“24–30 Ogis. Hileman 7–12: ‘Tingbaot Lod,’” Kam Folem Mi—Blong Wanwan Man, Woman mo Famli: Buk blong Momon 2020 (2020)

“24–30 Ogis. Hileman 7–12,” Kam Folem Mi—Blong Wanwan Man, Woman mo Famli: 2020

Pikja

Nifae i stap prea insaed long wan taoa long garen

Pikja blong Nifae insaed long wan taoa long garen we i kam long Jerry Thompson

24–30 Ogis

Hileman 7–12

“Tingbaot Lod”

Nifae, Lihae, mo ol narawan oli bin “gat plante revelesen evri dei” (Hileman 11:23). Ol revelesen we i kam oltaem, i no blong ol profet nomo—hem i blong yu tu. Taem yu raetemdaon ol filing mo tingting blong yu, bae i save helpem yu blong kasem moa revelesen oltaem.

Raetemdaon Ol Filing mo Tingting blong Yu

Papa blong Nifae, Hileman, i bin askem strong long ol boe blong hem “tingbaot, tingbaot”: hem i bin wantem olgeta blong oli tingbaot ol bubu blong olgeta, tingbaot ol toktok blong ol profet, mo antap long evriwan, blong oli tingbaot “Ridima blong olgeta, we i Kraes” (luk long Hileman 5:5–14). Hem i klia we Nifae i bin tingbaot, from se hemia nao semfala mesej we hem i talem plante yia afta “we hem i no slak” (Hileman 10:4) blong talem long ol pipol. “?Olsem wanem nao yufala i save fogetem God blong yufala?” (Hileman 7:20), hem i askem. Evri traehad blong Nifae— stap prij, stap prea, blong mekem ol merikel, mo stap askem God blong i sendem hadtaem blong kaekae—oli blong traem helpem ol pipol blong oli tanem olgeta i go long God mo tingbaot Hem. Long plante wei, blong fogetem God i wan moa bigfala problem bitim hemia blong no save Hem; mo hem i isi blong fogetem Hem taem maen blong yumi i stap long “ol samting blong wol we oli blong nating,” mo taem klaod blong sin i blokem maen blong yumi (Hileman 7:21; luk tu long Hileman 12:2). Be olsem we seves blong Nifae i stap soem, hem i neva let tumas blong stap tingbaot mo “tanem [yumi] long Lod, God blong [yumi]” (Hileman 7:17).

Pikja

stadi blong yuwan pikja bokis

Sam Aedia blong Skripja Stadi blong Yuwan

Hileman 7–11

Ol profet oli talemaot tingting blong God.

I gat fulap profet we oli tokbaot truaot long Buk blong Momon, be Hileman 7–11 i wan gudfala ples blong lanem wanem nao hem i wan profet, wanem hem i mekem, mo olsem wanem yumi sapos blong tekem ol toktok blong hem. Taem yu stap ridim olgeta japta ia, luklukgud ol aksen blong Nifae, ol tingting blong hem, mo olsem wanem hem i mekem ol samting wetem Lod. ?Olsem wanem seves blong Nifae i helpem yu blong andastanem gud moa rol ia blong profet long taem blong yumi tedei? Hemia samfala eksampol. ?Wanem samting moa yu faenem?

Hileman 7:17–22:Ol profet oli taltalemaot fasin blong sakem sin mo oli givim woning long wanem i risal blong mekem sin.

Hileman 7:29; 9:21–36:Ol profet oli save, tru long revelesen we i kam long God, wanem nao ol pipol oli nidim blong harem.

Hileman 10:7:Ol profet oli kasem paoa blong silim pipol long wol mo long heven (luk long Matiu 16:19; D&K 132:46).

Hileman 10:4–7, 11–12:

?Olsem wanem nao ol ves ia oli jenisim wei we yu stap filim abaot profet blong yumi we i stap laef? ?Wanem nao hem i bin tijim i no longtaem i pas? ?Wanem nao yu stap mekem blong lisin mo blong folem daereksen blong hem?

Hileman 9–10

Ol saen mo ol merikel oli save help, be oli no naf blong bildimap wan fet we i save stap strong oltaem.

Sapos ol saen mo ol merikel oli bin inaf blong jenisim hat blong wan, nao bae evriwan long Ol Man blong Nifae bae oli jenisim laef blong olgeta tru long ol bigfala saen we Nifae i bin givim, we oli stap long Hileman 9. Be, wanem i hapen, i we “ol pipol oli divaedem olgeta long ol grup” (Hileman 10:1) from se plante oli “mekem hat blong olgeta i kam strong” (Hileman 10:15). ?Wanem wei nao olgeta we oli gat fasin nogud oli mekem taem oli luk ol saen mo ol merikel? (luk long Hileman 10:12–15; luk tu long 3 Nifae 2:1–2). ?Wanem nao i denja blong mekem ol saen oli stap olsem fandesen blong wan testemoni? (luk long “Signs,” Gospel Topics, topics.ChurchofJesusChrist.org).

