13–19 Julae

Alma 32–35

“Planem Toktok Ia insaed long Hat blong Yu”

Kipim ol pikinini insaed long maen blong yu taem yu stap prea mo stadi long Alma 32–35. Taem yu stap mekem olsem, bae yu kasem ol tingting mo ol filing abaot wei blong stap tijim olgeta. Raetemdaon mo tekem aksen folem ol tingting ia.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Putum nem blong wanwan pikinini insaed long wan kontena. Askem wan blong pikimap wan long ol nem ia, mo invaetem pikinini ia blong serem wan samting we hem i bin lanem, i no longtaem i pas, aot long Buk blong Momon. Gohed olsem kasem taem evriwan i bin gat wan janis, be no fosem eniwan blong serem.

Stap Tijim Doktrin: Ol Smol Pikinini

Alma 32:28–43

Mi save helpem fet blong mi long Jisas Kraes i gro.

Ol sid, ol tri, mo ol frut oli ol samting we ol pikinini oli save gud we i save helpem olgeta blong oli andastanem ol samting we yumi no save tajem, olsem fet mo testemoni. Tingting hevi long hao nao yu save yusum fasin blong tingting blong Alma, blong save tijim olgeta pikinini.

Samfala Aktiviti we Yu Save Mekem

• Talem sot Alma 32:28–43; yu save yusum “Japta 29: Alma I Stap Tij abaot Fet mo Toktok blong God” (Ol Stori long Buk blong Momon, 81, o vidio we i go wetem we i stap long ChurchofJesusChrist.org). Soem ol pikja blong wan plant we i stap long ol defren level blong gro blong hem, mo askem ol pikinini blong helpem yu blong putum ol pikja ia long stret oda (luk long ol pikja we oli stap long aktiviti pej blong wik ia). Eksplenem se taem yumi stap laef folem gospel, testemoni blong yumi i stap gro—i stat smol olsem wan sid, be i save kam bigwan olsem wan tri.

• Soem wan sid long ol pikinini, mo ridim, long olgeta, ol fasfala laen blong Alma 32:28. Talem long ol pikinini se toktok blong God i olsem wan sid. Askem olsem wanem nao yumi stap helpem wan sid blong i gro. Letem ol pikinini oli priten blong planem wan sid, blong oli givim wota, mo helpem sid ia blong gro. Poenemaot se yumi no save luk sid afta we yumi planem, be yumi save se hem i stap, mo i stap gro; yumi no save luk Papa long Heven mo Jisas Kraes tu, be yumi save se Tufala i ril mo Tufala i lavem yumi. Helpem ol pikinini blong oli tingting long ol samting we oli save mekem blong helpem fet blong olgeta long Jisas Kraes i gro.

• Droem wan tri antap long bod, mo letem ol pikinini oli ademap wan lif o wan frut evri taem oli tingting long wan samting we oli save mekem blong helpem fet blong olgeta long Jisas Kraes i gro. Invaetem olgeta blong mekem ol simpol aksen blong ripresentem ol samting we oli bin tingting long olgeta.

Alma 33:2–11; 34:17–27

Papa long Heven i harem mi taem mi stap prea.

Ol Man blong Soram oli bin stap prea wan taem long wan wik, mo oli bin stap yusum ol semfala toktok evri taem (luk long Alma 31:22–23). Alma mo Amulek, tufala i bin tijim se yumi save prea eni taem, abaot eni long ol nid blong yumi long saed blong spirit o blong laef blong wol ia.

Samfala Aktiviti we Yu Save Mekem

• Ridim ol sentens we yu bin jusum aot long Alma 33:4–11 we oli tokbaot ol ples we yumi save prea, mo helpem ol pikinini blong oli tingbaot sam ples we oli save go prea long hem. Afta, invaetem olgeta blong droem ol pikja blong olgetawan we oli stap prea long olgeta ples ia. Testifae se oli save prea long eni ples, iven sapos oli stap prea long hat blong olgeta nomo.

• Jusum ol sentens aot long Alma 34:17–27 we oli tokbaot ol samting we yumi save prea from, mo ridim olgeta sentens ia i go long ol pikinini. Helpem ol pikinini blong tingbaot samfala samting we oli save talem long Papa long Heven taem oli stap prea, mo invaetem olgeta blong droem ol pikja blong olgeta samting ia. Testifae se oli save toktok long Papa long Heven abaot eni samting we oli stap tingting long hem, o oli stap filim. Serem wan eksperiens we God i bin harem ol prea blong yu.

• Sing wan singsing we i stap tijim ol pikinini abaot prea, olsem “A Child’s Prayer” o “We Bow Our Heads” (Children’s Songbook, 12–13, 25). Helpem olgeta blong luksave wanem singsing ia i stap tij abaot prea.

Stap Tijim Doktrin: Ol Bigfala Pikinini

Alma 32:1–16, 27–28

Taem mi putum tingting i stap daon, Lod i save tijim mi.

Alma mo Amulek, tufala i bin gat sakses blong tijim Ol Man blong Soram we oli bin gat tingting i stap daon, mo oli bin rere blong harem toktok blong God. Tingting long wei we yu save leftemap tingting blong ol pikinini blong jusum blong gat tingting i stap daon.

