27 Julae–2 Ogis. Alma 39-42: ‘Bigfala Plan blong Hapines’” Kam Folem Mi—Blong Wanwan Man, Woman mo Famli: Buk blong Momon 2020 (2020)
27 Julae–2 Ogis. Alma 39-42,” Kam Folem Mi—Blong Wanwan Man, Woman mo Famli: 2020
Woman, ?Yu Yu Krae From Wanem? i kam long Mark R. Pugh
27 Julae–2 Ogis
Alma 39–42
“Bigfala Plan blong Hapines”
Taem yu stap stadi long Alma 39–42, Tabu Spirit i save givim yu ol niu tingting abaot ol samting we oli stap hapen long laef blong yu.
Raetemdaon Ol Filing mo Tingting blong Yu
Sapos wan we yu lavem i mekem wan series mistek, bae i had blong save olsem wanem blong help o mekem samting. Wan samting we i mekem se Alma 39–42 i impoten tumas, hem i we i soemaot olsem wanem, we, Alma—wan disaepol blong Kraes, we long wan taem i bin gat ol bigfala mistek blong hem blong hem i sakem sin from—i bin handelem kaen situesen olsem. Boe blong Alma, Korianton, i bin mekem sin long saed blong seks, mo Alma, olsem we hem i stap mekem oltaem, i bin trastem paoa blong tru doktrin blong leftemap tingting blong man i sakem sin (luk long Alma 4:19; 31:5). Long ol japta ia, yumi luk we Alma i tok stret i no agri nating wetem sin, mo yumi luk fasin blong hem we i kaen mo lav blong hem long Korianton. Mo long en, yumi filimsave tras blong Alma se Sevya “bae i kam blong tekemaot ol sin blong wol; yes, hem i kam talem gud nius blong fasin blong sevem man” long olgeta we oli sakem sin (Alma 39:15). Taem we Korianton, long en, i gobak long wok blong seves long God, (luk long Alma 49:30,) hemia i save givim yumi hop blong kasem fogivnes mo fasin blong pemaot man taem yumi stap “wari” (Alma 42:29) abaot ol sin blong yumiwan mo ol sin blong wan we yumi lavem.
Sam Aedia blong Skripja Stadi blong Yuwan
Sin long saed blong seks i wan rabis sin long ae blong Lod.
Blong mekem boe blong hem i savegud se sin long saed blong seks i wan bigfala sin, Alma i tijim se “ol samting ia oli wan rabis sin long ae blong Lod” (Alma 39:5). ?From wanem jastiti i impoten long yu? ?From wanem hem i impoten long Lod? Eksplenesen ia we i kam long Elda Jeffrey R. Holland, bae i save help:
“I klia se long medel blong ol wari blong Hem we i bigwan moa long saed blong laef long wol ia, hem i olsem wanem wan i kam insaed long wol ia, mo olsem wanem wan i kamaot long wol ia. Hem i putum ol strik limit long saed blong olgeta samting ia.
“ … Praevet laef blong man, Hem i putum i stap blong wan mared kapol, from se i bigfala simbol blong tu pipol i kam wan fulwan, tufala i kam wan fulwan tru long God we i odenem mo i talemaot olsem wanem i hapen. … Mared, hem i stap blong i rod blong wan man mo wan woman i kam joen. … Tufala i kam joen, mo i kam fulwan nao yumi stap yusum toktok ia sil blong talem se hemia i wan promes we i no save finis” (“Personal Purity,” Ensign, Nov. 1998, 76).
Tingting long kaonsel ia we Alma i bin givim long Korianton long Alma 39:8–15. ?Olsem wanem nao hemia i helpem yu blong andastanem moa abaot hamas loa blong jastiti i impoten, mo olsem wanem blong winim temtesen? Ol tijing blong Alma oli soem tu hamas Lod i wantem tumas blong fogivim yumi taem yumi sakem sin mo i gat hop blong yumi evriwan. Taem yu stap ridim Alma 39–42 long wik ia, lukaotem ol pruf se God i gat sore. ?Olsem wanem nao sore blong God i bin blesem yu?
Luk tu long “Fasin blong Stap Klin long Saed blong Seks,” Blong Ol Yut Oli Kam Strong, 35–37.
Bae mi laef bakegen long ded mo bae mi stanap long fored blong God blong Hem i jajem mi.
