Sa rairai ko Jisu vei ira na Nifaiti

Mo Dou Kila Kina, mai vei Gary L. Kapp

14–20 ni Tiseba

Moronai 10

“Lako Mai vei Karisito, ka Vakataucokotaki Vua”

Eso na gone ena nomu kalasi e rawa ni yaco vei ira na ka sotavi vakaibalebale ena veika vulici tiko mai na iVola i Momani mai vale. E rawa vakacava ni o vakayagataka na veika sotavi oqori mo vakayaloqaqataki ira kece na gone mera wili ivolanikalou mai vale?

Vola na Veika o Uqeti Kina

ivakatakilakila ni veiwasei

Sureta na Veiwasei

Me ra veisoliyaka wavoki e dua na ilavelave ni iVola i Momani. Ni taura tu na ivola na gone yadudua, kerea me wasea e dua na ka e lomana me baleta na iVola i Momani—e dua na italanoa taleitaki, e dua na ivakadinadina, se e dua na ka e vulica tiko mai kina e vale se e valenilotu.

ivakatakilakila ni veivakavulici

Vakavulica na iVunau: Gone Sobu

Moronai 10:3–5.

Au rawa ni kila vakataki au ni dina na iVola i Momani.

Vaqara na sala me ra vukei kina na gone me ra ciqoma na veisureti nei Moronai me taroga vua na Kalou kevaka e dina na iVola i Momani.

iTaviqaravi e Rawa ni Caka

• Vakaraitaka e dua na iyaloyalo kei Moronai ni buluta tiko na peleti koula (raica na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale), ka kerei ira na gone me ra tukuna na ka era raica. Sureti ira mera dusia na peleti, ka vakamacalataka ni ena peleti oqo era a vola na vosa eda wilika tiko oqo ena iVola i Momani. Laiva vei ira na gone me ra sa vakai Moronai ni volavola ena peleti ka laki buluti ira. Lagata vata “The Golden Plates” (Nodra Sere na Lalai Vakavalagi, 86).

• Vakaraitaka na iVola i Momani, ka wilika Moronai 10:4. Vakabibitaka ni da rawa taroga vua na Kalou kevaka e dina na iVola i Momani, ka na tala yani na Yalo Tabu me vakadinadinataka vei keda. Rawa tale beka ga ni o taurivaka na “Wase e 54: Na Yalayala ni iVola i Momani” (iTalanoa ena iVola i Momani,156, se na kena vidio ena ChurchofJesusChrist.org). Wasea ni sa vukei iko vakacava na Yalo Tabu mo rawata na nomu ivakadinadina me baleta na iVola i Momani. Vukei ira na gone me ra kila na ko na vakila vakacava e dua na ivakadinadina bula mai na Yalotabu. Lagata e dua na sere baleta na kunei ni dina, me vaka na “Search, Ponder, and Pray” (Nodra Sere na Lalai Vakavalagi,109).

Moronai 10:8–20

Na Tamada Vakalomalagi e solia vei au na isolisoli vakayalo.

E vakamacalataka o Moronai na isolisoli ka solia na Kalou vei ira na luvena ni ra sa vakabauti Koya. Sa rawa mo vukei ira na gone me ra vakabauta ni na solia vei ira na Kalou na isolisoli vakayalo.

iTaviqaravi e Rawa ni Caka

• Vola na naba 9 ki na 16 ena so na tiki ni pepa, ka ologa yadua na pepa me vaka e dua na iloloma. Me ra veivukevuke na gone ena cekati ni iloloma. Ni ra sa cakava, wilika vata na tikina mai na Moronai 10:9–16 ka veidonui kei na naba, ka vukei ira na gone me ra raica na isolisoli vakayalo yadudua. Vakamacalataka ni oqo na isolisoli sa solia vei ira na Luvena na Tamada Vakalomalagi me rawa ni da veivukei vakai keda ka vakayacora na Nona cakacaka.

• Laiva me ra veitalanoa vakalekaleka na gone baleta na isolisoli taleitaki era sa ciqoma. Tukuna vei ira na gone me baleta na isolisoli vakayalo o sa raica ni sa solia vei ira ko Tamada Vakalomalagi, me vakataka na isolisoli ni vakabauta, na vuku, ivakadinadina, yalololoma, kei na gumatua mera vuli kina.

Moronai 10:32

E vinakati au o Jisu Karisito meu lako mai ki Vua.

Vakasamataka na sala o na vukei ira kina na gone mera kila vakavinaka na ibalebale ni “lako mai vei Karisito.”

iTaviqaravi e Rawa ni Caka

• Wilika vei ira na gone mai na Moronai 10:32, “Lako mai vei Karisito, ka vakataucokotaki Vua,” ka sureti ira na gone mera cavuta na malanivosa vata kei iko. Kerei ira me ra bobo ni o biuta e dua na iyaloyalo kei Jisu ena dua na vanua ena loma ni rumu. Me ra qai rai na matadra, raica na iyaloyalo, ka soqoni wavokita. Veivosakitaka vata kei ira na gone na sala eda rawa ni lako mai kina vua na Karisito (raica, me ivakaraitaki, Yavu ni Vakabauta 1:3–4). Tokaruataka na itaviqaravi oqo, ni ko vakatarai ira na gone me ra biuta na iyaloyalo o ya ena dua na vanua ena rumu ni kalasi.

