20–26 Julae. Alma 36–38: ‘Yu Luk long God mo Stap Laef,’” Kam Folem Mi–Blong Wanwan Man, Woman mo Famli: Buk blong Momon 2020 (2020)
“20–26 Julae. Alma 36–38,” Kam Folem Mi—Blong Wanwan Man, Woman mo Famli: 2020
Ol pikja oli kam long Joshua Dennis
20–26 Julae
Alma 36–38
“Yu Luk long God mo Stap Laef”
“Taem yu stap filim glad we i kam taem yu andastanem gospel, bae yu wantem blong yusum wanem we yu bin lanem.” (Prijim Gospel blong Mi [2004], 21). Raetemdaon ol tingting mo ol filing blong yu abaot wei blong yusum ol trutok we yu stap lanem.
Raetemdaon Ol Filing mo Tingting blong Yu
Taem Alma i bin luk fasin nogud raon long hem, hem i filim “harem nogud we i hevi tumas,” mo “fulap trabol long tingting blong sol blong hem” (Alma 8:14). Taem hem i tokbaot Ol Man blong Soram, hem i talem: “ol nogud fasin olsem we oli stap long medel blong ol pipol ia, i mekem sol blong mi i harem nogud” (Alma 31:30). Hem i filim wan semmak samting afta we hem i kambak long misin blong hem long Ol Man blong Soram—hem i bin luk se “hat blong ol pipol i stat blong kam strong, mo oli stat blong kros from we trutok ia i strong, nao hat blong hem i harem nogud tumas” (Alma 35:15). ?Wanem nao Alma i mekem abaot wanem hem i bin luk mo filim? Simpol nomo. Hem i no slakem tingting blong hem, o tingting blong hem i no kam fasfas from situesen we wol i stap long hem. Be, “hem i bin mekem se ol boe blong hem oli mas kam tugeta, blong hem i save givim long wanwan long olgeta, wan afta wan, wok we hem i gat long saed blong ol samting blong stret mo gud fasin” (Alma 35:16). Hem i tijim olgeta se: “I no gat narafala rod o wei we bae God i sevem man, be nomo, long mo tru long Kraes. … Luk, hem i toktok blong trutok mo stret mo gud fasin” (Alma 38:9).
Sam Aedia blong Skripja Stadi blong Yuwan
Mi save bon long God bakegen taem mi stap putum tingting blong mi i stap daon mo taem mi stap sakem sin.
Sam nomo bae oli gat ol bigfala eksperiens olsem hemia blong Alma we i bin jenisim laef blong hem. Be i gat olgeta prinsipol, insaed long eksperiens blong hem, we yumi evriwan i save lanem samting aot long hem mo praktisim, from se evriwan long yumi i mas “bon long God” (Alma 36:23). So taem yu ridim Alma 36, lukaotem olgeta prinsipol we yu save praktisim. Eksampol. ?Olsem wanem nao wan we i bin bon long God i filim abaot sin? ?Abaot Jisas Kraes? Yu save lukaotem tu ol jenis we yu ting se yu save luk long ol bilif mo ol aksen blong wan we i bon long God.
Luk tu long Mosaea 5:7; 27:25–26; Alma 5:14; 22:15; Hileman 3:35; “Fasin blong Jenisim Laef,” Ol Topik blong Gospel, topics.ChurchofJesusChrist.org.
Jisas Kraes i pem praes from ol sin blong wol.
Bae yu luk se i gat sam samting we oli ripripitim long stori blong jenis blong laef blong Alma, we i stap long japta ia. Hemia i from se, Alma 36 i wan gudfala eksampol blong wan poem blong lanwis Hibru, we oli singaotem, chiasmus; insaed long hem, ol toktok mo ol aedia, oli presentem i folem wan oda, we i lidim man i go long stamba aedia, mo afta oli ripripitim long rives oda. Insaed long Alma 36, aedia we i stap long ves 3, oli ripitim long ves 27, aedia we i stap long ves 5 oli ripitim long ves 26, mo i gogo olsem. Stamba aedia, i mesej ia we i moa impoten long wan chiasmus. Luk sapos yu save faenem stamba aedia ia long ol ves 17–18. Luk olsem wanem we taem “tingting blong [hem] i fas long tingting ia,” nao hemia i tajem Alma mo i jenisim laef blong hem. ?Olsem wanem nao trutok ia i tajem yu? ?Wanem nao ol nara aedia we i bin ripit we yu faenem long skripja ia?
?Olsem wanem nao stori blong hem abaot fasin blong sakem sin mo fogivnes i givim insperesen long yu blong folem eksampol blong Alma mo tanem yu i go long Sevya?
