“16–22. ni Noveba. Ica 6–11: ‘Na Ca Me Muduki Tani Sara,’” Lako Mai, Mo Muri Au—Me Baleta Na Tamata Yadua Kei Na Matavuvale: Ai Vola i Momani 2020 (2020)

“16–22. ni Noveba. Ica 6–11,” Lako Mai, Mo Muri Au—Me Baleti Ira na Tamata Yadua kei na Matavuvale: 2020

iVakatakilakila

Waqa ni Jeretaiti ena wasawasa

I Will Bring You up Again out of the Depths, mai vei Jonathan Arthur Clarke

16–22 ni Noveba.

Ica 6–11

“Na Ca Me Muduki Tani Sara”

Ni vosa tiko baleta na kedra itukutuku na Jeretaiti, a kaya kina o Momani ni “sa kilikili me ra kila na tamata kecega na veika sa volai tu ena itukutuku oqo” (Mosaia 28: 19). Nanuma tiko oqo ni ko wilika na Ica 6–11. Na cava na vuna e kilikili kina na veika oqo—se yaga—vei iko kei ira na nomuni daulomani?

Vola na Veika o Uqeti Kina

Ni oti e vica na drau na yabaki, ni ra sa vakarusai na Jeretaiti, era a kunea na Nifaiti na ivovo ni nodra itikotiko ni gauna makawa. Ena kedra maliwa na ivovo oqo a kunei kina e dua na itukutuku veivakurabuitaki—na peleti “koula dina” ka sa “sinai tu ena iceuceu” (Mosaia 8:9). Na tui ni Nifaiti, ko Limiai, e rawa ni vakila na kena sa bibi na itukutuku oqo ni: “Sa sega sara ni vakatitiqataki ni dua dina na itukutuku kurabuitaki e tiko ena peleti oqo,” e kaya o koya (Mosaia 8:19). Nikua o tu kina e dua na ivakalekaleka ni vola, vakadewataki ki na nomu vosa, ka sa vakatokai na iVola i Ica. E lako mai ena itukutuku vata ga ni o ira na Nifaiti era “sa rui gadreva” mera wilika, ka ni ra vakayacora vakakina, “era sa vakasinaiti ena rarawa; ia era kila rawa kina e vuqa na ka, o koya era sa marau kina vakalevu”(Mosaia 28: 12, 18). Ni o wilika me baleta na nodra cecere cake kei na lutu vakarerevaki na Jeretaiti, o na raica kina e vuqa na veigauna ni rarawa. Ia, kakua ni guilecava na marau ni kena vulici na lesoni mai na itukutuku makawa oqo. Ia me vaka, a vola o Moronai, “sa lewa yalomatua ni Kalou me vakaraitaki vei kemudou na veika oqo” (Ica 8:23), ni kevaka eda rawa ni vulica mai na malumalumu kei na nodra qaqa na Jeretaiti, “me muduki kina na ca, ka … yaco rawa kina na gauna me na sega kina na kaukauwa i Setani me rawa na yalodra na luve ni tamata” (Ica 8:26).

iVakatakilakila

ivakatakilakila ni vuli yadua

Vakasama eso ni Vuli iVolanikalou Yadua

Ica 6:1–12

Ena dusimaki au na Turaga ki na noqu vanua yalataki.

Sa rawa mo raica na vakasama vakayalo kevaka mo dou veidutaitaka na nodra soko takosova na wasawasa na Jeretaiti ki na nomuni ilakolako ena bula oqo. Me kena ivakaraitaki, na cava sa vakarautaka na Turaga me vakararamataka kina na nomu sala me vakataka na vatu ena nodra waqa na Jeretaiti? Na cava e rawa ni matataka na waqa, se na “liwa tiko ni cagi vaka ki na vanua yalataki”? (Ica 6:8). Na cava o sa vulica mai na nodra ivakarau na Jeretaiti ni se bera, ni yaco tiko, kei na gauna sa oti kina na soko? E sa liutaki iko tiko vakacava na Turaga ki na nomu vanua yalataki?

Na nodra ilakolako na Jeretaiti e Esia, mai vei Minerva Teichert

Ica 6:5–18, 30; 9:28–35; 10:1–2

E vakalougatataki au na Turaga niu sa yalomalua.

E dina ga ni dokadoka kei na ivalavala ca sa vaka tu kina na itukutuku ni kawa i Jereti, sa tu talega e dua na ivakaraitaki ni yalomalumalumu ena veiwase oqo — vakabibi ena Ica 6:5–18, 30; 9:28–35; kei na 10:1–2. Ni ko vakasamataka vakatitobu na taro eso oqo ena rawa ni vukei iko mo vuli mai na ivakaraitaki oqo: Na cava na vuna era a vakayalomalumalumutaki ira kina na Jeretaiti ena ituvaki vakaoqo? Na cava era a cakava mera vakaraitaka kina ni ra sa yalomalumalumu? Era a qai vakalougatataki vakacava ni ra sa cakava? O na raica ena so na gauna, era a vakasaurarataki na tamata ena kedra ituvaki mera yalomalumalumu. Vakasamataka na cava e rawa ni o cakava me sa lomamu ga mo “yalomalumalumu ena mata ni Turaga” (Ica 6:17) ka sega ni vakasaurarataki mo yalomalumalumu (raica na Mosaia 4:11–12; Alama 32: 14–18).

Raica talega na “Veivosoti,”ena iUlutaga Vakosipeli, topics.ChurchofJesusChrist.org.