Taem Alma i luk se Korianton i bin gat ol kwestin abaot Laef Bakegen long Ded, hem i tijim Korianton long wanem i stap hapen afta we yumi ded. ?Wanem trutok nao Alma i stap tijim long ol japta 40–41 we bae i save helpem Korianton—mo eniwan we i bin sin—blong hem i andastanem hemia? Yu save oganaesem wanem yu lanem taem yu putum ol topik we Alma i bin tokbaot (olsem spirit wol, laef bakegen long ded, mo restoresen) mo afta, raetemdaon wanem Alma i stap tijim abaot wanwan long olgeta topik ia. ?Olsem wanem nao, we, taem yumi stap tingbaot olgeta trutok ia, i helpem yu taem yu filim se samting i temtem yu, o taem yu stap lukaotem blong kasem fogivnes?
Mi save faenem ansa long ol gospel kwestin blong mi wetem fet.
Samtaem, yumi save ting se ol profet oli save ansa long evri kwestin blong gospel. Be yu luk se truaot long japta 40, Alma i bin gat plante kwestin we i no gat ansa abaot laef afta long ded. ?Wanem nao hem i bin mekem blong faenem ol ansa? ?Wanem nao hem i bin mekem taem hem i no kasem wan ansa? Tingting long olsem wanem nao eksampol blong Alma i save helpem yu wetem ol kwestin blong gospel we yu gat.
Prea i wan wei we yumi save faenem ol ansa blong ol kwestin blong gospel.
Atonmen blong Jisas Kraes i mekem se i posibol blong gat plan blong pemaot man.
Korianton i bin biliv se panismen from ol sin, i no wan stret samting (luk long Alma 42:1). Be Alma i bin tijim hem se i gat wei blong ronwe long fasin “blong harem nogud tumas” we sin i stap putum yumi long hem: fasin blong sakem sin mo fet long Atonmen blong Jisas Kraes, we tufala tugeta, i gat sore long hem mo hem i stret (luk long Alma 42:15). Taem yu stap ridim Alma 42, lukaotem olsem wanem Atonmen blong Sevya i mekem se i posibol blong yu kasem sore mo no stilim jastis (ves 25). ?Wanem trutok nao yu faenem long japta ia we i save helpem yu blong filim sore blong Hem?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.
Alma 39:1–9
?Bae famli blong yu i lanem samting sapos yufala i toktok raon long loa blong jastiti? Sapos yes, tingting blong yusum olgeta risos ia folem nid blong famli blong yu: Alma 39:1–9; “Fasin blong Stap Klin long Saed blong Seks,” Blong Ol Yut Oli Kam Strong, 35–37; “Chastity,” Gospel Topics, topics.ChurchofJesusChrist.org; overcomingpornography.org; mo ol vidio ia “What Should I Do When I See Pornography?” mo “I Choose to Be Pure” (ChurchofJesusChrist.org). Tingting hevi long olsem wanem yu save helpem famli blong yu i andastanem ol blesing blong stap klin long saed blong seks, mo ol blesing blong gat praevet laef insaed long mared (eksampol, luk long vidio ia, “How to Talk to Your Kids about Intimacy,” long ChurchofJesusChrist.org).
Alma 39:9–15
?Wanem nao yumi lanem aot long ol ves ia abaot wei blong stap longwe long sin?
Alma 42:4
Yu save plei wan gem, we yu tekem ol pis pepa we oli raetem ol fasin blong Kraes long olgeta, o oli raetem ol prinsipol blong gospel, mo saksakem ol pis pepa ia raon long rum. Yu save luk hamas pis pepa ol memba blong famli oli save tekem long wan smol taem, afta, toktok raon long olsem wanem nao ol samting we oli raetem long ol pepa ia i save helpem yumi blong kam moa olsem God. ?Olsem wanem nao, “taem we oli givim” long yumi long wol ia i olsem smol taem ia we oli givim long gem ia? ?Olsem wanem yumi save yusum taem blong tes blong yumi long wol ia blong save kam moa olsem Sevya?
Alma 42:12–15, 22–24
Maet yu save soem rilesensip bitwin jastis mo sore taem yu yusum wan droing blong wan simpol skel blong toktok raon long ol kwestin olsem olgeta ia: ?Wanem i hapen long skel taem yumi mekem sin? ?Wanem nao jastis i askem yumi blong mekem skel ia i balens bakegen? ?Olsem wanem nao Sevya i stretem wanem jastis i askem, mo i mekem se i save gat sore?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Lukluk nomo long ol prinsipol we bae i blesem famli blong yu. Taem yu stap prea mo stadi long toktok blong God, askem yuwan: “?Wanem nao mi faenem long ples ia we bae i gat mining speseli long famli blong mi?” Lukaotem daereksen we i kam long Spirit taem yu stap tingting hevi long ol wei blong helpem famli blong yu blong faenemaot olgeta trutok ia.
Hem ia, Hem I Pikinini blong Mi i kam long Elspeth Caitlin Young