Tu Taosen Yang Strong Soldia, i kam long Arnold Friberg

10–16 Ogis

Alma 53–63

“God I Sevem Olgeta wetem Bigfala Paoa blong Hem”

Ol stori insaed long Alma 53-63 oli save helpem yu blong luk ol risal blong stap laef folem ol trutok blong gospel, o blong stap sakemaot olgeta. So taem yu stap ridim Alma 53–63, raetemdaon ol tingting mo filing we oli kam long yu mo tingting hevi long sam wei we yu save laef folem ol trutok ia we yu stap lanem.

Raetemdaon Ol Filing mo Tingting blong Yu

Taem oli komperem wetem ol ami blong Ol Man blong Leman, “ smol ami” blong Hileman” (Alma 56:33) we i gat 2,000 yang Man blong Nifae insaed long hem, i no save gat janis nomo blong stanap agensem olgeta. Olgeta, namba blong olgeta i smol, be ol soldia blong Hileman “evriwan oli yang tumas” mo “oli neva bin faet” (Alma 56:46–47). Long sam wei, situesen blong olgeta i semmak long yumi we, samtaem, yumi filim se namba blong yumi i smol, mo yumi harem se las dei faet ia agensem Setan mo ol paoa blong devel long wol, i bigwan tumas.

Be ami blong Hileman i bin gat sam samting we i gat moa paoa ova long Ol Man blong Leman, mo hemia i no namba o skil blong faet. Oli bin jusum Hileman, wan profet, blong lidim olgeta (Alma 53:19); “ol mama blong olgeta oli bin tijim olgeta, se sapos oli no gat tu tingting, oli strong fulwan, nao God bae i sevem olgeta” (Alma 56:47); mo “fet blong olgeta we i bigwan tumas long samting ia we ol mama blong olgeta i bin tijim olgeta blong bilif.” Olsem risal, oli bin kasem proteksen “from bigfala merikel paoa blong God” (Alma 57:26). I nomata we oli bin kasem kil long faet, “i no bin gat wan sol long olgeta we oli lus” (Alma 57:25). So taem laef i givim ol kil long saed blong spirit long wanwan long yumi, yumi mas gat strong paoa long tingting—mesej blong ami blong Hileman, i we, “i gat wan God we i stret, mo eni man we i no gat tu tingting, God bae i sevem olgeta wetem bigfala paoa blong hem” (Alma 57:26).

Sam Aedia blong Skripja Stadi blong Yuwan

Alma 53:10–22; 56:43–48, 55–56; 57:20–27; 58:39–40

Taem mi stap praktisim fet long God, bae Hem i blesem mi tru long bigfala paoa blong Hem.

Ol merikel stori, olsem ol viktri blong ol yang soldia blong Hileman, oli had blong tekem i kambak long yumi, from se yumi luk se bae i no save hapen. Be wan risen from wanem ol kaen stori olsem oli stap insaed long ol skripja, i blong soem long yumi se, taem yumi gat fet, God i save wokem ol merikel insaed long laef blong yumi. Taem yu stap rid abaot ol strong yang soldia ia long ol ves ia, lukaotem sam samting we i soem olsem wanem nao oli bin praktisim fet blong olgeta long God, wanem i mekem fet blong olgeta i strong tumas olsem, mo wanem i mekem ol merikel ia oli posibol: Alma 53:10–22; 56:43–48, 55–56; 57:20–27; mo 58:39–40. Tebol we i stap i talem wan wei we yu save raetemdaon wanem we yu faenem.

Ol fasin blong ol soldia blong Hileman:
Wanem oli tijim long olgeta:
Wanem oli mekem:
Ol blesing we oli kasem:

Afta we yu stadi long ol ves ia, ?wanem nao yu filim insperesen blong mekem blong stap praktisim fet blong yu?

Hileman i tokbaot rol blong ol mama blong mekem fet blong ol yang strong soldia i kam strong moa (luk long Alma 56:47–48; 57:20–27). ?Wanem rol nao ol memba blong famli mo ol narawan oli gat blong stap bildimap fet? ?Wanem nao yu save mekem, blong mekem fet blong famli blong yu mo ol fren blong yu, i kam strong moa?

Oli No Bin Gat Tu Tingting, i kam long Joseph Brickey

Alma 58:1–12, 31–37; 61

Mi save jusum blong tingting moa gud samting aot long ol narawan mo no luk se man i mekem nogud long mi.

