Christ’s Prayer, mai vei Derek Hegsted

19–25 ni Okotova

3 Nifai 27–4 Nifai

“Sa Sega Beka ni Dua na Matatamata Mamarau Cake”

Ni o wilika na 3 Nifai 27–4 Nifai, vakasamataka na veika sotavi, na vakanananu, na ivolanikalou, kei na italanoa ka na vukei ira na gone me ra kila na ivakavuvuli ena veiwase oqo.

Vola na Veika o Uqeti Kina

Sureta na Veiwasei

Vukei ira na gone me ra nanuma lesu na veika era sa vulica ena vica na macawa sa oti me baleta na veika a vakavulica o Jisu vei ira na tamata ena vanua ko Vanuasautu. Vakamacalataka ni iVola i Momani e tukuna vei keda na nodra a vakalougatataki na tamata ni ra muria na veika a vakavulica vei ira o Jisu.

Vakavulica na iVunau: Gone Sobu

3 Nifai 27:1–22

Au lewena na Lotu i Jisu Karisito.

Ena vukei ira vakacava na gone me ra kila na bibi ni noda lewena na Lotu i Jisu Karisito na Nona vosa na iVakabula vei iratou na Nona tisaipeli?

iTaviqaravi e Rawa ni Caka

• Kerei ira yadua na gone mera cavuta na yacadra. Na cava e bibi kina na yacada? Tukuna vei ira ni o ira na tisaipeli i Jisu era a vinakata mera kila na yaca me vakatokai kina na Lotu i Karisito. Wilika vei ira na isau ni taro ni iVakabula ena 3 Nifai 27: 7. O cei a kaya o Jisu e dodonu me vakatokayacataki kina na Nona Lotu?

• Cakava e dua na beji e kaya “Au lewena Na Lotu i Jisu Karisito ni Yalododonu Edaidai” vei ira yadua na gone me ra dara ki vale. Me ra rokataka na gone na nodra beji. Lagata na “Na Lotu i Jisu Karisito” (iVolanisere ni Gonelalai, 48) vata kei ira na gone. Tukuna na vuna o vakavinavinaka kina ni o lewe ni Lotu, ka tarogi ira na gone na vuna era vakavinavinaka kina baleta na Lotu.

• Vukei ira na gone me ra biuta vata na qito iba ena tabana ni itaviqaravi ni macawa oqo. Vakamacalataka ni o Jisu e vinakata na Nona Lotu me tara e na Nona kosipeli, ka vakayagataka na tabana ni itaviqaravi me tukuna vei ira na gone baleta na kena ibalebale.

4 Nifai 1:2–3, 15–17

Na bulataki ni kosipeli e kauta mai vei au na reki.

Na nodra bula marau na tamata e vakamacalataki ena 4 Nifai e rawa ni vukei ira na gone me ra vulica me baleta na reki e yaco mai na bulataki ni kosipeli.

iTaviqaravi e Rawa ni Caka

• Sureti ira na gone mera veivosakitaka na veika e vakamarautaki ira. Mo tukuna vei ira na gone me baleta na nodra bula marau o ira na tamata ena 4 Nifai, wilika na vu ni malanivosa eso mai na tikina e 2–3 kei na 15–17. E rawa talega ni o goleva na “Chapter 48: Peace in America” (Book of Mormon Stories, 136–37, se na kena vidio ena ChurchofJesusChrist.org). Vakabibitaka ni ra a marau na tamata baleta era a saumaki vua na Turaga, era a bulataka na ivakaro, ka ra veilomani vakaiira.

• Vakaraitaka na kedra iyaloyalo na tamata mamarau. Vakamacalataka ni o ira na tamata ena 4 Nifai a voleka ni 200 na nodra yabaki ni bula marau baleta era a saga na nodra vinaka taucoko mera bulataka na kosipeli. Vukei ira na gone me vakasamataka eso na ivakaro era na rawa ni muria. Me kena ivakaraitaki, sa rawa mo wilika vei ira na 4 Nifai 1:15 me vakavulica ni o ira na tamata a sega ni veivala vakai ira tale. Sureti ira na gone me ra matanataka na vakamuri ni ivunau era vakasamataka. Lagata vata e dua na sere me baleta na reki e yaco mai ni bulataki na kosipeli, me vaka na “Lagata vata e dua na sere me baleta na reki e yaco mai ni bulataki na kosipeli, me vaka na “When We’re Helping” (Children’s Songbook, 198).

• Wilika na malanivosa mai na 4 Nifai 1:24–29, 34–35, kei na 43 e vakamacalataka na veika a yaco ena gauna era sega kina ni muria na ivakaro eso vei ira na Nifaiti. Ni o cakava oqo, sureti ira na gone me ra mata rarawa ni ra rogoca e dua na ka rarawataki. Vakadinadinataka ni kena muri na ivakaro ena veimuataki ki na bula marau.

Vakavulica na iVunau: Gone Qase Cake

3 Nifai 27:3–8

Au lewena na Lotu i Jisu Karisito.

Vakasamataka mo vukei ira vakacava na gone o vakavulica mera kila na veivakalougatataki cecere e lako mai ni o dua na lewe ni Lotu i Jisu Karisito.

iTaviqaravi e Rawa ni Caka

• Vukei ira na gone me wilika na 3 Nifai 27:3, ka vakaraica na taro a tarogi Jisu kina na Nona tisaipeli. Qai sureti ira mera raica na 3 Nifai 27:5–8 me baleta na kena isau. Me vaka na veitikina oqo, na cava na vuna e bibi kina na yaca ni Lotu?