Ica 7–11

O ira na iliuliu ivalavala dodonu era na vakalougatataki ira na tamata era liutaka tiko.

NaWase 7–11 ni Ica e volaitukutukutaka tiko e 28 na itabatamata. E dina ga ni sega ni levu na kena matailalai e rawa ni soli ena tikina lalai vakaoqo, e basika totolo mai e dua na ivakarau: na veiliutaki dodonu e veimuataki ki na veivakalougatataki kei na bula sautu, kei na veiliutaki ni ivalavala ca e veimuataki ki na tiko vakavesu kei na veivakarusai.

Sa koto e ra e vica wale sara na tui e tukuni tiko ena wase oqo. Wilika na tikina e salavata, ka raica na cava e rawa ni o vulica mai na nodra ivakaraitaki — vinaka kei na ka ca — me baleta na veiliutaki. Ni o kitaka vakakina, vakasamataka eso na madigi mo liutaka se vakauqeti ira na tamata ena nomu vuvale, nomu itikotiko, nomu veikacivi ena Lotu, kei na so tale.

Ko Oraia—Ica 6:30–7:1
Ko Sule—Ica 7:23–27
Jareti—Ica 8:1–7, 11–15
Ko Ima kei Korianatuma—Ica 9:21–23.
Ko Eci—Ica 9:26–30
Ko Sesi—Ica 10:1–2
Ko Ripilakisi—Ica 10:5–8.
Ko Morienitoni—Ica 10:10–11
Ko Lipi—Ica 10:19–28
Ko Icemi—Ica 11:11–13

Ica 8:7–26

Na cava na isoqosoqo vuni?

Ni rau bukivere e rua se sivia na tamata me kakua ni kilai na nodra cakacaka vuni, rau sa vakaitavi ena dua na vere vuni. Era sa dau vakauqeti ena nodra gadreva mera tamata kaukauwa se vutuniyau. Me ikuri ni isoqosoqo vuni ka vakamacalataki ena Ica 8:7 – 18, sa rawa ni laurai na ivakaraitaki tale eso ena Ilamani 1:9 – 12; 2:2 – 11; 6:16 – 30, kei na Mosese 5:29 – 33. Ena Ica 8:18–26, e vakamacalataka tiko o Moronai na kena revurevu na isoqosoqo vuni (raica talega na Ica 9:4–12) ka sa vakasalataki keda meda kakua ni tokoni ira.

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Ica 6:2–12

Era na marautaka beka na nomu matavuvale me ratou dramataka na nodra ilakolako na Jeretaiti ki na vanua yalataki? Sa rawa mo dou vakayagataka e dua na rumu buto me vakatakarakarataka na waqa kei na cina livaliva me matataka na vatu ramase. Sa rawa mo dou veivosakitaka na sala era a vakaraitaka kina na Jeretaiti na nodra vakabauta na Turaga ena nodra vodo ena waqa, dina ga ni ra kila tu ni ra na “buluti e loma ni waitui” (Ica 6:6). Ni o wilika oti na tikina 9, sa rawa vei ira na lewe ni matavuvale mera wasea na sere ni Lotu taleitaki ni veivakacaucautaki ka lagati ira. E rawa vakacava ni vakatauvatani na noda itikotiko ki na nodra waqa na Jeretaiti? Na vanua yalataki cava sa liutaka tiko kina na Turaga na noda matavuvale?

Ica 6:22–23

Ena macawa oqo, sa rawa ki na nomu matavuvale me raica na sala na kena sa yaco na ivakaro vakaparofita nei taci Jereti me baleta na tiko vakavesu. Na ivakaro cava era sa vakasalataki keda kina na noda iliuliu ni Lotu? Ena sala cava eda na tiko vakavesu kina ni da sega ni muria na nodra ivakasala?

Ica 8:23–26

Me vaka na veitikina oqo, na cava na vuna a vakaroti kina o Moronai me vola “na veika oqo” me baleta na isoqosoqo vuni? (Ica 8:23). Na cava eda sa vulica rawa mai na ivola nei Ica e rawa ni vukei keda meda rawata na veivakalougatataki ka tukuni tiko ena tikina 26?

Ica 9:11

Ena vakamawe vakacava ki na noda digidigi na noda gagadre? Na cava e rawa ni da cakava me vaka e dua na matavuvale me vakadeitaka ni da sa gadreva na veika ni Kalou?

Ica 11:8

Mo vulica eso tale na ka me baleta na loloma ni Turaga vei ira era sa veivutuni, sa rawa mo wilika Mosaia 26:29–30; 29:18–20; Alama 34:14–16; se Moronai 6:8. Sa rawa ki na lewe ni matavuvale me wasea na ivakaraitaki ni loloma ni Kalou mai na ivolanikalou se mai na nodra bula.

Me baleta na vakasama ni nodra vakavulici na luveda, raica na ituvatuva ena macawa oqo ena Lako Mai, Mo Mujri Au—Me Baleta na Lalai.

Vakavinakataki ni Vuli Yadudua

Cakacakataka na ka o sa vulica. Na vulici ni kosipeli e okati vakalevu cake sara mai na kena wiliki ka vakasamataki vakatitobu. Eda na dau vuli vakalevu duadua ena noda cakacakataka na dina ena ivolanikalou (raica na Joni 7:17). Na cava o na cakava mo vakayacora kina na veika o wilika ena Ica 6–11?