E Veipapitaisotaki o Alama ena Wai o Momani

Minerva Teichert (1888 – 1976), Alma Baptizes ena wai ko Momani, 1949 – 1951, waiwai ena masonite, 35⅞ x 48 na iji. Brigham Young University Museum ni Cakacaka ni Liga, 1969

30 ni Noveba–6 ni Tiseba

Moronai 1–6

“Mera Tiko Ga Kina ena Sala Dodonu”

Ni bera ni o tekivu tuvanaka na itaviqaravi ni vuli baleti ira na gone, vulica ena masumasu na Moronai 1– 6, ka vakasaqara na ivakavuvuli ena veitikina eso o nanuma ni dodonu me ra kila.

Vola na Veika o Uqeti Kina

ivakatakilakila ni veiwasei

Sureta na Veiwasei

Sureti ira na gone me ra wasea na veika era sa vulica tiko me baleti Moronai. Sa rawa mo vakayagataka na “Wase 53: Ko Moronai kei na Nona iVakavuvuli” (Na iTalanoa ni iVola i Momani, 154–55, se na kena vidio ena ChurchofJesusChrist.org) me vukea na nodra nanuma.

ivakatakilakila ni veivakavulici

Vakavulica na iVunau: Gone Sobu

Moronai 4–5

Au taura na sakaramede me vakaraitaka niu na dau nanumi Jisu Karisito.

Na sakaramede sa rawa ni dua na ka tabu vakayalo—vei ira mada ga na gonelalai. E rawa vakacava mo vukei ira na gone o vakavulica mera vakayagataka na gauna ni sakaramede mera vakasamataki Jisu kina?

iTaviqaravi e Rawa ni Caka

• Vakaraitaka e dua na kedra iyaloyalo na tamata ni ra vakayagataka tiko na sakaramede (raica na Gospel Art Book, naba 108). Kerei ira na gone me ra tukuna vei iko na cava ena yaco ena gauna ni sakaramede. Na cava e dodonu meda cakava tiko ena gauna ni sakaramede?

• Sureta e rua na lewe ni tabanalevu me rau lako mai ki na kalasi me rau wilika na Moronai 4:3 kei na 5:2 vei ira na gone ka wasea se cava era dau vakayagataka kina na sakaramede ena veimacawa. Kerea me rau vakatura eso na ka e rawa ni ra cakava na gone me vukea na nodra vakasamataki Jisu ena gauna ni sakaramede ka dau nanumi koya tikoga.

• Lagata e dua na sere e vukei ira na gone mera vakasamataki Jisu, me vaka na “Reverently, Quietly” (Children’s Songbook,26). Kerei ira na gone me ra vakatovotovotaka na dabe vagagalu vaka era gadreva ena gauna ni sakaramede.

Moronai 6:1–3

Au rawa ni vakavakarau meu papitaiso.

Na ivakamacala nei Moronai baleti ira na tamata era a papitaiso ena nona gauna e rawa ni vukei ira na gone me ra vakavakarau me ra ciqoma na cakacaka vakalotu bibi oqori nikua.

iTaviqaravi e Rawa ni Caka

• Wilika na veimalanivosa mai na Moronai 6:1–3 ka vakatavulica o cei e rawa ni papitaiso. Vakamacalataka na vosa eso era sega beka ni kila na gone. Me ivakaraitaki, e dua na ibalebale ni “na yalo sa raramusumusu kei na yalo sa bibivoro” o ya me da vakila na rarawa me baleta na noda ivalavala ca (Moronai 6:2). Talanoataka vei ira na nomu a vakavakarau mo papitaiso, se kerea e dua ka se qai papitaiso ga me vakamacalataka na sala a vakavakarau kina. Vukei ira na gone mera vakasamataka eso na sala era rawa ni vakavakarau kina me ra papitaiso ena dua na siga.