Blong gat moa infomesen abaot chiasmus, luk long Book of Mormon Student Manual (Church Educational System manual [2009], 232–33).
Olgeta skripja, oli bin holemtaet olgeta “from wan waes stamba tingting.”
?Yu yu tingting finis abaot olsem wanem nao hem i wan merikel mo wan blesing blong gat olgeta skripja tedei? God “i trastem [yumi] wetem ol samting ia, we oli tabu” (Alma 37:14). Taem yu stap ridim Alma 37, lukaotem olgeta blesing we oli kam from se yumi gat olgeta skripja. ?Wanem eksperiens blong yu long olgeta blesing ia? ?Olsem wanem nao yumi save yusum ol skripja blong “soem paoa blong [God] long ol fiuja jeneresen? (Alma 37:18).
Long Alma 37: 38-47, Alma i komperem “toktok blong Kraes” long Liahona. Taem yu stap tingting long wanem hem i komperem ia, tingting long samfala wei we yu bin eksperiensem merikel mo paoa blong ol tijing blong Kraes “dei afta dei” (Alma 37:40).
Luk tu long D. Todd Christofferson, “The Blessing of Scripture,” Ensign o Liahona, May 2010, 32–35.
Ol skripja oli tijim yumi olsem wanem blong folem God.
“Tru long ol smol mo simpol samting, ol bigfala samting oli kam blong hapen.”
Samtaem, bae yumi filim se ol problem blong yumi oli bigwan tumas mo oli fasfas tumas, mekem se ansa blong olgeta i mas bigwan mo i mas fasfas tu. Be yet, plante taem, Lod i stap jusum “ol smol mo simpol samting” (Alma 37:6) blong save mekem wok blong Hem i kamtru, mo i save blesem laef blong ol pikinini blong Hem. Taem yu stap rid long Alma 37: 6–7, tingting hevi mo raetemdaon ol wei we yu bin luk se prinsipol ia i stap wok long laef blong yu. ?Wanem nao oli ol smol mo simpol samting we Lod i stap yusum blong blesem yu mo blong mekem wok blong Hem i kamtru?
Luk tu long Alma 37:41–46; Dallin H. Oaks, “Ol Smol mo Simpol Samting,” Ensign o Liahona, Mei 2018, 89–92.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Alma 36:5–26
Nomata eksperiens blong Alma i wan we i bigwan, fasin we hem i jenisim laef blong hem i soemaot plante prinsipol we i blong yumi evriwan tu. Invaetem wanwan memba blong famli blong jusum wan ves long Alma 36:5–26 we i stap tijim fasin blong stap “bon long God.” ?Wanem nao yumi lanem aot long ol ves ia? Maet ol memba blong famli oli save serem olsem wanem oli bin praktisim olgeta prinsipol ia we Alma i tokbaot.
Alma 36:18–21, 24
?Olsem wanem nao yumi save yusum ol ves ia blong helpem wan blong luk se, fasin blong sakem sin, i wan eksperiens we i givim glad, be i no givim fraet? ?Olsem wanem fasin blong sakem sin i givim insperesen long yumi blong save serem gospel wetem ol narafala man?
Alma 37:6–7, 38–46
?Wanem nao sam long ol “smol mo simpol samting” (Alma 37:6) we i mekem se ol gudfala bigfala samting oli hapen insaed long laef blong yumi? ?Long wanem wei toktok blong Kraes i semmak long Liahona? ?Olsem wanem nao yumi helhelpem yumi blong wok strong moa blong stadi long ol skripja?
Alma 37:35
?From wanem hem i waes blong lanem blong stap obei long ol komanmen taem yumi stap yangfala?
Alma 38:12
?Famli blong yu i save se wanem ia wan rop blong animol? Bambae yu save soem wan pikja blong wan kaen rop ia blong kontrolem hos mo tokbaot olsem wanem oli yusum blong kontrolem wan animol. ?Wanem nao i minim blong stap kontrolem ol strong filing blong yumi? ?Olsem wanem nao taem yumi stap kontrolem ol filing blong yumi bae i helpem yumi blong “stap fulap long lav?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Raetemdaon Ol Filing blong Yu. Taem yu raetemdaon ol tingting mo filing we i kam long Spirit, yu stap soem long Lod se yu gat strong tingting long daereksen blong Hem, mo bambae Hem i blesem yu wetem moa revelesen we bae i kam oltaem. Taem yu stap stadi, raetemdaon ol tingting blong yu. (Luk long Teaching in the Savior’s Way, 12, 30.)
Wan Enjel i Kamkamaot long Alma mo Ol Boe blong Mosaea, i kam long Clark Kelley Price