22–28 Jun. Alma 17–22: ‘Bae Mi Mekem Yufala I Kam Wan Tul long Ol Han blong Mi,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
22–28 Jun. Alma 17–22,” Kam Folem Mi—Blong Wanwan Man, Woman mo Famli: 2020
Amon mo King Lamonae, i kam long Scott M. Snow
22–28 Jun.
Alma 17–22
“Bae Mi Mekem Yufala I Kam Wan Tul long Ol Han blong Mi”
So taem yu stap ridim Jekob 17–22, raetemdaon ol tingting mo filing we oli kam long yu mo tekem aksen folem. Taem yu mekem olsem, yu stap soem long Lod we yu wantem kasem moa revelesen we i blong yuwan.
Raetemdaon Ol Filing mo Tingting blong Yu
Tingting long evri risen we ol pipol oli gat blong no serem gospel: “Mi no save inaf”, o” mi no save stret se bae oli intres o nogat,” o mebi “bae i olsem wanem sapos mi mekem olgeta oli harem nogud?” Mebi yu faenem se yuwan yu gat ol semmak tingting ia long sam taem. Ol Man blong Nifae oli bin gat wan moa risen blong no serem gospel wetem Ol Man blong Leman: oli bin wan “pipol we i wael mo i bin mekem hat blong olgeta i strong mo i prapa wael; wan pipol we i glad blong kilimded Ol Man blong Nifae” (Alma 17:14; luk tu long Alma 26:23–25). Be ol boe blong Mosaea oli gat wan moa risen from wanem oli bin filim se oli mas serem gospel wetem Ol Man blong Leman: “oli wantem se oli mas talemaot fasin blong sevem man long evri man, from oli no save tekem se wan sol blong man i save lus” (Mosaea 28:3). Lav ia, we i bin givim insperesen long Amon mo ol brata blong hem, i save givim insperesen tu long yu blong serem gospel wetem ol famli blong yu, ol fren mo olgeta man mo woman we yu save olgeta—iven olgeta we yu luk se bae oli no save akseptem.
Sam Aedia blong Skripja Stadi blong Yuwan
Taem mi stap mekem fet blong mi i kam strong moa, mi save kam gud moa blong serem gospel.
?Yu yu bin joen bakegen wetem sam olfala fren, mo filim olsem we Alma i bin filim—we hem i glad i bitim mak se oli bin stap strong long bilif blong olgeta? (luk long Alma 17:1–2). ?Wanem nao yu lanem aot long ol boe blong Mosaea abaot wei blong kipim fet blong yu long gospel, mo komitmen blong yu long hem i strong i stap? Taem yu stap tingting hevi long paoa long saed blong spirit blong ol boe blong Mosaea, ?wanem nao yu filim insperesen blong mekem?
?Olsem wanem nao wei we ol boe blong Mosaea oli bin rere long spirit i bin lidim wok blong olgeta wetem Ol Man blong Leman? Maet yu save yusum janis ia blong skelem ol traehad blong yu blong tijim gospel “wetem paoa mo atoriti we i kam long God” (Alma 17:3).
Mi save stap olsem wan tul long han blong God blong tekem fasin blong sevem man i go long ol pikinini blong Hem.
Presiden Thomas S. Monson i talem: “Oltaem mi wantem se Lod i save se sapos Hem i gat wan wok blong mekem, Tom Monson bae i go mekem wok ia blong Hem” (“On the Lord’s Errand: The Life of Thomas S. Monson,” video, ChurchofJesusChrist.org). Taem yu stap ridim Alma 17:6–12, lukaotem wanem nao ol boe blong Mosaea oli bin mekem blong oli save stap olsem ol tul long han blong God. ?Olsem wanem nao yu save kam wan tul long han blong God blong stap blesem ol narawan? ?Wanem samting yu lanem aot long eksampol blong olgeta we i givim paoa long tingting blong yu blong mekem wanem we Lod i nidim yu blong go mekem?
Luk tu long Dallin H. Oaks, “Stap Serem Gospel we I Kambak,” Ensign o https://www.ChurchofJesusChrist.org/general-conference/2016/10/sharing-the-restored-gospel?lang=bis, Okt 2016.
Mi save helpem ol narawan blong oli kasem gospel.
