“7–13 Disemba. Moronae 7–9: ‘Bae Kraes I Leftemap Yu’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“7–13 Disemba. Moronae 7–9,” Kam Folem Mi—Blong Wanwan Man, Woman mo Famli: 2020
Minerva Teichert (1888–1976), Moronae: Las Man blong Nifae, 1949–1951, oel peinting antap long mesonaet, 34¾ x 47 inj. Brigham Yang Yunivesiti Miusiom blong Art, 1969
7–13 Disemba
Moronae 7–9
“Bae Kraes I Leftemap Yu”
Taem yu stap stadi long Moronae 7–9, lisin long ol kwaet toktok blong Tabu Spirit, mo raetemdaon ol mesej blong Hem i go long yu. Hem i save tijim yu tugeta samting ia: wanem yu nidim blong save mo wanem yu nidim blong mekem.
Raetemdaon Ol Filing mo Tingting blong Yu
Bifo Moronae i finisim histri ia, we tedei yumi save long hem olsem Buk blong Momon, wetem ol las toktok blong hem, hem i bin serem trifala mesej we i kam long papa blong hem, Momon: wan toktok i go long olgeta we “[oli] folem Kraes wetem pis,” (Moronae 7:3) mo tu leta we Momon i bin raetem i go long Moronae. Maet Moronae i bin putum ol trifala mesej ia insaed long Buk blong Momon from se hem i bin luk finis ol semmak samting bitwin ol denja blong taem blong hem mo taem blong yumi. Taem hem i bin raetem ol toktok ia, ol pipol blong Ol Man blong Nifae, evriwan oli stap foldaon i go long apostasi. Plante long olgeta “oli bin lusum lav blong olgeta, wan i go long narawan” mo oli laekem “evri samting be i no long samting we i gud” (Moronae 9:5, 19). Be yet, Momon i luk se i gat ples blong gat hop yet—i stap tijim yumi se, hop, i no minim blong sarem ae long samting, o blong no tingting hevi long ol problem blong wol; hem i minim blong gat fet long Papa long Heven mo Jisas Kraes, we paoa blong Tufala i bigwan moa, mo i stap oltaem moa bitim olgeta problem ia. Hem i minim blong “holemtaet evri gud samting” (Moronae 7:19). Hem i minim blong letem Atonmen blong Jisas Kraes mo “hop blong glori blong hem, mo blong laef we i no save finis, i stap long maen blong yu blong oltaem” (Moronae 9:25). Mo kasem dei blong glori blong Seken Kaming blong Kraes i kam, i minim blong neva stop blong “wok, … blong yumi save winim enemi blong evri stret mo gud fasin” (Moronae 9:6).
Sam Aedia blong Skripja Stadi blong Yuwan
Laet blong Kraes i helpem mi blong jajem samting we i gud mo samting we i nogud.
Wol blong tedei i fulap long ol strong mesej we i tanem tingting blong man; ?hao nao bae yumi save talem wijwan i raet mo wijwan i rong? Long ol toktok blong Momon long Moronae 7, i gat samfala prinsipol we yumi save yusum blong stap longwe long fasin blong stap “jaj rong” (Moronae 7:18). Taem yu stap stadi long Moronae 7:12–20, lukaotem ol trutok we i save helpem yu blong save wanem we bae i tekem yu i kam kolosap long God mo wanem bae i no tekem yu i kam kolosap long God. Yu save yusum ol trutok ia blong helpem yu blong skelem ol mesej we yu kam blong krosem mo ol eksperiens we yu gat long wik ia, mo faenemaot, sapos yes o no, oli stap invaetem yu mo stap pulum tingting blong yu blong mekem gud samting (luk long Moronae 7:13).
Luk tu long “Judging Others,” Gospel Topics, topics.ChurchofJesusChrist.org; Bible Dictionary, “Light of Christ.”
Tru long fet long Kraes, mi save “holemtaet evri gud samting.”
Afta we yu tijim olsem wanem blong luksave wanem i gud mo wanem i nogud, Momon i bin askem wan kwestin we i luk se i stret long taem tedei: “?Hao nao i save hapen se yufala i save holemtaet evri gud samting?”—speseli taem we ol temtesen blong enemi oli save switim man tumas olsem (Moronae 7:20). Ansa blong Momon, yu save faenem truaot long haf blong japta 7. Taem yu stap ridim ol ves 20–48, lukaotem ol trutok we bae i helpem yu blong luksave “evri gud samting” we yu gat, from Jisas Kraes. ?Olsem wanem nao fet blong yu long Hem i helpem yu blong go lukaotem olgeta samting we oli gud? “?Olsem wanem yu save “holemtaet” sam moa gudfala samting?
Luk long Ol Toktok blong Bilif 1:13.
“Bigfala lav, i klin lav blong Kraes.”
