Moronae I Stap Raet long Ol Buk we Oli Wokem long Gol, i kam long Dale Kilborn

2–8 Novemba

Momon 7–9

“Mi Toktok long Yufala Olsem se Yufala I Stap long Ples Ia”

Momon mo Moronae oli bin gat fet se bae histri blong tufala bae i givim insperesen long olgeta we bae oli stap laef long ol las dei. So taem yu stap ridim Momon 7-9, raetemdaon ol tingting mo filing we oli kam long yu abaot ol wei we yu save yusum wanem we yu stap lanem.

Raetemdaon Ol Filing mo Tingting blong Yu

Momon mo Moronae, tufala i bin save se bae i olsem wanem blong stap laef long wan wol we i gat fasin we i nogud. Long Moronae, blong stap hemwan, bae i wan samting we i had tumas afta we papa blong hem i ded long faet, mo afta we Ol Man blong Nifae oli ded evriwan. Hem i raetem: “Mi mi stap miwan nomo … Mi mi no gat ol fren o eni ples blong go” (Momon 8:3, 5). Maet ol samting oli stap, i luk se i nomo gat hop, be Moronae i bin faenem hop long testemoni blong hem abaot Sevya mo save blong hem se “ol stamba tingting we oli no save finis blong Lod bae oli gohed blong rol i go” Momon 8:22 Mo Moronae i bin save se wan ki rol blong olgeta stamba tingting ia we oli no save finis, Buk blong Momon nao bae i tekem rol ia—histri ia we hem i bin stap wok strong wetem strong tingting blong raetem finisim; histri ia we, wan dei, “bae i saen, aot long tudak i go,” mo i tekem plante pipol oli kam “long save abaot Kraes” (Momon 8:16; 9:36). Fet we Moronae i gat long ol promes ia, i mekem se i posibol blong hem i talemaot long olgeta we bae oli ridim buk ia afta, se: “mi toktok long yufala olsem se yufala i stap long ples ia,” mo “from mi save se bae yufala i gat ol toktok blong mi” (Momon 8:35; 9:30). Naoia, yumi gat ol toktok blong hem, mo wok blong Lod i stap rol i go, o muv i go, mo wan risen i we from, Momon mo Moronae, tufala i bin stap tru long misin blong tufala, i nomata se tufala i stap tufalawan.

Sam Aedia blong Skripja Stadi blong Yuwan

Momon 7

Mi mas biliv long Jisas Kraes mo mi mas tekem mo folem gospel blong Hem.

Ol las toktok blong Momon we hem i bin raetemdaon, oli stap long Momon 7, oli go long olgeta laen blong Ol Man blong Leman long ol las dei ia, be oli gat ol trutok we oli blong yumi evriwan. ?Wanem nao mesej blong Momon i stap tijim yu abaot Jisas Kraes mo gospel blong Hem? ?From wanem nao Momon i jusum mesej ia blong putum long en blong ol raeting blong hem?

Momon 7:8–10; 8:12–22; 9:31–37

Buk blong Momon i impoten tumas.

Presiden Russel M. Nelson i bin askem: “?Sapos oli givim ol daeman mo ol rij ston, o Buk blong Momon, wijwan nao bae yu jusum? Yu ones, ?wijwan nao i moa impoten long yu? (“Buk blong Momon:?Bae Laef blong Yu I Olsem Wanem Sapos Yu No Gat Buk Ia? Ensigno https://www.ChurchofJesusChrist.org/general-conference/2017/10/the-book-of-mormon-what-would-your-life-be-like-without-it?lang=bis, Okt 2017).

Momon mo Moronae, tufala i save se histri we tufala i bin stap kipim, bae i impoten tumas long dei blong yumi tedei, mekem se tufala i bin mekem ol bigfala sakrifaes blong rere mo protektem histri ia. Taem yu stap ridim Momon 7:8–10; 8:12–22; mo 9:31–37, tingting se from wanem histri ia hem i impoten tumas long taem blong yumi tedei. Yu save faenem sam niu tingting long 1 Nifae 13:38–41; 2 Nifae 3:11–12; mo Doktrin mo Ol Kavenan 33:16; 42:12–13. ?Wanem ol eksperiens we i bin helpem yu blong save se Buk blong Momon i impoten tumas, o praes blong hem i bigwan tumas?

Ol raeting blong ol profet long Buk blong Momon oli blong yumi tu.

Momon 8:26–41; 9:1–30

Buk blong Momon ia, oli bin raetem blong yusum long dei blong yumi.

