“10–16 Ogis. Alma 53–63: ‘God I Sevem Olgeta wetem Bigfala Paoa blong Hem,’” Kam Folem Mi—Blong Praemeri: Buk blong Momon 2020 (2020)
“10–16 Ogis. Alma 53–63,” Kam Folem Mi—Blong Praemeri: 2020
Tu Taosen Yang Strong Soldia, i kam long Arnold Friberg
10–16 Ogis
Alma 53–63
“God I Sevem Olgeta wetem Bigfala Paoa blong Hem”
Taem yu stap ridim Alma 53-63, tingting long wei we bae yu mekem ol stori blong ol japta ia oli laef long ol pikinini mo blong helpem olgeta blong oli lanem ol prinsipol blong gospel we wanwan stori i gat.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Blong rere ol pikinini blong oli lanem samting aot long Alma 53–63, invaetem olgeta blong serem wanem we oli rimemba abaot Ol Man Antae–Nifae–Lihae (luk long Alma 23–24). Blong helpem yu, soem wan pikja we yu stap yusum blong tijim stori, o mekem olgeta oli tingbaot wan aktiviti we oli bin mekem insaed long klas.
Stap Tijim Doktrin: Ol Smol Pikinini
Mi save stap fetful long God, olsem ol yangfala soldia.
Ol yang strong soldia blong Hileman oli wan bigfala eksampol long ol pikinini insaed long klas blong yu. Leftemap tingting blong ol pikinini blong traem blong kam olsem olgeta.
Samfala Aktiviti we Yu Save Mekem
-
Invaetem wan pikinini blong holem pikja insaed long aotlaen blong wik ia insaed long Kam Folem Mi—Blong Wanwan Man, Woman mo Famli taem yu stap talem sot stori blong ol yang soldia blong Hileman. Maet yu save yusum tu “Japta 34: Hileman mo ol 2000 Yang Soldia” (Ol Stori long Buk blong Momon,93–94, o vidio blong hem long ChurchofJesusChrist.org Letem ol pikinini oli serem wanem we oli save mo laekem abaot stori blong ol 2000 yang soldia.
-
Invaetem wan gel mo wan boe blong ripresentem ol mama mo ol papa blong ol yang soldia ia. Taem yu stap ridim Alma 56:27 mo 47–48, givim long ol pikinini ol samting blong oli holem we oli ripresentem olsem wanem ol mama mo papa blong olgeta i bin helpem olgeta soldia ia; ol samting ia oli wan basket kaekae, we i ripresentem “ ol kaekae” we ol papa oli bin sendem mo ol skripja oli ripresentem ol tijing blong ol mama. Askem ol pikinini blong serem ol samting we papa mo mama blong olgeta oli givim i go long olgeta, o tijim olgeta long hemia.
-
Ridim Alma 53:20–21, mo helpem ol pikinini blong oli andastanem se ol toktok olsem strong, strong paoa long tingting, paoa long bodi, mo tru oli minim wanem. Tokbaot olsem wanem ol yang soldia ia oli bin soem olgeta kwaliti ia. Mekem ol simpol nem tag blong ol pikinini we i ridim: “!Taem bae mi mi , bae mi olsem wan yang soldia!” Helpem ol pikinini blong fulumap waet spes ia wetem wan kwaliti we oli jusum aot long Alma 53:20–21.
-
Helpem ol pikinini blong finisim aktiviti pej blong wik ia. Helpem olgeta blong tingbaot ol wei we oli save kam olsem ami blong Hileman. Singsing tugeta “We’ll Bring the World His Truth” (Children’s Songbook, 172–73).
Taem mi wari, mi save trastem God.
Taem we hem mo ol ami blong hem oli fesem ol hadtaem, Hileman i bin trastem Lod. ?Wanem nao ol pikinini we yu stap tijim oli lanem aot long eksampol blong hem?
Samfala Aktiviti we Yu Save Mekem
-
Dro wan strong fes long bod, mo tokbaot wei we Hileman i bin wari from se ami blong hem i no gat inaf kaekae, o i no gat inaf man blong hem i gohed blong faet (luk long Alma 58:32–41). Askem ol pikinini blong serem abaot sam taem we oli bin wari. Ridim Alma 58:37 (o helpem wan pikinini blong ridim hemia), mo helpem ol pikinini blong oli jenisim fes long bod i kam wan fes we i stap smael blong soem olsem wanem Hileman i bin filim from se hem i trastem God. ?Wanem nao yumi save mekem taem yumi filim se yumi wari? Singsing tugeta long singsing ia, “Smiles” (Children’s Songbook, 267).
-
Long sam pis pepa, raetem sam samting we ol pikinini oli save wari abaot. Letem ol pikinini oli kam, wan afta wan, blong jusum wan pepa blong yu yu ridim, mo invaetem ol pikinini blong serem olsem wanem God i save helpem olgeta wetem wanwan long ol wari ia. Serem wan eksperiens we God i bin helpem yu taem yu bin wari.
Stap Tijim Doktrin: Ol Bigfala Pikinini
Alma 56:45–48; 57:21, 25–27; 58:39–40
Mi save stap fetful long God, olsem ol yangfala soldia.
?Wanem trutok nao, aot long stori blong ol yang soldia blong Hileman, i save helpem ol pikinini wetem ol jalenj we oli stap fesem?
