“6–12 Julae. Alma 30–31: ‘Paoa mo Atoriti blong Toktok blong God,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“6–12 Julae. Alma 30–31,” Kam Folem Mi—Blong Wanwan Man, Woman mo Famli: 2020
Evri Samting I Talem se I Gat Wan God (Alma mo Koriho), i kam long Walter Rane
6–12 Julae
Alma 30–31
“Paoa mo Atoriti blong Toktok blong God”
Alma i testifae long “bigfala paoa” blong toktok blong God (Alma 31:5). Taem yu stap ridim Alma 30–31, raetemdaon ol samting we oli kam long maen blong yu taem yu stap filim bigfala paoa we toktok blong God i gat long yu.
Raetemdaon Ol Filing mo Tingting blong Yu
Ol stori insaed long Alma 30–31 oli soemaot klia paoa blong ol toktok—we i mekem nogud, mo i mekem gud. “Ol swit toktok” mo ol “ol toktok we oli solap long selfis” blong wan giaman tija we nem blong hem i Koriho, kolosap i tekem “plante sol i go daon blong oli lus evriwan” (Alma 30:31, 47). Semmak, ol tijing blong wan Man blong Nifae we i agens, we nem blong hem i Soram, i lidim wan bigfala grup blong ol pipol blong foldaon long “ol bigfala rabis mistek,” mo i “prapa spolem gud ol wok blong Lod” (Alma 31:9, 11).
Komperem wetem hemia, Alma i gat wan fet we i no muvmuv olsem wef; hem i save se toktok blong God bae “i gat moa bigfala paoa long tingting blong ol pipol bitim naef blong faet, o eni narafala samting,” (Alma 31:5)—mo i tekem tu ol toktok blong Koriho mo Soram. Alma i talemaot ol trutok we oli no save finis, mo i askem ol paoa blong heven blong oli sarem maot blong Koriho (luk long Alma 30:39–50), mo oli invaetem ol blesing blong heven blong stap long olgeta we oli bin go wetem hem blong tekem Ol Man blong Soram oli kambak long trutok (luk long Alma 31:31–38). Olgeta eksampol ia, oli ol impoten mo bigfala eksampol long olgeta we oli stap folem Kraes tedei, we “ol toktok we oli solap long selfis” mo “ol bigfala rabis mistek” oli gat wan strong paoa long maen blong ol pipol (Alma 30:31; 31:9). Be yumi save faenem trutok bae yumi trastem, olsem Alma i bin mekem, “paoa blong toktok blong God” (Alma 31:5).
Sam Aedia blong Skripja Stadi blong Yuwan
?Wanem hem i wan man we i agensem Kraes?
Long Alma 30:6, oli singaotem Koriho se hem i “wan man we i agensem Kraes.” Wan we i agensem Kraes i “wan we bae i priten se hem i Kraes, be, bae hem i agensem Kraes (1 Jon 2:18–22; 4:3–6; 2 Jon 1:7). Long bigfala mining blong hem, hem i eniwan o eni samting se i wan giaman kopi blong tru gospel, o plan blong fasin blong sevem man, mo i agensem Kraes long pablik o long sikret (luk long Bible Dictionary, “Antichrist”).
?Wanem “giaman kopi blong tru gospel nao” yu yu save luk long wol blong tedei? Eksampol. Sista Julie B. Beck, foma Rilif Sosaeti Jeneral Presiden i bin tijim se, “Eni doktrin o prinsipol we yumi harem, we i kam long wol ia, we i agensem famli, i agensem Kraes tu” (“Teaching the Doctrine of the Family,” Ensign, Mar. 2011, 15).
Koriho I Fesem Alma i kam long Robert T. Barrett
Buk blong Momon i save helpem mi blong no foldaon long paoa blong olgeta we oli stap traem blong giaman long mi.
Taem yu stap ridim Alma 30:6–31, bae yu harem se ol tijing blong Koriho, oli saon semmak. Presiden Esra Taf Benson i bin tijim se, hemia i from we Buk blong Momon i stap soemaot mo i save mekem yumi kam strong moa agensem “ol ivel plan, teknik, mo doktrin blong devel long taem blong yumi tedei. Ol kaen blong ol man we oli mekem apostasi insaed long Buk blong Momon, oli semmak long kaen ia we yumi gat tedei. God, wetem save blong Hem we i bin stap finis mo we i no gat en mo i stret gud, i mekem Buk blong Momon blong yumi save luksave ol rong, mo save olsem wanem blong faet agensem ol giaman tingting long saed blong edukesen, politik, relijin, mo aedia blong man long taem blong yumi tedei.(Teachings of Presidents of the Church: Ezra Taft Benson, [2014], 132).