• Vukei ira na gone me ukutaka na beji buli vaka-uto ka kaya “Au lomana na Kalou ena noqu igu taucoko, vakasama, kei na kaukauwa” (raica na Moronai 10:32). Me da vakaraitaka vakacava vua na Kalou ni da lomani Koya?

ivakatakilakila ni veivakavulici

Vakavulica na ivunau: Gone Qase Cake

Moronai 10:3–5.

Au sa rawa ni kila na ka dina ena kaukauwa ni Yalo Tabu.

E vinakata na Kalou meda kila yadudua ni dina na iVola i Momani. Vukei ira na gone me ra kilamatata na yalayala, “E na vakatakila vei kemudou ko koya ena kaukauwa ni Yalo Tabu ni sa dina.”

iTaviqaravi e Rawa ni Caka

• Vola ena papa ni volavola na vosa Wilika, Nanuma, Tugana, ka Taroga. Sureti ira na gone me ra kunea na veivosa oqo ena Moronai 10:3–4. Na cava me da wilika, nanuma, tugana, ka kerea me da rawata kina se vaqaqacotaka na noda ivakadinadina ni iVola i Momani? Kerei ira na gone me ra vakaraica na tautauvata na tikina oqo kei na sere “Search, Ponder, kei Pray” (Children’s Songbook,109).

• Vukei ira na gone me ra nanuma eso na ka o ni sa sotava vata ni o ni vulica tiko na iVola i Momani. Wasea na nomu vakila me baleta na iVola i Momani, ka oka kina na nomu rawata se vaqaqacotaka na nomu ivakadinadina ni sa dina. Sureti ira na gone mera wasea na nodra vakila kei na ivakadinadina.

• Tukuna vei ira me baleta e dua na gauna ka a soli ivakadinadina kina vei iko na Yalo Tabu me baleta e dua na ka. Vakamacalataka na veika o vakila kei na sala o kila kina ni Yalo Tabu. Vukea me ra vuli na gone mai vei ira na tiki ni ivolanikalou oqo me baleta na sala e vosa kina vei keda na Yalo Tabu: Joni 14:26–27; Vunau kei na Veiyalayalati 6:15, 23; 8:2–3; 9:7–9; 11:12–14.

Moronai 10:8–19

Na Tamada Vakalomalagi e solia vei au na isolisoli vakayalo.

Sa vuqa sara ena noda gauna oqo ka ra sa “cakitaka … na isolisoli ni Kalou” (Moronai 10:8). Vukei ira na gone me ra raica ni na isolisoli oqo e se tiko ga nikua.

iTaviqaravi e Rawa ni Caka

• Vola na iloloma eso ka vakayacani ena Moronai 10:9–16 ena so na veitiki ni pepa, ka biuti ira ena dua na kato ni isolisoli. Vola na naba 9 ki na 16 ena vava ni volavola, ka sureti ira na gone me ra veivukevuke ena kena tomiki e dua na pepa mai na kato ka veisotaritaka kei na naba ena papa ni volavola. Na cava eda vulica me baleta na isolisoli oqo mai na tikina e 8 kei na 17–18?

• Wasea na italanoa kei na nona lako mai na iVola i Momani (raica na “Wase e 3: Na Agilosi o Moronai kei na Peleti Koula,” na iTalanoa ni Vunau kei na Veiyalayalati, 13–17). Vukea me ra kila na gone na iloloma ka tukuni ena Moronai 10:9–16 ea solia na Kalou vei Josefa Simici me rawa ni kauta mai kina na iVola i Momani. Na cava na vuna e vinakata kina na Tamada Vakalomalagi meda vakabauta na isolisoli vakayalo nikua?

Moronai 10:32–33

E vinakati au o Jisu Karisito meu lako mai ki Vua.

O na sureti ira vakacava na gone me ra “lako vei Karisito, ka mo dou vakataucokotaki Vua”?

iTaviqaravi e Rawa ni Caka

• Vola ena vava ni volavola e dua na taro me vakataka na cava na kena ibalebale me lako mai vei Karisito? Vukei ira na gone me ra vakasaqaqara Moronai 10:32–33 mera kunea na cava e rawa ni isaunitaro. Ni cakacaka vata me vola na cava e vinakata na Karisito meda cakava kei na Nona yalayala me cakava ena vukuda.

• Wasea na nomu tikina taleitaki se italanoa eso mai na iVola i Momani ka sa vukei iko mo lako vei Karisito, ka sureti ira na gone me ra vakayacora vakakina. Railesuva vata kei ira na gone na vosa ni Parofita o Josefa Simici mai na ivakamacala taumada ni iVola i Momani: “Ena toro voleka vua na Kalou e dua na tamata ena nona vakamuria na ivakavuvuli [na iVola i Momani], mai na dua tale na ivola.” Wasea na nomu ivakadinadina me baleta na kena sa yaco na ka oqo ena nomu bula.

ivakatakilakila ni vuli

Vakayaloqaqataka na Vuli e Vale

Sureti ira na gone me ra dau masulaka e dua na ivakadinadina kaukauwa cake ni iVola i Momani ka qai wasea na nodra ivakadinadina vua e dua na lewe ni matavuvale se itokani.

Vakatorocaketaki Noda Veivakavulici

Vakayaloqaqataka na Veiwasei O ira na gone lalai e dau tiko na nodra raikiloma vakaibalebale eso me baleta na kosipeli. Na wasei tiko ni nodra vakasama e veivuke ena nodra vakarautaki ira me ra vosa vei ira na nodra itokani me baleta na kosipeli (raica na Veivakavulici ena iVakarau ni iVakabula,30.)

tabana ni itaviqaravi: e vakavulica na iVola i Momani me baleti Jisu Karisito