Minerva Teichert (1888 – 1976), Moronai: Na iOtioti ni Nifaiti, 1949–1951, waiwai ena masonite, 34¾ x 47 na idi. Brigham Young University Museum of Art, 1969

7–13 ni Tiseba

Moronai 7–9

“Me Laveti Iko Cake Mada ko Karisito”

Na vulici ena masumasu na Moronai 7–9 ena sureta mai na veivakauqeti ni Yalo Tabu. Ena vukei iko mo kila na nodra gagadre na gone ena nomu kalasi.

Vola na Veika o Uqeti Kina

Sureta na Veiwasei

Vakananumi ira na gone me baleta nomu a sureti ira me ra cakava e dua na ka ena gauna ni lesoni ni macawa sa oti se dua na ka era sa vulica vata kei ira na nodra matavuvale ena macawa oqo. Kerei ira mera wasea na veika era sa vulica.

Vakavulica na iVunau: Gone Sobu

Moronai 7:33

Ke sa tu vei au na vakabauta, au sa rawa ni cakava na cava ga e gadreva na Kalou meu cakava.

O ira na gone era vakabauti Jisu Karisito ka yalodei ki na nona kaukauwa e rawa ni ra vakayacora na veika lelevu ni ra qaravi Koya.

iTaviqaravi e Rawa ni Caka

• Wilika na Moronai 7:33, ka sureti ira na gone me ra tucake ni ra rogoca na vosa “vakabauta.” Vakamacalataka ni da vakaraitaka na noda vakabauti Jisu Karisito ni da sa maroroya na Nona ivakaro. Vukei ira na gone me ra vola ena vava ni volavola eso na ka e vinakata o Jisu mera cakava, me vaka na talairawarawa vei ira na nodra itubutubu se tukuna na ka dina. Vakadinadinataka ni noda vakabauti Jisu Karisito ena rawa ni vukea noda talairawarawa ki na ivakaro.

• Vakaraitaka na iyaloyalo eso e tukuna e dua mai na iVola i Momani (se na ivola tale eso ni ivolanikalou) era rawata e dua na ka bibi baleta e ra vakabauti Jisu Karisito (raica, me vakaoqo, Gospel Art Book, naba 19, 70, 78,81). Vukei ira na gone mera tukuna na italanoa e vakaraitaki tiko ena iyaloyalo. Tukuna vei ira ni baleta ni ra vakabauti Jisu Karisito na tamata oqori, ea soli kina na kaukauwa mera cakava na veika e gadreva O Koya me ra cakava.

Moronai 7:41

Na vakabauti Jisu Karisito e rawa ni solia vei au na inuinui.

E tiko e vuqa na tamata e vuravura era sa vakila ni sa sega na inuinui. E rawa vakacava ni o vukei ira na gone o vakavulica mera kunea na inuinui vei Jisu Karisito?

iTaviqaravi e Rawa ni Caka

• Wilika ka vakamacalataka na Moronai 7:41 vei ira na gone, ka kerei ira me ra laveta na ligadra ni ra rogoca e dua na ka e kaya o Momani e dodonu meda vakanuinui kina. Tukuna vei ira na gone me baleta na vakanuinui ko vakila ena vukui Jisu Karisito.

• Kerei ira na gone me ra vakasamataka e dua era kila e sotava tiko e dua na ka dredre. Sureti ira na gone me ra droinitaka na iyaloyalo me baleta na tamata oya ka rawa ni vakananumi koya me nuinui vei Jisu Karisito.

Moronai 7:47

“Na loloma uasivi sa ikoya na loloma taucoko i Karisito.”

Na veika cava oa sotava ena nomu bula ka rawa ni vukea mera vulica na gone me ra dau yalovinaka vei ira na tani ka qaravi ira ena loloma?

iTaviqaravi e Rawa ni Caka

• Kerei ira na gone me ra tokaruataka vata kei iko na malanivosa oqo: “Na loloma uasivi sai koya na loloma taucoko i Karisito” (Moronai 7:47). Vukei ira na gone mera vakasamataka eso na sala ea vakaraitaka kina na loloma o Jisu Karisito vei ira na tani (iyaloyalo ena rawa ni veivuke, me vaka na Gospel Art Book, naba 55, 83,84). Sa vakaraitaka vakacava O Koya na loloma vei keda? E rawa ni da vakaraitaka vei cei na loloma me vaka ea kitaka o Jisu? Me ivakaraitaki, mo vakaraitaka na vidio “My Brother Hyrum” (ChurchofJesusChrist.org).

• Sureti ira na gone me ra droinitaka na kedra iyaloyalo ni ra vakaraitaka tiko na loloma vua e dua tale. Vakatututaka mera biuta na nodra iyaloyalo ena vanua ka na vakananumi ira mera lomani ira na tani me vaka e cakava o Jisu.

Vakavulica na ivunau: Gone Qase Cake

Moronai 7:21–22, 25, 33

Au vakalougatataki niu vakabauti Jisu Karisito.

O Momani e vinakata me ra kila na tamata ni caka mana ea sega ni cegu ena gauna sa mai cava kina na veiqaravi ni iVakabula e vuravura. Ni da sa vakabauti Jisu Karisito tikoga , eda rawa, vata kei na Nona veivuke, ni cakava e dua na ka e gadreva O Koya meda cakava — oka kina na veika ni caka mana.

iTaviqaravi e Rawa ni Caka

• Vukei ira na gone me vola ena vava ni volavola eso na “veika vinaka” ka da sa ciqoma ena vuku ni kosipeli i Jisu Karisito, me vakataka na taukeni ni matavuvale tawamudu, ka lesu tiko vua na Tamada Vakalomalagi, kei na kena vosoti na noda ivalavala ca. Mo qai sureti ira na gone me ra wilika Moronai 7:21–22 kei na 25, ka vakaraica eda rawa vakacava ni ciqoma kece sara na veika vinaka oqo. Eda na vakaraitaka vakacava na noda vakabauti Jisu Karisito kei na nona yalayala?