Tingting blong mekem wan lis blong ol giaman doktrin we Koriho i bin tijim insaed long Alma 30:6–31. ?Wanem nao sam samting we i bin hapen from oli bin bilivim ol tijing ia? Olsem, ?wanem nao i risal blong stap biliv se “taem we wan man i ded, hem i en blong hem”? (Alma 30:18). ?Wijwan giaman doktrin nao Koriho i bin tijim we oli semmak long ol giaman doktrin ia we yu stap luk long wol tedei?
Taem yu stap ridim wanem Koriho mo Alma i stap tokbaot, i save helpem yu blong rere from ol situesen olsem, taem we ol narawan oli stap traem blong giaman long yu. Bae i save helpem yu blong stadi long Alma 30:29–60 blong andastanem olsem wanem Koriho i foldaon long giaman (luk speseli long ol ves 52–53). ?Wanem nao yu save lanem aot long ansa blong Alma long saed blong ol tijing blong Koriho? (luk long Alma 30:31–35).
Toktok blong God i gat paoa blong lidim ol pipol i go long stret mo gud fasin.
Problem long Ol Man blong Soram we oli seperet long Ol Man blong Nifae, i luk olsem we i nid blong wan ansa long saed blong politik o ami blong stretem wanem we i stap (luk long Alma 31:1–4). Be Alma i bin lanem blong trastem, “paoa blong toktok blong God” (Alma 31:5). ?Wanem nao yu lanem aot long Alma 31:5 abaot paoa blong toktok blong God? ?Olsem wanem nao yu bin luk toktok blong God i lidim ol pipol blong mekem wanem we i stret? (Alma 31:5). Tingting hevi long wei we yu save traem, o yusum o testem, toktok blong God blong helpem wan we yu lavem.
Blong andastanem moa wei blong Alma blong go sevem ol narawan, yu save komperem ol fasin blong hem, ol filing mo aksen blong hem wetem olgeta ia blong Ol Man blong Soram, olsem we i stap long Alma 31. Maet wan tebol olsem hemia ia bae i save helpem yu. ?Wanem ol samting we i defren we yu bin luksave? ?Yu yu filim se bae yu save kam moa olsem Alma?
|
Ol Man blong Soram |
Alma |
|---|---|
Ol Man blong Soram I biliv se olgeta aotsaed long grup blong olgeta, bae oli sendem olgeta blong go long hel (Alma 31:17). | Alma I biliv se Ol Man blong Soram oli ol “brata” blong hem mo sol blong olgeta i “impoten tumas” (Alma 31:35). |
Ol Man blong Soram Oli putum hat blong olgeta long ol rij samting blong wol ia (Alma 31:24, 28). | Alma I wantem blong tekem ol sol oli kam long Jisas Kraes (Alma 31:34). |
Ol Man blong Soram | Alma |
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Alma 30:44
Tingting blong ridim mo toktok raon long Alma 30:44 tugeta taem yufala i go wokbaot aotsaed, o luk long ol pikja blong kriesen blong God. Ol memba blong famli oli save serem wanem we oli stap luk we i stap testifae abaot God. ?Olsem wanem olgeta samting ia—o ol nara eksperiens we yumi bin gat—oli stap helpem yumi blong save se God i ril ?
Alma 30:56–60
?Olsem wanem nao yumi lanem long Alma 30:56–60 abaot wei we devel i stap tritim olgeta we oli stap folem hem? ?Wanem nao yumi save mekem blong protektem hom blong yumi long paoa blong hem?
Alma 31:20–38
Afta we yu ridim Alma 31:20–38 wetem famli blong yu, yufala i save toktok raon long ol kwestin ia: ?Olsem wanem nao prea blong Alma i defren long prea blong Ol Man blong Soram? ?Olsem wanem yumi save folem eksampol blong Alma long ol prea blong yumiwan, mo ol prea wetem famli?
Ol yangfala pikinini oli save putum wan ston andanit long pilo blong olgeta blong helpem olgeta blong oli tingbaot blong prea evri moning mo naet. Maet bae oli glad tu blong flasem ston blong olgeta.
Alma 31:23
?Wanem nao yumi stap mekem evri dei long hom blong yumi blong lanem abaot God, mo tokbaot God?
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Stap rere ol samting raon long yu. “Ol samting we oli stap raon long yumi, oli save spolem o helpem paoa blong yumi blong lanem samting, mo filim trutok” (Teaching in the Savior’s Way,15). Traem faenem wan ples blong stadi long ol skripja we i stap invaetem paoa blong Tabu Spirit. Yusum miusik mo ol pikja we i leftemap tingting. Hemia i save invaetem Spirit tu.
Ramiamtam, i kam long Del Parson