31 Ogis–6 Septemba. Hileman 13–16: ‘Ol Gudnius blong Bigfala Glad,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“31 Ogis–6 Septemba,” Kam Folem Mi—Blong Wanwan Man, Woman mo Famli: 2020
Samuel, Wan Man blong Leman Antap long Wol i kam long Arnold Friberg
31 Ogis–6 Septemba.
Hileman 13–16
“Ol Gudnius blong Bigfala Glad”
Taem yu stap raetemdaon ol tingting mo filing blong yu long wik ia, tingbaot olsem wanem olgeta prinsipol long Hileman 13–16 oli bildimap olgeta antap long ol nara samting we yu bin lanem, mo oli save mekem save blong yu long saed blong ol nara samting we yu bin lanem insaed long ol skripja oli kam strong moa.
Raetemdaon Ol Filing mo Tingting blong Yu
Fas taem we Samuel, Man blong Leman i bin traem blong serem “ol gudnius” long Sarahemla (Hileman 13:7), Ol Man blong Nifae we hat blong olgeta i strong tumas oli no bin wantem lisin long hem mo oli sakemaot hem. Bae yu talem se i olsem se oli bin bildim wan bigfala wol we man i no save gotru raon long hat blong olgeta, we i mekem se oli no save akseptem mesej blong Samuel. Samuel i bin andastanem hamas mesej we hem i tekem i bin impoten, mo hem i bin soem fet blong hem taem hem i bin folem komanmen blong God blong “gobak bakegen, mo profesae” (Hileman 13:3). Semmak olsem we Samuel i bin fesem, yumi evriwan i fesem ol wol taem yumi stap “mekem rere rod blong Lod” (Hileman 14:9) mo traehad blong folem ol profet blong Hem. Mo olsem Samuel, yumi tu, yumi talem witnes blong yumi abaot Jisas Kraes, “we i tru se bae hem i kam long wol” mo invaetem yumi evriwan blong “biliv long nem blong hem” (Hileman 13:6; 14:13). I no evriwan we bae i lisin, mo sam bae oli wok strong blong agensem yumi. Be olgeta we oli stap bilivim mesej ia wetem fet long Kraes, oli faenem se, i tru, i wan “gudnius blong bigfala glad” (Hileman 16:14).
Sam Aedia blong Skripja Stadi blong Yuwan
Lod bae i givim ol woning tru long ol profet blong Hem.
Long ol skripja, samtaem oli komperem ol profet long ol gadman antap long wan wol, o taoa, we i stap givim woning abaot ol denja we oli stap (luk long Aesea 62:6; Esikel 33:1–7).
Presiden M. Russel Ballard i bin tijim: “Tru long plante handred yia, ol profet oli bin mekem wok ia blong olgeta taem oli givim woning long ol pipol abaot ol denja we oli stap long fored blong olgeta. Ol Aposol blong Lod oli gat stret wok ia blong lukaotgud, blong givim woning, mo blong go aot blong helpem olgeta we oli stap lukaotem ansa long ol kwestin blong laef.” (“God I Stap long Stia,” Ensign o https://www.ChurchofJesusChrist.org/general-conference/2015/10/god-is-at-the-helm?lang=bis, Okt 2015).
Taem yu stap stadi mo tingting hevi long Hileman 13, yu save makem hamas woning Samuel i bin givim. Eksampol:?Wanem nao hem i stap tijim abaot fasin blong sakem sin? ?Abaot fasin blong putum tingting i stap daon mo fasin blong kam rij? ?Olsem wanem nao olgeta woning ia oli blong yu tu? ?Wanem woning nao ol profet blong tedei oli bin givim i no longtaem i pas? Mo ?Olsem wanem nao yu filim abaot olgeta woning ia?
Profet i poenem yumi i go long Jisas Kraes.
Lod i gat sore long olgeta we oli stap sakem sin.
Long fas ples, oli sendem Samuel i go long Ol Man blong Nifae blong hem i serem ol nius blong glad abaot taem we bae Sevya i kam (Luk long Hileman 13:7). From se oli no bin akseptem hem, hem i gobak wetem ol strong woning abaot ol jajmen blong God. Be insaed long olgeta woning ia oltaem, i bin gat wan invitesen blong sore blong man i sakem sin; faenem ol invitesen ia truaot long Hileman 13–15 (luk speseli long Hileman 13:6, 11; 14:15–19; 15:7–8). ?Olsem wanem nao ol invitesen ia, oli blong yu tu? ?Wanem nao yumi lanem aot long ol ves abaot fasin blong sakem sin? ?Wetaem nao yu bin filim sore ia blong God we i kam taem yu bin sakem sin?
Ol saen mo ol sapraes i save mekem fet i kam strong, hemia long olgeta we oli no mekem hat blong olgeta i kam strong.
