“13–19 Julae. Alma 32–35: ‘Planem Toktok Ia insaed long Hat blong Yu,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“13–19 Julae. Alma 32–35,” Kam Folem Mi—Blong Wanwan Man, Woman mo Famli: 2020
13–19 Julae
Alma 32–35
“Planem Toktok Ia insaed long Hat blong Yu”
Raetemdaon ol tingting mo filing we oli kam long Spirit, taem yu stap stadi long Alma 32–35. ?Wanem insperesen nao yu filim blong go mekem from olgeta samting ia we yu stap lanem?
Raetemdaon Ol Filing mo Tingting blong Yu
Long Ol Man blong Soram, prea i wan evri dei fasin we i nating, we oli stap mekem wan taem nomo long wan wik. Prea ia, i blong stanap long wan ples we evriwan i save luk yu, mo ripripitim ol toktok nating we i mekem yuwan nomo i harem gud. Wanem i mowas, hem i we Ol Man blong Soram oli nomo gat fet long Jisas Kraes—iven, oli talem se Hem i no stap—mo oli mekem i nogud long ol puaman (luk long Alma 31:9–25). Be long narasaed, Alma mo Amulek tufala i bin tijim klia se prea i go moa wetem wanem i stap hapen insaed long hat blong yumi, be i no long wan pablik ples. Mo sapos i no lidim man blong gat lav mo sore long olgeta long nid, hem i “blong nating nomo, mo i no gat yus” (Alma 34:28). Moa impoten long hemia, i soemaot fet long Jisas Kraes, we i givim fasin blong pemaot man tru long “wan sakrifaes we i no gat en mo i no save finis” (Alma 34:10). Kaen fet olsem, Alma i eksplenem, i bon, o i kam from man i gat tingting i stap daon, mo i “wantem blong biliv” (Alma 32:27). Hem i gro sloslo, olsem wan tri, mo i nidim blong oli fidim oltaem. Taem yu stap ridim Alma 32–35, yu save tingtingbak long fet blong yuwan, mo ol prea blong yuwan; ?yu yu filim se i gat eni fasin olsem hemia blong Ol Man blong Soram we i stap krip i kam insaed? ?Olsem wanem nao bambae yu fidim fet blong yu long Jisas Kraes blong hem i save kam olsem wan “tri we i gro i kam antap we i lid i go long laef we i stap oltaem”? (Alma 32:41).
Sam Aedia blong Skripja Stadi blong Yuwan
Mi save jusum blong putum tingting i stap daon.
Alma i kasem se olgeta Ol Man blong Soram we oli pua, oli bin gat tingting i stap daon, mo “oli rere blong harem trutok” (Alma 32:6). Taem yu stap ridim Alma 32:1–16, tingbaot olsem wanem yu stap rere blong harem toktok blong God.
?Wanem ol eksperiens we i mekem se yu yu gat tingting i stap daon? ?Yu bin mekem wanem blong yu putum tingting blong yu i stap daon moa? Olgeta ves ia oli save tijim yu olsem wanem blong jusum fasin blong putum tingting i stap daon, be i no blong oli fosem yu blong putum tingting i stap daon. Eksampol. ?Wanem i defren bitwin fasin blong stap “pua long saed blong ol samting blong wol,” mo blong stap “pua long hat”? (ves 3). ?Hem i minim wanem blong putum tingting [blong yuwan] i stap daon from trutok”? (ves 14).
Luk tu long “Humility,” Gospel Topics, topics.ChurchofJesusChrist.org.
Mi praktisim fet long Jisas Kraes taem mi planem mo fidim hat blong mi wetem toktok blong Hem.
?Yu ting se from wanem nao Alma i tokbaot fasin blong planem wan sid olsem ansa blong ol kwestin blong Ol Man blong Soram long saed blong wosip? ?Wanem sid nao Alma i stap tokbaot? (luk long Alma 32:28; 33:22–23). Taem yu stap ridim Alma 32:17–43, raetemdaon ol toktok, mo ol sentens we i helpem yu blong andastanem olsem wanem blong praktisim fet long Jisas Kraes mo toktok blong Hem. ?Wanem nao yu lanem abaot wanem hem i fet, mo wanem i no fet? Afta, taem yu stap ridim ol japta 33–34, lukaotem gud ol ansa blong kwestin ia blong Ol Man Soram: “?Olsem wanem nao bae [yumi] mas planem sid ia? (Alma 33:1).
Hemia wan nara wei blong stadi long Alma 32–34: Droem ol pikja we oli stap ripresentem ol defren taem blong wan sid we i stap gro. Afta, putum nem blong wanwan pikja wetem ol toktok we oli kamaot long Alma 32:28–43 we i helpem yu blong andastanem olsem wanem oli planem mo stap fidim hat blong yu wetem toktok blong God.
