Era vakadinadinataka na Nifaiti na siga e sega na kena bogi

E Dua na Siga, e Dua na Bogi, kei na Dua na Siga, mai vei Jorge Cocco

7–13 ni Sepiteba

3 Nifai 1–7

“Mo Laveta Cake Na Ulumu ka Marau”

Kevaka o gadreva na ikuri ni vakasama ni ko vakavakarau mo veivakavulici, raica na “Additional Resources for Teaching Children” kei na “Meeting the Needs of Younger Children” ena itekivu ni idusidusi oqo.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureti ira na gone me ra wasea na veika era nanuma mai na macawa sa oti me baleta na ivakatakilakila a kaya o Samuela na Leimanaiti ena vukei ira na tamata me kila ni sa sucu ko Jisu. Tukuna vei ira na gone ni nikua era na veivosakitaka me baleti ira na tamata era a raica na ivakatakilakila oya ni yaco.

ivakatakilakila ni veivakavulici

Vakavulica na iVunau: Gone Sobu

3 Nifai 1:4–15, 19–21

E a rairai mai e dua na kalokalo vou na gauna a sucu kina o Jisu Karisito.

Na itukutuku ena Veiyalayalati Vou ni nona sucu na iVakabula e kilai levu, mai vei ira sara madaga na gone. Na macawa oqo sa dua na madigi levu mo vakavulici ira kina na gone ena nomu kalasi me baleta na cakacaka mana era a raica na Nifaiti ena gauna a sucu kina o Jisu.

iTaviqaravi e Rawa ni Caka

• Ni bera na kalasi, vakabira e dua na kalokalo ena lalaga. Sureti ira na gone me ra vaqara e dua na ka ena lalaga e a dau sega ni tu kina. Tukuna vei ira na gone ni ra a raica na Nifaiti e dua na kalokalo vou e lomalagi ena gauna a sucu kina o Jisu. Vakalekalekataka na itukutuku mai na 3 Nifai 1:4–15, kei na 19–21. E rawa talega mo vakayagataka na “Chapter 41: The Signs of Christ’s Birth” (Book of Mormon Stories, 114–16, se na kena vidio ena ChurchofJesusChrist.org).

• Vakaraitaka vei ira na gone e dua na iyaloyalo ni nona sucu na iVakabula (raica na Gospel Art Book, no. 30), ka lagata e dua na sere ni Siganisucu taleitaki, me vaka na “The Nativity Song” (Children’s Songbook, 52–53). Vukei ira na gone me ra kila ni o ira na Nifaiti era a yawa sara mai na vanua a sucu kina o Jisu, ia era a kila na Nona sucu ena vuku ni veivakatakilakila era a raica. Vakadinadinataka ni dina ga eda sega ni raica na sucu ni iVakabula, na Yalo Tabu e rawa me vukei keda me da kila ni sa dina na kena italanoa ena ivolanikalou.

3 Nifai 1:20

Na nodra vosa na parofita sa na dau vakayacori ga.

A kaya na Turaga vei Nifai, “Au [na] vakaraitaka yani ki vuravura ni’u na vakayacora taucoko sara na veika au a vakarota me ra tukuna na noqu parofita tabu” (3 Nifai 1:13).

iTaviqaravi e Rawa ni Caka

• Vakaraitaka na iyaloyalo ka vakatakarakarataka na sala e vosa kina na Kalou vei ira na parofita, me vakataki Noa (Gospel Art Book, nos. 7–8; raica na Nai Vakatekivu 6–7) kei Samuela na Leimanaiti (Gospel Art Book, naba 81; raica na Ilamani 14:1–7). Sureti ira na gone me ra wasea na veika era kila baleta na italanoa eso oqo.

• Wilika vei ira na gone 3 Nifai 1:20, ka wasea na nomu ivakadinadina ni sa na dau vakayacori ga na vosa ni parofita. Sureti ira na gone mera vakarorogo vua na parofita ena koniferedi raraba e tarava.

3 Nifai 5:13

Au rawa ni muri Jisu Karisito.

O Momani a kaya, “Ko i au e dua na tisaipeli i Jisu Karisito.” E rawa vakacava mo vukei ira na gone mera raici ira vaka tisaipeli talega?

iTaviqaravi e Rawa ni Caka

• Wilika 3 Nifai 5:13, ka sureti ira na gone mera tokaruataka na malanivosa “Ko i au e dua na tisaipeli i Jisu Karisito.” Vakavulica vei ira ni sa dau tovolea e dua na tisaipeli i Jisu Karisito me muri Koya. Wasea e vica na ka a cakava o Momani me vakataki Jisu kina, me vaka na vakavulici ni vosa ni Kalou kei na talairawarawa ki na ivakaro ni Kalou (raica na 3 Nifai 5:13–18). Vukei ira na gone mera vakasamataka na sala eso e rawa ni ra tisaipeli kina.

• Ena dua na tiki ni pepa, vukei ira na gone mera droinitaka na ligadra ka kotiva tani. Vola na “Ko i au e dua na tisaipeli i Jisu Karisito” ena dua na yasana, ka sureti ira mera droinitaka e dua na ka era rawa ni cakava mera tisaipeli kina ena yasana kadua (o na gadreva mo vukei ira mera vakasamataka eso na nanuma). Lagata vata e dua na sere me baleta na muria na iVakabula, me vaka na “I’m Trying to Be like Jesus” (Children’s Songbook, 78–79).

ivakatakilakila ni veivakavulici

Vakavulica na iVunau: Gone Qase Cake

3 Nifai 1:4–21

Na yalayala ni Kalou, ka soli mai vei ira na Nona parofita, sa dau vakayacori tu ga.

