Waqa ni Jeretaiti e dela ni waitui

Au Na Kauti Iko cake Tale mai na Wai Titobu, mai vei Jonathan Arthur Clarke

16–22 ni Noveba

Ica 6-11

“Me Muduki Kina Na Ca”

Na vakasama eso ena ituvatuva oqo era sega ni ivakaro mo muria. Era nakiti me caudreva nomu vakasama vinaka ka sureta na veivakauqeti vakayalo.

Vola na Veika o Uqeti Kina

ivakatakilakila ni veiwasei

Sureta na Veiwasei

Vakayagataka na iyaloyalo mai na ituvatuva ni macawa oqo kei na macawa sa oti ena Lako Mai, Mo Muri Au—Baleti Ira Na Tamata Yadua kei na Matavuvale me vukei ira na gone mera railesuva na veika era sa vulica me baleta na kawa i Jereti ni ra takosova tiko na wasawasa. Mera veivukevuke ka wasea na veika era kila.

ivakatakilakila ni veivakavulici

Vakavulica na iVunau: Gone Sobu

Ica 6:2–12

Na Tamada Vakalomalagi e rawa me vakacegui au niu rere.

E a rairai rerevaki vei ira na Jeretaiti me ra “biligi kina e dela ni ua ni waitui me muria na mata ni cagi” (Ica 6:5). Ia na Turaga a taqomaki ira vinaka ka vukei ira. E rawa vakacava mo vukei ira na gone mera gole vua na Turaga ni ra vakila na rere?

iTaviqaravi e Rawa ni Caka

• Ni o vakayagataka na vosa kei na malanivosa mai na Ica 6:2–12, vakamacalataka vei ira na gone na nodra ilakolako takosova na wasawasa na Jeretaiti. Sureti ira na gone mera vakaraitaka na ivukivuki ni ra vodo tiko i loma ni waqa ka sa yavalata ka ubia mai na waqa na ua lelevu. Ena vakacava beka ni da vodo dina tiko ena dua na waqa ena wasawasa voravora? Na cava e rawa ni da cakava ni da sa rere? Wilika vata na tikina e 7 kei na 9 ka raica na ka era a cakava na Jeretaiti ni ra sa rere.

• Tukuna baleta e dua na gauna o a rere kina ka qai vakacegui iko na Tamada Vakalomalagi. Wasea vei ira na gone e dua na sere ni Lotu me vukei iko mo “vakavinavinaka ka vakacaucautaka na Turaga” (Ica 6:9) me baleta na Nona veivuke. Me ra wasea na gone na nodra sere ni Lalai taleitaki, ka lagata vata eso.

• Vakayagataka na tabana ni itaviqaravi ni macawa oqo mo vukei ira na gone mera caka waqa pepa. Vakamacalataka ni waqa era a taqomaki ira tiko na Jeretaiti ni ra a vakavolivoliti tu ena wai (raica na Ica 6:7, 10). Na cava sa solia vei keda na Tamada Vakalomalagi me maroroi keda tiko ena noda ilakolako lesu Vua?

Ica 6:9, 12, 30; 7:27; 10:2

Au rawa ni dau yalo vakavinavinaka.

Ni ra yaco yani vakavinaka ki na vanua yalataki, era a vakavinavinaka kina vakalevu na Jeretaiti ka “drodro na wainimata ni marau” (Ica 6:12). E rawa vakacava ni o vakauqeta e dua na yalo ni vakavinavinaka vei ira na gone o vakavulica?

iTaviqaravi e Rawa ni Caka

• Wilika vei ira na gone na veimalanivosa mai na Ica 6:9 kei na 12 me vakavulici ira ena nodra vakaraitaka nodra vakavinavinaka vua na Turaga na Jeretaiti ena nodra vukei mera yacova na vanua yalataki. Kerei ira na gone mera cavuta eso na ka era vakavinavinakataka. Lagata vata, me vakai ira na Jeretaiti, e dua na sere e vakaraitaka na vakavinavinaka, me vaka na “I Thank Thee, Dear Father” (iVolanisere ni Gonelalai, 7).

• Wilika vei ira na gone na Ica 10:2 mo vakaraitaka ni oti e vuqa na yabaki e muri, era se nanuma tu na Jeretaiti na nodra kosova na wasawasa na tubudra ena veivuke ni Turaga. Vukei ira na gone mera vakasamataka na sala eso sa vakalougatataki ira kina na Turaga. Mera qai droinitaka na gone na iyaloyalo me vakananumi ira ena veivakalougatataki oqori (se vukei ira mera digitaka mai na so na iyaloyalo mo kauta mai, vaka beka mai na dua na mekasini ni Lotu).

Ica 7:24–27

Au sa vakalougatataki niu muria na parofita.

Ai Vola i Ica e vakaraitaka vakamatata ni nodra vakamuri ira na parofita na Jeretaiti, era a vakalougatataki kina, ka a dredre sara na nodra bula, ni ra beci ira na parofita. Vakasamataka na sala eso mo vukei ira kina na gone mera raica ni sa vakakina vei keda.

iTaviqaravi e Rawa ni Caka

• Vakaraitaka e dua na kena itaba na parofita bula, ka taroga vei ira na gone na veika era kila me baleti koya. Na cava e dau vakayacora na parofita? Vakamacalataka ni o ira na Jeretaiti e a tu talega nodra parofita, ka ena veigauna era muria kina na parofita, era a kalougata ka marau (raica na Ica 7:24–27). E rawa vakacava ni da muria na parofita?

