“30 Novemba–6 Disemba. Moronae 1–6: ‘Blong Holemtaet Olgeta I Stap long Stret Rod,’” Kam Folem Mi—Blong Wanwan Man, Woman mo Famli: Buk blong Momon 2020 (2020)
“30 Novemba–6 Disemba. Moronae 1–6,” Kam Folem Mi—Blong Wanwan Man, Woman mo Famli: 2020
Minerva Teichert (1888–1976), Alma I Baptaesem Man insaed long Ol Wota blong Momon 1949–1951, oel peinting antap long mesonaet, 35⅞ x 48 inj. Brigham Yang Yunivesiti Miusiom blong Art, 1969
30 Novemba–6 Disemba
Moronae 1–6
“Blong Holemtaet Olgeta I Stap long Stret Rod”
Moronae i bin raetem wanem hem i hop se bae i “save gat yus … long samfala dei long fiuja” (Moronae 1:4). ?Wanem nao yu faenem insaed long Moronae 1–6 we i gat yus long yu? Raetemdaon wanem we yu faenemaot, mo tingting blong serem wetem wan we, hem tu, i faenem se hem i gat yus long ol skripja ia.
Raetemdaon Ol Filing mo Tingting blong Yu
Afta we hem i finisim histri blong papa blong hem abaot Ol Man blong Nifae, mo afta we hem i finisim blong raetemsot histri blong Ol Man blong Jared, Moronae, long fas ples, i ting se wok blong hem blong kipim histri, i finis ia nao (luk long Moronae 1:1). ?Wanem moa i stap yet blong tokbaot abaot tufala nesen ia, we oli prapa spolem gud tufala evriwan? Be Moronae i bin luk taem blong yumi (luk long Momon 8:35), mo hem i bin kasem insperesen blong” raetem sam smol samting moa, blong maet bae oli save gat yus … long samfala dei long fiuja” (Moronae 1:4). Hem i bin save se apostasi we bae i stap long evri ples, i stap kam, mo bae i tekem tingting we i fasfas long saed blong ol prishud odinens mo relijin. Maet, hemia nao risen we hem i givim ol klia ditel abaot sakramen, baptaes, mo fasin blong pasem presen we i Tabu Spirit, mo olgeta blesing blong stap kam tugeta wetem ol narawan we oli stap biliv, blong “holem taet olgeta i stap long stret rod, … oli dipen nomo long ol gudfala wok blong Kraes, we i bin man we i bin statem mo finisim fet [blong yumi]” (Moronae 6:4). Ol gudfala niu tingting olsem, oli givim yumi ol risen blong stap talem tangkyu se Lod i bin holemtaet laef blong Moronae blong mekem se hem i save “raetem sam smol samting moa” (Moronae 1:4).
Sam Aedia blong Skripja Stadi blong Yuwan
Ol disaepol blong Jisas Kraes oli gohed blong stap fetful, nomata fasin blong agens we i stap.
Long sam pipol, hem i isi moa blong stap fetful long ol taem we ol samting oli isi mo no fasfas tumas. Be olsem ol disaepol blong Jisas Kraes, yumi mas stap fetful iven taem yumi stap fesem ol tes mo ol fasin we oli kam agensem yumi. Taem yu stap ridim Moronae 1, ?wanem nao i stap givim insperesen long yu abaot fasin blong Moronae blong stap fetful long Lod mo long koling blong hem? ?Olsem wanem nao yumi save folem eksampol blong hem?
Oli mas mekem ol prishud odinens olsem we Lod i givim komanmen from.
Long taem blong seves blong Hem long wol ia, Sevya i bin kasem mo i bin mekem ol tabu odinens, olsem baptaes (luk long Matiu 3:13–17; Josef Smit Translesen, Jon 4:1–3 [insaed long apendiks blong Baebol]), prishud odinesen (luk long Mak 3:13–19), mo sakramen (luk long Matiu 26:26–28). Be, from Bigfala Apostasi, plante pipol tedei oli konfius, o oli no save gud olsem wanem blong mekem olgeta odinens ia—mo iven oli no save sapos oli nidim olgeta odinens ia, o no. Long Moronae 2–6, Moronae i bin givim sam impoten ditel abaot samfala prishud odinens we i save help blong kliarem sam long ol tingting ia we oli fasfas. ?Wanem tingting mo filing i kam long yu taem yu stap lanem abaot ol odinens long ol japta ia? Hemia samfala kwestin we yu save askem blong helpem yu blong lanem samting:
-
Konfemesen (Moronae 2; 6:4).?Wanem nao ol instraksen long Moronae 2:2 i stap tijim yu abaot odinens blong konfemesen? ?Yu ting se i minim wanem blong “Tabu Spirit i lidim olgeta mo oli kam klin tru long paoa blong hem”? (Moronae 6:4).
-
Prishud odinesen (Moronae 3).?Wanem nao yu faenem long japta ia we i save helpem wan blong hem i rere blong oli odenem hem long prishud? ?Wanem nao yu faenem we i save helpem wan blong mekem wan odinesen?