• Vakaraitaka na iyaloyalo ni tamata e papitaiso tiko (raica na Gospel Art Book, naba 103, 104), ka laivi ira na gone mera veivosakitaka na cava era raica vei ira na iyaloyalo. Vukei ira mera raica na kena matailalai, me vaka na wai, kei na isulu vulavula. Tarogi ira na gone na cava na vuna eda papitaiso kina, ka vakamacalataka na cava na vuna o a digitaka kina mo papitaiso.

Moronai 6:4–6, 9

Au sa vakalougatataki niu lako ki lotu.

Era sa kila tiko beka na gone o vakavulica tiko na vuni noda lako ki Lotu ena veimacawa? NaMoronai 6 e solia eso na vuna bibi.

iTaviqaravi e Rawa ni Caka

• Tarogi ira na gone na cava era vinakata kina na laki lotu, ka vukei ira mera tukuna eso na ka eda cakava ena lotu. Wilika vei ira e so na veika oqo mai na Moronai 6:4–6, 9, ka sureti ira mera matanataka se droinitaka na kedra iyaloyalo ni ra cakava tiko na veika oqo (me vaka na masu, vunau, lagasere, ka vakaivotavota ena sakaramede).

• Vukei ira na gone me ra lagata na sere me baleta na lako ki lotu, me vakataka na “When I Go to Church” (Children’s Songbook,157). Tukuna vei ira na gone na cava o taleitaka kina na lako ki Lotu, kei na sala esa vakalougatataki iko kina.

ivakatakilakila ni veivakavulici

Vakavulica na ivunau: Gone Qase Cake

Moronai 2–6

Na Yalo Tabu e dua na isolisoli tabu.

Na Yalo Tabu e cavuti vakavica ena Moronai 2–6. O na vakayagataka vakacava na veiwase oqo me vukei ira na gone mera kila vakavinaka na sala e rawa ni vukei ira kina na Yalo Tabu?

iTaviqaravi e Rawa ni Caka

• Kerei ira na gone me ra vakasaqara na veitikina yadua ena Moronai 2–6 ka cavuti kina na Yalo Tabu se Yalo. Ni wilika vata na veitikina oqo, ka kerei ira na gone mera vola ena vava ni volavola na veika era sa vulica baleta na Yalo Tabu. E rawa vakacava mena vukei keda na Yalo Tabu?

• Tukuna vei ira na gone me baleta e dua na gauna o vakila kina na veivakauqeti ni Yalo Tabu, e valenilotu se so tale na vanua. Vakamacalataka o kila vakacava ni Yalo Tabu ka sa vukei iko vakacava. Sureti ira na gone mera wasea na veika era sa sotava kei na Yalo Tabu, ka vakayaloqaqataki ira me ra vakasaqara na Nona veivakauqeti.

  ciqoma tiko na veivakalougatataki e dua na goneyalewa lailai

  Na isolisoli ni Yalo Tabu e dau soli mai na veitabaki ni liga.

Moronai 4–5

Au taura na sakaramede me vakaraitaka niu na dau nanumi Jisu Karisito.

Ni ra kila vakavinaka na gone na bibi ni sakaramede, sa na rawarawa cake me ra okata ena vakarokoroko ka vakila nodra voleka kivua na Kalou ena cakacaka vakalotu oqo.

iTaviqaravi e Rawa ni Caka

• Vola na malanivosa eso mai na Moronai 4:3 kei na 5:2 ena veitikinipepa duidui, ka kerei ira na gone me ra biuta na veimalanivosa ena kena ituvatuva dodonu. Mai na veitikina oqo, na cava na vuna e bibi kina na sakaramede?

• Sureti ira na gone me ra raitayaloyalotaka ni dua na itokani e lako tiko mai ki na soqoni ni sakaramede ena imatai ni gauna. Era na vakamacalataka vakacava vua na nodra itokani na sakaramede ka cava na vuna eda taura kina? Vakayaloqaqataki ira me ra vakayagataka na Moronai 4:3 kei na 5:2 ena nodra ivakamacala.

