“2–8 ni Noveba. Momani 7 – 9: ‘Au Sa Vosa Vei Kemudou Me Vaka Sara Ga Dou sa Tiko Dina Oqo,’” Lako Mai, Mo Muri Au — Me Baleta na Tamata Yadua kei na Matavuvale: iVola i Momani 2020 (2020)

“2–8 ni Noveba. Momani 7–9,” Lako Mai, Mo Muri Au—Me Baleta na Tamata Yadua kei na Matavuvale: 2020

iVakatakilakila

E volavola tiko o Moronai ena peleti koula

E Volavola Tiko o Moronai ena Peleti Koula, mai vei Dale Kilborn

2–8 ni Noveba.

Momani 7–9

“Au Sa Vosa Vei Kemudou Me Vaka Sara Ga Dou sa Tiko Dina Oqo”

E rau vakabauta o Momani kei Moronai ni nodrau itukutuku ena vakauqeti ira era bula tiko ena iotioti ni gauna. Ni o wilika na Momani 7–9, vola na veivakauqeti e lako mai vei kemudou me baleta na iwalewale o na tutaka kina na veika o vulica tiko.

Vola na Veika o Uqeti Kina

E rau kila o Momani kei Moronai na cava na galili ena dua na vuravura ca. Vei Moronai na galili sa rairai bibi sara ni se qai mate oti toka ga o tamana ena ivalu, ka ra vaqeyavutaki na Nifai. “Kau sa qai vo taudua ga ko i au,” a vola o koya. “Sa sega na wekaqu se na vanua meu lako kina” (Momani 8:3, 5). Sa vaka me sega na inuinui ni veika eso, ia a kune vakacegu ko Moronai mai na nona ivakadinadina me baleta na iVakabula kei na nona kila ni “na ia tiko ga na inaki ni Turaga” (Momani 8:22). Ka sa kila ko Moronai ni dua na itavi bibi ena inaki tawamudu oqori ena vakayacora na iVola i Momani—na ivolatukutuku ka sa vakacavara vagumatua tiko o koya, na itukutuku ena yaco ena dua na siga me “cila yani mai na butobuto” ka kauta mai e vuqa na tamata “me ra kila na Karisito” (Momani 8:16; 9:36). Na vakabauta nei Moronai ena yalayala oqo a rawa kina vua me vakaraitaka vei ira na itabatamata mai muri era na wilika na ivola oqo, “Au sa vosa vei kemudou me vaka ga sara ga dou sa tiko dina oqo” ka “Niu kila ni dou na taura na noqu vosa” (Momani 8:35; 9:30). Eda sa cakava tiko na nona vosa, kei na cakacaka ni Turaga ka sa toso tiko yani, ena dua na tikina ni rau sa dina tiko o Momani kei Moronai ena nodrau ilesilesi ena gauna mada ga erau tiko duadua kina.

iVakatakilakila

ivakatakilakila ni vuli yadua

Vakasama eso ni Vuli iVolanikalou ni Tamata Yadudua

Momani 7

Au na vakabauti Jisu Karisito ka “muria” na Nona kosipeli.

Ena iotioti ni vosa volai nei Momani, ena Momani 7, sa itukutuku kivei ira na kawa Leimanaiti ena gauna oqo, ia era sa tu kina na dina sa baleti keda kece sara. Na cava e vakatavulica na itukutuku nei Momani baleti Jisu Karisito kei na Nona kosipeli? Na cava na vuna a rairai digitaka kina o Momani na itukutuku oqo me tinia kina na nona ivola?

Momani 7:8–10; 8:12–22; 9:31–37

Sa ka bibi sara na inaki ni iVola i Momani.

A taroga o Peresitedi Russell M. Nelson: “Kevaka e soli vei kemuni na daimani se na rupi se na iVola i Momani, o cei o na digitaka? Na ka dina, o cei sara mada e cecere cake na kena yaga vei iko?” (“Na iVola o Momani: Ena Vakaivei Beka Nomu Bula Kevaka e Sega?” Ensign se Liaona, Nove. 2017, 61).

E rau sa kila tu o Momani kei Moronai ni itukutuku e rau sa maroroya tiko ni na yaga vakalevu sara ena noda gauna oqo, rau a qai solibula vakalevu kina me vakarautaki ka taqomaki. Ni o wilika na Momani 7:8–10; 8:12–22; kei na 9:31–37, vakasamataka na vuna sa rui yaga vakalevu kina ena noda gauna oqo. Sa rawa mo raica na ikuri ni veivakararamataki ena 1 Nifai 13:38–41; 2 Nifai 3:11–12; kei na Vunau kei na Veiyalayalati 33:16; 42: 12–13. Na veika cava e sa vukei iko mo kila ni sa yaga sara vakalevu na iVola i Momani?

