“29 Jun–5 Julae. Alma 23–29: Oli “Neva Foldaon I Go Lus’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“29 Jun–5 Julae. Alma 23–29,” Kam Folem Mi—Blong Wanwan Man, Woman mo Famli: 2020
Ol Antae-Nifae-Lihae Oli Berem Ol Tul blong Faet blong Olgeta i kam long Jody Livingston
29 Jun–5 Julae
Alma 23–29
Oli “Neva Foldaon I Go Lus”
Taem yu stap stadi Alma 23-29, ?wanem mesej nao yu faenemaot blong yuwan mo blong famli blong yu? ?Wanem nao yu save serem insaed long ol klas blong yu long Jos?
Raetemdaon Ol Filing mo Tingting blong Yu
?Yu yu stap askem yuwan samtaem se ol pipol oli rili save jenis o no? Ating yu stap wari se yu save winim sam nogud joes we yu bin mekem, o sam nogud fasin we yu stap gat, o maet yu gat ol semmak wari abaot sam we yu lavem olgeta. Sapos i olsem, stori blong Ol Antae-Nifae-Lihae i save helpem yu. Olgeta pipol ia, oli ol bigfala enemi blong Ol Man blong Nifae. Taem we Amon mo ol brata blong hem oli disaed blong prijim gospel long olgeta, Ol Man blong Nifae oli bin “jikim olgeta fulap.” I luk se blong kilimded Ol Man blong Leman i wan moa stret ansa, bitim blong jenisim laef blong olgeta. (Luk long Alma 26:23–25.)
Be Ol Man blong Leman oli bin jenisim laef blong olgeta—tru long paoa blong Lod blong jenisim laef blong man. Long wan taem, oli bin save olgeta olsem “ol pipol we oli wael mo oli bin mekem hat blong olgeta i kam strong” (Alma 17:14), be afta, oli “save olgeta from sapot blong olgeta long God” (Alma 27:27). Wanem i tru, i we oli “neva foldaon i go lus” (Alma 23:6).
Ating yu gat ol rong kastom blong lego, o yu gat “ol tul blong faet” blong slakem daon (Alma 23:7). O ating yu jes nid blong yu strong moa long testemoni blong yu, mo no folem tumas fasin blong stap mestem rod. Nomata wanem jenis yu nidim, Alma 23–29 i save givim yu hop, se tru long paoa blong Jisas Kraes, paoa ia we i pem praes, bae i wan jenis we i longfala mo i save stap, i posibol blong hapen.
Sam Aedia blong Skripja Stadi blong Yuwan
Taem ol pikinini blong God oli akseptem gospel, ol bigfala blesing oli kam folem.
Taem we king blong Ol Man blong Leman i talem se toktok blong God, “i no save gat wan samting we i save blokem” long medel blong ol pipol blong hem (luk long Alma 23:1–5), hem i openem doa blong ol bigfala blesing i kam long olgeta. Taem yu stap ridim Alma 23–29, lukaotem olgeta blesing ia. ?Olsem wanem nao yu save meksua se “i no save gat wan samting we i save blokem” toktok blong God insaed long laef blong yu, o insaed long famli blong yu?
Taem mi jenisim laef blong mi i go long Jisas Kraes mo gospel blong Hem, hemia i jenisim laef blong mi.
Ol Man blong Leman, we Amon mo ol brata blong hem oli bin visitim, i luk se bae oli no ol man nating we bae oli save jenisim laef blong olgeta—oli bin fas long kastom blong ol papa blong olgeta mo ol fasin nogud blong olgeta. Be yet, plante long olgeta oli bin akseptem gospel blong Jisas Kraes, mo oli bin mekem ol jenis ia we i bin nid blong mekem long laef blong olgeta. Olsem wan saen blong jenis long laef blong olgeta, Ol Man blong Leman ia, oli bin singaotem olgeta ol Antae-Nifae-Lihae. (Mining blong “antae” long kes ia, i no semmak long hemia we i oli yusum blong talem man we i agensem Kraes.)
Taem bae yu tingting long jenis blong laef blong Ol Man blong Leman ia, bae i pusum yu tu, blong tingting hevi long jenis insaed long laef blong yuwan, we yu tanem yu “i go long Lod” (Alma 23:6). Wan wei blong stadi long ol japta ia, i blong save faenemaot olsem wanem we taem Ol Antae-Nifae-Lihae oli konvet, oli jenisim laef blong olgeta tu. Yu save stat wetem olgeta ves ia.
Taem yu stap tingting hevi long ol jenis blong Ol Antae-Nifae-Lihae, tingting long olsem wanem nao jenis blong laef blong yu i go long Kraes i bin jenisim fasin blong yu. ?Wanem nao yu stil nidim blong mekem blong gospel i save gat moa bigfala paoa insaed long laef blong yu?
God i gat bigfala sore.
