Na ivakaraitaki i Karisito ni rairai vei ira na Nifaiti mai vei Andrew Bosley

12–18 ni Okotova

3 Nifai 20–26

“Dou Sa Luve ni Veiyalayalati”

Ni o wilika na 3 Nifai 20–26, “vakadikeva vagumatua sara na veika oqo” (3 Nifai 23:1) mo kunea na dina o vakila ka vakauqeti kina mo wasea vei ira na gone ena nomu kalasi.

Vola na Veika o Uqeti Kina

Sureta na Veiwasei

Solia wavoki e dua na iyaloyalo ni iVakabula e na kalasi. Ni taura e dua na gone na iyaloyalo, sureti koya me wasea e dua na ka e a vakavulica se cakava o Jisu ni a sikovi ira na tamata ena iVola i Momani. E rawa ni ra wasea e dua na ka era a vulica mai vale se ena Lalai.

Vakavulica na iVunau: Gone Sobu

3 Nifai 20:1

Au rawa ni masu e yaloqu.

Kevaka e a vulica me baleta na masu na nomu kalasi ena macawa sa oti, e rawa ni o taracake na lesoni o ya kei na dua na itaviqaravi oqo.

iTaviqaravi e Rawa ni Caka

• Kerei ira na gone me ra vakaraitaka vei iko na ka era cakava ni ra masu. Na cava era cakava e ligadra? uludra? matadra? Vakamacalataka ni so na gauna eda via vosa vua na Tamada Vakalomalagi, ia eda sega ni rawa ni tekiduru se bobo. Na cava e rawa ni da cakava? Wilika vei ira na gone na 3 Nifai 20:1: “[Ko Jisu] sa vakaroti ira me kakua sara ni mudu na nodra dau masu e lomadra.” Tukuna vei ira na gone na ivakarau ni nomu dau masu e lomamu.

• Droinitaka e dua na gusu kei na uto ena papa ni volavola. Kerei ira na gone me ra dusia na gusu ka tukuna vei iko eso na ka era dau kaya ni ra masu. Qai kerei ira me ra dusia na uto, ka vakamacalataka ni da rawa ni kaya na ka vataga oya ena yaloda. Vakadinadinataka ni Tamada Vakalomalagi e kila na veika eda vakila kei na vakasama.

3 Nifai 24:8–12

Na saumi iKatini e kauta mai na veivakalougatataki.

O ira na gone era se bera ni papitaiso e sega ni namaki me ra sauma na ikatini. Ia, e sega ni se rui totolo me vakavulici vei ira na ivakavuvuli kei na veivakalougatataki e salavata kei na lawa oqo.

iTaviqaravi e Rawa ni Caka

• Kevaka e dua na katubaleka ni nomu rumu ni kalasi, sureti ira na gone me ra vakaraica toka. Na cava e rawa ni yaco mai ki na rumu ni sa tadola tu na katuba leka? Wilika na 3 Nifai 24:10, ka vakamacalataka ni da sauma na ikatini, ena tadola na “katubaleka ni lomalagi” ka na rawa ni yaco mai na veivakalougatataki ki na noda bula.

• Vakaraitaka vei ira na gone e 10 na ilavo qaqa (se iyaya lalai tale eso). Sureti ira me ra wilika vata kei iko na ilavo qaqa oqori. Vakadinadinataka ni veika kece e tu vei keda e ka ni veivakalougatataki mai vei Tamada Vakalomalagi. Wasea tani e dua na tiki ni ilavo qaqa, ka vakamacalataka ni gauna eda sauma kina na ikatini, eda solia lesu vei Tamada Vakalomalagi e dua na ikatini ni veika eda rawata. Vakaraitaka na iyaloyalo ni sala eso ni vakayagataki ni ikatini me vakalougatataki kina na Lotu ni Turaga (me vaka na tara ni veivaletabu, na vakatetei ni kosipeli, kei na so tale; raica na Gospel Art Book, naba 109–10, 118–19).

• Lagata vata e dua na sere me baleta na ikatini, me vaka na “I Want to Give the Lord My Tenth” (Children’s Songbook, 150). Dusimaka na vei malanivosa e vakavulica na vuna eda sauma kina na ikatini.

3 Nifai 25:5–6

Na Tamada Vakalomalagi e vinakati au meu vulica baleti ira na noqu qase.

Me vaka a parofisaitaki ena veitikina oqo, o Ilaija sa vakalesuya mai na idola ni veivauci ka rawa kina me da tiko vata kei ira na noda matavuvale me tawamudu.

iTaviqaravi e Rawa ni Caka

• Wilika na 3 Nifai 25:6, ka sureti ira na gone me ra biuta na ligadra e utodra ena veigauna era rogoca kina na vosa “lomadra.” Vakamacalataka ni Tamada Vakalomalagi e vinakata “na gonelalai”—keda kece sara—me vulica ka vakila na loloma me baleti ira “na qase”—noda itubutubu, tukada-buda, kei na tukada-buda vakarua.

• Sureta na itubutubu ni dua vei ira na gone me talanoataka baleti ira nona qase. Se tukuna vei ira na gone e dua na italanoa me baleta e dua vei ira na nomu qase; vakaraitaka na kena iyaloyalo ke rawa. Vakadinadinataka ni Tamada Vakalomalagi e gadreva meda tiko tawamudu vata kei na noda matavuvale, ka sa vuna e solia kina vei keda o Koya na valetabu. Lagata vata na “Matavuvale me Tawamudu Tu,”” (iVolanisere ni Gonelalai, 98).