Long Hileman 14, Samuel i bin eksplenem risen we Lod i bin givim ol saen blong taem we Sevya i bon i kam long wol, mo ol saen blong ded blong hem: “Wetem stamba tingting ia se bae yufala i save biliv long nem blong hem.” (Hileman 14:12). Taem yu stap stadi long Hileman 14, luk se ol saen blong taem we Sevya bae i bon i kam long wol oli stap long ol ves 1–8 mo ol saen blong ded blong Hem, oli stap long ol ves 20–28. ?Long tingting blong yu, from wanem nao ol saen ia oli ol wei we i wok blong soemaot taem we Jisas Kraes i bon i kam long wol, o taem we Hem i ded?
?Yu yu save tingting abaot eni saen we Lod i bin givim blong helpem yu blong biliv long Hem? Olsem: ol profet oli bin talem finis ol saen we bae oli kamaot bifo Seken Kaming blong Sevya (luk long “Saen blong Ol Taem,” Gaed long Ol Skripja, scriptures.ChurchofJesusChrist.org). ?I gat eniwan long ol saen ia we i kamtru long taem blong yumi tedei? Ol nara saen we oli stap lidim fet blong yumi long Jisas Kraes, maet oli moa blong yumiwan mo oli no ol bigfala samting we i bin hapen. Tekem smol taem blong tingting hevi long ol wei we yu bin witnesem han blong Hem long laef blong yu.
?Wanem woning nao oli givim abaot ol saen insaed long Hileman 16:13–23? ?Olsem wanem yu save stap longwe long ol kaen fasin ia blong ol pipol we oli tokbaot long ol ves ia?
Luk tu long Alma 30:43-52; Ronald A. Rasband, “Tru long Tabu Plan blong God,” Ensign o https://www.ChurchofJesusChrist.org/general-conference/2017/10/by-divine-design?lang=bis, Okt 2017.
Blong stap folem kaonsel blong profet i tekem mi kolosap long Lod.
Elda Neil L. Andersen i bin tijim: “Mi bin faenem se taem mi stap stadi wetem prea long ol toktok blong profet blong God, mo wetem longfala tingting, mi stretem tingting blong mi, long saed blong spirit, i go wetem ol insperesen tijing blong hem, nao fet blong mi long Lod Jisas Kraes, oltaem i kam antap. Sapos yumi jusum blong putum kaonsel ia i stap long saed mo disaed se, yumi nao, yumi save samting, bae fet blong yumi i safa mo lukluk ia blong yumi i go long samting we i no save finis, bae klaod i blokem” (“Profet blong God,” Ensign o Liahona, Mei 2018, 24–27). ?Olsem wanem ol toktok mo ol aksen blong Ol Man blong Nifae long Hileman 16 oli konfemem wanem we Elda Andersen i bin tijim? ?Wanem komitmen blong yuwan nao yu filim se yu sapos blong mekem long saed blong ol profet blong Lod mo ol mesej we oli stap givimaot?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting.
Hileman 13:3–4
?Wanem nao i givim insperesen long famli blong yu long wei we Samuel i mekem folem oda blong Lod, insaed long Hileman 13:3–4? Long taem blong famli stadi blong yu long wik ia, maet yu save leftemap tingting blong ol memba blong famli blong serem ol filing mo ol tingting we i “stap kam insaed long hat [blong olgeta].”
Hileman 13:38
Aedia ia se, man i save faenem hapines taem hem i “mekem ol nogud fasin,” i wan fasin we i hapen plante taem tedei. ?Long wanem wei nao, fasin blong laef folem gospel, i tekem tru hapines i kam long yumi?
Hileman 15:3
?Olsem wanem nao taem Papa long Heven i stretem yumi, hem i olsem se Hem i soem lav we Hem i gat long yumi? Invaetem ol memba blong famli blong putum tingting i stap daon, mo askem Lod wanem oli save mekem blong kam antap.
Hileman 15:5–8
?Wanem nao yumi lanem abaot taem we Ol Man blong Leman oli bin jenisim laef blong olgeta, we oli tokbaot long ol ves ia? ?Olsem wanem nao yumi save folem eksampol blong olgeta?
Hileman 16:1–3
?Bae famli blong yu i laekem blong aktem stori blong Samuel, Man blong Leman? Afta we yufala i ridim stori ia, mebi ol memba blong famli oli save tekem taem, wan afta wan, blong stanap antap long wan jea, mo ridim sam long ol profesi blong Samuel, mo ol nara memba blong famli oli priten blong sutum ol aro mo sakem ol ston long hem. Hemia i save helpem famli blong yu blong andastanem olsem wanem Samuel mo Ol Man blong Nifae oli bin filim. Ol yangfala pikinini oli save droem ol pikja blong stori ia. ?Olsem wanem nao, yumi, yumi save stap olsem Samuel mo serem gospel wetem ol narawan nomata ol fraet blong yumi?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Lukaotem sam paten we i stap. Wan paten, i wan plan, o wan eksampol we oli save yusum olsem wan gaed blong mekem wan wok. Insaed long ol skripja, yumi faenem ol paten we oli soem olsem wanem Lod i stap mekem wok blong Hem i kamtru, olsem blong sendem ol wokman blong Hem blong givim woning long ol pipol.
© The Book of Mormon for Young Readers, Samuel, Wan Man blong Leman, i kam long Briana Shawcroft