O Momani ni volavola tiko ena peleti koula

O Momani ni Cakava na iVakalekaleka ena Peleti mai vei Tom Lovell

26 ni Okotova–1 ni Noveba

Momani 1–6

“Au Gadreva Meu Vakauqeti Kemuni Kecega … me Veivutuni”

Na veika e vakamacalataki ena Momani 1–6 e rawa me dredre vei ira na gone mera kila vakavinaka, ia e rawa ni ra se vulica e dua na lesoni mai na itukutuku nei Momani ni bula dodonu ena dua na vuravura ca. O na vakayagataka vakacava na veika a sotava o koya mo vakavulici ira kina na gone me ra tudei ena kosipeli?

Vola na Veika o Uqeti Kina

ivakatakilakila ni veiwasei

Sureta na Veiwasei

Na cava era kila na gone me baleti Momani? Vakauqeti ira me ra wasea na ka era sa kila se vulica kei na nodra matavuvale. Na vakaraitaki ni dua na iyaloyalo kei Momani, me vaka na kena ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale ena rawa ni veivuke.

ivakatakilakila ni veivakavulici

Vakavulica na iVunau: Gone Sobu

Momani 1:1–3

Au sa rawa ni bula dodonu me vakataki Momani.

E dina ni ra se lalai na gone o vakavulica, e rawa ni ra vakatorocaketaki ena bula vakayalo kei na bula dodonu.

iTaviqaravi e Rawa ni Caka

• Wilika na Momani 1:1–3 vei ira na gone, se vakayagataka na “Chapter 49: Mormon and His Teachings” (Book of Mormon Stories, 138–42, se na kena vidio ena ChurchofJesusChrist.org). Sureti ira me ra vakarogoca se a yabaki vica o Momani ena gauna a solia kina o Amaroni vua e dua na itavi bibi. Qai kerei ira mera dulaka cake na kena levu ena nodra iqaqalo. Me vukei ira na gone mera raitayalotaka na nona se gone sara o Momani, vakaraitaka vei ira na iyaloyalo ni dua e se qai yabaki 10. Vukei ira mera kila vakavinaka na itovo vinaka a raica o Amaroni vei Momani ni se gone, ka vakadinadinataka ni rawa mera vakataki Momani na gone ni ra muri Jisu Karisito.

• Cakava e dua na qito oya mera vakamurimuria na gone eso na ivukivuki rawarawa o cakava. Qai vakaraitaka eso na iyaloyalo ni veika a cakava o Jisu, ka veivosakitaka na sala eda rawa kina ni muri koya (raica na Gospel Art Book, naba 33–35, 41–42). Veivosakitaka na sala eso a muri Jisu Karisito kina o Momani—me ivakaraitaki, ena vakavulici ni kosipeli, vakauqeti na tamata me talairawarawa vua na Kalou, kei na lomani ira na tani.

Momani 3:3, 9

Na Tamada Vakalomalagi e solia vei au e vuqa na veivakalougatataki.

Na ivakavuvuli nei Momani e rawa ni vukei ira na gone me raica na veivakalougatataki sa solia vei ira na Tamada Vakalomalagi.

iTaviqaravi e Rawa ni Caka

• Wilika na Momani 3:3 kei na 9 vei ira na gone, ka vakamacalataka ni o ira na Nifaiti a sega ni kila rawa ni a sa vakalougatataki ira na Tamada Vakalomalagi. Vukei ira na gone mera vakasamataka na veivakalougatataki sa solia vei ira na Tamada Vakalomalagi. Vakaraitaka na iyaloyalo se iyaya eso me soli vakasama vei ira. Na cava eda rawa ni cakava nikua me vakaraitaka ni da sa vakavinavinaka vua na Tamada Vakalomalagi me baleta na noda veivakalougatataki?

• Vukei ira na gone mera vakananuma na veivakalougatataki sa solia vei ira na Tamada Vakalomalagi, ka kerei ira mera droinitaka na iyaloyalo eso ni veivakalougatataki oqo. Sureti ira mera liliga na nodra iyaloyalo ena dua na vanua e vale ka ra na rawa ni raica ka nanuma kina ni sa vakalougatataki ira na Tamada Vakalomalagi ena vuqa na sala. O rawa talega ni sureti ira mera vakaraica na veivakalougatataki e lako mai vei Tamada Vakalomalagi ni ra lagata tiko na imatai ni qaqani “Vinaka Tamaqu Dauloloma” (iVolanisere ni Gonelalai, 9).

Momani 3:12

Na Tamada Vakalomalagi e vinakata meu lomana na tamata kecega.

O na rawa vakacava ni vukei ira na gone o vakavulica mera gadreva mera lomani ira era tiko voliti ira?

iTaviqaravi e Rawa ni Caka

• Kerei ira yadua na gone mera droinitaka e dua na tamata ena papa ni volavola, ka dusimaka ni tamata yadua era droinitaka e duatani na kena irairai mai vei ira na kena vo. Droinitaka e dua na uto rabailevu me vakavolivolita na droini kece. Vukei ira na gone me ra kila ni Tamada Vakalomalagi e vinakata meda lomana na tamata kecega. Wilika na Momani 3:12, ka vakabibitaka na vosa “loloma” kei na “lomani.” Na cava e a cakava o Momani me vakaraitaka na nona lomani ira na tani?

