“14–20 Disemba. Moronae 10: ‘Kam long Kraes, mo Kam Stret Evriwan Tru Hem’” Kam Folem Mi—Blong Praemeri: Buk blong Momon 2020 (2020)
“14–20 Disemba. Moronae 10,” Kam Folem Mi—Blong Praemeri: 2020
Blong Yufala I Mas Save, i kam long Gary L. Kapp
14–20 Disemba
Moronae 10
“Kam long Kraes, mo Stap Stret Evriwan Tru Hem”
Sam pikinini insaed long klas blong yu, maet oli bin gat ol eksperiens we i gat mining taem oli bin stap lanem samting aot long Buk blong Momon long hom. ?Olsem wanem nao yumi save yusum ol eksperiens ia blong leftemap tingting blong evri pikinini blong ridim olgeta skripja long hom?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Pasem raon wan kopi blong Buk blong Momon. Taem wanwan pikinini i holem buk ia, askem hem blong serem wan samting we hem i lavem abaot Buk blong Momon—olsem wan stori, wan testemoni, o wan eksperiens we hem i laekem tumas, we hem i lanem samting aot long hem long hom o long jos.
Stap Tijim Doktrin: Ol Smol Pikinini
Bae mi save kam blong save miwan se Buk blong Momon i tru.
Lukaotem sam wei blong helpem ol pikinini blong akseptem invitesen blong Moronae blong askem God sapos Buk blong Momon i tru.
Samfala Aktiviti we Yu Save Mekem
-
Soem pikja blong Moronae we i stap berem ol buk we oli wokem long gol (luk long aotlaen blong wik ia long Kam Folem Mi—Blong Wanwan Man, Woman mo Famli, mo askem ol pikinini blong tokbaot wanem we oli luk. Invaetem olgeta blong poen i go long ol buk, mo eksplenem se long ol buk ia, oli bin raetem ol toktok we, tedei, yumi save ridim insaed long Buk blong Momon. Letem ol pikinini oli priten se oli Moronae we oli stap raet long ol buk ia, mo i berem olgeta. Tugeta, singsing long “The Golden Plates” (Children’s Songbook, 86).
-
Soem Buk blong Momon mo ridim Moronae 10:4. Talem bigwan se yumi save askem God sapos Buk blong Momon i tru, mo bambae Hem i sendem Tabu Spirit i kam testifae long yumi. Maet yu save yusum tu “Japta 54: Promes blong Buk blong Momon” (Ol Stori long Buk blong Momon,156, o vidio blong hem long ChurchofJesusChrist.org). Serem olsem wanem Tabu Spirit i bin helpem yu blong kasem testemoni blong yu long saed blong Buk blong Momon. Helpem ol pikinini blong andastanem se witnes we i kam long Spirit, bae oli filim se i olsem wanem. Singsing wan song abaot fasin blong faenem trutok, olsem “Search, Ponder, and PrayChildren’s Songbook,109).
Papa long Heven i givim ol presen long saed blong spirit long mi.
Moronae i tokbaot ol presen we God i givim long ol pikinini blong Hem taem we oli gat fet long Hem. Yu save helpem ol pikinini blong gat fet se bae God i givim ol presen long saed blong spirit i go long olgeta.
Samfala Aktiviti we Yu Save Mekem
-
Raetem ol namba 9 kasem 16 long ol seperet pis pepa, mo kavremap wanwan pepa olsem wan presen. Letem ol pikinini oli kam, mo wanwan i gat janis blong openem ol presen ia. Taem oli mekem olsem, tugeta ridim ol ves we oli kamaot long Moronae 10:9–16 we i go wetem ol namba ia, mo helpem ol pikinini blong faenem wanwan long ol presen long saed blong spirit. Eksplenem se, olgeta ia, oli ol presen we oli kam long Papa long Heven; Hem i givim ol presen ia long ol pikinini blong Hem blong yumi save helpem wanwan long yumi mo blong yumi mekem wok blong Hem.
-
Letem ol pikinini oli toktok smol abaot ol presen we oli laekem tumas we oli bin kasem. Talem long ol pikinini abaot ol presen ia long saed blong spirit we yu luk se Papa long Heven i bin givim long olgeta, olsem presen we i fet, waes tingting, testemoni, kaen fasin mo fasin blong save lanem samting.
Jisas Kraes i wantem mi blong kam long Hem.
Tingting long wei we bae yu helpem ol pikinini blong oli andastanem se i minim wanem blong “kam long Kraes.”
Samfala Aktiviti we Yu Save Mekem
-
Ridim Moronae 10:32, i go long ol pikinini, “kam long Kraes, mo kam stret evriwan tru hem,” mo invaetem ol pikinini blong oli ripitim sentens ia wetem yu. Askem olgeta blong oli sarem ae blong olgeta taem yu stap putum wan pikja blong Jisas samples insaed long rum ia. Afta, letem olgeta oli openem ae blong olgeta, faenem pikja, mo kam raon long hem. Wetem ol pikinini, toktok raon long ol wei we yumi save kam long Kraes (eksampol, luk long Ol Toktok blong Bilif 1:3–4). Ripitim aktiviti ia, mo letem ol pikinini oli putum pikja ia samples insaed long klasrum.