Jisas Kraes i bin soem long Moronae wanem bae i hapen taem bae Buk blong Momon i kamaot (luk long Momon 8:34–35), mo wanem Moronae i bin luk, i lidim hem blong givim ol klia mo strong woning blong taem blong yumi tedei. Taem yu stap ridim Momon 8:26–41 mo 9:1–30, tingting hevi se, ?i gat o i no gat, ol saen blong ol kaen fasin mo aksen olsem long laef blong yu? ?Wanem nao yu save mekem i defren?

Eksampol, insaed long Momon 9:1–30 i gat mesej blong Moronae we i ansa blong bigfala fasin blong no gat bilif long Jisas Kraes, we hem i bin luk se bae i hapen long taem blong yumi. Gat tingting blong raetemdaon wanem yu lanem aot long ol toktok blong hem abaot olgeta samting ia:

• Ol risal blong no stap biliv long Kraes (ol ves 1–6, 26)

• Hamas i impoten blong stap biliv long wan God blong revelesen mo wan God blong ol merikel (ol ves 7–20)

• Kaonsel we Moronae i gat blong givim long yumi (ol ves 21–30)

?Wanem nao yu lanem aot long Moronae we i save helpem yu blong tekem ol narawan oli kam kolosap long Papa long Heven mo Jisas Kraes?

Sam Aedia blong Famli Skripja Stadi mo Famli Haos Naet

Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:

Momon 7:5–7, 10; 9:11–14

?Wanem nao ol ves ia oli stap tijim yumi abaot plan blong Papa long Heven mo from wanem yumi nidim wan Sevya?

Momon 7: 8 –10

?Wanem nao yumi lanem long stadi blong yumi long Buk blong Momon long yia ia we i bin helpem bilif blong yumi long Baebol i kam strong moa? Blong statem wan toktok raon long topik ia, yu save ridim sam skripja tugeta, aot long Buk blong Momon mo Baebol we oli tijim ol semmak trutok, olsem long Alma 7:11–13 mo Aesea 53:3–5 o 3 Nifae 15:16–24 mo Jon 10:16.

Momon 8:1–9

?Bae i filim olsem wanem blong stap yuwan nomo, olsem Moronae i bin stap hemwan? ?Wanem i tajem yu moa abaot wok ia we hem i bin mekem i hapen?

Momon 8:12, 17–21; 9:31

Tingting blong ridim olgeta ves ia olsem wan famli, mo afta, ridim toktok ia we i kam long Elda Jeffrey R. Holland: “Ol pipol we oli no stret evriwan, oli evri pipol ia nao we God i bin wok wetem olgeta; hemia evriwan, be i no wetem Wan Stret Pikinini Ia Nomo blong Hem. Taem yu luk samting we i no stret evriwan, tingbaot se hemia i no kamaot long tabu wok ia blong Hem” (“Lord, I Believe,” Ensign o Liahona, May 2013, 94). ?From wanem nao hem i wan denja blong lukluk nomo long ol samting we oli no stret evriwan long ol narawan, wetem olgeta tu we oli bin raetem Buk blong Momon?

Momon 8:36–38

?Hem i minim wanem blong tekem nem blong Jisas Kraes long yumi? ?From wanem bae wan i save sem blong tekem long hem, nem ia blong Jisas Kraes? ?Olsem wanem bae yumi save talem ol testemoni blong yumi abaot Sevya wetem ful tras mo klia fasin?

Momon 9:16–24

Yumi nidim samfala spesifik samting blong mekem wan tes blong saens, o blong wan resipi i wok gud. Tingting blong mekem wan tes, o mekem wan fevret resipi olsem wan famli bifo yufala i ridim Momon 9:16–24. Taem yufala i stap ridim ol ves ia, (speseli ol ves 20–21), lukaotem “ol stret kaekae ia” we i mekem ol merikel oli posibol blong hapen. ?Wanem ol merikel yumi save luk long wol ia raon long yumi mo insaedlong ol famli blong yumi?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Stap Kam Antap long Stadi blong Yuwan

Lukluk i go long ol ofisol risos blong Jos. Sapos yu gat ol kwestin long saed blong gospel, ol bes ples blong kasem ansa, oli: prea, ol skripja, ol toktok blong ol profet we oli laef, mo ol nara ofisol buk we Jos i pablisim (luk long Teaching in the Savior’s Way, 17–18, 23–24).

Momon I Stap Raetemsot Histri long Ol Buk, i kam long Jon McNaughton