Vuni Tiko ena Qara Vatu o Ica, mai vei Gary Ernest Smith

23–29 ni Noveba

Ica 12–15

“Sa Vakayacori Rawa na Ka Kecega ena Vakabauta”

Ni o vola na nomu vakasama e rawa ni o sureta na ikuri ni ivakatakila ka vaqaqacotaka na nomu ivakadinadina. Ena vukea talega mo nanuma tiko na veika e uqeta nomu vakasama ka wasea vei ira tale eso ena veisiga ni mataka.

Vola na Veika o Uqeti Kina

E parofisaitaka o Ica vei ira na Jeretaiti na veika “lelevu ka talei” (Ica 12:5). A “tukuna vakaidina vei ira na veika kece mai na ivakatekivu ni tamata” (Ica 13:2). A raica taumada “na gauna i Karisito” kei na dua na Jerusalemi Vou (Ica 13:4). Ka a tukuna o koya na “vakanuinui dei ki na dua na vuravura vinaka cake, io, e dua na tikina ena liga imatau ni Kalou” (Ica 12:4). Ia era a sega ni ciqoma na nona vosa o ira na Jeretaiti, ena iulubale vata ga era dau sega ni ciqoma kina na nodra parofisai na italai ni Kalou ena gauna oqo—“baleta ni ra sa sega ni raica rawa” (Ica 12:5). E taura na vakabauta me da vakadinata na yalayala se ivakasala ni veika eda sega ni raica, me vaka ni vakabauta ga a parofisaitaka kina o Ica na “veika lelevu ka talei” vei ira na tamata tawa-vakabauta. Na vakabauta a vakanuinui kina o Moronai ni rawa vua na Turaga me veisautaka nona “sega ni maqosa ena volavola” me nona kaukauwa (raica na Ica 12:23–27). Sai koya na vakabauta vakaoqo “ena vakadeitaki ira me ra tudei sara ka tawayavalati rawa ena cakacaka vinaka kecega, ka sa tuberi ira me ra vakalagilagia kina na Kalou” (Ica 12:4). Ia ena mataqali vakabauta vakaoqo “sa vakayacori rawa kina na ka kecega” (Ica 12:3).

Vakasama eso ni Vuli iVolanikalou Yadua

Ica 12

Na vakabauti Jisu Karisito ena rawa kina na veicakacaka mana lelevu.

E vuqa na tamata nikua, me vakataki ira na Jeretaiti ena gauna i Ica, era via raica na ivakadinadina ni bera ni ra na vakabauta na Kalou kei na Nona kaukauwa. Ia, a vakavulica ko Moronai ni “vakabauta sai koya na vakanuinuitaki ni veika sa sega ni rairai” ka ni “dou na sega ni rawata e dua na ivakadinadina me yacova ni sa vakatovolei oti nomudou vakabauta” (Ica 12:6).

Me kilai yadua na gauna o raica kina na vosa na “vakabauta” ena Ica 12, ka vola na veika o sa vulica me baleta na vakabauta. Vakaraica na isau ni taro vakaoqo: Na cava na vakabauta? Na cava soti na vua ni bula e vakasinaiti tu ena vakabauta? O rawa talega ni vola na nomu vakasama me baleta na ivakadinadina o sa rawata “ni oti na vakatovolei ni nomu vakabauta” (Ica 12:6).

Raica talega na Iperiu 11; Alama 32.

Ica 12:1–9, 28, 32

O Jisu Karisito e solia vei keda “e dua na vakanuinui uasivi sara.”

Me ikuri ni vakasama bibi me baleta na vakabauta, e levu talega na ka ena Ica 12 e baleta na inuinui—ena rawa beka ni o vola na veigauna e basika kina na vosa “inuinui.” Na cava na ibalebale ni inuinui vei iko? Na cava soti na vuna e tu kina vei Ica na “vakanuinui dei ki na dua na vuravura vinaka cake?” (raica na Ica 12:2–5). Sa solia vakacava vei iko na kosipeli i Jisu Karisito “e dua na inuinui uasivi cake”? (Ica 12:32).

Raica talega na Moronai 7:40–41; Dieter F. Uchtdorf, “Na Kaukauwa Vakalou ni Vakanuinui,” Ensign se Liaona, Nove. 2008, 21–24; Vunautaka na Noqu Kosipeli, 117.

Ica 12:23–29

O Jisu Karisito e rawa ni cakava na veika malumalumu me kaukauwa.

Ni da wilika na ivola qaqa eso nei Moronai, e rawarawa me da guilecava ni a leqataka o koya na nona “malumalumu ena volavola” ka rerevaka de ra vakalialia na nona vosa o ira na tamata (raica na Ica 12:23–25). Ia a yalataka na Kalou ni na “vakayacora me vu ni nodra kaukauwa na veika era malumalumu kina” ni ra sa yalomalumalumu (tikina 27), ka sa ivakadinadina ni na vakayacora na Turaga na Nona yalayala na kaukauwa vakayalo ena volavola nei Moronai.

