Ko i Au na Rarama kei Vuravura, mai vei James Fullmer

14–20 ni Sepiteba

3 Nifai 8–11

“Tucake ka Lako Mai vei Au”

Wilika na 3 Nifai 8–11 ni o vakananumi ira tiko na gone o vakavulica. Na vakasama eso ena ituvatuva oqo ena rawa ni dusimaka na nomu vakavakarau.

Vola na Veika o Uqeti Kina

Sureta na Veiwasei

Vakaraitaka e dua na iyaloyalo i Jisu Karisito ni a rairai e Amerika, me vaka na kena ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Sureti ira na gone me ra dusia na tikina lalai eso ena iyaloyalo ka wasea e dua na ka era kila me baleta na italanoa e tukuni tiko.

Vakavulica na iVunau: Gone Sobu

3 Nifai 8–11

O Jisu Karisito e sureti au meu lako mai Vua.

O na sega beka ni rawa ni wasea vata kei ira na gone na veika matailalai kece ni Nona rairai na iVakabula kivei ira na tamata i Nifai, ia e rawa ni o vukei ira mera vakila na loloma e a vakaraitaka vei ira na tamata o Koya ena 3 Nifai 8–11.

iTaviqaravi e Rawa ni Caka

• Tukuna vei ira na gone me baleta na cagilaba kei na butobuto e vakamacalataki tiko ena 3 Nifai 8, ka qarauna mo kakua ni vakarerei se vakacudrui ira kina. E rawa ni o vakayagataka na “Chapter24: Ammon Meets King Lamoni’s Father” (Book of Mormon Stories, 117–19, se na kena vidio ena ChurchofJesusChrist.org). Tarogi ira na gone na veika era na vakila beka ke ra a tiko ena cagilaba kei na butobuto oya. Vakamacalataka ni cagilaba kei na butobuto e a ivakatakilakila ni sa mate o Jisu, ka vakaraitaka e dua na iyaloyalo ni Vakoti ena Kauveilatai (raica na Gospel Art Book, naba 57). Qai wilika na 3 Nifai 9:13. Na cava a kaya o Jisu ni na cakava o Koya vei ira era sa veivutuni? Vukei ira na gone mera kila ni vosa na “vakabulai” ena tikina oqo e kena ibalebale ni o Jisu ena vosoti ira.

• Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ni o vakamacalataka ena nomu vosa ga na rairai ni iVakabula sa vakaturi cake tale kivei ira na Nifaiti kei na Leimanaiti. Wilika na malanivosa leleka mai na 3 Nifai 11 ka na vukei ira mera vakila na bibi ni veika sa yaco oqo. Sureti ira me ra bobo ka raitayaloyalotaka se na vakacava beka na ka era vakila kevaka era yaco mera raici Jisu. Se vakaraitaka na imatai ni miniti ni vidio “My Joy Is Full” (ChurchofJesusChrist.org). Tukuna vei ira na gone na ka o vakila ni o wilika ka vakananuma vakatitobu na veika a yaco oqo. Vakadinadinataka ni o Jisu e vinakata meda lako kece sara mai Vua ka vakila na Nona loloma. Vakacavara na tabana ni itaviqaravi vata kei ira na gone.

3 Nifai 10:4–6

O Jisu e taqomaki ira na Nona tamata me vaka na toa yalewa e taqomaki ira na luvena.

Na irairai ni dua na toa yalewa sa vakasoqoni ira vata na luvena e rawa ni vakavulici ira na gone me baleta na vakacegu kei na veimaroroi ni iVakabula kevaka eda na lako ki Vua.

iTaviqaravi e Rawa ni Caka

• Vakaraitaka e dua na iyaloyalo ni dua na toa yalewa e qaravi ira tiko na luvena. Wilika na 3 Nifai 10:6, ka talanoataka vei ira na gone na nona dau kacivi ira na luvena na toa yalewa ka taqomaki ira e ruku ni tabana ni yaco na leqa. Veivosakitaka na sala e vakataka kina na toa yalewa o Jisu ka da vakataka na luvena o keda. Eda na lako vakacava yani Vua me da vakarurugi?

• Vakabira e dua na iyaloyalo i Jisu ena dua na lalaga. Sureti ira na gone mera lako wavokita tiko na rumu ni kalasi ni o wilika na 3 Nifai 10:4 e cake. Tukuna vei ira me ra toso yani ki na iyaloyalo kei Jisu ni ra sa rogoca na vosa “vakasoqoni vata” se na “vakasoqoni ira.” Tokaruataka na itaviqaravi oqo ni o wilika na tikina e 5 kei na 6. Wasea vei ira na gone na sala o sa yaco mai kina Vua na iVakabula mo vakarurugi, ka vakadinadinataka ni o Koya ena taqomaki keda mai na veileqa vakayalo ni da maroroya na Nona ivakaro.

3 Nifai 11:21–26

O Jisu e vinakata meu papitaiso.