Vakavulica na iVunau: Gone Qase Cake

3 Nifai 23:1, 5

Au rawa ni vakasaqaqara vagumatua ena ivolanikalou.

Na iVakabula a tukuna vei ira na lewevuqa me ra vakasaqaqara ena ivolanikalou, ka a vinakata me raica me ra vola na nodra vosa na parofita (raica na 3 Nifai 23:1, 5–13; 26: 2).

iTaviqaravi e Rawa ni Caka

• Sureti ira na gone mera wilika na 3 Nifai 23:1, 5 ka vakaraica e dua na vosa e tukuni vakatolu. Na cava na kena ibalebale me vakasaqarai na vosa ni parofita? E duidui vakacava na vakasaqaqara mai na wilika walega? Tukuna vei ira na gone o vakasaqaqara vakacava ena ivolanikalou kei na veika o raica rawa kina.

• Solia vei ira yadua na gone e dua na kadi lailai se tiki ni pepa, ka sureti ira mera vola na vosa veivagolei kina dua na tiki ni ivolanikalou taleitaki. (Soli vakasama vei ira ke gadrevi.) Me ra veivukevuke na vunitaka na nodra kadi ena loma ni rumu ni ra tabonaka na matadra na vo ni gone. Kerei ira na gone me ra vakasaqara na tiki ni ivolanikalou, ia ni ra sa kunea, me ra wilika vata. Na cava eda kunea ena tiki ni ivolanikalou oqo ka sa bibi vei keda?

3 Nifai 24:8–12

Na saumi ikatini e dolava na katubaleka kei lomalagi.

Ni o vakavulici ira na gone me baleta na ikatini, o sa vakarautaki ira mera ciqoma na “veivakalougatataki me na sega na tikina e maroroi rawa kina” (3 Nifai 24:10).

iTaviqaravi e Rawa ni Caka

• Vola ena papa ni volavola Kevaka au sauma na ikatini, na Turaga ena . Sureti ira na gone me ra wilika na 3 Nifai 24:8–12, ka vukei ira mera vakaraica na malanivosa me vakacavara na yatuvosa oqo. Wasea e dua na ka o sa vakalougatataki kina baleta ni o a sauma na ikatini.

• Vola e so na levu ni ilavo ena papa ni volavola, ka vukei ira na gone me cakacakataka e vica na ikatini (10 na pasede) me da solia me baleta na levu ni ilavo yadua. Vakaraitaka vei ira na kena vakaleweni na tikidua ni ikatini.

• Vukei ira na gone mera vola ena papa ni volavola eso na sala e vakayagataki kina na ikatini me vakalougatataka na Lotu ni Turaga (me tara na valetabu, vakatetei na kosipeli, tabaki vakaivola na ivolanikalou, kei na so tale). Kerei ira na gone me ra droinitaka na iyaloyalo (se raica na iyaloyalo ena mekasini ni Lotu) ni sala eso e vakalougatataka kina na Lotu na ikatini.

3 Nifai 25:5–6

Na Tamada Vakalomalagi e vinakati au meu vulica baleti ira na noqu qase.

Vakasamataka na sala mo vakauqeti ira kina na gone me ra vakasaqarai ira na nodra qase e liu me rawa ni ra vakayacora na cakacaka vakalotu ena vukudra ni ra lako ki na valetabu, ena gauna era sa qase cake kina.

iTaviqaravi e Rawa ni Caka

• Tukuna vei ira na gone ni 3 Nifai 25:5–6 e tiko kina e dua na parofisai me baleta e dua na ka ena yaco ena veisiga emuri. Sureti ira me ra wilika na veitikina oqo me ra kila kina se cava oya. Vakadinadinataka ni sa vakayacori na parofisai oqo, ka sureti ira na gone mera wilika na veika e baleta ena Vunau kei na Veiyalayalati 110: 13–16 (raica talega na Gospel Art Book, naba 95). Vakamacalataka ni gauna eda sa vulica me baleta na noda qase e liu ka cakava nodra cakacaka ena valetabu, na lomada e sa vagolei tiko vei ira na noda qase.

• Tukuna vei ira na gone me baleta e dua na nomu qase e liu sa mate ka a sega na madigi me papitaiso kina. Vakaraitaka e dua na iyaloyalo kevaka e rawa. Wasea na nomu ivakadinadina ni Tamada Vakalomalagi e lomani koya na tamata oqo, ka sa vakarautaka tu na sala vei koya me ciqoma na papitaiso mai na cakacaka e vakayacori ena valetabu. Kerei ira na gone me ra raica e dua na malanivosa ena 3 Nifai 25:6 ka rawa ni vakamacalataka na lomamu baleta na nomu qase e liu.

• Vukei ira na gone me ra vakalewena ena dua na vunikau ni matavuvale na yacadra nodra itubutubu kei na tukadra-budra. Vakauqeti ira mera tarogi ira nodra itubutubu me vukei ira me vakuria eso tale na yaca.

Vakauqeta na Vuli e Vale

Sureti ira na gone mera kerei ira nodra itubutubu se tukadra-budra me talanoataka vei ira me baleta na nodra qase e liu.

Vakatorocaketaki Noda Veivakavulici

O ira na gone era dau vuli ena vuqa na sala. Era dau marautaka na gone me ra vuli ena veika vovou ka duidui era sotava. Vakayagataka na itaviqaravi eso e solia na galala me ra veitosoyaki, vakayagataka taucoko nodra wakilakila, ka tovolea na veika vovou. (Raica na Teaching in the Savior’s Way, 25.)