“21–27 Disemba. Krismes: Bae Hem I Kam long Wol blong Pemaot Ol Pipol blong Hem’” Kam Folem Mi—Blong Praemeri: Buk blong Momon 2020 (2020)-
“21–27 Disemba. Krismes,” Kam Folem Mi—Blong Praemeri 2020
Luk Smol Sipsip blong God, i kam long Walter Rane
21–27 Disemba
Krismes
“Bae Hem I Kam long Wol blong Pemaot Ol Pipol blong Hem”
Plante taem, ol pikinini oli wantem tumas blong tokbaot olsem wanem nao oli stap selebretem Krismes. Tingting hevi long wanem yu save mekem blong helpem olgeta blong lukluk nomo long Jisas Kraes, mo hamas oli talem tangkyu from taem ia we Hem i bon i kam long wol.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong dro pikja blong wan samting we famli blong olgeta oli stap mekem long taem blong Krismes blong helpem olgeta tingbaot Jisas Kraes.
Stap Tijim Doktrin: Ol Smol Pikinini
1 Nifae 11:13–22; Mosaea 3:5–8; Alma 7:9–13; Hileman 14:1–6; 3 Nifae 1:15, 19–21
Jisas Kraes i bon i kam long wol ia blong i kam Sevya blong mi.
Ol pikinini we yu stap tijim, ?oli save from wanem yumi stap selebretem Krismes? ?Olsem wanem nao yu save helpem olgeta blong andastanem from wanem nao taem we Jisas Kraes i bon i kam long wol ia i wan risen blong selebresen?
Samfala Aktiviti we Yu Save Mekem
-
Talem abaot taem ia we Jisas i bon i kam long wol, mo semtaem soem ol pikja (olsem olgeta we oli stap long Gospel Art Buk, ol namba 28, 29, 30, 31). Letem ol pikinini oli serem wanem we oli save. Yusum aktiviti pej blong wik ia blong tijim ol pikinini se ol pipol we oli bin stap laef long taem blong Buk blong Momon oli bin save abaot taem ia we Jisas i bon i kam long wol.
-
Ridim ol ki sentens long Alma 7:11–12 blong tijim ol pikinini wanem we Jisas Kraes i bin mekem blong yumi. Serem from wanem yu yu glad se Jisas Kraes i bon i kam long wol, mo talemaot ol filing blong yu abaot sakrifaes ia blong Hem we i pem praes blong sin.
-
Soem ol pikja we i soemaot sakrifaes we i pem praes we Sevya i mekem—olsem taem Hem i bin safa long Getsemane, i ded long kros, mo taem Hem i laef bakegen long ded (luk long Gospel Art Buk, ol namba 56, 57, 58, 59). Askem ol pikinini blong talem long yu abaot wanem oli luk long ol pikja ia. Helpem olgeta blong andastanem se Papa long Heven i sendem Jisas Kraes i kam long wol ia blong safa from ol sin blong yumi, blong ded from yumi, mo i bin girap bakegen long ded blong mekem se yumi save gobak laef wetem Hem.
-
Wetem ol pikinini, singsing long wan singsing abaot taem we Jisas i bon i kam long wol ia, olsem “He Sent His Son” o “Away in a Manger” (Children’s Songbook, 34–35, 42–43). Poenemaot long ol pikinini ia, ol toktok long singsing ia we oli tokbaot ol blesing we yumi gat from se Jisas i bon i kam long wol ia.
Buk blong Momon i testifae abaot Jisas Kraes.
Taem yu stap kam blong endem stadi blong yu long Buk blong Momon, long yia ia, talem bakegen long ol pikinini se buk ia, hem i “Wan Narafala Testeman blong Jisas Kraes,” we oli bin raetem blong helpem yumi blong go long Hem.
Samfala Aktiviti we Yu Save Mekem
-
Holem wan kopi blong Buk blong Momon i go antap blong ol pikinini oli save luk. Ridim taetol mo poen i go long ol toktok ia “Wan Narafala Testeman blong Jisas Kraes.” Letem ol pikinini oli gat janis blong holem buk, mo helpem olgeta blong oli faenem nem blong Sevya antap long kova blong buk. Talem long ol pikinini hao nao yu yu filim abaot Buk blong Momon, mo olsem wanem hem i bin helpem yu blong lanem moa abaot Jisas Kraes.
-
Givim wan pikja blong Jisas long wanwan pikinini mo mekem olgeta oli dro wan pikja blong Hem. Invaetem olgeta blong holem ol pikja blong olgeta i go antap evri taem oli harem nem blong Kraes taem yu stap ridim 2 Nifae 25:23, 26. Testifae se Buk blong Momon, oli bin raetem blong helpem yumi blong “biliv long Kraes” (2 Nifae 25:23).
-
Serem wetem ol pikinini wan long skripja o stori long Buk blong Momon we yu laekem tumas, we i bin helpem yu blong lanem moa abaot Jisas Kraes. Askem ol pikinini abaot ol stori long Buk blong Momon we oli laekem tumas, mo helpem olgeta blong luk olsem wanem ol stori ia oli stap helpem yumi blong lanem abaot Sevya mo go kolosap long Hem. Sapos oli lukluk long sam long ol pikja ia insaed long Ol Stori long Buk blong Momon, bae i save helpem olgeta blong tingbaot ol stori ia.