-
Sakramen (Moronae 4–5; 6:6).Luk gud long olgeta promes insaed long ol prea blong sakramen (luk long Moronae 4:3; 5:2), mo tingting hevi long wanem nao yu stap mekem blong kipim olgeta promes ia. ?Wanem nao yu save mekem, blong invaetem paoa blong Spirit i moa strong taem yu stap tekpat long sakramen?
-
Baptaes (Moronae 6:1–3).?Wanem nao yu save mekem blong gohed blong kwalifae blong baptaes we oli givim long ol ves ia, iven afta we yu baptaes finis? ?Olgeta ves ia, oli talem wanem long yu long saed blong mining blong stap olsem wan memba blong Jos blong Jisas Kraes?
Folem wanem we yu bin lanem, ?olsem wanem nao bae yu jenisim ol wei we yu tingting, tekpat, o mekem ol narawan oli rere from ol odinens ia? ?From wanem nao hem i impoten blong oli mekem olgeta odinens ia “folem ol komanmen blong Kraes”? (Moronae 4:1).
Luk tu long “Ordinances,” Gospel Topics, topics.ChurchofJesusChrist.org.
Jisas i tijim olsem wanem oli mas mekem olgeta odinens ia.
Ol disaepol blong Jisas Kraes oli lukaotem gudlaef blong sol blong wanwan.
Yes, hem i tru we, yumi evriwan bae yumi “wok from fasin blong sevem [yumiwan]” (Momon 9:27), be Moronae i bin tijim tu long yumi se, “mit tugeta fulap taem” wetem ol narawan we oli stap biliv, i save helpem yumi blong gohed blong stap “long stret rod” (Moronae 6:4–5). So taem yu stap ridim Moronae 6:4–9, tingting hevi long ol blesing we oli kam taem oli “kaontem [yu] wetem ol pipol blong jos blong Kraes” (Moronae 6:4). ?Olsem wanem yu save help blong mekem ol eksperiens ia we yu mo ol narawan i gat long Jos, i moa olsem eksperiens ia we Moronae i tokbaot, i nomata se yu yu wan lida o yu yu wan we i stap tekpat?
Sam Aedia blong Famli Skripja Stadi mo Famli Haos Naet
Taem yu stap ridim ol skripja wetem famli blong yu, Spirit i save helpem yu blong save wanem prinsipol nao blong tokbaot bigwan mo toktok raon long olgeta blong stretem ol nid blong famli blong yu. Hemia samfala tingting:
Moronae 1; Moronae 6:3
?I minim wanem blong “tanem baksaed long Kraes”? (Moronae 1:2–3). ?Olsem wanem nao yumi save soem we yumi gat “wan strong tingting blong wok blong hem kasem en”? (Moronae 6:3). Serem sam eksampol blong sam pipol we yu save, we oli gat wan strong tingting olsem blong wok blong Hem.
Moronae 4:3; Moronae 5:2
Sapos yufala i ridim ol prea blong sakramen olsem wan famli, bae i save mekem yufala i toktok raon long fasin blong tekem sakramen wetem moa respek. Maet ol memba blong famli oli save toktok raon long ol sentens we oli stap long ol prea ia, we oli gat mining long olgeta. Oli save raetemdaon tu ol tingting mo filing blong olgeta abaot olgeta sentens ia, o oli save droem wan pikja we i stap helpem olgeta blong tingting abaot Sevya. Oli save tekem wanem we oli raetem, o droem i go long sakramen miting blong helpem olgeta blong putum tingting blong olgeta i stap long Hem nomo. Talem long famli blong yu olsem wanem yu yu stap filim abaot sakramen mo sakrifaes blong Sevya.
Moronae 6:1–4
?I minim wanem blong gat wan “wan hat we i fulap wetem sore mo wan spirit we i wantem blong sakem sin”? (Moronae 6:2). ?Olsem wanem nao hemia i helpem yumi blong rere from baptaes? ?Olsem wanem nao, hemia i save helpem yumi afta we yumi baptaes?
Moronae 6:4–9
Folem ol ves ia, ?wanem nao sam long olgeta blesing we oli kam taem we oli “kaontem [yu] wetem ol pipol blong jos blong Kraes”? Moronae 6:4 ?From wanem yumi nidim Jos?
Moronae 6:8
?Wanem nao ves ia i stap tijim long saed blong fasin blong sakem sin? ?Hem i minim wanem blong askem fogivnes “wetem tru tingting”? (Moronae 6:8). Tingting blong singsing wan singsing abaot fasin blong fogiv, olsem “Help Me, Dear Father” (Children’s Songbook, 99).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Stap Kam Antap long Stadi blong Yuwan
Faenem pruf we i soem lav blong God. Presiden M. Russell Ballard i tijim: “Gospel i wan gospel blong lav—lav long God mo lav long wanwan long yumi” (“God’s Love for His Children,” Ensign, May 1988, 59). Taem yu stap ridim olgeta skripja, tingting blong raetemdaon o makem ol pruf blong lav we God i gat long yu mo long evriwan long ol pikinini blong Hem.
Moronae insaed long Hol blong Ston, i kam long Jorge Cocco