Lamonae i bin lida blong wan “pipol we i wael mo i bin mekem hat blong hem i kam strong mo i prapa wael” (Alma 17:14), be yet, hem i bin winim plante yia blong kastom laef mo i bin akseptem gospel blong Jisas Kraes. Taem yu stap rid abaot ol toktok blong Amon wetem Lamonae, luk wanem Amon i bin mekem, we maet i helpem Lamonae blong save akseptem gud mesej blong hem. Sapos yu kasem sam tingting abaot wanem yu save mekem blong serem gospel wetem ol narawan, raetemdaon ol tingting ia.
Maet bae i help sapos ol memba blong klas oli mekem wan lis blong ol trutok we Amon i tijim long Lamonae (luk long Alma 18:24–39mo ol trutok we Eron i bin tijim long papa blong Lamonae (luk long Alma 22:1–16 ?Wanem olgeta ves ia oli talem long yu abaot ol trutok we yu save serem wetem ol narawan blong helpem olgeta blong lukaotem wan testemoni abaot gospel?
Minerva K. Teichert (1888–1976), Amon I Sevem Ol Animol blong King, 1935–1945, oel long mesonaet, 35 x 48 inj. Brigham Yang Yunivesiti blong Art
Testemoni blong mi i gat paoa we i save kasem longwe blong lidim tingting blong man.
Tru long ol stori blong jenisim laef we yumi bin ridim long ol skripja, plante taem, i gat ol bigfala samting oli hapen, mo long stamba blong hem, yumi faenem ol man o woman we oli bin gat strong paoa long tingting blong toktok antap, mo blong serem witnes blong olgeta wetem ol narawan. Wan wei blong stadi long ol samting we oli hapen long Alma 18–22 hem i blong lukluk long ol jenis we i stap longtaem long wan we i stap serem testemoni blong hem. Mebi yu save raetemdaon wanem yu faenem long wan daegram olsem ia:
|
Amon i bin serem gospel wetem , we i bin serem gospel wetem , mo risal i . |
Lod i stretem han blong Hem i kam long mi taem mi sakem sin.
Long en blong stori blong Lamonae we i jenisim laef blong hem, Momon i tijim wan impoten samting abaot fasin blong Lod. ?Wanem nao Alma 19:36 i talem long yu abaot fasin blong Lod? ?Wetaem nao yu bin filim se Lod i stap stretem han blong Hem i kam long yu? ?Olsem wanem nao yu save helpem olgeta we yu lavem blong oli filim sore blong Hem?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Alma 17–19
?Olsem wanem nao bae yu mekem olgeta stori insaed long ol japta ia oli kam laef long famli blong yu? Yu save rolplei long stori ia blong Amon we i stap protektem sipsip, o stori blong Abis we i pulum i kam tugeta ol grup blong ol pipol blong oli witnesem paoa blong God. Maet ol memba blong famli blong yu oli save droem pikja blong ol defren pat blong stori, mo yusum ol pikja ia blong talemaot stori ia. ?Wanem nao famli blong yu i save mekem blong folem eksampol blong Amon mo Abis?
Alma 18:24–39
Maet ol memba blong famli blong yu oli save ridim Alma 18:24–39 tugeta mo faenemaot ol trutok we Amon i tijim long Lamonae. ?From wanem yumi ting se Amon i tijim Lamonae faswan long ol trutok ia? ?From wanem i impoten blong yumi gat wan testemoni abaot ol trutok ia?
Alma 20:8–15
?Wanem nao yumi save lanem long wei we Lamonae i mekem long papa blong hem? ?Olsem wanem yumi save folem eksampol blong Lamonae blong stanap from samting we i raet? (Blong gat sam eksampol, luk long vidio ia, “Dare to Stand Alone” long ChurchofJesusChrist.org.)
Alma 22:15–18
Luklukbak long Alma 20:23 blong luk wanem papa blong Lamonae i bin rere blong lego blong sevem laef blong hem. Afta, luklukbak long Alma 22:15 blong luk wanem hem i bin glad blong givap long hem blong save kasem glad blong gospel. ?Wanem nao hem i bin glad blong lego blong kam blong save God? (luk long ves 18). Maet wanwan long ol memba blong famli oli save raetem wan plan blong lego wan samting blong save kam blong save God moa fulwan.
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Stap Kam Antap long Stadi blong Yuwan
Faenem mo praktisim ol prinsipol. I nomata we ol ditel blong ol stori blong ol skripja, yu luk se oli no blong yu, olgeta prinsipol long ol stori ia, oli blong yu tu. Taem yu stap ridim abaot Amon mo Eron, ?wanem prinsipol nao yu bin faenem abaot fasin blong serem gospel?
Waef blong King Lamonae i girap, i presem Jisas. O, Tabu Jisas i kam long Walter Rane