Era Biubiu mai Pepeli na Jeretaiti, mai vei Albin Veselka

9–15 ni Noveba.

Ica 1–5

“Dresuka Laivi na iLati ni Tawavakabauta Oya”

Ni ko railesuva na veika o sa kunea ena nomu vulica na Ica 1 – 5, na dina cava soti o vakila me na vukea mera raica na gone? E rairai beka e rawa ni veivuke na vakasama mai na ituvatuva oqo.

Vola na Veika o Uqeti Kina

Sureta na Veiwasei

Vakaraitaka na iyaloyalo ni taci Jereti (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale). Sureti ira na gone me ra wasea na veika era kila baleti koya.

Vakavulica na iVunau: Gone Sobu

Ica 1:33 – 43; 2:16 – 25; 3:1 – 6

Sa dau rogoca ka sauma na Tamada Vakalomalagi na noqu masu.

Na kena italanoa na taci Jereti e vakaraitaka e vica na sala ka rawa ni vukei keda kina na Kalou ni da masu.

iTaviqaravi e Rawa ni Caka

• Sureta eso na lewe ni tabanalevu ka ra kila e dua tale na vosa me cavuta e vica na iyatuvosa mai na vosa o ya ki na nomu kalasi (se vakatagitaka e dua na katokatoni ni dua tale na vosa). Mera matanataka na gone ni ra vosataka e dua tale na vosa, ka vakamatatataka na kena dredre na sega ni vosa vata. Vakayagataka oqo me vakamacalataka na itukutuku kei na vale cecere mai Pepeli ena na iVakatekivu 11:1 – 9 kei na Ica 1:33. Wilika na Ica 3:13 ka 15, ka vakamacalataka ea masu vakacava ko tuakai Jereti ka me yaco me veikilai vosa o koya kei na nona itokani kei na matavuvale (raica na Ica 1:34 – 37). Wilika ka vukei ira na gone me ra kila na isau ni nona masu mai vua na Turaga Ica 1:35. E rawa ni o vakayagataka na “Chapter 50: The Jaredites Leave Babel” (Book of Mormon Stories, 143–44 se na kena vidio ena ChurchofJesusChrist.org).

• Sureti ira na gone me vaka ni ra tara e dua na waqasogo, vaka e vakamacalataki ena Ica 2:16 – 17. Vakamacalataka na leqa sa tu vata kei na nodra waqa na Jeretaiti (raica na Ica 2:19), ka tarogi ira na gone na cava era na cakava me baleta na veileqa oqo. Wilika na Ica 2:18 – 19 mo vakavulici ira na gone na sala e kauta kina na tuakai Jereti na nona leqa vua na Turaga ena masu. Vakadinadinataka ni rawa ni da dau masu ni tiko na noda taro se leqa.

• Vakamacalataka vakalekaleka na Ica 2:19 – 3:6 me vakamatatataka na sala e sauma kina na Turaga vei taci Jereti na taro me baleta na waqasogo. Dui biubiuta e 16 na vatu e loma ni rumu ni vuli, ka sureti ira na gone mera wiliki ira ni ra sa kunei ira. Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, e ra qai tukuna vei iko na gone na ka era kila baleta na italanoa (raica talega na tabana ni itaviqaravi ni macawa oqo).

Ica 3:13, 15.

Au a buli meu ucuya na Kalou.

Ni sa raica ko tuakai Jereti na Turaga, sa vulica ni “sa buli na tamata kecega mai na ivakatekivu ena [Nona] vatuka” (Ica 3:15).

iTaviqaravi e Rawa ni Caka

• Vakaraitaka e dua na iyaloyalo ni iVakabula, ka sureti ira na gone me ra dusia eso na tiki ni Yagona. Vakamacalataka ni sa raici Jisu Karisito na tuakai Jereti, ea vulica ni da sa vakataki Jisu. Me vaka ni o dusia e dua na tiki ni yago ena iyaloyalo, sureti ira mera dusia na tiki vata ga ni yagodra. Vakadinadinataka ni da a buli meda irairai vata ga kei Tamada Vakalomalagi kei Jisu Karisito.

• Me lagati vata e dua na sere e baleta na tikini yagoda, me vakataka na “Head, Shoulders, Knees, and Toes” (Children’s Songbook, 275). Vukei ira na gone me ra tukuna na cava na vuna era vakavinavinakataka kina na veitiki tale eso ni yagodra.

Eda buli meda ucuya na Kalou.

Vakavulica na iVunau: Gone Qase Cake

Ica 1:33–43; 2; 3:1–17

Au rawa ni ciqoma na ivakatakila me vukei au.

