Alma i baptaesem ol pipol long Ol Wota blong Momon

Minerva Teichert (1888–1976), Alma I Baptaesem Man insaed long Ol Wota blong Momon 1949–1951, oel peinting antap long mesonaet, 35⅞ x 48 inj. Brigham Yang Yunivesiti Miusiom blong Art, 1969

30 Novemba–6 Disemba

Moronae 1–6

“Blong Holemtaet Olgeta I Stap long Stret Rod”

Bifo yu stat blong mekem plan blong gat ol aktiviti blong ol pikinini, wetem prea, stadi long Moronae 1–6, mo lukaotem ol prinsipol mo ol ves we yu filim se ol pikinini oli nidim blong andastanem.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem wanem oli bin stap lanem abaot Moronae. Yu save yusum “Japta 53: Moronae mo Ol Tijing blong Hem” (Ol Stori long Buk blong Momon, 154-55, o vidio blong hem long ChurchofJesusChrist.org).

tijing pikja bokis

Stap Tijim Doktrin: Ol Smol Pikinini

Moronae 4–5

Mi tekem sakramen blong soem se, oltaem nomo, bae mi tingbaot Jisas Kraes.

Sakramen i save stap olsem wan tabu eksperiens long saed blong spirit—iven blong ol yangfala pikinini. ?Olsem wanem nao yu save helpem ol pikinini we yu stap tijim blong oli yusum taem blong sakramen blong tingting long Jisas?

Samfala Aktiviti we Yu Save Mekem

• Soem wan pikja blong ol pipol we oli tekem mo kakae sakramen (luk long Gospel Art Buk, namba 108). Askem ol pikinini blong oli talem long yu wanem nao i stap hapen long taem blong sakramen. ?Wanem nao yumi sapos blong mekem long taem blong sakramen?

• Invaetem tu memba blong wod blong kam long klas blong ridim Moronae 4:3 mo 5:2 i go long ol pikinini, mo serem from wanem oli tekem sakramen evri wik. Askem tufala blong givim tingting long ol pikinini abaot sam samting we oli save mekem blong helpem olgeta blong tingting long Jisas long taem blong sakramen mo blong oli tingbaot Hem oltaem.

• Singsing wan singsing we i stap helpem ol pikinini blong tingting abaot Jisas, olsem “Reverently, Quietly” (Children’s Songbook, 26). Askem ol pikinini blong oli praktisim blong sidaon kwaet olsem we bae oli mekem long taem blong sakramen.

Moronae 6:1–3

Mi save rere blong kasem baptaes.

Moronae i bin tokbaot ol pipol blong hem we oli bin baptaes long taem blong hem, i save helpem ol pikinini blong oli kasem impoten odinens ia tedei.

Samfala Aktiviti we Yu Save Mekem

• Ridim ol sentens blong Moronae 6:1–3 we oli tijim huia nao i save baptaes. Eksplenem ol toktok we ol pikinini oli no andastanem gud. Eksampol: wan mining blong “wan hat we i fulap wetem sore mo wan spirit we i wantem blong sakem sin,” i blong filim sore from ol sin blong yumi (Moronae 6:2). Tokbaot olsem wanem yu yu bin rere blong kasem baptaes, o askem wan we i jes baptaes blong eksplenem olsem wanem hem i bin rere. Helpem ol pikinini blong oli tingting long sam wei we oli save rere blong kasem baptaes wan dei.

• Soem ol pikja blong ol pipol we oli kasem baptaes (luk long Gospel Art Buk, ol namba 103, 104), mo letem ol pikinini oli tokbaot wanem we oli stap luk insaed long ol pikja ia. Helpem olgeta blong luk ol ditel, olsem wota mo ol waet klos. Askem ol pikinini se from wanem oli kasem baptaes, mo eksplenem from wanem yu jusum blong yu kasem baptaes.

Moronae 6:4–6, 9

Mi kasem blesing taem mi go long jos.

Ol pikinini we yu stap tijim, ?oli andastanem from wanem yumi mas go long jos evri wik? Moronae 6 i givim sam impoten risen.

Samfala Aktiviti we Yu Save Mekem

• Askem ol pikinini se from wanem oli laekem blong go long jos, mo helpem olgeta blong talem wan samting we yumi stap mekem long Jos. Ridim sam samting aot long Moronae 6:4–6, 9, mo invaetem olgeta blong aktemaot o droem ol pikja abaot olgetawan we oli stap mekem sam long ol samting ia (olsem blong stap prea, stap prij, stap singsing, mo tekem mo kakae sakramen).

• Helpem ol pikinini blong singsing wan singsing abaot fasin blong go long jos, olsem “When I Go to Church” (Children’s Songbook, 157). Talem long ol pikinini from wanem nao yu laekem tumas blong go long Jos mo olsem wanem nao hemia i bin blesem yu.

tijim samting pikja bokis

Stap Tijim Doktrin: Ol Bigfala Pikinini

Moronae 2–6

Tabu Spirit i wan we i tabu presen.

Oli tokbaot Tabu Spirit plante taem long Moronae 2–6. ?Olsem wanem nao yu save yusum ol japta ia blong helpem ol pikinini blong oli andastanem olsem Tabu Spirit i save helpem olgeta?

Samfala Aktiviti we Yu Save Mekem

• Askem ol pikinini blong faenem evri ves long Moronae 2–6 we i stap tokbaot Tabu Spirit o Spirit. Ridim wanwan long ol ves ia tugeta, mo askem ol pikinini blong listim daon long bod ol samting we oli lanem abaot Tabu Spirit. ?Olsem wanem Tabu Spirit i save helpem yumi?

