“9–15 Novemba. Ita 1–5: ‘Teremaot Vel Ia blong No Gat Bilif,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“9–15 Novemba. Ita 1–5,” Kam Folem Mi—Blong Wanwan Man, Woman mo Famli: 2020
Ol man blong Jared oli Aot long Babel, i kam long Albin Veselka
9–15 Novemba
Ita 1–5
“Teremaot Vel Ia blong No Gat Bilif”
Buk blong Ita i histri blong Ol Man blong Jared, we oli bin kasem graon blong promes plante handred yia bifo Ol Man blong Nifae. God i bin givim insperesen long Moronae blong putum insaed long Buk blong Momon, histri ia blong Ita, from se bae i stret blong yumi long taem blong yumi tedei. ?Long wanem wei nao yu filim se histri ia i go wetem laef blong yu?
Raetemdaon Ol Filing mo Tingting blong Yu
Hem i tru se ol wei blong God oli hae moa bitim hemia blong yumi, mo yumi mas, oltaem, putum tingting blong yumi blong i folem hemia blong Hem; Hem i stap leftemap tingting blong yumi blong tingting mo mekem samting blong yumiwan. Hemia i wan lesen we Jared mo brata blong hem, tufala i bin lanem. Eksampol, aedia ia blong travel i go long wan niu graon we i “moa gud bitim evri graon long wol,” i stat blong kam long maen blong Jared, mo Lod i bin “gat lav mo sore” long hem, mo i promesem blong givim wanem hem i wantem, mo talem, “Mo olsem ia nao, bae mi mekem long yu from longfala taem ia we yu bin prea long mi” (luk long Ita 1:38-43). Mo taem brata blong Jared i luksave se i tudak tumas insaed long ol baj ia we bae i tekem olgeta long promes graon ia, Lod i bin invaetem hem blong i traem talem wan wei, mo i askem wan kwestin we yumi, nao, yumi stap askem Hem oltaem: “?Wanem nao yu wantem se mi mas mekem?” (Ita 2:23). Mesej ia, i wantem talem se yumi no mas ting se God bae i givim oda long yumi long saed blong evri samting. Yumi save serem ol tingting mo aedia blong yumi wetem Hem, mo bae Hem i lisin, mo bae i givim konfemesen blong Hem, sapos no, bae Hem i givim advaes long yumi. Samtaem, wan samting ia nomo we i seperetem yumi long ol blesing we yumi lukaotem i “vel ia blong no gat bilif,” mo sapos yumi save “teremaot vel ia” (Ita 4:15), bae yumi sapraes long wanem Lod i wantem mekem blong yumi.
Sam Aedia blong Skripja Stadi blong Yuwan
Taem bae mi stap prea long Lod, bae Hem i gat lav mo sore long mi.
Ita 1:33–43 i tokbaot trifala prea blong brata blong Jared. ?Wanem nao yu lanem aot long ansa blong Lod long wanwan long olgeta prea ia? Tingting long wan taem we yu bin gat eksperiens long lav mo sore blong Lod taem yu bin stap prea long Hem long prea. Maet bae yu wantem blong raetemdaon eksperiens ia mo serem wetem wan we i nidim blong harem testemoni blong yu.
Mi save kasem revelesen long saed blong laef blong mi.
Presiden Russel M. Nelson i talem: “Mi plis long yufala blong kam antap long paoa blong yufala long saed blong spirit blong kasem revelesen. … Jusum blong mekem wok long saed blong spirit we bae i mekem yu gat presen we i Tabu Spirit mo harem voes blong Spirit plante taem moa, mo moa klia.” (“Revelesen blong Jos, Revelesen blong Laef blong Yumi,” Ensign o Liahona, Mei 2018, 93).
Taem yu stap stadi long Ita 2; 3:1–6; mo 4:7–15, ?wanem trutok nao yu save faenem we bae i helpem yu blong andastanem olsem wanem blong lukaotem revelesen blong yuwan? Long wan kala, yu save makem ol kwestin o ol wari blong brata blong Jared mo wanem hem i mekem abaot olgeta samting ia, mo long wan nara kala, yu save makem olsem wanem Lod i bin helpem hem mo i talemaot tingting blong Hem. ?Wanem nao i tajem yu abaot wei we brata blong Jared i bin storian wetem Lod,? mo ?wanem nao yu lanem aot long hemia long wei blong mekem revelesen i kam moa plante insaed long laef blong yu?