O ira na gone o vakavulica era sa vakarau tiko me ra papitaiso. Na ivakavuvuli i Karisito ena malanivosa oqo ena rawa ni vukei ira mera kila na vuna e bibi kina na papitaiso.

iTaviqaravi e Rawa ni Caka

• Wilika na 3 Nifai 11:21–26, ka sureti ira na gone me ra tucake ena veigauna kece era rogoca kina na vosa “papitaiso.” Vakamacalataka ni o Jisu e a vakavulica vei keda na sala dodonu ni papitaiso. Vakaraitaka na iyaloyalo ni nona papitaiso e dua na gone (raica na Gospel Art Book, naba. 104). Kevaka era sa raica oti e dua na papitaiso o ira na gone, sureti ira mera vakamacalataka na veika era a raica. O cei e a vakayacora na papitaiso, ka a cakava vakacava okoya?

• Sureta taumada, e dua na tama ni dua vei ira na gone me tiko ena nomu kalasi ka wasea vei ira na gone na vuna e bibi kina meda papitaisotaki ena tabadromuci mai vua e dua e taura tu na matabete. Okoya e rawa talega ni vakamacalataka vei ira na gone na cava ena yaco ena gauna era sa papitaiso kina, kei na veivakalougatataki era na ciqoma. Vakauqeti koya me vakayagataka na 3 Nifai 11:23–26 ena nona ivakamacala.

Vakavulica na iVunau: Gone Qase Cake

3 Nifai 8–11

Ni’u tiko ena butobuto, o Jisu Karisito e rawa ni noqu rarama.

E dua na itukutuku kaukauwa ni veiwase oqo oya ni o Jisu Karisito sa rarama kei vuravura, ka sa rawa me na rarama ki na noda bula o Koya.

iTaviqaravi e Rawa ni Caka

• Wilika vata na 3 Nifai 8:5–7, 11–23, kei na 10:9–13 (kevaka e rawa, vakabutobutotaka na rumu ni o wilika). Cegu vagauna na wiliwili ka tarogi ira na gone se vakaevei na veika era na vakila ke ra sotava na veika a yaco oqo. Wilika vata kei ira na gone eso na vosa ka vosa kina o Jisu Karisito vei ira na tamata ni ra a tiko ena butobuto (raica na 3 Nifai 9:13–14, 18). Na cava e a vakatokai Koya kina o Jisu Karisito me Rarama kei Vuravura? Na cava e a sureti ira kina na tamata, kei keda o Jisu, meda cakava me rawa ni noda rarama o Koya? (raica na 3 Nifai 9:20–22).

• Vakaraitaka vei ira na gone e dua na mape ni vuravura, ka vukei ira mera kunei Jerusalemi kei Amerika. Vakamacalataka ni veivakarusai ka tukuni ena 3 Nifai 8 e a ivakatakilakila vei ira na tamata ena vanua o Amerika ni o Jisu Karisito a sa vakoti ki na kauveilatai mai Jerusalemi. Wilika vata na 3 Nifai 11:1–15, ka kerei ira na gone me ra tukuna vei iko ni ra sa kunea e dua na ka e vukei ira mera vakila na loloma ni Kalou ena veitikina oqo. Wasea na tikina e 37, ka vakadinadinataka ni iVakabula e lomani ira kece na gone. Wasea na nomu ivakadinadina me baleta na dina ni veika o wilika tiko.

Yadudua, mai vei Walter Rane

3 Nifai 11:1–8

Au rawa ni vulica meu kila na domo ni Kalou ena noqu bula.

E liu era a sega ni kila na tamata na domo mai lomalagi era a rogoca. Na cava e rawa ni ra vulica na gone mai na itukutuku oqo me baleta na kena ciqomi na ivakatakila?

iTaviqaravi e Rawa ni Caka

• Wilika na 3 Nifai 11:1–4 kei ira na gone, ka cegu mo taroga na taro me vaka “Na cava o nanuma era sega ni rawa ni kila kina na domo na tamata?” Qai kerei ira mera wilika na tikina e 5–7 me ra raica na veika era a cakava na tamata ka vukei ira mera kila na domo ena yalodra. Eda na tovolea vakacava me vakarorogo vua na Kalou ni vosa o Koya ki na yaloda ena Yalo Tabu?

• Vakatagitaka e ra na katokatoni ni dua na serenilotu se na sere ni gone me rawa ni dredre ni rogoci. Tarogi ira na gone kevaka era rawa ni kila na qaqa ni sere. Qai vukei ira na gone me ra vaqara ena 3 Nifai 11:3 na ivakamacala ni domo mai lomalagi. Na cava e sega kina ni dau vosa na Kalou vei keda ena dua na domo “kaukauwa” se “rogo levu”? Na cava eda rawa ni cakava meda rogoci Koya vakavinaka cake kina?

Vakauqeta na Vuli e Vale

Sureti ira na gone me ra tukuna vua e dua me baleta na nona veisiko o Jisu ki Amerika—kevaka e rawa, e dua ka se bera ni kila oti.

Vakatorocaketaki Noda Veivakavulici

Sotava na vakasausa ena loloma. “Eso na gauna na nona ivakarau e dua na gone e rawa ni vakacacana nodra vuli na vo ni kalasi.“ Ni yaco oqori, mo dau vosota, yalololoma, ka veiciqomi ena bolebole eso ena rairai sotava tiko na gone oya. … Kevaka e vakaleqai tu nona bula na gone e vakasausa tiko, veitalanoa kei na kenadau ena tabanalevu se iteki baleti ira na vakaleqai tu se sikova na disabilities.ChurchofJesusChrist.org mo rawa ni kila na ivakarau me sotavi kina na gagadre eso oqori” (Veivakavulici ena iVakarau ni iVakabula,26).