O Jisu e vakaraitaka na iApositolo Le Tinikarua

Third Nephi: These Twelve Whom I Have Chosen, mai vei Gary L. Kapp

21–27 ni Sepiteba

3 Nifai 12–16

“Ko i Au na Lawa, kei na Rarama”

Ni ko vulica na 3 Nifai 12–16, vakaraica na dina e na rawa me vakaibalebale vei ira na gone o vakavulica. Na idusidusi oqo e vakatututaka eso na dina, ia na Yalo Tabu ena rawa ni dusimaki iko ki na so tale.

Vola na Veika Ko Uqeti Kina

ivakatakilakila ni veiwasei

Sureta na Veiwasei

Solia wavoki e dua na iyaloyalo kei Jisu. Me ra veivukevuke na gone ena nodra taura na iyaloyalo ka wasea e dua na ka a vakavuvulitaka o Jisu, me vaka e dua na ka era sa vulica mai vale ena macawa oqo.

ivakatakilakila ni veivakavulici

Vakavulica na iVunau: Gone Sobu

3 Nifai 12:14–16

Au rawa ni ivakaraitaki vinaka vei ira na tani.

Ena so na gauna era sega ni kila na gone ni nodra ivakaraitaki e rawa ni vakalougatataki ira na tani. Vakayagataka na veitikina oqo me vakauqeti ira me ra vakacilava yani na nodra rarama.

iTaviqaravi e Rawa ni Caka

• Tukuna vei ira na gone ni 3 Nifai 12:14–16 e sa baleti ira, ka qai wilika e cake. Ena gauna kece o wilika kina na “kemudou” se “nomudou,” dusi vei ira na gone, ka kerei ira mera dusi ira vakai ira.

• Vakaraitaka vei ira na gone e dua na cina livaliva, ka sureta e dua vei ira me waqaca. Vakamacalataka ni gauna eda muria kina na iVakabula, e sa vaka me waqa e dua na rarama ka rawa ni vukei ira tale eso me muri koya talega. Qai ubia se vunitaka na rarama, ka kerei ira na gone me ra tukuna eso na ka e rawa ni ra cakava me ra ivakaraitaki vinaka kina vei ira na tani. Ena veigauna kece era cakava oqori, mera cereka na rarama (raica talega na tabana ni itaviqaravi ni macawa oqo).

• Me lagati vata e dua na sere e vakauqeti ira na gone me ra serau me vaka e dua na rarama, me vaka na“Shine On” se “I Am like a Star” (Children’s Songbook, 144, 163). Tukuna vei ira na gone me baleta na rarama o sa raica vei ira ni ra vakayacora na “cakacaka vinaka,” ka vakamacalataka na sala e vukei ira kina na tani ka vakauqeti iko mo cakava talega na cakacaka vinaka na nodra rarama kei na ivakaraitaki.

3 Nifai 14:7

Na Tamada Vakalomalagi e dau sauma na noqu masu.

Na tikina oqo e rawa ni vukei ira na gone mera kila vakavinaka ni na rogoca ka sauma na nodra masu na Kalou.

iTaviqaravi e Rawa ni Caka

• Ni o wilika na 3 Nifai 14:7, sureti ira na gone me ra matanataka na veika e matataka tiko na veisureti yadua ni i Vakabula ena tikina oqo. Me kena ivakaraitaki, era rawa ni laveta na ligadra (kerekere), cakava na vakadodorairai ena ligadra (vakasaqara), se cakava e dua na ivukivuki ni tuki katuba (tukituki). Vukei ira na gone me ra vakasamataka na veika era rawa ni kaya ka kerea ena nodra masu. Vakamacalataka ni da rawa ni tukuna vei Tamada Vakalomalagi e dua ga na ka, ka na rogoca o Koya baleta ni lomani keda o Koya.

• Sureti ira na gone me ra vakaraitaka vei iko na ka era cakava e ligadra, matadra, kei na uludra ni ra masu. Vakayagataka na sere me vaka na “Keimami Cuva Masu No” me veivuke (iVolanisere ni Gonelalai,18b). Eda vosa tiko beka vei cei ni da masu? Wasea na nomu ivakadinadina ni Tamada Vakalomalagi sa dau rogoca na noda masu.

3 Nifai 14:24–27

Na iVakabula e vinakata me’u rogoca ka cakava na ka e vakavulica o Koya.

Ni rogoci walega na vosa ni iVakabula e sega ni rauta. O ira ga era bulataka na Nona ivakavuvuli era rawa ni vorata na cava ni bula.

iTaviqaravi e Rawa ni Caka

• Lagata vata na “The Wise Man and the Foolish Man” (Children’s Songbook, 281), se wilika na 3 Nifai 14:24–27. Vukei ira na gone me ra vakaisosomitaka na yacadra kei “na tamata vuku” ni ra lagasere tiko. Na cava na vuna e a duri dei tu ga kina na vale ni tamata vuku ena gauna ni cava? Raica lesu na tikina e 24 mo vakabibitaka ni a vakayacora ruarua o koya na rogoca kei na cakava na ka a kaya na iVakabula.

• Vakaraitaka vei ira na gone e dua na vatu kei na so na nuku. Kerei ira mera dusia na vatu ni o vakamacalataka e dua na digidigi me muria na iVakabula ka dusia na nuku ni o vakamacalataka e dua na digidigi ka sega ni muri Koya. Vakadinadinataka ni da cakava na veika e tukuna na iVakabula, eda sa kaukauwa me vaka e dua na vale e tara toka ena dela ni vatu.

ivakatakilakila ni veivakavulici

Vakavulica na iVunau: Gone Qase Cake

3 Nifai 12:6

E dodonu meu via kania ka via gunuva na ivalavala dodonu.