Lod bae i mekem mi mi rere blong krosem “bigfala dip solwota” blong mi.
Blong kasem graon ia blong promes, Ol Man blong Jared oli fesem wan bigfala problem: blong krosem “bigfala dip solwota” (Ita 2:25). Sentens ia, “bigfala dip solwota” i wan stret wei blong tokbaot ol tes mo ol jalenj blong yumi, mo hao oli semmak long wanem yumi stap filim. Mo samtaem, olsem we i hapen long Ol Man blong Jared, blong krosem “bigfala dip solwota” blong yumiwan, i wan wei ia nomo blong mekem wanem we God i wantem aot long yumi. ?Yu yu luk eni samting we i semmak long laef blong yu we i stap long Ita 2:16–25? ?Olsem wanem nao Lod i mekem yu yu rere from ol jalenj blong yu? ?Wanem nao Hem i stap askem yu blong mekem naoia blong yu rere from samting we Hem i nidim yu blong mekem long fiuja?
Oli krietem mi folem fasin mo pikja blong God.
Long Hil Selem, brata blong Jared i bin lanem plante abaot God mo abaot Hemwan bakegen. ?Wanem nao yu lanem aot long Ita 3 abaot huia i God long saed blong spirit mo long saed blong bodi blong Hem? ?Olsem wanem ol trutok ia oli helpem yu blong andastanem tabu aedentiti blong yu, mo tabu paoa blong yu?
Yumi evriwan, yumi ol pikinini blong God.
?Weswe? ?Brata blong Jared i fas man blong luk Lod?
God i bin soemaot Hemwan long ol nara profet bifo Hem i soemaot Hem long brata blong Jared (eksampol, luk long Moses 7:4, 59), ?so from wanem nao Lod i bin talem long hem: “Mi neva bin soemaot miwan long man”? (Ita 3:15). Elda Jeffrey R. Holland i talem wan wei blong eksplenem samting ia: “Kraes i stap talem long brata blong Jared: ‘mi neva bin soemaot miwan long man long wei ia, we mi mi no disaed long hemia, we i hapen nomo from fet blong man we i luk mi’” (Christ and the New Covenant [1997], 23).
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Ita 1:34–37
?Wanem nao yumi lanem aot long ol ves ia abaot fasin blong prea from ol narawan? ?Wanem nao ol narafala trutok abaot prea we ol ves ia oli stap soemaot?
Ita 2:16–3:6
?Wanem nao eksampol blong brata blong Jared i tijim yumi abaot wei blong faenem ol ansa long ol problem blong yumiwan, mo ol kwestin blong yumi? Mebi ol memba blong famli oli save serem ol eksperiens blong olgeta taem we oli bin lukaotem mo kasem ol ansa we oli kam long Lod.
Ita 4:11–12
Afta we oli ridim olgeta ves ia, ol memba blong famli oli save raetemdaon sam long ol evri dei samting we i save lidim tingting blong famli blong yu (olsem ol muvi, ol singsing, ol gem, o ol pipol); oli raetem long ol pis pepa mo putum olgeta insaed long wan smol dis. Afta, wan afta wan, oli tekem taem blong pikimap wan pepa mo toktok raon long hem se ?samting ia “i lidim [olgeta] blong mekem gud fasin” o no? (Ita 4:12). ?Wanem jenis nao famli blong yu i filim blong mekem?
Ita 5
Yu save haedem wan samting, o wan smol bokis wetem sam swit kaekae insaed long hem, mo invaetem wan memba blong famli blong luk insaed, mo givim long haf famli we i stap, sam tingting blong oli traem faenem wanem i stap insaed long bokis ia. Taem yufala i stap ridim Ita 5 tugeta, toktok raon se from wanem nao i impoten blong Lod i yusum ol witnes long wok blong Hem. ?Olsem wanem yumi serem witnes blong yumi abaot Buk blong Momon wetem ol narawan?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Yu mas rere oltaem. “Ol taem blong tij oli pas kwiktaem, mekem se yu mas holem evri janis taem ol taem blong tij ia oli kamkamaot. … Eksampol: wan yangfala we i mas mekem wan had desisen, maet hem i rere blong lanem olsem wanem blong kasem wan revelesen we i blong hemwan nomo” (Teaching in the Savior’s Way, 16).
?Yu Bin Luk Moa Bitim Hemia? i kam long Marcus Alan Vincent