“14–20 Disemba. Moronae 10: ‘Yes, Kam long Kraes, mo Kam Stret Evriwan Tru Hem’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“14–20 Disemba. Moronae 10,” Kam Folem Mi—Blong Wanwan Man, Woman mo Famli: 2020
Blong Yufala I Mas Save, i kam long Gary L. Kapp
14–20 Disemba
Moronae 10
“Yes, Kam long Kraes, mo Kam Stret Evriwan Tru Hem”
Taem yu stap finis blong ridim Buk blong Momon, tingting blong kasem wan niufala witnes we i kam long Tabu Spirit, se buk ia i tru. Taem yu stap mekem hemia, raetemdaon ol filing mo tingting we yu kasem.
Raetemdaon Ol Filing mo Tingting blong Yu
Buk blong Momon i stat wetem promes blong Nifae, we i soem long yumi se “Lod i gat fulap sore long olgeta evriwan we hem i jusum, from fet blong olgeta” (1 Nifae 1:20). Buk i en wetem wan mesej we i kolosap semmak, we i kam long Moronae, taem hem i stap rere blong ‘silim’ ol histri: hem i invaetem yumi blong “tingbaot hamas sore Lod i bin gat long ol pikinini blong ol man” (Moronae 10:2–3). Iven sapos yumi stap tingting nomo long ol plante sore we oli raetemdaon insaed long Buk blong Momon, hemia i givim yumi plante samting blong tingting long hem. ?Wanem eksampol nao i kam long maen blong yu? Maet bae yu save tingting hevi long wei we God i bin gat sore mo i lidim famli blong Lihae tru long waelples mo oli krosem ol bigfala solwota; mo tingting hevi long ol sore we oli gud tumas we Hem i bin soem long Inos taem we sol blong hem i bin stap hanggri from fogivnes, o sore ia we Hem i bin soem long Alma, we i wan konkon enemi blong Jos we i bin kam wan long ol strong man we i stap difendem Hem. O maet bae ol tingting blong yu oli save tanem i go long sore ia we Sevya we i bin laef bakegen long ded, i bin soem long ol pipol taem Hem i bin hilim sik blong olgeta, mo i bin blesem ol smol pikinini blong olgeta. Maet, wanem i moa impoten, i we, evri samting ia oli save mekem yu yu tingbaot “hamas sore nao Lod i bin gat” long yu; from se, wan stamba tingting blong Buk blong Momon i blong invaetem wanwan long yumi blong kasem sore blong God—wan invitesen we Moronae i talem stret long gudbae toktok blong hem: “Kam long Kraes mo kam stret evriwan tru hem” (Moronae 10:32).
Sam Aedia blong Skripja Stadi blong Yuwan
Mi save kam blong save trutok tru long paoa blong Tabu Spirit.
Promes ia long Moronae 10:3–7 i bin jenisim laef blong plante milian pipol raon long wol. ?Olsem wanem hem i jenisim laef blong yu? I nomata se yu yu stap lukaot blong kasem wan testemoni, o yu stap lukaot blong mekem testemoni blong yu i kam strong moa abaot Buk blong Momon, invitesen ia blong Moronae i blong yu tu. Taem yu stap ridim Moronae 10:3–7, tingting blong ridim skripja ia i moa gud, i bitim we yu bin stap ridim bifo. Yu save luklukgud long wanwan sentens, mo askem yuwan ol kwestin olsem: ?Hemia i minim wanem? ?Olsem wanem nao bae mi mekem hemia i gud moa? ?Wanem eksperiens nao mi bin gat wetem hemia? ?Olsem wanem nao Tabu Spirit i bin soemaot long mi se Buk blong Momon i tru?
Mo tu, tingting blong talem hemia long wan we i nidim blong harem testemoni blong yu long saed blong Buk blong Momon. ?Olsem wanem nao yu save helpem man o woman ia blong kasem wan witnes blong hemwan?
“No tanem baksaed long ol presen blong God.”
I gat plante wei we wan i save “tanem baksaed long ol presen blong God” (Moronae 10:8). Sam pipol oli no save akseptem se ol presen ia, oli tru i stap. Ol narawan oli save talem se oli no gat ol presen blong Spirit, be oli luksave ol presen ia long ol nara pipol. Mo sam moa, oli talem se oli no gat ol presen ia, taem oli no wantem save long olgeta, o oli no traem blong developem olgeta.