• Vukei ira na gone mera vakasamataka na ilawalawa duidui era lewena, me vaka nodra matavuvale se kalasi ena Lalai. Kerei ira mera tukuna vei iko na veika era taleitaka baleta na ilawalawa yadua oqori. Kerei ira na gone mera vukei iko mo vola na vosa yadua ni yaca ni Lotu ena veitiki ni pepa duidui. Qai wakia vata na vei tiki ni pepa, ka sureti ira na gone me ra tuvana na veivosa oqori ena kena itutu dodonu. Na veivakalougatataki cava eso eda sa ciqoma baleta ni da sa lewe ni Lotu i Jisu Karisito ni Yalododonu Edaidai?

3 Nifai 27:13–22

Na Lotu i Jisu Karisito e tara ena Nona kosipeli.

Na iVakabula e vakalekalekataka na Nona kosipeli ena 3 Nifai 27. Ena vukei ira vakacava na gone na Nona vosa mera kila vakavinaka se cava na kosipeli?

iTaviqaravi e Rawa ni Caka

• Vakamacalataka vei ira na gone ni vosa na kosipeli e kena ibalebale “itukutuku vinaka” (raica na Bible Dictionary, “Gospels”). Vukei ira na gone me vakasaqara ena 3 Nifai 27: 13–15 e dua na ka e rogo vaka itukutuku vinaka vei ira. Na cava eda vakavinavinaka kina ni da kila na kosipeli i Jisu Karisito?

• Vola ena papa ni volavola na ivakavuvuli ni kosipeli me vaka na vakabauta, veivutuni, papitaiso, na Yalo Tabu, kei na vosota ki na ivakataotioti. Sureti ira na gone mera vakasaqara ena 3 Nifai 27:19–21, ni ra vakaraica na veivosa oqori se vosa tautauvata ena ivakamacala nei Jisu me baleta na Nona kosipeli.

• Kerei ira na gone me ra raitayaloyalotaka e dua na itokani e tarogi ira ena ka era vakabauta me vaka e dua na lewe ni Lotu. Vukei ira mera kunea na dina ena 3 Nifai 27:13–21 ka rawa ni ra wasea me ra vakalekalekataka na veika eda vakabauta.

• Sureti ira na gone mera digitaka e dua na dina ni kosipeli ka a vakavulica na iVakabula ena 3 Nifai 27:13–21 era vinakata me ra vulica vakalevu cake. Vukei ira mera vakayagataka na ivakamacala e ra, na iDusidusi Vakaiulutaga, se na iDusidusi ki na iVolanikalou mera vakaraica e dua se rua na ivolanikalou e sema ki na dina oya. Sureti ira me ra veiwaseitaka na nodra ivolanikalou vakaiira kei na veika era sa vulica. Na cava eda vakavinavinaka kina ni da kila na kosipeli i Jisu Karisito?

4 Nifai

Na bulataki ni kosipeli e kauta mai vei au na reki.

Baleta ni ra sa saumaki oti ki vei Jisu Karisito kei na Nona kosipeli, o ira na tamata e vakamacalataki tiko ena 4 Nifai a rawa me ra tauyavutaka e dua na isoqosoqo ni sautu kei na duavata. Na cava e rawa ni ra vulica na gone mai vei ira?

iTaviqaravi e Rawa ni Caka

• Vakarautaka eso na tiki ni pepa vata kei na malanivosa mai na 4 Nifai 1:2–3, 5, kei na 15–17 e vakamacalataka na veivakalougatataki vei ira na tamata (me vakataka “sa sega na veileti ena vanua”). Biuta na pepa ena dua na koniteina, ka me ra digitaka e dua ka wilika na gone yadua. Vakauqeti ira na gone me ra raica na nodra malanivosa ena veitikina oqo mai na 4 Nifai. Na cava eda vulica mai na veimalanivosa oqo? Na veika tautauvata cava eda raica ena veitikina oqo kei na ivakamacala i Saioni ena Mosese 7:18?

• Me vukei ira na gone mera vakatovotovotaka na veika a vakavulici tiko ena 4 Nifai 1:15–16, solia vei ira na ituvaki eso ka ra veicudruvi tiko kina vakaiira na tamata. Sureti ira mera dramataka na veika ena yaco kevaka era saga mera bula vata kei na “sega na veileti.” Na cava e rawarawa kina me da levea na veileti ni tiko na “loloma ni Kalou” e yaloda?

• Wilika vata kei ira na gone na vei tikina oqo, ka kerei ira mera vakaraica na vuna sa sega tale kina na sautu kei na marau vei ira na Nifaiti kei na Leimanaiti: 4 Nifai 1:20, 24–29, 34–35, kei na 43. Eda na levea vakacava na vei leqa oqo? Vukei ira na gone mera raica na sala eso meda levea kina na viavialevu oya ena railesuvi ni Nodra iVakavuvuli na Peresitedi ni Lotu: Ezra Taft Benson (2014), 238–39.

Vakayaloqaqataka na Vuli e Vale

Vakauqeti ira na gone mera vakasamataka e dua na ka era na cakava me kauta mai na sautu kei na marau levu cake ki na nodra itikotiko ka wasea vei ira na nodra matavuvale.

Vakatorocaketaki Noda Veivakavulici

Tokoni ira na itubutubu ni gone. “O ira na itubutubu era sa qasenivuli ni kosipeli bibi duadua kivei ira na luvedra—sa nodra ruarua na itavi bibi kei na kaukauwa levu duadua me vakayarayarataka na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me ra tokoni kina nodra itubutubu ena nodra itavi bibi” (Veituberi ena iVakarau ni iVakabula, 25).