Na Rarama ni Matana Sa Serau vei Ira, mai vei Gary L. Kapp

28 ni Sepiteba–11 ni Okotova

3 Nifai 17–19

“Raica, Sa Vuabale Na Noqu Marau”

Ni o wilika na 3 Nifai 17–19, vakasamataka na ivolanikalou, na veika sotavi, na itaviqaravi, kei na italanoa cava so ena vukei ira na gone me ra kila na dina e tiko ena vei wase oqo.

Vola na Veika o Uqeti Kina

Sureta na Veiwasei

Vakaraitaka e dua na iyaloyalo ni iVakabula, ka sureti ira na gone me ra wasea na veika era na vakila kevaka me a sikovi ira o Koya me vakataki ira na Nifaiti.

Vakavulica na iVunau: Gone Sobu

3 Nifai 17:7, 20–25

Na iVakabula e lomani ira yadua na luvei Tamada Vakalomalagi.

O Jisu e a vakaraitaka na nona lomani ira na gone ni vakalougatataki ka masulaki ira. E rawa vakacava mo vukei ira na gone o vakavulica me ra vakila na Nona loloma me baleti ira?

iTaviqaravi e Rawa ni Caka

• Vakalekalekataka na itukutuku e tiko ena 3 Nifai 17 ni o vakaraitaka tiko e dua na iyaloyalo me vaka na kena e tiko ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Se o rawa ni vakayagataka na “Chapter 44: Jesus Christ Blesses the Children,” (Book of Mormon Stories, 124–25, se na kena vidio ena ChurchofJesusChrist.org). Wilika na malanivosa se tikina eso mai na 3 Nifai 17 ka vakabibitaka na loloma ni iVakabula vei ira na tamata (me vaka na tikina e 7 kei na 20–25). Mera veivukevuke na gone mera taura na iyaloyalo ka tukuna na veika a cakava o Jisu baleta ni lomani ira na tamata o Koya.

• Vakayagataka na tabana ni itaviqaravi ni macawa oqo me vukei ira na gone mera droinitaka e dua na kedra iyaloyalo kei Jisu. Ni ra cakava oqori, vukei ira mera vakasamataka eso na sala e vakaraitaka kina o Jisu na Nona loloma ena vukudra.

  

  Raici Ira Na Nomudou Lalai, mai vei Gary L. Kapp

3 Nifai 18:1–12

Au rawa ni vakasamataki Jisu ni’u vakayagataka na sakaramede.

E vuqa na ka e rawa ni vagolea tani e dua na gone ena gauna ni sakaramede. O na vukei ira vakacava na gone ena nomu kalasi mera kila na bibi ni vakasamataka na iVakabula kei na Nona loloma me baleti ira ena gauna ni cakacaka tabu vakalotu oqo?

iTaviqaravi e Rawa ni Caka

• Sureti ira na gone me ra tukuna vei iko na cava e yaco ena gauna ni sakaramede. Wilika na veitikina mai na itukutuku i Jisu ni qarava tiko na sakaramede vei ira na Nifaiti (raica na 3 Nifai 18:1–12), ka kerei ira na gone me ra tucake ni ra rogoca e dua na ka e tautauvata kei na veika eda cakava ena gauna ni sakaramede. Na cava e vinakata o Jisu Karisito meda “nanuma” se vakasamataka ena gauna ni sakaramede? (raica na 3 Nifai 18:7, 11).

• Vagugutaka, lagata se vakatagitaka e dua na serenilotu se sere ni Lalai ni ra rokataka tiko na gone na iyaloyalo ena vukea mera dau nanuma na iVakabula ena gauna ni sakaramede (raica na tabana e itaviqaravi ni macawa oqo). Vakauqeti ira mera dau raica na iyaloyalo oqo me vukei ira mera nanumi Jisu ni ra vakayagataka na sakaramede.

3 Nifai 18:15, 20–21, 24; 19:16–17, 30

O Jisu e vakavulici au ena ivakarau ni masu.

Na cava o kila rawa me baleta na masu ni o vulica na 3 Nifai 17–19? O na vakayagataka vakacava na veika o sa vulica mera vakavulici kina na gone ena ivakarau ni masu ?

iTaviqaravi e Rawa ni Caka

• Vakaraitaka na iyaloyalo ni tamata era masu tiko (me vakataka ena “Chapter 46: Jesus Christ Teaches and Prays with the Nephites” ena Book of Mormon Stories, 128–30). Sureti ira na gone me ra dusia eso na ituvaki ena iyaloyalo ka vakaraitaka ni ra masu tiko na tamata oqo. Wilika na 3 Nifai 19:16–17 me vakamacalataka ni o Jisu a vakavulica vei keda na ivakarau ni masu. Mera tukuna vei iko gone na veika era dau vakila ni ra masu.

• Wilika na 3 Nifai 18:21, ka sureti ira na gone me ra droinitaka e dua na kedra iyaloyalo se nodra matavuvale ni ra masu tiko. Vakauqeti ira na gone me ra sureti ira na nodra matavuvale me ra dau masu vata kei ira.

• Lagata vata e dua na sere baleta na masu, me vaka na “A Child’s Prayer” (Children’s Songbook, 12–13). Kerei ira na gone mera wasea na ka era sa vulica me baleta na masu mai na sere oqo. Wasea na nomu ivakadinadina ni masu.