Ni wiliki oti na Ica 12:23–29, vakananuma vakatitobu na gauna a vukei iko kina na Kalou mo vakadinadinataka na nomu malumalumu ka vakaukauwataki iko mai kina. E rairai sa ikoya talega oqo e dua na gauna vinaka me vakasamataki kina na malumalumu eso e vakaleqai iko tiko. Na cava beka o nanuma ni o gadreva mo cakava mo vakamalumalumutaki iko vua na Turaga ka vakaraitaka vua na vakabauta me rawa ni o ciqoma na nona yalayala me dau cakava me “vu ni kaukauwa na veika malumalumu”? (Ica 12:27).

Ni ko vakasamataka vakatitobu na tikina oqo, ena rawa ni veivuke na vakasama oqo mai vei Elder Neal A. Maxwell: “Ni da wilika ena ivolanikalou na ‘malumalumu’ vakatamata e oka ena vosa oqo na … malumalumu e dau tu ga ena ituvaki ni bula vakatamata ka dau kaukauwa cake na idre ni yago mai na yalo (raica na Ica 12:28–29). Sa vakakina, na malumalumu, e oka kina, na noda dui malumalumu yadua, ka namaki me da ulabaleta (raica na Vunau kei na Veiyalayalati 66:3; Jekope 4:7)” (NaTuraga, e Vakalevutaka Noda Vakabauta [1994], 84).

Raica talega na “Loloma Soli Wale,”ena iUlutaga Vakosipeli, topics.ChurchofJesusChrist.org..

Ica 13:13–22; 14–15

Nodra vakanadakui na parofita ena kauta mai na veika rerevaki vakayalo.

Ni nodra tui na Jeretaiti e dua na itutu rerevaki mai na veigauna makawa. A ka dina sara vei Korianatuma na ka oqo, ena nodra “segata e vuqa na tamata qaqa … me ra vakarusai koya” (Ica 13:15–16). Ena Ica 13:15–22, raica na ka a kitaka o Korianatuma me taqomaki koya kei na ka a vakasalataki koya kina o Ica me cakava. Ni o wilika na vo ni iVola i Ica, vakasamataka na isau ni nodra vakanadakui na parofita. Na cava ena yaco vei ira na tamata ni “sa mudu nona dau vakauqeti ira tiko na Yalo ni Turaga.”? (Ica 15:19).

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Ica 12:7–22

Ni o ni wilika vata na veitikina oqo, o ni na railesuva vata beka eso na ivakaraitaki veivakauqeti ni vakabauta o ni a wilika ena iVola i Momani. Oqo e rawa ni vakavuna na veivosakitaki ni ivakaraitaki ni vakabauta ena nomu matavuvale se na nomu bula sara ga—vakasamataka mo vola eso na veika oqo kevaka o se bera.

Ica 12:27

Na cava na vuna e solia kina vei keda na Turaga na malumalumu? Na cava na noda itavi ena kena caka na “veika malumalumu me kaukauwa”? Na cava na nona itavi na iVakabula?

Ica 12:41

E tiko e dua na sala lasa e rawa ni o vakavulici ira kina nomu gone me ra “vakasaqarai … Jisu”? E dua na sala e rawa ni vunitaka e dua na iyaloyalo kei Jisu ka sureti ira na nomu lewe ni matavuvale me ra “vakasaqara” ka kunea na iyaloyalo. Me da vakasaqarai Jisu vakacava, ka da na vakalougatataki vakacava ni da sa kunei Koya?

Ica 13:13–14; 15:19, 33–34.

Era na taleitaka na nomu lewe ni matavuvale me ra veidutaitaka na veika a vakila o Ica kei na veika erau a vakila o Momani kei Moronai (raica na Momani 6; 8:1–10). E rau tautauvata vakacava? E tautauvata vakacava na nodra sala ni vakarusai na Nifaiti ki na nodra sala na Jeretaiti? (vakatauvatana Ica 15:19 kei na Moronai 8:28). Na dina cava soti eda vulica ka rawa ni vukea me da levea na veika a yaco vei ira?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au— Baleta na Lalai.

Vakatorocaketaki Noda Veivakavulici

Vakauqeta na taro. Era na dau vakatataro na gone. Ena so na gauna o na raica beka nodra taro ni veivagolei tani mai na veika o vinakata tiko mo vakavulica. Ia, raica na taro me madigi. Era vakaraitaka ni ra sa vakarau tu na gone me ra vuli—era solia vei iko na veivakararamataki baleta nodra kauwai nomu gone kei na nodra nanuma ena veika era sa vulica tiko (raica na Veituberi ena iVakarau ni iVakabula, 25–26).

Taleitaki na Parofisai i Ica, mai vei Walter Rane