• Lagata vata e dua na sere me baleta na lomani ira na tani, me vaka na “Dauloloma ko Jisu” (iVolanisere ni Gonelalai, 39), ni o vakaraitaka tiko na kedra iyaloyalo na gone mai na veiyasai vuravura. Vakadinadinataka na loloma ni Kalou vei ira kece na luvena. Vakacavara vata kei ira na gone na tabana ni itaviqaravi ni macawa oqo.

ivakatakilakila ni veivakavulici

Vakavulica na iVunau: Gone Qase Cake

Momani 1:1–3; 2:1, 23–24; 3:1–3, 12, 17–22

Au rawa ni bula dodonu me vakataki Momani.

O Momani a se gone sara ena gauna e a raica rawa kina ko Amaroni ni na rawa ni vakaitavi okoya me qarauna na ivolatukutuku tabu. Na ivakarau yalododonu cava soti o raica vei ira na gone o vakavulica?

iTaviqaravi e Rawa ni Caka

• Sureti ira yadua na gone me ra wilika e dua vei ira na veitikina oqo, ka vukei ira mera wasea na veika era sa vulica me baleti Momani: Momani 1:1–3; 2:1, 23–24; kei na 3:1–3, 12, 20–22. Qai wasea na ivakarau yalododonu o sa raica vei ira yadua na gone.

• Vakaraitaka e dua na iyaloyalo kei Momani (raica na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Vukei ira na gone mera raica ni baleta ni a nuitaki ena nona itavi me na maroroya ka taqomaka na kedra itukutuku na Nifai o Momani, sa tu kina vei keda edaidai na iVola i Momani. Veitalanoa vata kei ira na gone me baleta na kena ibalebale mo nuitaki ka vakabauti. Sureti ira mera vakasamataka na sala era rawa ni ra nuitaki vakalevu cake kina.

  Momani ni se gonetagane

  Momani, Yabaki 10, mai vei Scott M. Snow

Momani 2:8–15; 5:10–11

Na rarawa va-Kalou e veimuataki kina veisau dina.

O Momani a raica ni ra sa rarawa na Nifaiti dau caka ca, ia na nodra rarawa e sega ni kena e rawa ni vakauqeti ira me ra veivutuni (raica na Momani 2:13). E rawa vakacava mo vukei ira na gone mera kila vakavinaka na kedrau duidui na rarawa vakavuravura kei na rarawa va-Kalou ka veimuataki ki na veivutuni?

iTaviqaravi e Rawa ni Caka

• Vola na ulutaga veitaravi ena papa ni volavola: Na rarawa e veimuataki ki na veivutuni kei Na rarawa e sega ni veimuataki ki na veivutuni. Sureti ira na gone mera veivukevuke ena wiliki ni veitikina mai na Momani 2:8, 10–15. Vukei ira mera vola ena papa ni volavola na veika era sa vulica me baleta na rarawa ena ruku ni kena ulutaga veiganiti. Eda na vakadeitaka vakacava ni rarawa eda vakila ena vuku ni noda ivalavala ca e veimuataki meda veisau?

• Sureta e dua na lewe ni matabisopi se dua na itubutubu ni dua vei ira na gone me wasea ki na kalasi na sala e rawa ni vukei keda kina na rarawa va-Kalou meda vakataki Tamada Vakalomalagi kei Jisu Karisito vakalevu cake. Na cava e bibi kina meda kila se eda vakila tiko na rarawa vakalou se na rarawa vakavuravura? Sureti ira na gone mera vakasaqara ena Momani 2:12 me raica kina na vuna me cakava kina na veivutuni na “yalo[da] … reki” (Momani 2:12).

Momani 3:12

Au rawa ni vakila na loloma nei Tamada Vakalomalagi vei ira na tani.

E dau rawarawa me da lomani ira era dau lomani keda ka dau vakataki keda, ia e a vakaraitaka o Momani ni ena veivuke mai vua na Tamada Vakalomalagi, sa rawa meda lomani ira era sa vakabauta ka cakava vakatani mai vei keda.

iTaviqaravi e Rawa ni Caka

• Vukea e dua na gone me wilika na Momani 3:12, ka sureti ira na gone mera vola e dua na iyatuvosa ka ivakaleka ni veika era sa vulica mai vei Momani me baleta na lomani ira na tani. Sureti ira na gone mera wasea na veika era sa vola. Eda na vakila vakacava na loloma ni Kalou vei ira na tani? (raica Moronai 7:48). Na cava e rawa ni da cakava me vakaraitaka na noda loloma vei ira na tamata ena noda kalasi kei na noda matavuvale?

• Sureti ira na gone mera vakacavara na tabana ni itaviqaravi ni macawa oqo. Vukei ira mera vakasamataka eso na sala vakaibalebale mera dolele yani ena loloma vei ira era duidui beka mai vei keda.

ivakatakilakila ni vuli

Vakauqeta na Vuli e Vale

Vakauqeti ira na gone mera vakaraitaka tu na tabana ni itaviqaravi ni macawa oqo ena dua na vanua e vale me rawa ni ra vakananumi kina me vakaraitaka na loloma vei ira na tani. Solia na gauna ena dua na kalasi mai muri mera wasea na veika era a cakava.

Vakatorocaketaki Noda Veivakavulici

Moica na itaviqaravi me ganita nodra yabaki na gone o vakavulica. O ira na gone sobu era gadreva na ivakamacala matailalai ka dau vuli mai na iwalewale rawarawa ni veivakavulici. Ni ra sa matua mai, sa rawa ni ra cau vakalevu cake ka rawa ni vinaka sara ni wasea na nodra vakasama. Solia vei ira kece na gone na madigi e veiganiti va-yabaki me ra wasea, vakadinadinataka, ka vakaitavi, ka raica mo solia na veivuke ke gadrevi. (Raica na Veivakavulici ena iVakarau ni iVakabula, 25–26.)

tabana ni itaviqaravi: Au rawa ni lomana na tamata kecega