• Talem long ol pikinini abaot wan taem we yu bin filim paoa blong Tabu Spirit, hemia long jos o long eni nara ples. ?Eksplenem olsem wanem yu bin save se hem i Tabu Spirit mo olsem wanem nao Hem i bin helpem yu? Invaetem ol pikinini blong serem eni eksperiens we oli bin gat wetem Tabu Spirit, mo leftemap tingting blong olgeta blong lukaotem paoa long Hem.

  yangfala gel i stap kasem wan blesing

  Presen ia we i Tabu Spirit, yumi kasem tru long fasin blong man i putum han antap long hed blong yumi.

Moronae 4–5

Mi tekem sakramen blong soem se, oltaem nomo, bae mi tingbaot Jisas Kraes.

Taem we ol pikinini oli andastanem se sakramen i tabu, bae i luk se bae oli tekem odinens ia wetem respek, mo bae oli filim moa kolosap long God long taem blong odinens ia.

Samfala Aktiviti we Yu Save Mekem

• Raetem ol sentens we oli stap long Moronae 4:3 mo 5:2 long ol defren pis pepa, mo askem ol pikinini blong putumbak ol sentens ia long stret oda. Folem ol ves ia, ?from wanem nao sakramen i impoten?

• Invaetem ol pikinini blong traem pikjarem se wan fren i kam long sakramen miting blong fas taem. ?Olsem wanem nao bae oli eksplenem long fren blong olgeta wanem nao hem i sakramen, mo from wanem nao bae yumi tekem mo kakae? Leftemap tingting blong olgeta blong yusum Moronae 4:3 mo 5:2 taem oli eksplenem samting.

• Askem ol pikinini blong serem ol samting we ol famli blong olgeta oli mekem long taem blong sakramen blong oli stap kwaet mo tingting abaot Jisas Kraes. ?Wanem nara aedia nao oli gat? Invaetem olgeta blong jusum wan long ol aedia ia mo blong oli setem wan gol blong spenem moa taem blong tingting abaot Sevya long taem blong sakramen.

Moronae 6:4–6, 9

Yumi go long jos blong tekem sakramen mo blong sapsapotem wanwan long yumi.

Ol toktok blong Moronae oli save helpem ol pikinini we yu stap tijim blong oli faenem moa bigfala stamba tingting blong kam long jos evri wik.

Samfala Aktiviti we Yu Save Mekem

• Raetem: ?From wanem yumi kam long Jos? I go long bod, mo askem ol pikinini blong kam raetem sam ansa. Invaetem olgeta blong faenem sam moa ansa long Moronae 6:4–6, 9 mo ademap olgeta long lis blong olgeta antap long bod. Invaetem ol pikinini blong serem olsem wanem oli kasem blesing from oli stap kam long jos. Letem olgeta oli rolplei se oli stap eksplenem long wan fren blong wan nara bilif se from wanem nao oli talem tangkyu blong stap memba blong Jos.

• Soem ol pikja o ol eksampol blong fidim kaekae long man. ?From wanem hem i impoten blong fidim ol bodi blong yumi? Tugeta ridim Moronae 6:4, mo askem ol pikinini se, long tingting blong olgeta, sentens ia “[oli] fidim olgeta wetem gudfala toktok blong God.” i minim wanem. ?Olsem wanem nao toktok blong God i fidim yumi?

• Invaetem wan long ol pikinini blong ridim toktok ia we i kam long Elda Jeffrey R. Holland mo toktok raon long wanem nao hemia i tijim abaot wei we yumi save fidfidim yumi: “Plante long ol pipol oli no kam long Jos blong stap lukaotem nomo sam niu samting long saed blong gospel, o blong luk ol olfala fren, we i nomata se evri samting ia oli impoten. Be oli kam blong lukaotem blong gat wan eksperiens long saed blong spirit. Oli wantem pis. Oli wantem se fet blong olgeta i kam strong, mo hop blong olgeta i kam niu bakegen. Long sot toktok, oli wantem blong oli fidim olgeta wetem gudfala toktok blong God, mo blong oli mekem olgeta oli kam strong moa tru long ol papa blong heven” (“A Teacher Come from God,” Ensign, May 1998, 26). ?Olsem wanem nao yumi helhelpem wanwan long yumi blong fidim yumi long jos?

lanem samting pikja bokis

Stap Leftemap Tingting blong Lanem Samting long Hom

Leftemap tingting blong ol pikinini blong toktok wetem ol famli blong olgeta abaot ol risen from wanem oli laekem blong kam long jos evri wik.

Stap Kam Antap long Fasin blong Yumi Blong Stap Tij

Sapotem ol papa mo mama. Wetem prea, lukaotem ol wei blong sapotem ol papa mo mama blong ol pikinini we yu stap tijim. ?Olsem wanem nao yu save sapotem ol traehad blong olgeta blong tijim gospel long ol pikinini blong olgeta? Eksampol, yu save toktok long ol papa mo mama abaot ol nid mo ol intres blong ol pikinini blong olgeta, o serem, wetem olgeta, wanem we ol pikinini blong olgeta oli stap lanem long klas (luk long Teaching in the Savior’s Way, 25).

aktiviti pej: Taem mi tekem mo kakae sakramen, mi stap tingbaot Jisas Kraes