“7–13 Disemba. Moronae 7–9: ‘Bae Kraes I Leftemap Yu,’” Kam Folem Mi—Blong Praemeri: Buk blong Momon 2020 (2020)
“7–13 Disemba. Moronae 7–9,” Kam Folem Mi—Blong Praemeri: 2020
Minerva Teichert (1888–1976), Moronae: Laswan long Ol Man blong Nifae, 1949–1951, oel peinting antap long mesonaet, 34¾ x 47 inj. Brigham Yang Yunivesiti Miusiom blong Art, 1969
7–13 Disemba
Moronae 7–9
“Bae Kraes I Leftemap Yu”
Wetem prea, stadi long Moronae 7–9; bae i invaetem paoa blong Tabu Spirit i kam long yu. Bae Hem i helpem yu blong andastanem ol nid blong ol pikinini long klas blong yu.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Mekem ol pikinini oli tingbaot wan samting we yu bin invaetem olgeta blong mekem long lesen blong las wik, o blong oli tingbaot wan samting we oli bin lanem wetem ol famli blong olgeta long wik ia. Invaetem olgeta blong serem wanem we oli lanem.
Stap Tijim Doktrin: Ol Smol Pikinini
Sapos mi gat fet, mi save mekem ol samting we Papa long Heven i nidim mi blong mekem.
Ol pikinini we oli gat fet long Jisas Kraes mo oli gat tras long paoa blong Hem, bae oli save mekem ol bigfala samting taem bae oli wok blong Hem.
Samfala Aktiviti we Yu Save Mekem
-
Ridim Moronae 7:33, mo invaetem ol pikinini blong stanap taem oli harem toktok ia “fet.” Eksplenem se yumi stap soem fet blong yumi long Jisas Kraes, taem we yumi stap obei long ol komanmen blong Hem. Helpem ol pikinini blong mekem wan lis, antap long bod, blong ol samting we Jisas i wantem olgeta blong mekem, olsem blong obei long papa mo mama blong olgeta, o talem trutok. Testifae se fet blong yu long Jisas Kraes, i save helpem yumi blong obei long ol komanmen.
-
Soem samfala pikja we oli stap soem wan we oli tokbaot long Buk blong Momon (o ol nara buk blong ol skripja) we oli stap mekem wan impoten samting from se hem i gat fet long Jisas Kraes (eksampol, luk long Gospel Art Buk, namba 19, 70, 78, 81). Helpem ol pikinini blong talem stori we pikja ia i soem. Talem long olgeta se, from se ol pipol ia oli bin gat fet long Jisas Kraes, nao oli bin kasem paoa blong mekem wanem Hem i bin nidim olgeta blong mekem.
Blong stap biliv long Jisas Kraes i save givim hop long mi.
I gat plante pipol long wol we oli filim se oli nomo gat hop. ?Olsem wanem nao yu save helpem ol pikinini we yu stap tijim, blong oli faenem hop long Jisas Kraes?
Samfala Aktiviti we Yu Save Mekem
-
Ridim mo eksplenem Moronae 7:41 long ol pikinini, mo askem olgeta blong oli leftemap han blong olgeta taem we oli harem wan samting we Momon i bin talem we yumi mas gat hop from. Talem long ol pikinini abaot hop we yu stap filim, mo hemia from Jisas Kraes.
-
Askem ol pikinini blong oli tingting long wan we oli save hem, we i stap gat wan hadtaem wetem wan samting. Invaetem ol pikinini blong dro wan pikja blong man o woman, o pikinini ia, we i mekem hem i rimemba blong gat hop long Jisas Kraes.
“Bigfala lav, hem i stret lav blong Jisas Kraes.”
?Wanem nao samfala eksperiens long laef blong yu we i save helpem ol pikinini blong oli lanem blong stap kaen long ol narawan, mo tritim olgeta wetem lav?
Samfala Aktiviti we Yu Save Mekem
-
Askem ol pikinini blong ripitim sentens ia wetem yu: “Bigfala lav, hem i stret lav blong Kraes” (Moronae 7:47). Helpem ol pikinini blong tingting abaot sam wei we Jisas Kraes i bin soem lav long ol narawan (ol pikja oli save help, olsem Gospel Art Buk, ol namba 55, 83, 84). ?Olsem wanem nao Hem i soem lav long yumi? ?Hu nao yumi save soem lav long hem olsem we Jisas i bin mekem? Eksampol, soem vidio ia “My Brother Hyrum” (ChurchofJesusChrist.org).
-
Invaetem ol pikinini blong dro wan pikja blong olgetawan we oli stap soem lav long wan narafala man. Givim tingting long olgeta se bae oli putum pikja blong olgeta long wan ples we bae i rimaenem olgeta blong lavem ol narawan olsem we Jisas i mekem.
Stap Tijim Doktrin: Ol Bigfala Pikinini
Mi kasem ol blesing taem we mi gat fet long Jisas Kraes.
Momon i bin wantem ol pipol blong save se ol merikel oli no stop taem we seves blong Sevya long wol ia i bin finis. Sapos we yumi gat fet long Jisas Kraes, yumi save, wetem help blong hem, mekem eni samting we Hem i nidim yumi blong mekem—we i tekem tu ol merikel samting.