Luk tu long Matiu 13:3–8, 18–23; Hibrus 11; Neil L. Andersen, “Fet I No Kam Tru long Janis, Be Tru long Joes,” Ensign o https://www.ChurchofJesusChrist.org/general-conference/2015/10/faith-is-not-by-chance-but-by-choice?lang=bis, Okt 2015; “Faith in Jesus Christ,” Gospel Topics, topics.ChurchofJesusChrist.org.
Mi save wosipim God long prea, long eni taem, mo long eni ples.
Kaonsel blong Alma mo Amulek long saed blong wosip mo prea, i blong stretem sam samting we Ol Man blong Soram oli no bin andastanem gud (luk long Alma 31:13–23). Be ol trutok we oli stap tijim i save helpem yumi blong andastanem olsem wanem blong prea mo wosip long wan moa gud wei. Yu save mekem wan lis blong ol trutok abaot prea we yu save faenem long Alma 33:2–11 mo 34:17–29. Long saed blong lis ia, mekem wan lis blong ol samting we man i save mestem mo no andastanem gud abaot prea, we ol trutok ia oli stretem (luk long Alma 31:12–23). ?Olsem wanem nao ol samting we yu stap lanem aot long ol ves ia, oli save jenisim wei we yu stap prea o stap wosip?
?Huia nao hem i Sinos mo Sinok?
Sinos mo Sinok, oli ol profet we oli bin testifae abaot Jisas Kraes long taem blong OlTesteman, be ol tijing blong olgeta oli no stap long OlTesteman. Ol Man blong Nifae oli bin gat ol tijing blong ol profet ia, maet from se oli bin stap insaed long ol buk we oli wokem long bras we Nifae i bin karem long Leban. Oli tokbaot olgeta tu long 1 Nifae 19:10–12; Jekob 5:1; mo Hileman 8:19–20.
“Laef ia i taem blong … rere blong mitim God.”
Taem yu stap ridim Alma 34:30–41, tingting long wei we yu save “yusum gud moa taem blong [yu] long laef ia” (ves 33). ?Olsem wanem fasin blong sakem sin mo fasin blong save wet longtaem i helpem yu blong rere blong mitim God? ?I gat ol nara jenis we yu nid blong mekem we yu yu stap pusumbak taem blong mekem? Yu mas meksua se yu tekem aksen long eni kwaet toktok we Spirit i talem long yu.
Luk tu long Alma 12:24; Larry R. Lawrence, “?Wanem Nao I Stap blong Mi Mekem Yet?” Ensign o https://www.ChurchofJesusChrist.org/general-conference/2015/10/what-lack-i-yet?lang=bist, Okt 2015.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Alma 32:9-11; 33:2–11; 34:38–39
?Bae i olsem wanem sapos oli letem yumi stap wosip mo stap prea nomo long Sandei? Taem yu stap ridim ol ves ia tugeta, ol memba blong famli oli save toktok raon long hao nao oli save wosip evri dei, mo from wanem oli mas talem tangkyu from se oli save wosip evri dei.
Alma 32:28–43
I gat wan pikja blong wan tri we i stap wetem aotlaen ia; yu save yusum blong soemaot ol toktok blong Alma long ol ves ia. O, yu mo famli i save go wokbaot blong faenem ol plant we oli stap gro mo oli stap long ol defren step blong gro, mo ridim ol ves we oli stap long Alma 32 we i stap komperem wan plant we i stap gro long fet blong yumi. Maet wanwan memba blong famli i save planem wan sid mo toktok raon long wanem yumi nid blong mekem blong sid ia i gro. Afta, long ol wik afta, yufala i save jekem sid blong yufala, mo rimaenem wanwan long yufala long nid ia, blong oltaem fidim testemoni blong yufala, abaot Jisas Kraes.
Alma 33:2-11; 34:17-29
?Wanem nao ol ves ia oli stap talem abaot hao yumi save mekem blong kam antap long prea blong yumiwan mo famli prea?
Alma 34:31
?Wanem eksperiens nao i bin soem long yumi se, taem yumi sakem sin, yumi stat “wantaem” blong kasem ol blesing blong plan blong pemaot man?
Alma 34:33–35
?Famli blong yu i save se wanem ia blong stap pusumbak taem blong mekem wan samting? Ating wan i save serem sam eksampol we hem i bin pusumbak taem blong mekem wan samting, mo ol nogud risal we i bin kamaot long hemia. Hem i minim wanem blong “pusumbak taem blong yumi sakem sin?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Droem ol pikja. Yu save letem sam memba blong famli oli stap dro taem oli stap lanem samting aot long ol skripja. Olsem, maet bae oli laekem blong droem wan sid we i stap gro i kam wan tri; bae oli mekem hemia semtaem we oli stap stadi long Alma 32.
Mo from hadwok wetem strong tingting blong yufala, mo fet blong yufala, mo fasin blong yufala blong save wet longtaem wetem trutok ia blong givim gudfala kaekae long hem, … luk, i no longtaem bae yufala i save tekem frut blong hem, we praes blong hem i gudgudfala” (Alma 32:42).