“14–20 ni Tiseba. Moronai 10: ‘Dou Lako mai vei Karisito, ka mo Dou Vakataucokotaki Vua,’” Lako Mai, Mo Muri Au —Baleta na Tamata Yadua kei na Matavuvale: iVola i Momani 2020 (2020)
“14–20 ni Tiseba. Moroni 10,” Lako Mai, Mo Muri Au—Me Baleti Ira na Tamata Yadua kei na Matavuvale: 2020
Qori Mo Dou Kila Kina, mai vei Gary L. Kapp
14–20 ni Tiseba
Moronai 10
“Dou Lako mai vei Karisito, ka mo Dou Vakataucokotaki Vua”
Ni o vakacavara na wilika na iVola i Momani, sa rawa mo vakasaqara e dua na ivakadinadina vou mai na Yalo Tabu ni sa dina. Ni o cakava, vola na veivakauqeti vakayalo o ciqoma.
Vola na Veika o Uqeti Kina
A dolava na iVola i Momani vata kei na yalayala nei Nifai me vakaraitaka vei keda ni “sa yalololoma dina na Turaga vei ira kecega sa digitaka ko koya, ena vuku ni nodra vakabauta” (1 Nifai 1:20). Tinia na ivola ena dua na itukutuku vakaoqo mai ko Moronai me vaka sa vakarau tu me “dregata” na ivolatukutuku: e sureti keda me da “kila kina na nona loloma na Turaga” (Moronai 10:2–3). Kevaka eda vakasamataka na levu ni loloma soli wale e volai tu ena Vola i Momani, e solia vei keda e levu na ka meda vakanananutaka vakatitobu. Na ivakaraitaki cava era lako mai ki na nomu vakasama? E rawa ni o vakasamataka vakatitobu na sala e veiliutaki kina ena yalololoma na Kalou ki na matavuvale nei Liai ena nodratou i lakolako ki na lekutu ka takosova yani na wasaliwa, na Nona yaloloma e vakaraitaka vei Inosi ena gauna vakasaqara vagumatua na yalona me vosoti, se na yalololoma e vakaraitaka o Koya vei Alama, e dua na meca kaukauwa ni Lotu ka qai yaco me dua vei ira na dau tu taka na lotu ena yaloqaqa. Se e rawa ni o vagolea na nomu vakasama ki na loloma veivueti e vakaraitaka na iVakabula sa tucaketale kivei ira na tamata ena gauna sa vakabulai ira na tauvimate ka vakalougatataki ira na gone lalai. E rairai bibi duadua, ni veika kece oqo ena rawa ni vakananuma “na nona loloma na Turaga” vei iko, ia e dua na inaki bibi ni iVola i Momani e sureti keda yadua meda ciqoma na loloma ni Kalou—e dua na veisureti ka vakaraitaka e na vosa ni vakamoce nei Moronai , “Dou lako mai vei Karisito, ka mo dou vakataucokotaki vua” (Moronai 10:32).
Vakasama eso ni Vuli iVolanikalou Yadua
Au sa rawa ni kila na ka dina ena kaukauwa ni Yalo Tabu.
Sa veisautaka na nodra bula e milioni na tamata e vuravura taucoko na yalayala e tiko ena Moronai 10:3 – 7. Esa veisautaka vakacava na nomu? Kevaka o vinakata me ra rawata se vaqaqacotaka na nomu ivakadinadina me baleta na iVola i Momani, na veisureti nei Moronai e baleti kemuni. Ni o wilika na Moronai 10:3–7, sa rawa mo wilika vakavinaka cake mai na veigauna sa oti. Sa rawa mo dikeva na malanivosa yadua, ni o tarogi iko na taro: Na cava e kena ibalebale oqo? Ena rawa vakacava niu cakava vakavinaka cake? Na cava soti au sa sotava vata mai na veika oqo? E vakaraitaka vakacava na Yalo Tabu na dina ni Vola i Momani vei au?
Vakasamataka e dua e gadreva me rogoca na nomu ivakadinadina me baleta na iVola i Momani. Ena rawa vakacava ni o vukea na tamata oya me vakasaqara vakataki koya na nona ivakadinadina?
“Kakua ni cakitaka na isolisoli ni Kalou.”
E vuqa tu na sala e rawa ni “cakitaka … na isolisoli ni Kalou” (Moronai 10:8). Era cakitaka eso na tamata ni tiko dina na isolisoli oqo. Eso era cakitaka ni tiko vei ira na isolisoli vakayalo ia era na vakadonuya ni tiko vei ira na tamata tale eso. Eso tale era cakitaka na nodra isolisoli ena nodra vakawaletaka se ena nodra sega ni vakatorocaketaka.