Samfala Aktiviti we Yu Save Mekem
-
Helpem ol pikinini blong oli raetem long bod sam long ol “gud samting” we yumi stap kasem tru long gospel blong Jisas Kraes, olsem blong gat ol famli we oli no save finis, mo gobak long Papa long Heven, mo kasem fogivnes from ol sin blong yumi. Afta, invaetem ol pikinini blong oli ridim Moronae 7:21–22 mo 25, mo lukaotem olsem wanem yumi save kasem evriwan long ol gudfala samting ia. ?Olsem wanem yumi save soem fet blong yumi long Jisas Kraes mo long ol promes blong Hem?
-
Ridim Moronae 7:33 i go long ol pikinini, mo askem olgeta blong oli lisin long wanem yumi save mekem taem yumi gat fet long Jisas Kraes. Taem we i stret, serem ol eksperiens we yu bin gat taem we fet i bin helpem yu blong mekem wanem we God i bin wantem yu blong mekem. Helpem ol pikinini blong oli tingting mo oli serem sam eksampol aot long laef blong olgeta. ?Olsem wanem nao fet long Kraes i bin mekem samting i defren long ol eksampol ia?
Mi save gat hop long Jisas Kraes, iven long taem blong ol tes we oli had.
Momon mo Moronae, tufala i bin fesem ol strong situesen, be tufala i faenem hop long Sevya Jisas Kraes. ?Olsem wanem yu save helpem ol pikinini blong oli faenem hop long Kraes taem tingting blong olgeta i slak?
Samfala Aktiviti we Yu Save Mekem
-
Helpem ol pikinini blong oli raetem samfala problem se i save mekem ol pipol oli slakem tingting mo oli nomo gat hop. Invaetem ol pikinini blong ridim Moronae 7:40–41 mo 9:25–26, mo lukaotem wan samting we i save helpem wan we i filim se tingting blong hem i slak. Talem long olgeta olsem wanem nao Jisas Kraes mo gospel blong Hem oli bin helpem yu long ol taem we i bin had.
-
Invaetem ol pikinini blong raetem wan mesej i go long wan we i filim se tingting blong hem i slak, blong helpem hem blong hem i faenem hop long Kraes, olsem we Momon i bin mekem long boe blong hem long Moronae 9:25–26. Leftemap tingting blong ol pikinini blong yusum ol toktok mo ol sentens aot long ol ves ia long ol mesej blong olgeta.
-
Fulumap wan klia kontena wetem wota, mo slakem tu samting insaed long hem—wan we i flot mo narawan we i draon. Komperem samting we i flot long wan we i gat hop long Kraes. Tugeta, ridim Moronae 9:25. ?Olsem wanem nao Kraes i stap leftemap yumi taem yumi fesem ol tes we oli had? Helpem ol pikinini blong oli tingting long samfala wei we oli save kipim Sevya mo ol tijing blong Hem blong leftemap tingting i stap long maen blong olgeta blong oltaem.
“Bigfala lav, hem i stret lav blong Jisas Kraes.”
Blong stap developem presen ia we i jareti, i wan gol blong wan laeftaem. ?Olsem wanem nao yu save givim insperesen long ol pikinini blong oli lukaotem stret lav blong Kraes?
Samfala Aktiviti we Yu Save Mekem
-
Invaetem ol pikinini blong serem wanem oli ting se toktok ia, jareti, i minim. Afta, invaetem wan long ol pikinini blong hem i ridim Moronae 7:45. (Sapos wan long ol toktok long ves ia i had blong andastanem, helpem ol pikinini blong traem faenem mining blong hem long wan diksonari.) Askem olgeta blong oli tokbaot ol man we oli save, we oli ol gudfala eksampol blong jareti. ?From wanem nao oli singaotem se “jareti, hem i “stret lav blong Kraes?” (Moronae 7:47). ?Wanem nao ves 48 i stap tijim yumi abaot wei we yumi save kam fulap long jareti? Leftemap tingting blong ol pikinini blong prea from jareti long wik ia, mo lukluk long sam wei blong soem jareti long ol narawan.
-
Helpem ol pikinini blong tingting long sam wei we Jisas i bin soem jareti, (eksampol, luk long, Luk 23:34; Jon 8:1–11; Ita 12:33–34). ?Olsem wanem nao yumi save folem eksampol blong Hem?
-
Askem ol pikinini blong oli raetem nem blong ol pipol we ol bin save long ol pis pepa mo putum olgeta long wan smol basket o kontena. Invaetem olgeta blong tekem ol kontena blong olgeta i gobak hom, jusum wan nem insaed long hem evri dei, mo mekem wan samting we i soem lav long man o woman ia. Long wan lesen long fiuja, invaetem olgeta blong oli serem eksperiens blong olgeta blong stap givim seves long ol pipol.
Stap Leftemap Tingting blong Lanem Samting long Hom
Leftemap tingting blong ol pikinini blong tingting long wan we i stap wantem gat moa fet o hop long Jisas Kraes. Invaetem ol pikinini blong serem wetem man o woman ia, wan samting we oli bin lanem long klas tedei.
Stap Kam Antap long Fasin blong Yumi blong Stap Tij
Leftemap tingting blong gat fasin blong stap kwaet. Wan impoten pat blong stap kwaet, hem i blong stap tingting long Papa long Heven mo Jisas Kraes. Maet bae yu rimaenem olgeta blong stap kwaet taem oli singsing wan singsing kwaet kwaet nomo, o oli mekem tiun blong singsing ia nomo, o soem wan pikja blong Jisas Kraes.