Tugeta, Hileman mo Pahoran, tufala i gat gud risen blong harem nogud from man i mekem nogud long tufala. Hileman i no stap kasem inaf sapot blong ol ami blong hem, mo Pahoran, hem, Moronae i rong mo stap poenem fingga long hem, se hem nao i stap holemtaet sapot ia (luk long Alma 58:4–9, 31–32; 60). ?Wanem nao i tajem yu abaot wanem oli bin mekem from hemia, we i stap long Alma 58:1–12, 31–37 mo Alma 61? ?Olsem wanem nao yumi save folem ol eksampol blong olgeta long ol sem situesen ia?

Elda David A. Bednar i bin tijim: “Long sam wei, mo long sam taem, bae i gat wan long Jos ia we bae i mekem, o bae i talem, wan samting we bae i save mekem yu harem nogud. Wan kaen samting olsem bae i hapen long wanwan mo evriwan long yumi—mo bae i hapen moa long wan taem. … Yu mo mi i no save kontrolem ol tingting o ol fasin blong ol narafala man. Be, yumi save jusum olsem wanem bae yumi fesem, o mekem samting. Plis, tingbaot se yu mo mi, yumi ol pipol we oli kavremap yumi wetem fridom blong mekem joes long wanem i gud o nogud, mo yumi save jusum blong yumi no filim nogud taem wan i mekem nogud long yumi” (“And Nothing Shall Offend Them,” Ensign o Liahona, Nov. 2006, 91).

Luk tu long Ol Proveb 16:32; Moronae 7:45; David A. Bednar, “Hem I No Stap Flas mo Tingting blong Hat blong Hem I Stap Daon,” Ensign o Liahona, Mei 2018, 30–33.

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.

Alma 53:10–17

Ol Antae-Nifae-Lihae oli bin mekem kavenan se bae oli nomo mekem blad i ron. ?Wanem kavenan nao yumi bin mekem wetem God? ?Wanem nao yumi stap ridim insaed long Alma 53:10–17 we i givim insperesen long yumi blong stap fetful moa long ol kavenan blong yumi?

Alma 53:20–21

?Olsem wanem yu save kam moa olsem ol yang man blong Hileman? Bae i help tu blong toktok raon long sam long ol sentens long ol ves ia, mo faenem mining blong olgeta; eksampol: “?i minim wanem blong “oli strong tumas … oli gat paoa mo oli no les”? ?Hem i minim wanem blong wokbaot long stret laef long fored blong [God]?

Alma 58:9–11, 33, 37

Long ol bigfala taem blong nid, ?bae yumi tanem yumi long Papa long Heven olsem we ol soldia blong Ol Man Nifae oli bin mekem? ?Olsem wanem God i ansarem prea blong olgeta? ?Olsem wanem Hem i bin ansarem ol prea blong yumi?

Alma 61:2, 9, 19

?Wanem yumi stap lanem aot long Pahoran long wei we yumi sapos blong mekem taem oli poenem fingga long yumi, be yumi no rong?

Alma 62:39–41

Hemia i wan lesen we i yusum wan samting we i save helpem famli blong yu blong andastanem se yumi save jusum blong ol tes blong yumi oli mekem “hat blong yumi i kam strong,” o yumi “mekem hat blong yumi i kam sofsof”: Putum wan poteto we i no tan, mo wan eg we i no tan insaed long wota we i stap boel. Poteto mo eg i ripresentem yumi, mo wota i ripresentem ol tes we yumi stap fesem. Taem poteto mo eg i stap boel, yufala i save toktok raon long samfala tes we famli i stap fesem. ?Wanem nao samfala wei blong fesem ol kaen tes olsem? Folem Alma 62:41, ?olsem wanem nao wei we yumi fesem ol tes ia, i tajem laef blong yumi? Afta we poteto mo eg i tan fulwan, katem openem poteto, mo brekem openem eg blong soem se semfala “tes” i mekem poteto i sofsof, be i mekem eg i kam strong. ?Wanem nao famli blong yumi i save mekem blong meksua se ol tes blong yumi oli mekem tingting blong yumi i stap daon mo i tekem yumi i go kolosap moa long God?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Letem ol pikinini oli soem wanem oli krietem. “Taem yu stap invaetem ol pikinini blong yu blong krietem wan samting we i go wetem wan prinsipol blong gospel, yu stap helpem olgeta blong andastanem gud moa prinsipol ia, mo yu givim olgeta wan samting we oli save holem blong tingbaot wanem we oli bin lanem. … “Letem olgeta oli bildim samting, oli dro, oli kala, oli raet mo oli krietem samting” (Teaching in the Savior’s Way,25).

Hem i tru, Sir, Evriwan I Stap mo Oli Kaontem Olgeta Evriwan, i kam long Clark Kelley Price