Stap Tijim Doktrin: Ol Bigfala Pikinini
1 Nifae 11:13–22; Mosaea 3:5–8; Alma 7:10–13; Hileman 14:1–6; 3 Nifae 1:15, 19–21
Jisas Kraes i bon i kam long wol ia blong i kam Sevya blong mi.
Tingting hevi long olsem wanem yu save helpem ol pikinini blong andastanem mining blong taem we Kraes i bon i kam long wol, mo wanem nao hemia i minim long olgeta.
Samfala Aktiviti we Yu Save Mekem
-
Long wanwan pikinini, givim wan long ol skripja refrens we i stap long aktiviti pej blong wik ia. Invaetem wanwan long olgeta blong ridim skripja blong olgeta, blong oli faenem nem blong profet we i stap toktok, mo serem wan samting we profet ia i bin save abaot Jisas Kraes. Helpem olgeta, o letem olgeta oli wok tugeta sapos i nid.
-
Long bod, raetemdaon sam samting we oli bin hapen kolosap long taem we Jisas i bon i kam long wol, olsem we oli tokbaot long Luk 2:4–14; Matiu 2:1–2; and 3 Nifae 1:15, 19–21. Helpem ol pikinini blong luklukgud insaed long ol skripja blong faenemaot sapos ol samting ia oli bin hapen long Betlehem, o long Ol Amerika, o tugeta. ?From wanem nao yumi talem tangkyu blong gat Buk blong Momon olsem wan nambatu witnes abaot taem ia we Jisas Kraes i bon i kam long wol, mo misin blong Hem olsem Sevya?
-
Ridim Alma 7:10–13 wetem ol pikinini. ?Wanem nao yumi lanem aot long ol ves ia abaot taem we Jisas i bon i kam long wol? ?Se Hem i hae o no? ?Abaot misin blong Hem long wol ia? Invaetem ol pikinini blong oli serem from wanem oli talem tangkyu from Jisas Kraes, mo serem testemoni blong yu abaot Hem.
Buk blong Momon i testifae abaot Jisas Kraes.
Taem hem i stap tokbaot Buk blong Momon, Profet Josef Smit i bin talem se “wan man bae i kam moa kolosap long God sapos hem i folem ol tijing blong hem, bitim eni narafala buk” (fas toktok blong Buk blong Momon.). ?Olsem wanem nao yu save helpem ol pikinini blong andastanem promes ia?
Samfala Aktiviti we Yu Save Mekem
-
Givim wan long ol ves ia long wanwan pikinini: 2 Nifae 25:23, 26; 33:4, 10. Invaetem ol pikinini blong ridim ves blong olgeta mo faenemaot wanem nao profet blong Buk blong Momon, Nifae, i bin wantem blong yumi mas save. Askem olgeta blong raetem antap long bod wanem we oli faenem. Eksplenem se ol samting ia oli tokbaot wan impoten stamba tingting blong Buk blong Momon Letem ol pikinini oli rolplei wetem wanwan long olgeta olsem wanem bae oli eksplenem long wan fren abaot wan impoten stamba tingting blong Buk blong Momon.
-
Serem wetem ol pikinini wan long skripja o stori long Buk blong Momon we yu laekem tumas, we i bin helpem yu blong lanem moa abaot Jisas Kraes. Askem ol pikinini abaot ol stori long Buk blong Momon we oli laekem tumas, mo helpem olgeta blong luk olsem wanem ol stori ia oli stap helpem yumi blong lanem abaot Sevya mo go kolosap long Hem. Serem wetem ol pikinini olsem wanem nao Buk blong Momon i bin helpem yu blong save se Jisas Hem i Kraes. Leftemap tingting blong ol pikinini blong tingting long wan ves o stori we i kam long Buk blong Momon we i mekem bilif blong olgeta long Jisas Kraes i kam strong moa. Askem ol pikinini blong serem hemia wetem wan fren o wan memba blong famli we i no save abaot Buk blong Momon.
Stap Leftemap Tingting blong Lanem Samting long Hom
Invaetem ol pikinini blong serem wetem famli blong olgeta olsem wanem nao Buk blong Momon i bin helpem olgeta blong lanem moa abaot Kraes. Leftemap tingting blong olgeta blong serem wan ves o wan stori long Buk blong Momon olsem pat blong testemoni blong olgeta.
Stap Kam Antap long Fasin blong Yumi blong Stap Tij
Ol pikinini oli lavem ol stori. Ol stori oli wan gudfala wei blong helpem ol pikinini blong oli lanem mo tingbaot ol trutok. Taem yu stap serem stori blong yu abaot taem we Jisas i bin bon i kam long wol ia, tingting tu blong serem ol stori we oli kamaot long laef blong yu we i bin help blong mekem fet blong yu long Sevya i kam strong moa.