E yaga vei keda na veika era a vola na parofita ni iVola i Momani.

Momani 8:26–41; 9:1–30

Na iVola i Momani a volai me baleta na noda gauna.

A vakaraitaka o Jisu Karisito vei Moronai na cava ena yaco ni sa lako mai na iVola i Momani (raica na Momani 8:34–35), kei na veika a raica o Moronai ka a vakavuna me veivakasalataki doudou baleta na noda gauna oqo. Ni ko wilika na Momani 8:26–41 kei na 9:1–30, vakananuma se sa tiko na ivakatakilakila ni ivakarau kei na ivalavala oqo ena nomu bula. Na duidui cava beka o na rawa ni cakava?”,

Me kena ivakaraitaki, na Momani 9:1–30 e tiko kina na itukutuku nei Moronai ena nona sauma na vakaitamera ni lailai ni vakabauti Jisu Karisito e sa raica tiko ena noda gauna oqo. Sa rawa mo volaitukutukutaka na veika o sa vulica mai na nona vosa me baleta na veika oqo:

Na isau ni sega ni vakabauta na Karisito (tikina 1–6, 26)
Na bibi ni vakabauta na Kalou ni ivakatakila kei na cakacaka mana (tikina 7–20.)
Na ivakasala nei Moronai me baleti keda (tikina 21–30)

Na cava o vulica mai vei Moronai, ka rawa ni o kauti ira mai eso mera voleka yani vua na Tamada Vakalomalagi kei Jisu Karisito?

iVakatakilakila

ivakatakilakila ni vuli vakavuvale

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Momani 7:5–7, 10; 9:11–14.

Na cava era vakavulica vei keda na veitikina oqo me baleta na ituvatuva nei Tamada Vakalomalagi kei na vuna eda gadreva kina e dua na iVakabula?

Momani 7:8–10

Na cava eda sa vulica rawa ena noda vulica na iVola i Momani ena yabaki oqo ka sa vukea na vaqaqacotaki ni noda vakabauta na iVola Tabu? Me tekivu e dua na veivosaki, sa rawa mo wilika vata eso na ivolanikalou mai na iVola i Momani kei na iVola Tabu e vakavulica na dina vata oqo, me vaka na Alama 7:11–13 kei na Aisea 53:3–5 se na 3 Nifai 15:16–24 kei na Joni 10:16.

Momani 8:1–9

Ena vakacava beka na kena vakilai na galili me vakataki Moronai? Na cava era sa vakauqeti keda me baleta na cakacaka a rawata o koya?

Momani 8:12, 17–21; 9:31

Sa rawa mo dou wilika vakamatavuvale na veitikina oqo ka qai wilika na itukutuku oqo mai vei Elder Jeffrey R. Holland: “Vakavo duadua ga na Luvena Duabau Ga, sa na cakacaka walega na Kalou vata kei ira na tamata ca. … Ni o raica na malumalumu, nanuma tiko na kena yalani e sega ni sa vakalou na cakacaka” (“Turaga, au sa Vakabauta,” Ensign se Liaona, Me 2013, 94). Na cava sa rui rerevaki kina na kena raici vakatabakidua tiko kina na nodra malumalumu na tamata, oka kina o ira era a vola na iVola i Momani?

Momani 8:36–38

Na cava na kena ibalebale kivei iko nomu taura vakai iko na yaca i Karisito? Na cava e rairai madua kina e dua ni taura vei koya na yaca i Jisu Karisito? Ena rawa vakacava meda doudou ena noda vakadinadinataka na iVakabula?

Momani 9:16–24

Ena gadrevi na gacagaca eso mera ituvatuva ni vakadidike se me ituvaki vinaka kina e dua na isaluwaki. Sa rawa mo dou cakava e dua na vakadidike se cakava vakamatavuvale e dua na isaluwaki talei ni kakana ni bera ni wiliki na Momani 9:16–24. Ni o wilika na tikina eso (vakabibi na tikina 20 – 21), vaqara na “gacagaca” e gadrevi me vakayacori rawa kina na cakacaka mana. Na cakamana cava eda rawa ni raica ena vuravura wavoliti keda kei na noda matavuvale?

Me baleta na ikuri ni vakasama mera vakavulici kina na gone, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakatorocaketaki ni Vuli ni Tamata Yadudua

Goleva na iVurevure Vakadonui ni Lotu Kevaka e tiko nomu taro baleta na kosipeli, na ivurevure vinaka duadua me baleta na isau ni taro o ya ena masu, na ivolanikalou, nodra vosa na parofita bula, kei na ivola tale eso e tabaka na Lotu (raica na Veituberi ena iVakarau ni iVakabula, 17–18, ,23–24).