• Sureti ira na gone me ra wasea na veika era cakava na nodra matavuvale ena gauna ni sakaramede me ra dau vakarokoroko ka vakasamataki Jisu Karisito kina. Na cava tale beka na vakasama eso e tiko vei ira? Sureti ira mera digitaka e dua na vakasama oqori ka vakarautaka e dua na takete me na tauri vakalevu cake na gauna ni vakasamataka na iVakabula ena gauna ni sakaramede.

Moronai 6:4–6, 9

Eda gole ki lotu me da vakayagataka na sakaramede ka veitokoni vakai keda.

Na vosa nei Moronai ena rawa ni vukei ira na gone o vakavulica mera kunea na inaki cecere cake ni lako mai ki lotu ena veimacawa.

iTaviqaravi e Rawa ni Caka

• Vola Na cava na vuna eda lako kina ki Lotu? ena vava ni volavola, ka kerei ira na gone me ra vola eso na isaunitaro e rawa. Sureti ira me ra qara na ikuri ni isaunitaro ena Moronai 6:4–6, 9 ka kuria na ka era vola ena vava ni volavola. Sureti ira na gone mera wasea na sala era sa vakalougatataki kina ena nodra mai lotu. Me ra dramataka ni ra sa vakamacalataka tiko vei ira e dua na itokani ni dua tale na vakabauta na cava era vakavinavinakataka kina na lewena na Lotu.

• Vakaraitaka na iyaloyalo se ivakaraitaki ni kakana e veivakamamautaki. Na cava na vuna e bibi kina me da vakania vinaka na yagoda? Wilika vata na Moronai 6:4, ka tarogi ira na gone se cava era nanuma e ibalebale ni malanivosa “ka vakani ena vosa vinaka ni Kalou”. E vakani keda beka vakacava na vosa ni Kalou?

• Sureta e dua na gone me ra wilika na vosacavuti oqo mai vei Elder Jeffrey R. Holland, ka veivosakitaka na veika e vakavulica baleta na sala eda rawa ni veivakani kina vakai keda: “E levu na tamata era sega ni lako mai ki lotu me vakasaqara wale tu ga me baleta e vica na dina vou ni kosipeli se me raica kina na itokani makawa, e dina ga ni veika kece oqori e bibi. Era dau gole mai me vakasaqara e dua na ka sotavi vakayalo. Era gadreva na vakacegu. Era gadreva me vaqaqacotaki na nodra vakabauta ka vakavoui na nodra inuinui. Era gadreva, vakalekaleka ga, me ra vakani ena vosa vinaka ni Kalou, me vaqaqacotaki na kaukauwa mai lomalagi” (“A iVakavuvuli Sa Lako Mai Vua na Kalou,” Ensign, Me 1998, 26). Eda na veivuke vakacava me veivakani vakayalo vakai keda e valenilotu?

ivakatakilakila ni vuli

Vakayaloqaqataka na Vuli e Vale

Vakayaloqaqataki ira na gone me ra tukuna ki na nodra matavuvale na vuna era taleitaka kina na laki lotu ena veimacawa.

Vakatorocaketaki Noda Veivakavulici

Tokoni ira na iTubutubu. Qara ena yalomasumasu na sala eso ko rawa ni tokoni ira kina na itubutubu ni gone o vakavulica. O na tokona vakacava na nodra sasaga me ra vakavulica na kosipeli vei ira na luvedra? Me kena ivakaraitaki, mo na vosa vei ira na itubutubu me baleta na nodra gagadre kei na nodra malele na luvedra se wasea vata kei ira na veika era sa vulica na luvedra ena kalasi (raica na Veivakavulici ena iVakarau ni iVakabula,25).

na tabana ni itaviqaravi: Au vakayagataka na sakaramede meu nanumi Jisu Karisito