O Moronai ni volavola tiko ena peleti koula

O Moronai e Volavola Tiko ena Peleti Koula, mai vei Dale Kilborn

2–8 ni Noveba

Momani 7–9

“Au sa Vosa vei Kemudou me vaka Dou sa Tiko Dina Oqo”

Ni o wilika na Momani 7–9, vakasamataka na cava o gadreva duadua vakalevu me ra kila na gone o vakatavulica. Cakava na ituvatuva mo vakavulica na dina o vakila ena vakalougatataka na nodra bula.

Vola na Veika o Uqeti Kina

ivakatakilakila ni veiwasei

Sureta na Veiwasei

Solia wavoki e dua na ilavelave ni iVola i Momani. Sureti ira na gone, ena gauna era taura kina na ivola, mera wasea e dua na ka era sa vulica mai kina. Ke ra gadreva na veivuke, vakananumi ira ki na veika era se qai vulica oti ga ena kalasi.

ivakatakilakila ni veivakavulici

Vakavulica na iVunau: Gone Sobu

Momani 7:8–10

Na iVola i Momani kei na iVola Tabu e rau vakadinadinataki Jisu Karisito ruarua.

E vakatavulica o Momani ni iVola i Momani a volai me vukei keda me da vakabauta na iVola Tabu ka o ira era vakabauta na iVolatabu mera na vakabauta na iVola i Momani.

iTaviqaravi e Rawa ni Caka

• Vakaraitaka vei ira na gone na tabana ni ulutaga ni iVola i Momani, ka dusi ki na vosa ni ulutaga ni o wilika, ka vakabibitaka na vosa e dua tale. Vukei ira na gone mera vakasamataka na ivolanikalou tale eso e vakavulici keda baleti Jisu. Vakaraitaka vei ira ni iVola Tabu e tiko kina na Veiyalayalati Makawa kei na veiyalayalati vou. Vukei ira na gone me kaya “Veiyalayalati Makawa, Veiyalayalati Vou” ni o dusia na iVola Tabu kei na “E Dua Tale na iVakadinadina” ni o dusia na iVola i Momani.

• Vakaraitaka e dua na mape ni vuravura se na tabana ni itaviqaravi ni ituvatuva oqo, vata kei na dua na iVola Tabu kei na iVola i Momani. Vakayagataka na veika oqo mo vakavulici ira kina na gone ni iVola Tabu e dua na itukutuku ni ivakavuvuli i Jisu e Jerusalemi kei na veivanua wavolivolita kei na iVola i Momani e dua na itukutuku ni Nona ivakavuvuli ena vanua o Amerika.

• Digitaka e vica na veika yaco kei na dina eso ni iVolatabu kei na iVola i Momani ruarua e vakadinadinataka, me vaka na sucu nei Jisu, mate, kei na Tucaketale. Vakaraitaka na iyaloyalo eso mai na Gospel Art Book e vakatakarakarataka na veika a yaco kei na dina oqo. Kerei ira na gone mera vakamacalataka na ka era raica ena iyaloyalo, ka tukuna vei ira ni iVola Tabu kei na iVola i Momani ruarua e vakavulica na veika oqo.

Momani 8:3

Au rawa ni digitaka na dina kevaka sara mada ga au galili voli.

O Moronai e a iotioti ni Nifaiti yalododonu, ia e a dina tu ga ki na nona ivakadinadina. Vukei ira na gone mera vuli mai na nona ivakaraitaki.

iTaviqaravi e Rawa ni Caka

• Wilika na Momani 8:3, ka vakabibitaka ni o Moronai e a tu duadua voli ga, ia e a dina tu ga ki na ivakaro, oka kina na ivakaro me vakaotia na iVola i Momani. Wasea e dua na gauna ko a yalodina kina dina ga o a galili voli.

• Ni oti na kena veivosakitaki na ivakaraitaki nei Moronai, wasea eso na ituvaki oya me lewa kina e dua na gone se me digitaka na dodonu se sega, ke sega mada ga ni dua e rai tiko. Na cava beka ena cakava o Moronai?

• Lagata kei ira na gone e dua na sere me baleta na digitaki ni dodonu, me vaka na “Me Da Dina” (iVolanisere ni Gonelalai, 81). Na cava e bibi kina mo digitaka na dodonu e veigauna kece, kevaka sara mada ga o tiko taudua voli?

(Momani 9:7–21

Na Kalou e “sa Kalou ni cakamana.

Vukei ira na gone mera kila vinaka ni cakamana sa ka bibi ena cakacaka ni Kalou ka na cakava na cakamana na Kalou ni ra vakabauta na nona tamata.

iTaviqaravi e Rawa ni Caka

• Vakamacalataka ni cakamana e dua na ka e cakava na Kalou me vakaraitaka na Nona kaukauwa ka vakalougatataka na noda bula (raica na Bible Dictionary, “Miracles”). Wilika na vosa kei na malanivosa mai na Momani 9:11–13, 17 e vakamacalataka eso na cakamana ni Kalou. Vukei ira na gone mera vakananuma na cakamana tale eso e kunei ena ivolanikalou (iyaloyalo mai na Gospel Art Book, me vaka na naba 26, 40, 41, kei na 83, e rawa ni veivuke). Vakadinadinataka ni Kalou e a dau cakamana ena gauna makawa ka se cakamana tikoga nikua.

