu save helpem ol pikinini blong andastanem se i minim wanem blong bon bakegen?

Samfala Aktiviti we Yu Save Mekem

• Soem long ol pikinini wan pikja blong wan bebi, mo invaetem olgeta blong tokbaot se ol bebi oli olsem wanem taem oli jes bon. Invaetem wan pikinini blong ridim Alma 5:14. Blong helpem ol pikinini blong andastanem wanem i minim blong “bon long God long saed blong spirit,” askem olgeta blong tingbaot se Yangfala Alma hem i bin wanem kaen man bifo hem i jenisim laef blong hem. ?Afta hem i kam wanem kaen man afta we hem i jenisim laef blong hem? (Luk long Mosaea 27:23–32 mo Alma 36:12–24.) Eksplenem se taem yumi gat fet long Jisas Kraes mo laef folem gospel blong Hem, hem i olsem we yumi statem wan niu laef, semmak olsem wan bebi.

• Rid tugeta long Alma 7:19, mo eksplenem se afta we yumi bon bakegen, yumi mas folem “rod ia we i go long kingdom blong God.” Haedem ol pepa raon long rum wetem ol skripja refrens ia i stap long wanwan pepa ia: Alma 5:12–13, 27–28, 57; 7:14–16, 23–24. Invaetem ol pikinini blong faenem ol pepa ia, mo luklukgud long ol skripja ia, mo serem wanem wanwan skripja i stap tijim se yumi mas mekem long gobak stap wetem God.

Alma 5:14, 44-48

Mi save kasem testemoni blong miwan tru long Tabu Spirit.

Wan enjel i bin visitim Alma, be testemoni blong hem “Tabu Spirit blong God i bin mekem mi save ol samting ia” (Alma 5:46).

Samfala Aktiviti We Yu Save Mekem

• Ridim Alma 5:44–46 wetem ol pikinini. ?Wanem nao Alma i bin mekem blong kasem wan testemoni blong hemwan long saed blong gospel? Givim long wanwan pikinini wan pis pepa mo invaetem olgeta blong mekem wan plan blong mekem wan samting long wik ia blong mekem testemoni blong olgeta i kam strong moa.

• Pasem raon wan glas (mira) blong lukluk long hem, mo letem ol pikinini oli lukluk olgetawan taem yu ridim Alma 5:14. ?I minim wanem blong gat fes blong Sevya long yumi? Serem ol taem we wan man i bin talem o mekem wan samting we i rimaenem yu long Sevya, mo askem ol pikinini blong mekem semak samting.

Alma 7:30–13

Sevya i tekem long Hemwan ol sin, ol harem nogud, mo ol hadtaem blong mi.

Taem yu stadi long Alma 7, tingting hevi long olsem wanem yu save bildimap fet blong ol pikinini long Jisas Kraes blong bae oli save kambak long Hem long ol hadtaem blong olgeta.

Samfala Aktiviti we Yu Save Mekem

• Invaetem ol pikinini blong rid long Alma 7:11–13, mo lukaotem sam samting we Jisas Kraes i bin safa from. Maet bae oli wantem serem ol eksperiens we oli bin filim sobodi, sik, o ol hadtaem. Aot long ol ves ia, ?from wanem nao Sevya i wantem blong safa from evri samting ia? (Eksplenem se toktok ia “helpem” i minim se “blong givhan.”)

• Talem long ol pikinini abaot wan sik, wan kil, o wan hadtaem we yu bin gat, mo askem sapos oli bin filim wan samting semmak olsem. Rid tugeta long Alma 7:11–13, mo poenemaot wanem we Jisas i bin safa from blong yumi. Helpem ol pikinini blong tingbaot ol taem we Sevya i bin eksperiensem ol samting ia, olsem long taem we Setan i bin stap traem Hem (luk long Matiu 4:1–11) o taem we Hem i bin stap safa long Getsemane. ?Olsem wanem nao hem i helpem yumi blong save se Jisas i andastanem ol hadwok blong yumi? Serem testemoni blong yu long paoa blong Jisas blong givim kamfot, help, mo hilim yumi.

Stap Leftemap Tingting blong Lanem Samting long Hom

Invaetem ol pikinini blong hangem wan pikja blong Jisas long wan ples we bae oli save luk oltaem blong rimaenem olgeta long wanem we oli bin lanem abaot Hem tedei.

Stap Kam Antap long Fasin blong Yumi blong Stap Tij

Kam antap olsem wan tija we i olsem Kraes. Olsem wan tija, hem i impoten blong tingting hevi long ol wei we yu save leftemap fasin blong yu blong helpem ol pikinini blong bildimap fet blong olgeta long Papa long Heven mo Jisas Kraes. Tingting blong yusum ol kwestin blong skelem yuwan long pej 37 long Teaching in the Savior’s Way.