Ni o wilika na Moronai 10:8–25, vaqara na dina ena vukei iko mo raica na nomu isolisoli vakayalo ka vakayagataka ena kaukauwa levu cake me vakalougatataki iko kei ira tale eso. Vakasaqara na vakasama titobu eso me baleta na isolisoli sa solia vei iko na Kalou se na isolisoli e vinakata o koya mo vakasaqara. Na cava e bibi kina me ra “nanuma ni kecega sa vinaka sa mai vei Karisito”? (Moronai 10:18).
Vakasamataka talega na ivakasala oqo mai vei Elder John C. Pingree Jr: “Eda na kila vakacava na noda isolisoli? Meda raica na noda veivakalougatataki vakapeteriaki, kerei ira era kilai keda vinaka, ka raica vakai keda na veika cava eda kenadau kina ka marautaka. Vakabibi, ni rawa meda kerea na Kalou (raica na Jemesa 1:5; VV 112:10). Okoya e kila na noda isolisoli, ni a solia ga mai vei keda o Koya” (“Au sa Solia Vei Iko e Dua na Cakacaka,” Ensign se Liaona, Nove. 2017, 33).
Raica na iDusidusi ki na iVolanikalou, “Gifts of the Spirit,” scriptures.ChurchofJesusChrist.org.
Sa rawa niu vakataucokotaki ena loloma soliwale i Jisu Karisito.
Na ivakasala nei Moronai meda “lako mai vei Karisito” e vakalevu cake na kena vulici se vakasamataki Koya se na kena vakamuri na Nona ivunau, e dina ni bibi na veika oqo. Ia, oqo e dua na veisureti me ra lako mai vei Karisito ena kena vakasama taucoko sara e rawa—ka me yaco meda vakataki Koya. Ni o wilika na Moronai 10:30–33, vakaraica na veimalanivosa ena vukei iko mo kila deivaki na cava e kena ibalebale mo lako mai vakataucoko vei Karsito, me vaka na “taura matua na isolisoli vinaka kecega ” “vakuwai kemudou mai na veika kecega sa sega ni vakalou,” ka, vakakina, “mo dou vakataucokotaki kina”(vakuri ena matanivola kala).
E rawa vakacava? Vakaraica na isau ni taro ena Moronai 10:30–33. Na cava na yalo e tukuna tiko vei iko ni o kitaka me taucoko na “lako mai vei Karisito, ka mo dou vakataucokotaki vua”?
Raica na Omanai 1:26; iDusidusi ni iVolanikalou, “Taucokotaki,” scriptures.ChurchofJesusChrist.org.
Eso na Vakasama me baleta na Vuli iVolanikalou Vakavuvale kei na Lotu Vakavuvale
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.
Moronai 10
Wilika vata na wase ni ivola oqo, ka vakasaqara na veigauna kece e vakayagataka o Moronai na vosa vakamasuti. Vola se makataka se cava beka e vakamamasutaka tiko o Moronai—se vakayaloqaqataki tiko—meda cakava. Na cava eda rawa ni cakava meda muria na nona vakamamasu?
Moronai 10:3
Na cava eda vulica me baleta na loloma soliwale ni Turaga ni da wilika na iVola i Momani ena yabaki oqo? Sa yalololoma vakacava na Turaga ki na noda matavuvale?
Moronai 10:3–5
Ni wiliki oti na veitikina oqo, o na taroga beka na lewe ni nomu matavuvale me ra wasea era sa mai kila vakacava ni dina na iVola i Momani. Raica me lagati vata e dua na sere me baleta na vakasaqarai ni dina, me vaka na “Search, Ponder, and Pray” (Children’s Songbook,109). Sa rawa talega mo sureti na lewe ni matavuvale me ra vola na nodra ivakadinadina ena dua na ivolaniveisiga ni matavuvale.
Moronai 10:8–18
E dau matau ena gauna ni Siganisucu meda dau vakasamataka na ciqomi loloma. E rawa ni ologa nai loloma na lewe ni matavuvale baleta e dua tale ena matavuvale ka matataka na “isolisoli ni Kalou” ka tukuni ena Moronai 10:9–16. Na isolisoli oqo e rawa talega ni matataka eso na isolisoli vinaka e lako mai vei Karisito era rawa ni raica vei ira.
Moronai 10:27–29, 34
Na lewe ni matavuvale me wasea na cava era na via tukuna vei Moronai ni ra “ka veirai kei [koya] ena itikotiko talei ni veilewai cecere i Jiova.”
E levu cake na vakasama ni vakavulici ira na gone, raica na ituvatuva ena macawa oqo ena Lako Mai, Mo Muri Au—Baleta na Lalai.
Vakavinakataki ni Vuli Yadudua
Vakaraici Jisu Karisito. Na inaki ni iVola i Momani—kei na ivolanikalou kecega—sai koya me vakadinadinataki Jisu Karisito. Na cava o vulica me baleti Jisu Karisito ena Moronai 10? Na cava o vakauqeti kina mo nanuma tikoga na veika oqo?
Buluta tiko o Moronai na Peleti mai vei Jon McNaughton