E rawa vakacava mo vukei ira na gone me ra vulica me baleta na ivakatakila mai na ivakaraitaki nei tuakai Jereti? Na veika cava o rawa ni wasea ka vukei iko kina na Turaga mo kunea na iwali ni nomu leqa se vakatataro?

iTaviqaravi Rawa ni Caka

• Ni bera na kalasi, vola na malanivosa, “Tu cake, vuki veisau, ka dabe tale” ena vosa duidui ena vica vata na tiki ni pepa ka (e rawa mo vakayagataka e dua na dauvakadewa ni Initaneti se na nodra veivuke e dua na tamata e kila tiko e dua tale na vosa). Solia e dua na pepa vei ira yadua na gone, ka sureti ira me ra na tovolea me da muria na ivakasala. Vakayagataka oqo me vukea na kena vakamacalataki na nodra vakauqeti na taci Jereti na nona masu ena Ica 1:33 – 37. Wilika vata na tikina eso oqo, ka kerei ira na gone me ra vakarorogo tiko ki na nona nanuma na Turaga vei Jereti kei na nona itokani kei na matavuvale. Na cava eda vulica mai na itukutuku oqo me baleta na masu?

• Lesia vei ira yadua na gone mera wilika e dua vei ira na tikina oqo, ka vukea mera kunea e dua na taro se leqa nei taci Jereti ena: Ica 1:33 – 35; Ica 1:36 – 37; kei na Ica 2:18 – 20. Na cava a cakava na taci Jereti me baleta na leqa eso se na taro oqo? A vukei koya vakacava na Turaga ena veigauna yadua oqori? Sureti ira na gone me ra vakasamataka na leqa era a gadreva kina na veivuke? E rawa vakacava ni ra muria na ivakaraitaki i taci Jereti me ra kunea na iwali ni nodra leqa? Wasea na ka sotavi ka oa masulaka na veivuke ka a vukei iko kina na Turaga.

Ica 3:4–17

Au a buli meu ucuya na Kalou.

O ira na gone o vakavulica e na sotava e vuqa na itukutuku lasu me baleta na Kalou, o ira vakaira, kei na ituvaki ni yagodra. Na tikina oqo e sa dua na madigi me vakavulica na dina tawamudu me baleta na ulutaga eso oqo.

iTaviqaravi e Rawa ni Caka

• Wilika vata kei ira na gone na Ica 3:6 – 16, ka vukei ira mera cakava e dua na lisi ni veika e sa vulica na tuakai Jereti baleta na Turaga mai na ka sotavi oqo. Na cava na vuna e bibi kina meda kila na veika oqo? Me vaka beka oqo, ena yavalata vakacava na sala eda raica kina na yagoda na noda kila ni da sa buli meda ucuya na Turaga?

• Vola na yago vakayalo kei na vakayago ena vava ni volavola. Sureti ira na gone me ra wasea na ivakarau ni bula ni dua na yago bula (eda taukena na kuli, na dra, kei na so tale), ka vola na nodra isaunitaro ena vava ni volavola. Wilika vata na Ica 3:4–17 ,ka sureti ira na gone me ra vaqara na veika era sa vulica me baleta na yagoda vakayalo. Vakadinadinataka ni yagoda kei na yaloda sa “buli me ucui [ Jisu]” (Ica 3:15).

Ica 2:2–4

E lewe tolu eratou na vakadinadinataka na iVola i Momani.

A parofisaitaka o Moronai ni Tolu na iVakadinadina eratou na tauyavutaka na dina ni iVola i Momani. E rawa mo vakayagataka na parofisai oqo mo vaqaqacotaka kina na nodra ivakadinadina na gone me baleta na iVola i Momani ena nodra ivakarau ga.

iTaviqaravi e Rawa ni Caka

• Vola ena vava ni volavola eso na vosa bibi mai na Ica 5:2–4, me vakataka na peleti, kaukauwa, dina, na ivakadinadina, kei na ivakadinadina. Wilika na veitikina oqo kei ira na gone, ka sureti ira me ra muduka ni ra yacova e dua na vosa ena vava ni volavola ka veivosakitaka na vuna e bibi kina na vosa oqori. Me vakavulici ira na gone me baleta na Tolu na iVakadinadina, o na rairai gadreva mo rai ki na “Wase 7: Era Raica na iVakadinadina na Peleti Koula” (iTalanoa ni Vunau kei na Veiyalayalati, 31 – 33) kei na “Na Nodra iVakadinadina na Lewe Tolu” ena iVola i Momani. Na cava na vuna e vinakata kina na Kalou e tolu na tamata me ra raica na peleti koula?

• Tukuna vei ira na gone o kila vakacava ni dina na iVola i Momani. Sureti ira na gone me ra wasea era kila vakacava na kena dina. Vukei ira mera vakasamataka na sala eso e rawa me ra ivakadinadina kina ni iVola i Momani, ka vakayaloqaqataki ira mera wasea nodra ivakadinadina vua e dua ena macawa oqo.

Vakayaloqaqataka na Vuli e Vale

Sureti ira na gone me ra vakasamataka eso na ka era rawa ni kerea me vukea na Tamada Vakalomalagi, me vaka ea cakava na tuakai Jereti. Vakayaloqaqataki ira me ra vakasaqara na Nona veivuke ena masumasu.

Vakatorocaketaki Noda Veivakavulici

Veivakavulici ena gauna ni itaviqaravi. Ni sa cakava tiko na gone na itaviqaravi me vaka na droini se cakava tiko e dua na tabana ni itaviqaravi, sa rawa mo vakayagataka na gauna me vakabibitaki kina na dina e vakavulici ena itaviqaravi.