Samfala Aktiviti we Yu Save Mekem

• Askem ol pikinini wanem oli tingbaot abaot wanem oli bin lanem long las wik abaot Ol Man blong Soram (luk long Alma 31:8–24). Talem bakegen long olgeta se wan risen from wanem Alma i bin wari long olgeta, i from hae tingting blong olgeta (luk long Alma 31:24–28). Ridim tugeta Alma 32:1-5, mo askem ol pikinini blong talemsot wanem i bin hapen long Ol Man blong Soram we oli bin pua. Afta, invaetem ol pikinini blong ridim ol ves 12–13 blong faenemaot from wanem Alma i bin filim se i wan gud samting blong oli sakemaot Ol Man blong Soram aotsaed long ol haos blong prea (o jos) blong olgeta. ?Wanem nao sam long ol blesing we oli kam taem yumi gat tingting i stap daon?

• Helpem ol pikinini blong oli faenem mining blong Tingting i stap daon o Fasin blong gat tingting i stap daon insaed long Gaed long Ol Skripja o insaed long wan diksonari. ?Wanem nao ol nara wei blong talem mining blong ol toktok ia we oli save faenem insaed long Alma 32:13–16? Invaetem olgeta blong tingting long ol defren wei blong komplitim wan sentens olsem: “mi mi gat tingting i stap daon taem we mi .”

Alma 32:26–43

Testemoni blong mi abaot Jisas Kraes i stap gro taem mi fidim testemoni ia.

Helpem ol pikinini we yu stap tijim blong oli faenem wanem oli save mekem blong “planem” toktok blong God insaed long hat blong olgeta.

Samfala Aktiviti we Yu Save Mekem

• Soem wan strong samting, (olsem wan ston) blong i ripresentem wan hat we i gat hae tingting, o wan hat we i strong, mo soem wan samting we i sofsof (olsem graon) we i ripresentem wan hat we i sofsof, o wan hat we i stap daon. Letem ol pikinini oli filim o tajem tufala samting ia. Afta, soem long ol pikinini wan sid blong i ripresentem toktok blong God. Invaetem olgeta blong traem pusum sid ia i go long samting ia we i strong, mo afta, insaed long hemia we i sofsof. Ridim tugeta Alma 32:27–28, mo tokbaot se i minim wanem blong “akseptem” (ves 27) toktok blong God i stap insaed long hat blong yumi.

• Taem yufala i stap ridim Alma 32:26–43 tugeta, stop wanwan taem mo invaetem ol pikinini blong droem wan pikja blong sid o plant ia we skripja i tokbaot—eksampol, wan sid o wan sid we i gro (ves 28), wan plant we i stap gro (ves 30), mo wan bigfala plant we i tekem frut (ves 37). Leftemap tingting blong olgeta blong putum nem long ol pikja blong olgeta wetem ol refrens we i kamaot long Alma 32. ?Olsem wanem nao, blong fidim wan sid, i olsem blong fidim testemoni blong yumi abaot Jisas Kraes? ?Olsem wanem nao yumi stap fidim testemoni blong yumi? Invaetem ol pikinini blong oli tingting, insaed long maen blong olgeta, long olsem wanem nao testemoni blong olgeta i stap gro, mo wanem bae oli mekem blong fidim testemoni blong olgeta.

Alma 33:2–11; 34:17–27

Papa long Heven i harem mi taem mi stap prea.

Ol Man blong Soram oli bin gat sam rong tingting abaot prea, mo sam long ol rong tingting ia, yumi stap luk yet tedei. Alma mo Amulek, tufala i bin tijim ol trutok we oli gat paoa blong save winim olgeta rong tingting ia.

Samfala Aktiviti we Yu Save Mekem

• Helpem ol pikinini blong luklukgud long Alma 33:2–11 blong faenem ol impoten toktok mo sentens we i go wetem prea we oli stap ripripitim. ?Wanem nao ol toktok mo sentens ia oli stap tijim yumi abaot prea?

• Helpem ol pikinini blong oli mekem wan lis blong ol situesen we oli save stap long hem mo prea, wetem tu olgeta ia we oli tokbaot insaed long Alma 33:4–10 mo 34:17–27 mo tu ol situesen insaed long laef blong olgeta. Invaetem ol pikinini blong serem ol eksperiens blong ol taem we oli bin prea mo filim se God i stap ansarem prea blong olgeta.

Stap Leftemap Tingting blong Lanem Samting long Hom

Sapos i posibol, givim long wanwan pikinini, ol sid blong oli tekem i gobak long haos, mo planem; hemia blong rimaenem olgeta blong helpem testemoni abaot Jisas Kraes, blong i gro. Leftemap tingting blong olgeta blong talem long ol famli blong olgeta wanem we oli bin lanem abaot fasin blong praktisim fet blong olgeta long Jisas Kraes.

Stap Kam Antap long Fasin blong Yumi blong Stap Tij

Testifae abaot ol blesing we Hem i promesem. Taem yu invaetem ol pikinini blong laef folem wan prinsipol blong gospel, talem long olgeta abaot ol promes we God i givim long olgeta we oli stap laef folem prinsipol ia (luk long Teaching in the Savior’s Way, 35).