I nomata se ol sin we Amon mo Ol Antae-Nifae-Lihae oli gat blong winim oli defren evriwan long eni samting long laef blong yu, yumi evriwan i stap dipen long sore blong God. ?Wanem nao yu faenem insaed long Alma 24:7–19 mo 26:17–22 we i save helpem yu blong andastanem sore blong Hem? Taem yu stap rid i go, i gud yu tingting long olgeta samting ia: ol wei we oli bin invaetem yu blong sakem sin, ol eksperiens blong yu wetem fasin blong sakem sin, olsem wanem yu bin traem blong stap longwe long sin, mo olgeta blesing we oli bin kam long yu tru long fasin blong sakem sin. Taem yu stap ridim ol ves ia long wei ia,?wanem nao yu lanem abaot sore we God i gat long laef blong yu?
Blong givim seves long Lod i tekem glad i kam.
I nomata ol defren eksperiens blong olgeta, Amon mo Alma oli talemaot ol semmak filing abaot ol misinari wok blong olgeta. Tingting blong stap ridim Alma 26 mo 29 mo komperem olgeta. ?Wanem samting i semmak we yu bin luk? ?Wanem toktok o sentens nao oli stap ripripitim? ?Wanem nao yumi save lanem aot long Amon mo Alma abaot wei blong faenem tru glad, i nomata ol jalenj blong yu? (Blong luklukbak long olgeta jalenj we Alma i bin fesem, luk long ol japta heding blong Alma 5–16. Blong luklukbak ol jalenj we Amon mo ol brata blong hem oli bin gat, lukluk long ol japta heding blong Alma 17–28.)
?Wanem oli ol bandel blong wit, mo ol stoahaos?
Long taem blong pikimap kaekae, oli stap fasem ol kaekae olsem wit long ol bandel, we oli singaotem bandel blong wit mo oli putum i go long ol haos, we samtaem oli singaotem ol stoahaos. Elda David A. Bednar i bin serem wan wei blong talem mining blong ol simbol ia insaed long Alma 26:5: “Long wok blong komperem hemia, long ples ia, ol bandel blong wit oli ripresentem ol niufala pipol we oli jes baptaes i kam memba blong Jos. Ol stoahaos, oli ol tabu tempol” (“Honorably Hold a Name and Standing,” Ensign o Liahona, May 2009, 97). ?Tingting long wanem oli komperem long Alma 26: 5–7 i stap tijim yu abaot hamas ol kavenan blong tempol oli impoten.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.
Alma 24:6–19
?From wanem Ol Antae-Nifae-Lihae oli bin berem ol tul blong faet blong olgeta “dip long graon”?. (Alma 24:16). Ating ol memba blong famli bae oli laekem blong raet long ol pis pepa, ol samting ia we bae oli wantem winim, o wantem lego. Afta, oli save digim wan hol, mo berem ol pepa ia i go.
Alma 24:7–12
Stadi long ol ves ia; hemia i save helpem famli blong yu i andastanem wanem i gudfala presen ia we i fasin blong sakem sin. ?Wanem nao Ol Antae-Nifae-Lihae oli bin mekem blong sakem ol sin blong olgeta? ?Olsem wanem nao Lod i bin helpem olgeta blong sakem sin? ?Wanem nao yumi save lanem aot long eksampol ia?
Alma 24:20–27
?Wanem nao yumi bin luk we i testifae se toktok blong Momon i tru, we i talem se: “Olsem ia nao yumi luk we Lod i stap wok long plante wei, blong sevem ol pipol blong hem.”? (Alma 24:27).
Alma 26:2
?Olsem wanem nao bae famli blong yu i ansarem ol kwestin blong Amon we oli stap long Alma 26:2? Maet yu save mekem wan lis blong ol ansa blong olgeta long wan bigfala pis pepa, mo hangem long wan ples we evriwan i save luk. Leftemap tingting blong ol memba blong famli blong ademap samting long hem taem oli stap tingting long sam nara blesing we God i givim antap long hed blong yumi.
Alma 29:9
?Olsem wanem nao Amon mo Alma oli bin stap olsem ol tul long han blong God? Tingting blong lukluk long ol tul insaed long hom blong yu mo toktok raon long wei we, wanwan long olgeta tul ia, i save helpem famli blong yu. ?Olsem wanem hemia i helpem yumi blong andastanem hao yumi wanwan i save stap olsem wan tul long han blong God?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Yusum defren teknik. Yusum ol defren wei blong mekem famli skripja stadi; hemia i save helpem ol memba blong famli blong oli gat intres mo oli tekpat. Eksampol. Afta we wan memba blong famli i ridim wan ves, hem i save askem ol nara memba blong famli blong talem, wetem toktok blong olgeta, wanem hem i jes ridim.
Droing blong Ol Antae-Nifae-Lihae we oli stap berem ol tul blong faet blong olgeta, i kam long Dan Burr