• Wilika na Moronai 7:33 vei ira na gone, ka kerei ira mera vakarogoca na veika eda rawa ni cakava ni da vakabauti Jisu Karisito. Ke veiganiti, wasea na veika o sa sotava ni a vukei iko na vakabauta mo cakava na ka e vinakata na Kalou mo cakava. Vukei ira na gone me ra vakasamataka ka wasea na ivakaraitaki mai na nodra bula. Sa vakayaco veisau vakacava na vakabauti Karisito ena ivakaraitaki eso oqo?

Moronai 7:40–41; 9:25–26.

Au rawa ga ni vakanuinui vei Jisu Karisito, ena gauna mada ga ni dredre levu.

Erau sotava o Momani kei Moronai na ituvaki ni bula veivakayalolailaitaki, ia erau kune vakacegu vua na iVakabula o Jisu Karisito. E rawa vakacava mo vukei ira na gone mera kunea na inuinui vei Karisito ni ra yalolailai?

iTaviqaravi e Rawa ni Caka

• Vukei ira na gone me ra vola eso na leqa ka rawa ni ra vakila kina na tamata na yalolailai se yali ni inuinui. Sureti ira na gone me ra wilika na Moronai 7:40–41 kei na 9:25–26, vaqara e dua na ka e rawa ni vukea e dua e vakila na yalolailai. Tukuna vei ira e sa vukei iko vakacava ena veigauna dredre ko Jisu Karisito kei na nona kosipeli.

• Sureti ira na gone me ra vola e dua na itukutuku vua e dua e vakila ni yalolailai me vukei koya me kunea na inuinui vei Karisito, me vaka a vakayacora o Momani vei luvena tagane ena Moronai 9:25–26. Vakayaloqaqataki ira na gone mera vakayagataka na vosa kei na malanivosa mai na veitikina oqo ena nodra itukutuku.

• Vakatawana e dua na koniteina makare ena wai, ka vakalutuma kina e rua na iyaya—e dua me nawa ka dua me dromu. Vakatautauvatataka na iyaya nawa kei na tamata ka tu vua na inuinui vei Karisito. Wilika vata na Moronai 9:25. E cakava beka vakacava ko Karisito me “laveti keda cake” ni da sotava na veika dredre? Vukei ira na gone mera vakasamataka eso na sala e rawa me ra maroroya kina na iVakabula kei na nona ivakavuvuli veivakauqeti “ena [nodra] vakasama me tawamudu.”

Moronai 7:45–48

“Na loloma uasivi sa ikoya na loloma taucoko i Karisito.”

Na vakatorocaketaki ni isolisoli ni loloma e sa dua na inakinaki ni bula taucoko. O na vakauqeti ira vakacava na gone me ra vakasaqara na loloma taucoko i Karisito?

iTaviqaravi e Rawa ni Caka

• Sureti ira na gone me ra wasea na veika era nanuma ni ibalebale ni vosa na “loloma”. Sureta e dua vei ira na gone me wilika na Moronai 7:45. (Kevaka e so na vosa ena tikina oqo e sa dredre mera kila vakavinaka, vukei ira na gone me ra vakaraica ena dua na ivolanivosa.) Kerei ira na gone me ra tukuna na tamata era kila era sa ivakaraitaki vinaka ni loloma uasivi. Na cava e vakatokai kina na loloma uasivi me “loloma taucoko i Karisito”? (Moronai 7:47). Na cava e vakavulica vei keda na tikina 48 me baleta na kena rawa ni da vakasinaiti ena loloma uasivi? Vakayaloqaqataki ira yadua na gone me masulaka na loloma uasivi ena macawa oqo ka vakaraica na sala eso me ra vakaraitaka na loloma uasivi vei ira na tani.

• Vukei ira na gone mera vakasamataka eso na sala ea vakaraitaka kina o Jisu na loloma uasivi (raica, me ivakaraitaki na, Luke 23:34; Joni 8:1–11; Ica 12:33–34). E rawa vakacava ni da vakamuria na Nona ivakaraitaki?

• Kerei ira na gone me ra vola na yacadra na tamata era na kila ena tiki ni pepa ka biuti ira ena dua na taga lailai se koniteina. Sureti ira me ra kauta ki vale na nodra koniteina, digitaka mai kina e dua na yaca ena veisiga, ka me cakava e dua na ka e vakaraitaka na loloma vua na tamata o ya. Ena dua na kalasi e muri, qai sureti ira mera wasea na veika era sa sotava ni ra qaravi ira na tamata oqori.

Vakayaloqaqataka na Vuli e Vale

Vakayaloqaqataki ira na gone mera vakasamataka e dua era na vakasaqara na vakabauta levu cake se vakanuinui vei Jisu Karisito. Sureti ira na gone me ra wasea vata kei ira na tamata o ya e dua na ka era sa vulica ena kalasi nikua.

Vakatorocaketaki Noda Veivakavulici

Vakauqeta na vakarokoroko E dua na tiki bibi ni vakarokoroko sai koya na vakasamataki ni Tamada Vakalomalagi kei Jisu Karisito. E rawa ni o vakananumi ira na gone mera vakarokoroko ena nomu lagata malua se gudrutaka e dua na sere se vakaraitaka toka e dua na iyaloyalo kei Jisu.