Taem yu stap ridim Moronae 10: 8–25, lukaotem ol trutok we bae i helpem yu blong luksave ol presen blong Spirit we yu gat, mo yusum olgeta wetem moa paoa blong blesem yuwan mo ol narawan. Lukaotem blong save moa abaot ol presen we oli kam long God, we Hem i bin givim yu, o ol presen ia we Hem i wantem yu blong lukaotem. ?From wanem i impoten blong “tingbaot se evri gudfala presen, i kam long Kraes? (Moronae 10:18).
Tingting tu long kaonsel ia blong Elda John C. Pingree Jr.: “So olsem wanem nao yumi kam blong save ol presen we yumi gat? Yumi save lukluk i go long petriakel blesing blong yumi; o askem olgeta we oli save gud yumi, mo yuwan, yu save faenemaot wanem yu save mekem i gud olsem nomo, mo yu laekem blong mekem. Be moa impoten long hemia, yumi save askem God (luk long Jemes 1:5; D&K 112:10). Hem i save ol presen blong yumi, from se, Hem nao, i givim ol presen ia long yumi” (“Mi Gat Wan Wok blong Yu,” Ensign o https://www.ChurchofJesusChrist.org/general-conference/2017/10/i-have-a-work-for-thee?lang=bis, Okt 2017).
Luk long Gaed long Ol Skripja, “Plan blong Fasin blong Pemaot Man”; scriptures.ChurchofJesusChrist.org.
Mi save kam stret evriwan tru long gladhat blong Jisas Kraes.
Toktok blong Moronae we i askem strong long yumi blong “kam long Kraes” i mekem se yumi mas mekem moa bitim blong jes lanem samting abaot Hem, o blong jes tingting abaot Hem plante moa, o iven blong traehad blong obei ol komanmen blong Hem, nomata se ol samting ia oli impoten. Be, hemia i wan invitesen blong kam long Kraes long wan wei we i moa fulwan, olsem we i posibol—blong kam olsem we Hem i stap. Taem yu stap ridim Moronae 10:30–33, luk gud long ol sentens we oli helpem yu blong andastanem wanem mining blong kam long Kraes fulwan, ol toktok olsem “holemtaet evri gudfala presen,” “tanem baksaed blong yufala long evri fasin we i no olsem blong god,” mo yes, “blong kam stret evriwan tru hem” (oli ademap italik).
?Olsem wanem samting ia i posibol? Blong gat sam ansa, luk long Moronae 10:30–33. ?Wanem nao Spirit i stap talem long yu, se yu mas mekem moa fulwan blong “kam long Kraes mo kam stret evriwan tru hem”?
Luk long Omnae 1:26; Gaed long Ol Skripja, “Stret, Stret Evriwan,” scriptures.ChurchofJesusChrist.org.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Moronae 10
Ridim japta ia tugeta, mo lukaotem evri taem we Moronae i yusum toktok ia, askem strong. Mekem wan lis blong ol samting we Moronae i stap askem strong—o i stap leftemap tingting long strong fasin—blong yumi mekem. ?Wanem nao yumi save mekem blong folem ol samting ia we hem i stap askem strong long yumi?
Moronae 10:3
?Wanem nao yumi bin lanem abaot sore blong Lod taem yumi bin stap rid long Buk blong Momon long yia ia? ?Olsem wanem nao Lod i bin gat sore long famli blong yu?
Moronae 10:3–5
Afta we yufala i ridim olgeta ves ia, yu save askem ol memba blong famli blong serem olsem wanem oli kam blong save se Buk blong Momon i tru. Tingting blong singsing wan singsing tugeta, abaot fasin blong stap lukaotem trutok, olsem “Search, Ponder, and Pray” (Children’s Songbook,109). Yu save invaetem tu sam memba blong famli blong raetemdaon ol testemoni blong olgeta long wan jenol we i blong famli.
Moronae 10:8–18
Krismes i wan nomol taem blong tingting blong kasem olgeta presen. Maet ol memba blong famli oli save kavremap ol presen blong wanwan long famli, we i ripresentem “ol presen blong God” we oli tokbaot insaed long Moronae 10:9-16. Olgeta presen ia, oli save ripresentem ol nara gudfala presen we oli kam long Kraes, we oli luk long wanwan long olgeta.
Moronae 10:27–29, 34
Ol memba blong famli oli save serem wanem oli wantem blong talem long Moronae taem oli “mitim [hem] long fored blong gudfala kot blong hae Jehova.”
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Lukaotem Jisas Kraes. Stamba tingting blong Buk blong Momon—mo evri skripja—i blong testifae abaot Jisas Kraes. ?Wanem nao yumi lanem abaot Jisas Kraes long Moronae 10? ?Wanem nao yumi filim insperesen blong go mekem blong kam long Hem?
Moronae I Stap Berem Ol Buk, i kam long Jon McNaughton