Samfala Aktiviti we Yu Save Mekem
-
Askem ol pikinini blong serem wanem oli save abaot ol yang soldia ia. Maet yu save yusum “Japta 34: Hileman mo Ol 2000 Yang Soldia” (Ol Stori long Buk blong Momon, 93–94, o vidio blong hem long ChurchofJesusChrist.org Letem ol pikinini oli serem wanem oli laekem tumas abaot ol soldia ia.
-
Tugeta, ridim Alma 56:45–48; 57:21, 25–27; mo 58:39–40. Invaetem ol pikinini blong faenem mo serem ol toktok mo ol sentens aot long ol ves ia we oli tokbaot gud ol yang soldia ia. ?Wanem nao ol toktok mo sentens ia oli stap minim? ?Olsem wanem nao yumi save stap olsem ol yang soldia ia?
-
Ridim Alma 56:46–48 i go long ol pikinini, mo invaetem olgeta blong lisin long wanem ol mama blong ol yang soldia ia oli bin tijim ol pikinini blong olgeta abaot fet. ?Olsem wanem ol papa mo mama oli stap helpem ol pikinini blong olgeta blong gat fet? ?From wanem hem i impoten blong ol pikinini oli folem ol stret mo gud tijing blong ol mama mo papa blong olgeta mo hemia blong ol lida blong Jos long wan fasin “ blong folem stret “ olsem we oli talem? (Alma 57:21).
Sid blong Fet, i kam long Jay Ward
Mi save obei ol kavenan blong mi.
Ol yang soldia ia mo ol papa mo mama blong olgeta oli mekem ol kavenan we oli bin fetful blong mekem i hapen. Yu save yusum stori ia blong tijim ol pikinini long hamas nao ol kavenan oli impoten.
Samfala Aktiviti we Yu Save Mekem
-
Serem ol pikinini i go long trifala grup: wan i ripresentem Hileman, wan narawan i ripresentem ol pipol blong Amon, mo nambatri i ripresentem ol boe blong ol pipol blong Amon. Ridim Alma 53:10–17 tugeta, mo letem ol grup ia oli serem olsem olgeta ol pipol we oli ripresentem oli bin mekem mo kipim ol kavenan. Serem testemoni blong yu se Papa long Heven i blesem yumi taem yumi kipim ol kavenan blong yumi.
-
Long bod, raetem ol sentens we oli kamaot long Mosaea 18:8–10 o Doktrin mo Ol Kavenan 20:37 we i tokbaot ol samting we yumi stap mekem kavenan blong mekem taem yumi kasem baptaes. Mo tu, raetem sam nara sentens we i no go wetem ol kavenan. Askem ol pikinini blong raetem wan sekol raon long ol samting we yumi stap mekem kavenan blong mekem (letem olgeta oli yusum ol skripja sapos i nid). ?Olsem wanem nao yumi kasem blesing taem yumi stap obei long ol kavenan blong yumi? Leftemap tingting blong ol pikinini blong oli raetemdaon wanem oli bin mekem kavenan blong mekem wetem God, mo hangem lis blong olgeta long wan ples we bae oli luk oltaem.
-
Invaetem wan pikinini blong ridim Alma 56:27. ?Olsem wanem nao ol papa oli bin helpem ol boe blong olgeta, mo semtaem oli no brekem kavenan blong olgeta blong no go long faet? ?Hu nao i sapotem yumi blong kipim ol kavenan blong yumi?
Mi save jusum blong mi no kros.
Moronae i rong blong poenem fingga long Pahoran, be Pahoran i no kros, i talem: “mi glad long hat blong yu we i gud tumas” (Alma 61:9).
Samfala Aktiviti we Yu Save Mekem
-
Invaetem ol pikinini blong tingting long wan taem we oli bin talem se oli bin mekem wan samting we oli no bin mekem. Talem long olgeta olsem wanem nao samting ia i bin hapen long Pahoran (luk long Alma 60–61). Maet yu save yusum “Japta 35: Kapten Moronae mo Pahoran (Ol Stori long Buk blong Momon, 95–97, o vidio blong hem long ChurchofJesusChrist.org). Blong lanem abaot wei we Pahoran i mekem, wanwan i ridim wan ves aot long Alma 61:3–14. ?Wanem nao Pahoran i bin mekem taem Moronae i bin poenem fingga long hem? ?Wanem nao yumi lanem abaot fogivnes aot long eksampol blong Pahoran? ?Olsem wanem nao bae yumi save kam olsem hem?
-
Antap long bod, raetemdaon ?Wanem nao mi sapos blong mekem taem wan i kros wetem mi? Invaetem ol pikinini blong wan afta wan, oli kam blong raetem sam ansa antap long bod. ?Yufala i ting se Pahoran i ansa olsem wanem long kwestin ia? Askem ol pikinini blong raetem ol ansa ia long wan leta i go long olgetawan, we bae oli save ridim taem wan i kros long olgeta.
Stap Leftemap Tingting blong Lanem Samting long Hom
Leftemap tingting blong ol pikinini blong oli serem wetem ol famli blong olgeta wan wei we oli wantem kam olsem ol yang soldia ia. Mo tu, oli save talem tangkyu long papa mo mama blong olgeta blong stap tijim olgeta olsem we ol mama blong ol yang soldia oli bin mekem.
Stap Kam Antap long Fasin blong Yumi blong Stap Tij
Mekem ol pikinini oli stap storian o toktok raon long ol topik blong gospel. Samtaem, blong jenisim wei we ol samting oli stap insaed long klasrum i save helpem ol pikinini blong smat blong tekpat long ol toktok raon long klas. Eksampol, wanwan taem, yu save invaetem ol pikinini blong sidaon long sekol daon long floa, be i no antap long ol jea.