Presiden Dallin H. Oaks i luk hemia: “Risen from wanem bigfala lav i neva mestem rod, mo risen from wanem bigfala lav i moa bigwan bitim evri gudfala aksen, … i from we bigfala lav, ‘klin lav blong Kraes’ (Moro 7:47), i no wan aksen be i wan wei blong stap, o i wan fasin insaed long yu. … Jareti o bigfala lav, i wan samting we wan i kam olsem” (“The Challenge to Become,” Ensign, Nov. 2000, 34). Taem yu stap ridim Moronae 7:44–48, tingting long olsem wanem nao Momon i tokbaot bigfala lav o jareti; mo lisin long ol tingting mo filing we oli kam long Tabu Spirit; Hem i save helpem yu blong faenem ol wei we yu save kam antap long hem. ?From wanem yumi nidim fet mo hop blong save kasem presen ia we i bigfala lav o jareti?
?Weswe? ?Bae oli save tekemaot jastiti mo klin fasin long mi?
Wei we Momon i tokbaot ol prapa rabis sin blong Ol Man blong Nifae, i mekem se sam oli mekem mistek, mo oli stap ting se, olgeta we oli viktim, o oli mekem nogud olgeta long saed blong seks, o oli abiusum olgeta long saed blong seks, olgeta ia, oli brekem loa blong jastiti. Be, Elda Richard G. Scott i bin kliarem hemia, mo talem se hemia i no olsem. Hem i tijim: “Mi talem wetem atoriti se, taem aksen blong vaelens, blong rabis tingting, o blong inses (fasin blong slip wetem memba blong famli bakegen) i spolem nogud yu, agensem tingting blong yu, yu yu no responsibol, mo yu yu no mas filim se yu rong” (“Healing the Tragic Scars of Abuse,” Ensign, May 1992, 32).
Mi save gat hop long Kraes, i nomata long ol situesen blong mi.
Afta we hem i tokbaot fasin nogud we hem i bin luk, Moronae i talem long boe blong hem se bae hem i no mas harem nogud. ?Wanem i tajem yu abaot mesej blong hop we i kam long Momon? ?Hem i minim wanem long yu blong Kraes i “leftemap yu”? ?Wanem fasin blong Kraes nao mo wanem prinsipol blong gospel blong Hem nao ‘i stap long maen blong yu’ mo i stap givim hop long yu? (Moronae 9:25).
Luk tu long Dieter F. Uchtdorf, “The Hope of God’s Light,” Ensign o Liahona, 2013, 70, 75–77.
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Moronae 7:5–11
Folem wanem i stap long Moronae 7:5–11, ?from wanem nao i impoten blong mekem ol raet samting from ol raet risen? ?Olsem wanem nao yumi save sapos yumi stap prea o stap obei long ol komanmen blong God wetem “tru tingting”? (ves 6).
Moronae 7:12–19
?Hao nao kaonsel blong Momon i save helpem yumi blong mekem ol gud joes long saed blong hao yumi spendem taem blong yumi, mo huia yumi spendem taem wetem? Yu save invaetem ol memba blong famli blong luklukgud insaed long hom blong yufala mo “holemtaet” (Moronae 7:19), o holem ol samting we i stap invaetem olgeta blong “mekem gud mo blong lavem God, mo wok blong hem” (Moronae 7:13). Presem olgeta from ol gudfala samting we oli faenem.
Moronae 7:29
Afta we yufala i ridim ves ia, ol memba blong famli oli save toktok raon long ol merikel we oli bin witnesem, o ol nara wei we oli bin luk han blong God insaed long laef blong olgeta.
Moronae 8:5–26
?Wanem nao Ol Man blong Nifae, we oli bin stap baptaesem ol smol pikinini, oli no bin andastanem abaot Atonmen blong Jisas Kraes? ?Wanem nao yumi lanem abaot Atonmen, aot long ol tijing blong Momon?
Moronae 8:16–17
?I minim wanem blong gat wan “lav we i stret evriwan”? ?Olsem wanem nao hemia i helpem yumi blong winim fraet? ?Olsem wanem nao, hemia i save helpem yumi blong tijim trutok wetem stret mo klia fasin? ?Olsem wanem yumi developem kaen lav ia?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Fasin blong Yumi blong Stap Tij
Yusum miusik blong invaetem Spirit mo tijim doktrin. “Miusik i gat ol paoa we i no gat limit blong pusum yumi i go from fasin blong gat moa Spirit” (“First Presidency Preface,” Hymns, x). Wan singsing abaot lav, olsem “Love One Another” (Hymns, no. 308), i save givhan blong toktok raon wetem famli abaot jareti, olsem we i stap long Moronae 7:44–48.
Pikja blong Fes blong Kraes we i Sevya, i kam long Heinrich Hofmann