“17–23 Ogis. Hileman 1–6: ‘Strong Ston blong Ridima blong Yumi,’” Kam Folem Mi—Blong Wanwan Man, Woman mo Famli: Buk blong Momon 2020 (2020)

“17–23 Ogis. Hileman 1–6,” Kam Folem Mi—Blong Wanwan Man, Woman mo Famli: 2020

Pikja

ol wef we oli brok long ston

17–23 Ogis

Hileman 1–6

“Strong Ston blong Ridima blong Yumi”

Olgeta prinsipol we oli stap long aotlaen ia, oli save gaedem stadi blong yufala long Hileman 1–6, be yu no letem hemia i stopem yu blong mekem moa. Tabu Spirit bae i gaedem yu long ol trutok we yu nidim blong lanem.

Raetemdaon Ol Filing mo Tingting blong Yu

Buk blong Hileman i rekodem tugeta ol win mo ol nogud taem long medel blong Ol Man blong Nifae mo Ol Man blong Leman. Hem i stat wetem “wan bigfala trabol we i nogud tumas long medel blong ol pipol blong Ol Man blong Nifae” (Hileman 1:1), mo ol bigfala trabol ia oli gohed blong kam truaot long histri ia. Long ples ia, yumi stap rid abaot ol tingting blong politik, ol grup blong ol stilman, fasin blong sakemaot ol profet, mo hae tingting mo fasin blong no bilif we i stap truaot long graon. Be yumi faenem ol eksampol tu olsem Nifae mo Lihae, mo “ol pipol we tingting blong olgeta i stap daon moa,” we oli bin gotru mo laef, be tu, oli bin traehad long saed blong spirit (Hileman 3:34). ?Olsem wanem oli mekem samting ia? ?Olsem wanem nao oli bin stap strong taem we fasin blong laef i stat blong kamdaon mo i foldaon i go brokbrok? Long sem wei we eniwan long yumi i stap strong long “strong win” we devel i sendem blong “i foldaon long [yumi]”— taem yumi bildim laef blong yumi antap long “strong ston blong Ridima blong yumi, we i Kraes, Pikinini blong God, … we i wan fandesen we sapos ol man oli bildimap olgeta antap long hem, oli no save foldaon” (Hileman 5:12).

Pikja

stadi blong yuwan pikja bokis

Sam Aedia blong Skripja Stadi blong Yuwan

Hileman 1–6

Hae tingting i seperetem mi long Spirit mo paoa blong Lod.

Taem yu stap ridim Hileman 1–6—mo truaot long Buk blong Momon—bae yu luk we i gat wan paten long fasin blong Ol Man blong Nifae: Taem Ol Man blong Nifae oli stap stret mo gud, God i stap blesem olgeta mo mekem olgeta oli gat plante samting. Afta smol taem, oli kam blong gat hae tingting mo gat ol fasin nogud, oli mekem ol joes we i stap lidim olgeta blong oli go lus evriwan mo oli stap safa. Taem oli gat tingting i stap daon, mo oli gat insperesen ia blong sakem sin, God i stap blesem olgeta bakegen. Paten ia i stap ripripit plante taem, mekem se ol pipol oli singaotem “raon rod blong hae tingting.”

Taem yu stap rid, lukaotem ol eksampol blong raon rod ia. Yu save makem ol eksampol ia taem yu faenem olgeta. Hemia sam kwestin blong helpem yu blong andastanem paten ia mo luk olsem wanem hem i blong yu tu:

?Wanem pruf blong hae tingting nao yu luk long medel blong Ol Man blong Nifae,? (eksampol, luk long Hileman 3:33–34; 4:11–13). ?Yu yu luk sam sem kaen hae tingting ia long yuwan?
?Wanem nao ol risal blong gat hae tingting mo fasin nogud? (luk long Hileman 4:23–26). ?Wanem nao ol risal blong gat tingting i stap daon mo gat fasin blong sakem sin? (luk long Hileman 3:27–30, 35; 4:14–16).
?Wanem nao Hileman i wantem ol boe blong hem blong oli tingbaot? (luk long Hileman 5:4–12). ?Olsem wanem nao, we, taem yumi stap tingbaot olgeta trutok ia, i helpem yu blong stap longwe long fasin blong kam blong gat hae tingting?

Luk tu long Dieter F. Uchtdorf, “Pride and the Priesthood,” Ensign o Liahona, Nov. 2010, 55–58.

Hileman 3:24–35

Mi save kam tabu taem mi stap givim gud hat blong mi i go long God.