Na tamata kece e rawa ni vakila na waloloi kei na karamaca; a tukuna na iVakabula na veika vakilai vakaoqo me vakavulica vei keda na sala e dodonu meda vakila e na vakasaqarai ni ivalavala dodonu.

iTaviqaravi e Rawa ni Caka

• Me ra kua ni rogoca na vo ni gone, kerea e dua na gone me vakaraitaka na imoimoi ni kana se gunu, ka me ra qai vakilakila na vo ni gone na cava e vakayacora tiko o koya. Na cava eda vakila ni da kania na kakana vinaka se gunu wai savasava? Eda na vakabulabulataka vakacava na yaloda? Sureti ira na gone me ra wilika na 3 Nifai 12:6 me ra kila kina na veika e vinakata na iVakabula me ra “via kania ka via gunuva.” Eda vakaraitaka vakacava ni da vinakata na ivalavala dodonu me vaka ga eda gadreva na kakana kei na gunu?

• Kauta mai na iyaloyalo ni kakana kei na gunu, ka vakatokai ira yadua ena tiki ni ivolanikalou me vaka na Same 119:103; Joni 6:35; 2 Nifai 32: 3; Inosi 1:4; se na 3 Nifai 20:8. Kerei ira na gone me ra wilika na veitikina ka vakamacalataka na veika era vakavulica me baleta na veika eda rawa ni cakava me vakaraitaka ni da via kania ka via gunuva na ivalavala dodonu. Wasea na veika sotavi eso o sa vakila kina na “vakasinaiti ena Yalo Tabu,” ka sureti ira na gone me ra wasea na veika era sotava.

3 Nifai 13:1–8, 16–18

E dodonu meu kitaka na veika vinaka me baleta na inaki dodonu.

Na veitikina oqo e vakaraitaka ni caka vinaka e sega ni veirauti—sa dodonu me vakauqeta na noda cakacaka na noda lomana na Kalou kei na gagadre me da qaravi koya.

iTaviqaravi e Rawa ni Caka

• Kerei ira yadua na gone me ra vakasaqara na 3 Nifai 13:1–4, 5–8, se na 16–18 ka vakaraica na veicakacaka vinaka ka tukuni tiko ena veitikina oqo (vakamacalataka ni soli “ka ni loloma” e kena ibalebale na dausoli ka vei ira na dravudravua). Na cava na vuna e kaya kina na iVakabula meda kakua ni vaka e so na tamata ka ra dau vakayacora na veika oqo?

• Mera yadua na gone na tiki ni pepa ka volai toka kina e dua na cakacaka dodonu (se me ra vakasamataka ga vakaiira na nodra ivakaraitaki). Kerei ira me ra vakasamataka na vuna vinaka kei na kena ca ni caka na veika oqori. Vakauqeti ira me ra dau vakayacora na veika vinaka ena inaki dodonu.

3 Nifai 14:21–27; 15:1

Na veitaqomaki vakayalo e lako mai na rogoca ka cakava na veika e vakavulica na iVakabula.

Na “uca” kei na “waluvu” e yaco vei keda kece ena bula oqo, ia eda rawa ni bula mai na veivakatovolei kevaka eda rogoca ka cakava na veika e vakavulica o Jisu.

iTaviqaravi e Rawa ni Caka

• Ni wilika vakalasi na 3 Nifai 14:21–27 kei na 15:1, ka kerei ira na gone me ra tucake e na veigauna kece o wilika kina na vosa “cakava.” Na cava na vuna e vakabibitaka kina na iVakabula na kena cakacakataki na nona veivosa, sega walega ni kena rogoci se nanumi? Sureti ira na gone mera droinitaka e dua na iyaloyalo ni tikina e 24–25 ka vola ena vatu “Jisu” kei na dua na ka a vakavulica vei keda o Jisu me da cakava. Lagata vata na “The Wise Man and the Foolish Man” (Children’s Songbook,281).

• Sureti ira na gone me ra tucake, ka kerei ira me ra raitayaloyalotaka ni dua na yavadra e matataka na rogoca na nona vosa na iVakabula kei na kena ikarua e matataka na cakava vakakina. Sureti ira mera laveta na yava ni “cakava” ka mera tu ga ena yava ni “rogoca”. Na cava ena yaco kevaka e liwa curuma na rumu e dua na cagi kaukauwa? Vakayagataka na ivakaraitaki oqo me vakatakila na vuna e bibi kina me ra cakava na ka a kaya na i Vakabula ka sega ni rogoca walega na Nona vosa.

ivakatakilakila ni vuli

Vakauqeta na Vuli e Vale

Sureti ira na gone me digitaka e dua na ka era sa vulica nikua me baleta na ivakavuvuli nei Jisu ka vakatulewataka na sala era na cakacakataka kina. Ena vukei ira vakacava mera dua na rarama vei ira na nodra matavuvale kei na itokani na veicakacaka oqori?

Vakatorocaketaki Noda Veivakavulici

Moica na itaviqaravi me sotava na gagadre. Kakua ni raica na veituvatuva oqo me ivakaro e dodonu mo muria ni o veivakavulici. Ia, vakayagataka me ra ivurevure ni nomu vakauqeti ni o vakasamataka vagumatua na nodra gagadre na gone o vakavulica. Ena so na gauna, o na vakauqeti mo moica na itaviqaravi me baleti ira na gone sobu me vakavulici vei ira na gone qase cake, se na kena veibasai.

tabana ni itaviqaravi: Au rawa ni dua na ivakaraitaki vinaka vei ira na tani