• Lagata vata e dua na sere baleti ira na parofita, me vaka na “Follow the Prophet” (iVolanisere ni Gonelalai, 58; raica talega na Gospel Art Book, naba 4–27, 67–87). Veitalanoa kei ira na gone me baleta na veika era sa vakavulica vei keda na parofita me da cakava (me ivakaraitaki, wilika na noda ivolanikalou e veisiga, vakatabuya na siga ni Vakacecegu, se qaravi ira na tani), ka sureti ira mera matanataka na muri ni ivakasala o ya ni o kaya “Muria na parofita!”

ivakatakilakila ni veivakavulici

Vakavulica na iVunau: Gone Qase Cake

Ica 6:2–12

Au rawa ni dinata na Tamada Vakalomalagi me dusimaki au ki na bula tawamudu.

Na itukutuku ni nodra soko takosova na wasawasa na Jeretaiti e rawa ni vakatauvatani ki na noda ilakolako ena bula vakayago oqo. Na ilakolako ruarua oqori e rerevaki ena so na gauna ka gadrevi kina na vakabauta ni na dusimaki ka taqomaki keda na Turaga.

iTaviqaravi e Rawa ni Caka

• Wilika vata na Ica 6:2–12, ka cegu wasoma mera rawa ni droinitaka na gone na veika era wilika tiko. E tautauvata vakacava na nodra ilakolako na Jeretaiti kei na noda bula? Vukei ira na gone mera vakaraica ka vola na veitiki duidui cava ni nodra droini e rawa ni matataka na noda bula. Me kena ivakaraitaki, o ira na Jeretaiti e rawa ni ra matataki keda. Na nodra waqa e rawa ni matataka na noda vuvale, na Lotu, se na kosipeli. Na cava beka e rawa ni matataka na cagi, na wai, na vatu serau, kei na vanua yalataki?

• Vukei ira na gone mera raica na veivosa kei na malanivosa ena Ica 6:2–12 e vakaraitaka na nodra dinata na Kalou na Jeretaiti. Wasea na ivakaraitaki ni sala sa vukei iko kina na nomu vakararavi vua na Kalou ena gauna dredre eso ni nomu bula. Vakauqeti ira na gone mera wasea na veika vata oqori era sa sotava.

  O ira na Jeretaiti era lako vata kei ira na manumanu

  Journey of the Jaredites across Asia, mai vei Minerva Teichert

Ica 6:30; 7:27; 10:2

Niu nanuma tiko na veika sa cakava vei au na Turaga e kauta mai na vakacegu.

E dua na ka era a kilai tani kina na tui ni kawa i Jeretaiti yalododonu mai vei ira na dau caka ca sai koya ni o ira na tui yalododonu era “dau nanuma na veika lelevu sa vakayacora na Turaga” ena vukudra (Ica 7:27). O rawa vakacava ni uqeti ira na gone mera dau nanuma na veika sa cakava na Turaga vei ira?

iTaviqaravi e Rawa ni Caka

• Kerei ira na gone mera wilika Ica 6:30; 7:27; kei na 10:2 yadudua se ena veilawalawa lalai ka vakaraica e dua na ka e tautauvata ena veitikina oqo. Wasea na nomu nanuma me baleta na veika sa vakayacora na Turaga vei iko, ka sureti ira na gone mera cakava vakakina.

• Wasea vei ira na gone me baleta na nomu dau tovolea mo nanuma na sala eso sa vakalougatataki iko kei na nomu matavuvale kina na Turaga. Vukei ira na gone mera vakasamataka eso na sala era rawa ni vakananuma kina na veika sa cakava vei ira na Turaga. Solia vei ira yadua na tiki ni pepa, ka sureti ira mera vakananuma vakatitobu ka vola e dua na ka e sa qai cakava wale tikoga oqo vei ira o Koya. Vakatura mera cakava e dua na itovo tudei mera dau vola na veivakalougatataki era raica mai vua na Turaga (raica na “O Remember, Remember” [vidio, ChurchofJesusChrist.org]).

Ica 9:28–35; 11:5–8

Na Turaga sa yalololoma niu veivutuni.

Dina ga ni ra a dau cati ira na parofita na Jeretaiti ka yaco mera tamata ca, na Turaga a dau vosoti ira ni ra vakamalumalumutaki ira ka veivutuni.

iTaviqaravi e Rawa ni Caka

• Wilika vata na Ica 9:28–35, ka vukei ira na gone mera vakasamataka e tolu se va na iyatuvosa leleka ka vakalekalekataka na veika a yaco ena veitikina oqo. Qai wilika na Ica 11:5–8, ka vukei ira na gone me raica na veika e tautauvata ena itukutuku e rua. Na cava eda vulica mai na italanoa eso oqo?

• Kerei ira na gone mera vakasamataka na tamata tale eso ena iVola i Momani era a vakayalomalumalumutaki ira ka ra a vosoti. Vakayagataka na iyaloyalo mai na Gospel Art Book se Lako Mai, Mo Muri Au—Baleti Ira Na Tamata Yadua kei Na Matavuvale me vukei ira mera nanuma. Wasea na nomu ivakadinadina ni Turaga e vosoti keda ni da sa veivutuni vakaidina.

ivakatakilakila ni vuli

Vakauqeta na Vuli e Vale

Sureti ira na gone mera wasea vei ira nodra matavuvale e dua na ka sa kitaka vei ira na Tamada Vakalomalagi ka ra sa vakavinavinakataka.

Vakatorocaketaki Noda Veivakavulici

Vukei ira na gone mera vakayagataka nodra vakasama. “Ni o vakavulici ira na gone, laivi ira mera tara, droinitaka, rokataka, vola, ka bulia. Na veika oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).

tabana ni itaviqaravi: Tamada Vakalomalagi a vukei ira na Jeretaiti mera taya na waqa