Hileman 10:2–4

Blong stap tingting hevi, hem i blong stap invaetem revelesen i kam.

Sapos yu eva filim se man i wokbaot antap long yu, o yu filim se yu wari, o yu konfius, bae yu save lanem wan impoten lesen aot long eksampol blong Nifae long Hileman 10:2–4. ?Wanem nao hem i mekem taem hem i “harem nogud”? (ves 3).

Presiden Henry B. Eyring i tijim: “Taem yumi stap tingting hevi, yumi stap invaetem revelesen blong i kam tru long Spirit. Blong stap tingting hevi, long mi, hem i blong tingting mo blong prea, mo hemia nao mi stap mekem afta we mi ridim mo stadi gud long ol skripja” (“Serve with the Spirit,” Ensign o Liahona, Nov. 2010, 60). ?Olsem wanem nao yu save kam blong gat fasin blong stap tingting hevi? Blong rid abaot wan wei blong oltaem tingting hevi long toktok blong God, luk long mesej blong Brata Devin G. Durrant “My Heart Pondereth Them Continually” (Ensign o Liahona, Nov. 2015, 112–15).

Luk tu long Ol Proveb 4:26; Luk 2:19; 1 Nifae 11:1; 2 Nifae 4:15–16; 3 Nifae 17:3; Moronae 10:3; D&K 88:62.

Hileman 12

Lod i wantem mi blong tingbaot Hem.

Long Hileman 12, Momon, we i stap raetemsot ol histri ia, i talemsot sam long ol lesen we yumi save lanem aot long stori blong Nifae, long ol fas japta. Tingting blong yusum ol sot stori ia olsem wan janis blong luklukbak insaed long hat blong yuwan bakegen. Maet yu save mekem wan lis blong olgeta samting we Momon i talem se i stap mekem se ol pipol oli stap fogetem Lod. ?Wanem i stap helpem yu blong tingbaot Hem? ?Wanem jenis nao yu filim insperesen blong go mekem folem wanem we yu bin lanem?

Pikja

famli stadi pikja bokis

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.

Hileman 7–9

?Wanem sam samting we i semsemmak we yumi luk bitwin ol samting we Nifae i bin mekem mo wanem ol profet oli stap mekem tedei? ?Wanem nao profet blong yumi tedei i stap tijim? Maet yu save jusum sam kaonsel we profet i jes givim mo toktok raon, olsem wan famli, abaot ol wei we yufala i save folem kaonsel ia i gud moa.

Hileman 10:4–5, 11–12

?Olsem wanem nao Nifae i bin soem se hem i bin lukaotem blong mekem tingting blong Lod be i no tingting blong hemwan? ?Olsem wanem nao yumi save folem eksampol blong hem? ?Wanem nao sam wei we famli blong yumi i save folem blong lukaotem, long wan moa gud wei, blong mekem tingting blong Lod?

Hileman 11:1–16

?Wanem Nifae i bin wantem mo wanem nao hem i bin mekem abaot hemia? ?Wanem nao yumi lanem abaot prea aot long eksampol blong Nifae?

Hileman 11:17–23

?Wanem nao yumi lanem abaot brata blong Nifae, Lihae, insaed long Hileman 11:17–23? ?Huia bakegen yumi save long hem we i bin laef folem wan stret mo gud laef be man i no bin luksave hem?

Hileman 12:1–6

?Yu yu save tingting abaot wan lesen o wan aktiviti we yu yusum samting long hem blong helpem famli blong yu i andastanem wanem nao “i no stap strong” i minim? Bae yu save invaetem wan memba blong famli blong traem balensem wan samting antap long hed blong hem. Afta, yu save invaetem ol memba blong famli blong lukluk long Hileman 12:1–6 mo faenem sam risen from wanem ol pipol oli no save stap strong blong stap folem Lod. ?Olsem wanem nao yumi save stap mo no muvmuv olbaot tumas long saed blong spirit?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Fasin blong Yumi blong Stap Tij

Luklukbak. Hemia i wan aedia blong save helpem ol memba blong famli blong tingbaot ol skripja we oli stap lanem: Jusum wan ves we yu luk se i gat mining long yu, mo raetem mo hangem long wan ples long hom we ol memba blong famli bae oli luk oltaem. Invaetem ol nara memba blong famli blong wanwan i tekem taem blong jusum wan skripja blong raetem bigwan mo soem, mo toktok raon long hem taem famli i stap kam tugeta, olsem long taem blong kaekae, o long taem blong famli prea.