Long Hileman 3, Momon i tokbaot wan taem we Jos i bin stap kam antap bigwan mo i gat blesing i plante, mekem se ol lida oli bin sapraes (luk long ol ves 24–32). Long en, sam pipol oli kam blong gat hae tingting, mo sam narawan oli gro mo oli “moa strong long fasin blong olgeta blong putum tingting i stap daon, … oli mekem se hat blong olgeta i kam klin mo tabu” (Hileman 3:35). Luk long ol ves 34–35, wanem nao ol pipol we oli bin gat tingting i stap daon moa oli bin mekem blong oli kam tabu. ?Olsem wanem ol samting ia oli stap helpem yu blong kam moa tabu? Bae i save helpem yu blong save se, long Gaed long Ol Skripja (scriptures.ChurchofJesusChrist.org) i putum mining blong tabu, fasin blong mekem i kam olsem “Rod ia blong mekem wan i kam fri long sin, i klin gud, i klin, mo i tabu tru long Atonmen blong Jisas Kraes.” ?Wanem nao yumi filim insperesen blong go mekem folem eksampol blong olgeta disaepol ia? ?Wanem nao yu stap mekem blong kipim hat blong yu i stap long God?

Hileman 5:14–52

Fet blong mi i kam strong moa tru long “ol bigfala pruf we mi bin kasem.”

Elda Jeffrey R. Holland i bin talem long wan taem se, olgeta we oli traehad wetem fet blong olgeta: “yufala i gat moa fet bitim we yufala i ting se yufala i save gat; hemia i from wanem Buk blong Momon i stap singaotem se hem i “ol tru bigfala samting we oli bin kasem’ [Hileman 5:50]. … Frut blong stap laef folem gospel i kamaot klia insaed long laef blong ol Lata-dei Sent long evri ples” (“Lord, I Believe,” Ensign o Liahona, May 2013, 94). Taem yu stap ridim ol ves ia, tingting long wanem pruf Lod i bin givim long yu. Eksampol: Maet yu no harem voes blong Lod stret, be yu bin filim “wan slo toktok” we i kam long Tabu Spirit we “i go tru i go kasem sol”? (Hileman 5:30; luk tu long D&K 88:66). Maet yu bin stap long tudak, yu bin krae long Lod blong gat moa bigfala fet, mo yu “kam fulap wetem glad we toktok i no naf blong talem” (Hileman 5:40–47). ?Wanem nara eksperiens nao yu bin gat we oli bin mekem fet blong yu long Kraes mo gospel blong Hem i kam strong moa?

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.

Hileman 3:27–30

Taem profet Momon i raetemsot ol tabu histri ia, wanwan taem, hem i yusum sentens ia, “olsem ia yumi save luk,” blong poenemaot wanem nao oli ol impoten trutok. ?Wanem nao hem i bin wantem yumi blong luk long Hileman 3:27–30? Truaot long stadi blong yu long wik ia, bae yu wantem blong stop smol wanwan taem blong askem ol memba blong famli olsem wanem nao bae oli finisim sentens ia, “olsem ia yumi save luk se,” long saed blong wanem we oli bin ridim. ?Wanem ol trutok nao yumi wantem tokbaot moa?

Hileman 5:6–7

George A. Smith, we i bubuman we i ded blong Presiden George Albert Smith i bin kamkamaot long hem long wan drim mo i askem hem: “?Mi wantem save se yu yu mekem wanem wetem nem blong mi?” Presiden Smith i ansa: “Mi neva mekem eni samting wetem nem blong yu we bae yu sem from” (insaed long Teachings of Presidents of the Church: George Albert Smith [2011], xxvi). Afta we yu ridim Hileman 5:6–7, maet yu save toktok long ol memba blong famli abaot fasin blong stap tingbaot mo stap givim ona long ol nem we yumi stap tekem, wetem hemia blong Sevya.

Hileman 5:12

Wan wei blong helpem famli blong yu blong gat wan pikja blong wanem i minim blong gat “wan sua fandesen,” maet yu save bildim wan smol haos tugeta mo putum antap long ol defren kaen fandesen. Afta, yu save krietem wan “strong win” taem yu spre long wota long hem, o taem yu yusum wan fan o hea draea blong mekem win. ?Wanem i hapen long smol haos ia taem hem i stap antap long ol defren fandesen? ?Olsem wanem nao Jisas Kraes i “wan sua fandesen” long laef blong yumi?

Hileman 5:29–33

?Wanem eksperiens nao yumi bin gat long saed blong stap luksave voes blong God long laef blong yumi?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Stadi blong Yuwan

Yu mas save wet longtaem wetem yuwan. Wan fandesen blong fet, oli bildim wan pis afta wan pis. Sapos yu faenem se i gat samfala doktrin we oli had blong andastanem naoia, gat longfala tingting. Gat tras se bae yu andastanem taem yu stap bildimap fandesen blong yu long Jisas Kraes taem yu stap praktisim fet blong yu, mo taem yu wok strong wetem strong tingting blong stap stadi.