Vakavulica na iVunau: Gone Qase Cake

3 Nifai 17

Na iVakabula e lomani ira na luvei Tamada Vakalomalagi.

A vakavulica o Peresitedi Ezra Taft Benson: “Au yalataka vei kemuni, na gone lomani, ni ra na qaravi kemuni talega o ira na agilosi. O ni sega beka ni raici ira, ia era na tu me vukei kemuni, ka ko ni na vakilai ira” (“To the Children of the Church,” Ensign, May 1989, 83).

iTaviqaravi e Rawa ni Caka

• Wilika vata eso na tikina mai na 3 Nifai 17 ka ko vakila ni na vakaibalebale vakalevu vei ira na gone o vakavulica. Ni o wilika na veitikina yadua, kerei ira na gone mera digitaka e dua na vosa se malanivosa ka ra nanuma ni sa bibi ka wasea na vuna e vakaibalebale kina vei ira na veivosa oqo. Vakadinadinataka ni o Jisu e lomani ira na gone vakalevu sara, ka sai koya oqo na vuna a vakalougatataki ira ka masulaki ira kina o Koya.

• Sureti ira na gone me ra wasea na veika era na rairai vakila ke ra a tiko maliwai ira na gone ka a vakalougatataki ira na iVakabula. Kevaka e rawa, vakaraitaka na vidio “My Joy Is Full” (ChurchofJesusChrist.org) me vukei ira me raitayaloyalotaka na veika oqo. Na cava e a cakava na iVakabula me vakaraitaka kina na Nona loloma? Na cava e rawa ni da cakava me da vakarautaki keda kina meda na tiko vata kei Koya ena Nona lesu tale mai?

3 Nifai 18:1–12

Ni’u vakayagataka na sakaramede, au rawa ni vakasinaiti ena Yalo Tabu.

Eda rawa ni vulica mai na 3 Nifai 18 na bibi ni sakaramede vua na iVakabula. O na vukei ira vakacava na gone mera vakila na kena bibi vei ira?

iTaviqaravi e Rawa ni Caka

• Vukei ira na gone me ra wilika na 3 Nifai 18:1–12. Na cava era vulica me baleta na sakaramede mai na veitikina oqo? Vukei ira mera wilika na masu ni sakaramede ena Vunau kei na Veiyalayalati 20: 77 kei na 79 ka vakasaqara na vosa kei na malanivosa ena masu ka ra kunei talega ena 3 Nifai 18:1–12. Na cava na ibalebale ni veivosa kei na veimalanivosa oqo? Eda vakarautaki keda vakacava me da vakayagataka na sakaramede? Na cava eda yalataka me da cakava ena noda taura na sakaramede?

• Lagata vata e dua na sere ni vakarokoroko, me vaka na “Rokovi, Lomani” (iVolanisere ni Gonelalai,11). Ena vukei keda vakacava meda vakila na Yalotabu na noda taura na sakaramede ena vakarokoroko? E vukei keda vakacava meda digidigi donu?

3 Nifai 18:15–24; 19:6–9, 15–36

Na masumasu ena vukei au meu voleka kivei Tamada Vakalomalagi.

Eda rawa ni vakila ni volekati keda na Tamada Vakalomalagi ena masu. Na itukutuku cava me baleta na masu ena 3 Nifai 18–19 ena vukei ira na gone o vakavulica me vakavinakataka na nodra masu?

iTaviqaravi e Rawa ni Caka

• Vola na veitiki ni ivolanikalou ena tiki ni pepa, ka solia vei ira na gone yadua se ki na vei iwasewase lalai ni gone: 3 Nifai 18:15; 3 Nifai 18:20; 3 Nifai 18:21; 3 Nifai 19:19; kei na 3 Nifai 19:24. Sureti ira na gone me ra wilika na ivolanikalou, ka vakaraica na veika a vakavulica o Jisu Karisito se Nona tisaipeli me baleta na masu. Kerei ira mera wasea na veika era vulica ki na kalasi.

• Ena papa ni volavola, vola au vakavinavinaka vei kemuni ni . Solia vei ira na gone e dua na miniti mera vakasamataka kina na levu ga ni ka era kila mera vakalewena ena vanua lala. Na cava e vinaka kina meda dau vakaraitaka na vakavinavinaka vei Tamada Vakalomalagi? Mo qai vola na au kerea vei kemuni na ena papa ni volavola, ka wilika vata na 3 Nifai 18:18–21 kei na 19:9, 23, ka vakaraica na vei vakasama me baleta na veika e dodonu me da masulaka.

• Wasea na nomu ivakadinadina se dua na ka o sotava baleta na kaukauwa ni masu, ka vakauqeti ira na gone mera wasea na nodra ivakadinadina se na veika era sa sotava.

Vakauqeta na Vuli e Vale

Vakauqeti ira na gone mera vosa vei ira na nodra itubutubu se lewe ni matavuvale me baleta na sala me vakaibalebale vakalevu cake kina vei ira na sakaramede ena Sigatabu ka tarava.

Vakatorocaketaki Noda Veivakavulici

Vukei ira na gone sobu me ra vuli mai na ivolanikalou. Mo vukei ira na gone sobu mera vuli mai na ivolanikalou, vakanamata ki na dua na tikina ena ivolanikalou se dua mada ga na malanivosa bibi. O na sureti ira beka na gone mera tucake ni ra rogoca e dua na vosa matata se malanivosa vakatabakidua.