-
Helpem ol pikinini blong oli flasem wan baj we sep blong hem i olsem wan hat (♥) we i talem se: “Mi lavem God wetem ful paoa blong tingting, ful maen mo ful paoa blong mi” (luk long Moronae 10:32). ?Olsem wanem nao yumi soem long God se yumi lavem Hem?
Stap Tijim Doktrin: Ol Bigfala Pikinini
Mi save kam blong save trutok tru long paoa blong Tabu Spirit.
God i wantem se wanwan long yumi i save se Buk blong Momon i tru. Helpem ol pikinini blong oli andastanem promes blong God se “bae hem i soemaot trutok blong ol samting ia long yufala, tru long paoa blong Tabu Spirit.”
Samfala Aktiviti we Yu Save Mekem
-
Long bod, raetem ol toktok ia, Ridim, Rimemba, Tingting Hevi, mo Askem. Invaetem ol pikinini blong faenem ol toktok ia insaed long Moronae 10:3–4. ?Wanem nao yumi sapos blong ridim, rimemba, tingting hevi long hem, mo askem blong save gat wan testemoni, o blong mekem testemoni abaot Buk blong Momon i kam strong moa. Askem ol pikinini blong lukaotem ol sem samting bitwin ol ves ia mo singsing ia “Search, Ponder, and Pray” (Children’s Songbook, 109).
-
Helpem ol pikinini blong oli tingbaot sam long ol eksperiens we yufala i bin gat taem yufala i bin lan tugeta aot long Buk blong Momon. Serem ol filing blong yu abaot Buk blong Momon, mo tu, talem olsem wanem yu bin kasem wan testemoni, o olsem wanem testemoni blong yu abaot Buk blong Momon i bin kam strong moa, se hemia i tru. Invaetem ol pikinini blong oli serem ol filing mo testemoni blong olgeta.
-
Talem abaot wan taem we Tabu Spirit i bin testifae long yu abaot wan samting. Tokbaot olsem wanem yu bin filim mo olsem wanem yu bin save se hemia i Tabu Spirit. Helpem ol pikinini blong oli lan aot long ol skripja ia abaot wei we Spirit i stap toktok long yumi: Jon 14:26–27; Doktrin mo Ol Kavenan 6:15, 23; 8:2–3; 9:7–9; 11:12–14.
Papa long Heven i givim ol presen long saed blong spirit long mi.
I gat plante, long taem blong yumi tedei, we oli stap “tanem baksaed long ol presen we oli kam long God” (Moronae 10:8). Helpem ol pikinini blong luk se ol presen ia oli stap yet tedei.
Samfala Aktiviti we Yu Save Mekem
-
Raetem nem blong ol presen we oli stap tokbaot long Moronae 10:9–16 long ol pis pepa, mo putum insaed long wan presen bokis. Raetem ol namba 9 kasem 16 i go long bod, mo invaetem ol pikinini blong gat janis blong pikimap wan pepa long bokis ia mo joenem i go long ves namba long bod. ?Wanem nao yumi stap lanem abaot ol presen ia we oli tokbaot long ol ves 8 mo 17–18?
-
Serem stori blong taem we bae Buk blong Momon i kam (luk long “Japta 3: Enjel Moronae mo Ol Buk we Oli Wokem long Gol,” Ol Stori long Doktrin mo Kavenan, 13–17). Helpem ol pikinini blong oli faenemaot ol presen we oli tokbaot long Moronae 10:9–16 we God i bin givim long Josef Smit blong mekem se hem i save tekem Buk blong Momon i kam ?From wanem nao Papa long Heven i wantem yumi blong biliv long ol presen long saed blong spirit, long taem blong yumi tedei?
Jisas Kraes i wantem mi blong kam long Hem.
?Olsem wanem nao bae yu invaetem ol pikinini blong “kam long Kraes, mo stap stret gud long hem”?
Samfala Aktiviti we Yu Save Mekem
-
Antap long bod, raetem wan kwestin olsem: ?Hem i minim wanem blong kam long Kraes? Helpem ol pikinini blong luklukgud long Moronae 10:32–33 blong faenem ol ansa. Wok tugeta blong mekem wan lis blong wanem Kraes i wantem yumi blong mekem, mo wanem nao Hem i promes blong mekem long yumi.
-
Serem wan ves o stori long Buk blong Momon we yu laekem tumas, we i bin helpem yu blong kam long Kraes; mo invaetem ol pikinini blong mekem sem samting. Luklukbak, wetem ol pikinini, ol toktok blong Profet Josef Smit insaed long fas toktok blong Buk blong Momon.: “wan man bae i kam moa kolosap long God sapos hem i folem ol tijing blong [Buk blong Momon], bitim eni narafala buk.” Serem testemoni blong yu abaot wei we hemia i bin hapen insaed long laef blong yu.
Stap Leftemap Tingting blong Lanem Samting long Hom
Invaetem ol pikinini blong prea from wan moa strong testemoni abaot Buk blong Momon, mo afta, serem testemoni blong olgeta wetem wan memba blong famli o wetem wan fren.
Stap Kam Antap long Fasin blong Yumi blong Stap Tij
Leftemap ting blong ol pikinini blong oli serem wanem we oli gat. Plante taem, ol yangfala pikinini oli gat ol gudfala wei blong lukluk gospel. Taem oli serem ol tingting blong olgeta, hemia i helpem olgeta blong oli rere blong toktok long ol fren blong olgeta abaot gospel (luk long Teaching in the Savior’s Way, 30.)