Na itukutuku e tiko ena 3 Nifai 1:4–21 e rawa ni taracake na nodra vakabauta na gone ni Kalou sa dau dina tu ga ki na Nona yalayala.

iTaviqaravi e Rawa ni Caka

• Sureti ira na gone me ra veidutaitaka na parofisai i Samuela na Leimanaiti ena Ilamani 14:1–7 kei na kena vakayacori dina ena 3 Nifai 1:19–21. Vakadinadinataka ni yalayala ni Kalou mai na gusudra na nona parofita sa dau vakayacori tu ga.

• Wilika vata kei ira na gone na italanoa e tiko ena 3 Nifai 1:4–10. Tarogi ira na gone era na vakila vakacava beka ke ra a dua na dauvakabauta ka bula tiko ena gauna o ya. Sureti ira na gone mera wilika na vo ni itukutuku ena tikina e 11–15 ka vakatura na sala me taucoko kina na iyatuvosa oqo: “Na ivakavuvuli ni italanoa oqo oya …” Eda na vakaraitaka vakacava na noda dinata na Kalou ni da sa lomaleqa se yalolailai?

• Wasea e dua na ka sa yalataka vei keda na noda parofita bula. Na cava e rawa ni da cakava me vakaraitaka na noda vakabauta ni sa solia mai na Kalou na nona vosa na parofita?

3 Nifai 2:11–12; 3:13–14, 24–26

Eda sa kaukauwa cake ni da vakasoqoni vata.

Ko ira na Nifaiti era a vakasoqoni vata mera taqomaki vakayago kina. E rawa vakacava mo vukei ira na gone me raica ni vakasoqoni vata kei ira na itokani yalododonu e rawa talega ni solia vei ira na kaukauwa vakayalo?

iTaviqaravi e Rawa ni Caka

• Wilika vata kei ira na gone na vei tikina oqo, ka sureti ira me ra vakaraica na vuna era a soqoni vata kina na Nifaiti kei na veivakalougatataki a yaco vei ira: 3 Nifai 2:11–12 kei na 3:13–14, 24–26. Na cava e bibi kina vei keda me da “vakasoqoni” edaidai ena noda matavuvale kei na valenilotu? E rawa vakacava ni da vakaukauwataki vakayalo ni da vakasoqoni vata?

• Vakayagataka e dua na lesoni vakaraitaki me vakavulica ni da na kaukauwa cake ni da tu vata mai na noda tu veiyawaki. Me kena ivakaraitaki, sureti ira na gone mera tovolea me musuka e dua na tabanikau ka qai dua na ivesu tabanikau se mera basuka e dua na draunipepa ka qai dua na itaba draunipepa. Eda tautauvata beka vakacava kei na tabanikau se na draunipepa? Eda na veivaqaqacotaki beka vakacava vakai keda ni da soqoni vata ena noda matavuvale se e valenilotu?

• Vakamacalataka ni o Jisu sa vakasoqoni ira tiko na Nona tamata ki na Lotu edaidai ena cakacaka ni kaulotu (raica na 3 Nifai 5:24–26). Sureta e dua na daukaulotu tudei se kaulotu ni tabanalevu me wasea na veika e sotava me vakaraitaka ni ra sa vaqaqacotaki kina na tamata ena nodra vakasoqoni vata ki na Lotu.

3 Nifai 4:30–33; 5:12–26; 6:14; 7:15–26

Ko i au e dua na tisaipeli i Jisu Karisito.

O na vukei ira vakacava na gone mera raici ira vaka tisaipeli i Jisu Karisito, me vakataki Momani? (raica na 3 Nifai 5:13).

iTaviqaravi e Rawa ni Caka

• Vakaraitaka e dua na iyaloyalo kei Momani (me vaka na Gospel Art Book, no. 73). Sureti ira yadua na gone mera veivukevuke ka cavuqaqataka na ka a kaya o Momani ena 3 Nifai 5:13: “Ko i au e dua na tisaipeli i Jisu Karisito.” Na cava na kena ibalebale mo dua na tisaipeli i Jisu Karisito? (raica na VV 41: 5).

• Wasea na kalasi vaka ilawalawa lalai, ka lesia na ilawalawa yadua mera wilika e dua na ivakaraitaki oqo ni tisaipeli: na Leimanaiti era sa saumaki (raica na 3 Nifai 4:30–33; 6:14), Momani (raica na 3 Nifai 5:12–26), kei Nifai (raica na 3 Nifai 7:15–26). Era a tisaipeli dina i Jisu Karisito vakacava o ira na tamata oqo? Na cava eda rawa ni cakava meda muria kina na nodra ivakaraitaki?

ivakatakilakila ni vuli

Vakayaloqaqataka na Vuli e Vale

Sureti ira na gone me ra vakasamataka e dua na ka era na cakava ena macawa oqo me ra tisaipeli i Karisito. Vakauqeti ira me ra vola ka wasea vei ira na nodra matavuvale.

Vakatorocaketaki Noda Veivakavulici

Vakaraitaka e dua na ivolanikalou. Digitaka e dua na tikina o raica ni vakaibalebale (se sureti ira na gone mera digitaka e dua), ka vakabira tu ena nomu rumu ni kalasi mera raica wasoma kina na gone. E rawa mo vakaraitaka tu me vica na macawa ka taleva lesu vaka gauna.

na tabana ni itaviqaravi: era raica na tamata na ivakatakilakila ni sucu i Karisito