• Wasea e dua na ka sotavi ni o sa raica na cakamana ena loma ni Lotu nikua se ena nomu bula vakai iko. Wasea na nomu ivakadinadina ni Kalou sa “Kalou ni cakamana” (Momani 9:11).

ivakatakilakila ni veivakavulici

Vakavulica na iVunau: Gone Qase Cake

Momani 7:8–10

Na iVola i Momani kei na iVola Tabu e rau vakadinadinataki Jisu Karisito ruarua.

A vakatavulica o Momani ni “kosipeli i Karisito … ka na soli yani vei [keda]” e na iVola Tabu kei na iVola i Momani ruarua. Vakasamataka mo na vakavulici ira vakacava na gone ni sa bibi vei keda na ivola ruarua oqori.

iTaviqaravi e Rawa ni Caka

• Vola na Momani 7:9 ena papa ni volavola, ia vakalala toka na vanua me sosomitaka na veivosa oqo kei na ko ya. Vola talega ena papa ni volavola oqo = na iVola i Momani kei na ko ya = na iVola Tabu. Sureti ira na gone mera wilika e cake na Momani 7:9 ka vakayagataka na malanivosa ena papa ni volavola mera vakalewena na vanua lala. Na cava eda vulica me baleta na iVola Tabu kei na iVola i Momani mai na tikina oqo?

• Vakaraitaka e dua na iVola i Momani kei na iVola Tabu. Wasea e vica na italanoa mai na ivola yadua, ka vakaraitaka na iyaloyalo ke tiko (raica na Gospel Art Book). Sureti ira na gone mera dusia na ivola e lako mai kina na italanoa. Na cava eda gadreva kina na ivola ruarua?

• Vola na vosa yadua ni ikawalu ni yavu ni vakabauta e na tiki ni pepa duidui. Solia e dua se rua na vosa vei ira na gone yadua, ka sureti ira mera cakacaka vata ka biuta na veivosa ena kena ituvatuva dodonu. Qai kerei ira me ra cavuta na yavu ni vakabauta vakavica. Na cava e vakavulica vei keda?

  ilavelave ni iVola i Momani ena vosa duidui eso

  Na iVola i Momani e ivakadinadinataki Jisu Karisito.

Momani 8:1–7

Au rawa ni digitaka na dodonu kevaka mada ga au galili voli.

Na inaki dei nei Moronai me “vakayacora na ivakaro i tama[na],” dina ga ni sa mate o tamana, e rawa ni vakauqeti ira na gone mera muria na ivakaro ni Kalou.

iTaviqaravi e Rawa ni Caka

• Wilika na Momani 8:1–7 kei ira na gone, ka sureti ira mera wasea na cava era na vakila ke o ira o Moronai. Kerei ira mera wilika tale ena tikina e 1, 3, kei na 4 mera raica na veika a vakaroti kina o Moronai me cakava. E a rawata vakacava o Moronai me “vakayacora na ivakaro i tama[na]”? Me da vakataki Moronai vakalevu vakacava beka?

• Sureti ira na gone mera vola yadua e dua na ituvaki e ra na dodonu mera na digitaka kina na dodonu se na cala ni sega ni dua e rai tiko. Biuta na nodra nanuma ena dua na koniteina, ka mera veivukevuke na gone mera tomika e dua na ituvaki ka wasea na veika era na cakava mera vakataki Moronai.

Momani 8:24–26; 9:7–26

Na Kalou e “sa Kalou ni cakamana.”

Era lewevuqa edaidai era sega ni vakabauta ni se yaco tiko na cakamana. Vakayagataka na ivakavuvuli i Moronai ena veitikina oqo mo vakavulici ira kina na gone ni ke sa tiko na vakabauta, eda rawa ni raica na cakamana ni Kalou ena noda bula.

iTaviqaravi e Rawa ni Caka

• Vakaraitaka vei ira na gone e dua na ivola vakarautaki ni kakana. Na cava ena yaco ke o biuta laivi e dua na isaluwaki bibi? Sureti ira na gone mera vakasaqara ena Momani 8:24 kei na 9:20–21 mera raica kina na “isaluwaki” bibi ka dodonu me tiko vei keda ni bera ni cakamana na Kalou. Wasea na ivakaraitaki ni cakamana—levu se lailai—o sa raica ena loma ni Lotu se ena nomu bula. Sureti ira na gone mera wasea na nodra dui ivakaraitaki.

• Wasei ira na gone ki na rua na timi. Sureta na timi yadua me vakaraica na ivakaraitaki ni cakamana ena so se na ivolanikalou kece oqo: Momani 8:24; 9:11–13, 16–18, 21–25. Na cava eda rawa ni kaya vua e dua ka nanuma ni sa sega ni qai yaco tale na cakamana? (raica na Momani 9:9, 15–21).

ivakatakilakila ni vuli

Vakauqeta na Vuli e Vale

Sureti ira na gone mera kerea e dua na lewe ni matavuvale me vakamacalataka e dua na cakamana ka sa vaqaqacotaka na nona ivakadinadina.

Vakatorocaketaki Noda Veivakavulici

O ira na gone e rawa ni ra kila na veivakayarayarataki ni Yalo Tabu. Vakavulica vei ira na gone ni yalo vakacegu, loloma, kei na lomavinaka ka tiko vei ira ni ra tukuni se seretaki Jisu Karisito kei na Nona kosipeli e lako mai na Yalo Tabu (raica na Veivakavulici ena iVakarau ni iVakabula, 11).

tabana ni itaviqaravi: na iVola i Momani kei na iVola Tabu e vakadinadinataka na iVakabula