O Ica ni Vuni Tiko ena Qara ni Vatu, mai vei Gary Ernest Smith

23–29 ni Noveba

Ica 12–15

“Sa Vakayacori Rawa na Ka Kecega ena Vakabauta”

Ni o wilika na Ica 12–15, vakasamataki ira na gone o vakavulica. Na veivakasama ni itaviqaravi ena ituvatuva oqo ena rawa ni vakauqeti iko ena vakasama tale eso ka na vukea me sotava na nodra gagadre na gone ena nomu kalasi.

Vola na Veika o Uqeti Kina

Sureta na Veiwasei

Vukei ira na gone me vakananuma na italanoa eso ena ivolanikalou baleti ira na tamata era a vakaraitaka na vakabauta cecere. Eso na ivakaraitaki e kune ena Ica 12:11–22.

Vakavulica na iVunau: Gone Sobu

Ica 12:6–22

Na vakabauta sai koya noda vakadinata na veika eda sega ni raica.

O Moronai a wasea e vica na ivakaraitaki ni tamata era a rawata na veika lelevu ena vuku ni nodra vakabauta. Vakasamataka na sala e rawa mo vakayagataka kina na ivakaraitaki eso oqo me vakavulici ira na gone se cava na vakabauta.

iTaviqaravi e Rawa ni Caka

• Wilika vei ira na gone na “Vakabauta sa i koya na vakanuinuitaki ni veika sa sega ni rairai” mai na Ica 12:6, ka kerei ira mera cavuta vata na malanivosa oqo kei iko. Tukuna vei ira na gone me baleta na veika o vakabauta dina ga ni o sega ni rawa ni raici ira, ka vukei ira me vakasamataka eso tale na ivakaraitaki. Na sere “Vakabauta” (iVolanisere ni Gonelalai, 50), se dua tale na sere me baleta na vakabauta, ena rawa ni veivuke.

• Vakaraitaka na iyaloyalo ka vakatakarakarataka na ivakaraitaki ni vakabauta ena Ica 12:12:13–15, 20–21 (raica na Gospel Art Book, naba 78,85, kei na tabana ni itaviqaravi ni macawa oqo). Mera tukuna vei iko na gone na veika era raica ena iyaloyalo kei na veika era kila me baleta na italanoa oqo. Veitalanoa kei ira na gone me baleti ira na tamata yadua oqo kei na nodra vakaraitaka vakacava na vakabauta kei na veika a yaco ena vuku ni nodra vakabauta.

• Qitora e dua na qito ni kilakila mada kei ira na gone. Solia vei ira na ivakatakilakila me baleti ira na tamata yalodina ka vakamacalataki ena Ica 12:13–15, 19–20 me yacova ni ra sa kila rawa na gone o cei o ira. Mera qai qitora tale na gone na qito ka veivukevuke ena solia na ivakatakilakila me baleti ira na tamata vataga oqori (se so tale na tamata yalodina) ka ra qai vakilakila na vo ni kalasi. Wasea na veika o qoroya me baleta na nodra vakabauta na tamata oqo.

Ica 12:23–27

O Jisu Karisito e rawa ni vukei au meu kaukauwa.

Ena so na gauna era sotava na gone na ituvaki eso ka ra vakila kina na malumalumu, me vaka ga a yaco vei Moronai. Vukei ira mera kila na veika a vulica o Moronai—ni na iVakabula e rawa ni “vu ni nodra kaukauwa na veika malumalumu” (Ica 12:27).

iTaviqaravi e Rawa ni Caka

• Vakamacalataka vei ira na gone e dua na itavi ka na gadrevi kina e levu na kaukauwa vakayago me rawati kina. Sureti ira mera wasea na ivakaraitaki ni veika era se sega ni kaukauwa vinaka mera cakava ena gauna oqo. Ena rawa vakacava ni da yaco me da kaukauwa me rawati kina na cakacaka eso oqo? Vakamacalataka ni tiko talega na cakacaka vakayalo me da cakava, ia eda vakila na malumalumu vakayalo ena so na gauna. O Moronai e a vakila vakaoqo me baleta na nona volavola e na peleti. Wilika na Ica 12:27 vei ira na gone. Na cava a yalataka na Turaga vei ira era vakila na malumalumu?

• Wasea e dua na ka sotavi ka a vukei iko kina se dua tale o kila na iVakabula me cakava e dua na ka dredre. Vakadinadinataka vei ira na gone ni kevaka era na vakasaqara na Nona veivuke, o Jisu e rawa ni vukei ira mera kaukauwa, ena gauna mada ga era vakila kina na malumalumu.

Vakavulica na iVunau: Gone Qase Cake

Ica 12:5–6

Na vakabauta sai koya noda vakadinata na veika eda sega ni raica rawa.

O ira na gone o vakavulica era tara tiko na yavu ni nodra ivakadinadina. Na ivakasala nei Moronai me baleta na vakabauta, e kunei ena Ica 12:6, ena rawa ni vukei ira.

iTaviqaravi e Rawa ni Caka

• Vakamacalataka ni o Ica na parofita a tovolea me vakavulici ira na kawa i Jereti ena “veika lelevu ka talei,” ia era sega ni vakabauta na ka e a tukuna. Sureti ira na gone me ra wilika na Ica 12:5 me raica na vuna era sega kina ni vakabauta. Na cava soti eso na ka e vinakata na Tamada Vakalomalagi meda vakabauta dina ga ni da sega ni raici ira? Wilika vata na Ica 12:6. Na cava a vakavulica o Moronai vei ira na tamata era sega ni vakabauta na dina vakayalo baleta ni ra sega ni raici ira rawa?

• Vakaraitaka e dua na iyaloyalo vua e dua na gone ka mera kua ni raica na vo ni gone, ka kerei koya me vakamacalataka na iyaloyalo oya vei ira na vo ni kalasi. Ke levu na gauna, mera veivukevuke na vo ni gone me vakayacora vakakina vata kei na iyaloyalo duidui tale eso. Qai sureti ira mera wilika na Ica 12:6 ka vakaraica na malanivosa oqo: “Vakabauta sa i koya na vakanuinuitaki ni veika sa sega ni rairai.” Eda vakaraitaka vakacava na vakabauti Jisu Karisito ni da sega ni raici koya rawa?

• Kerei ira na gone mera wilika na malanivosa oqo ena Ica 12:6: “Dou na sega ni rawata e dua na ivakadinadina me yacova ni sa vakatovolei oti na nomudou vakabauta.” Vukei ira na gone mera kila vakavinaka ni gauna eda talairawarawa kina ki na ivakaro, eda rawa ni kila ni sa dina. Kerei ira mera vakasamataka na ivakavuvuli eso ni kosipeli e vinakata na Kalou me tiko e dua na noda ivakadinadina e baleta, me vaka na saumi ikatini, rokovi ni siga ni Vakacecegu, se na bulataki ni Vosa ni Vuku. Qai vola ena papa ni volavola me rawa ni rawati e dua na ivakadinadina ni , au na . Wasea na sala o a cakacakataka kina na vakabauta mo rawa ni rawata kina nomu ivakadinadina ni veika oqo kei na veidina ni kosipeli tale eso.

Ica 12:4, 32

Na inuinui sa vaka e dua na ikelekele ki na yaloqu.

Vukei ira na gone o vakavulica mera kila vakavinaka ni da rawa ni “vakanuinui ki na dua na vuravura vinaka cake” ena vuku ni noda vakabauta na Karisito (Ica 12:4).

iTaviqaravi e Rawa ni Caka

• Wasea vei ira na gone na ivakamacala ni inuinui e kune ena “inuinui” (iDusidusi ki na iVolanikalou, scriptures.ChurchofJesusChrist.org). Me vaka na ivakamacala oqori kei na Ica 12:4, 32, na cava eda vakanuinuitaka? (raica talega na Moronai 7:40–42). Vukei ira na gone mera vakasamataka na veivosa tale e so me baleta na nuitaka, vata kei na vosa ka kena ibalebale na veibasai ni nuitaka. Wasea vata kei ira eso na dina vakosipeli e solia vei iko na inuinui, ka sureti ira me ra vakayacora vakakina.

• Vakaraitaka (se droinitaka ena papa ni volavola) e dua na iyaloyalo ni dua na waqa kei na iyaqa. Na cava era gadreva kina na iyaqa na waqa? Na cava ena yaco ki na dua na waqa ka sa sega na kena iyaqa? Wilika vata na Ica 12:4, ka tarogi ira na gone se tautauvata vakacava na inuinui kei na dua na iyaqa. Sureti ira na gone mera droinitaka na nodra droini yadua ni dua na waqa kei na iyaqa ka mera vakatavulica kina na nodra matavuvale me baleta na inuinui.

Ica 12:23–29

O Jisu Karisito e rawa ni vukei au me’u kaukauwa.

Ni ra qase cake mai na gone, era sa tekivu kila vakalevu cake na nodra malumalumu. Vakayagataka na veitikina oqo mo vakavulica e vakayacora vakacava na iVakabula me “vu ni nodra kaukauwa na veika malumalumu” (Ica 12:27).

iTaviqaravi e Rawa ni Caka

• Kerei ira na gone mera wilika na Ica 12:23–25 me vaqaqa na cava e a kauwaitaka kina o Moronai. Kerei ira kevaka era sa bau sotava oti na vakanananu vaka oqori. Qai sureti ira mera wilika na tikina e 26–27 me ra raica na sala a vakayaloqaqataki Moronai kina na Turaga. Na cava meda cakava me rawa ni vukei keda kina na Turaga meda kaukauwa ni da vakila na malumalumu? Wasea e dua na ka e a vukei iko kina na iVakabula mo kaukauwa mo cakava rawa kina e dua na ka dredre.

• Sureti ira na gone mera droinitaka na iyaloyalo ni dua na ka malumalumu kei na dua na ka kaukauwa. Qai sureti ira mera kuria kina nodra droini eso na vosa se malanivosa mai na Ica 12:23–29 ka vakavulica vei ira ni iVakabula e rawa ni vukei keda me vukica na noda malumalumu me kaukauwa. Vakauqeti ira na gone mera vakasamataka e dua na nodra malumalumu ka qai vakasaqara na veivuke ni iVakabula mera kaukauwa kina.

Vakauqeta na Vuli e Vale

Sureti ira na gone mera vola e dua na dina ka ra vinakata mera rawata e dua na kena ivakadinadina. Vukei ira mera biuta e dua na takete mera cakacakataka na vakabauta mera rawata kina na ivakadinadina ni dina o ya.

Vakatorocaketaki Noda Veivakavulici

Vakasaqara mo kilai ira vinaka na gone o vakavulica. “Vakaraica na sala eso mo kila vinaka kina na nodra bula, veika era taleitaka, taledi, kei na nodra gagadre na [gone] o vakavulica. Mo dau taro, vakarorogo matua, ka vakadikeva na ka era kaya ka cakava na vuli tiko ena ituvaki duidui eso. … Kerea na nodra raititobu na nodra itubutubu. Ka bibi duadua, masulaka na kila vinaka ka na rawa ni solia duadua ga na Yalotabu” (Veivakavulici ena iVakarau ni iVakabula,7).