Minerva Teichert (1888–1976), E Veipapitaisotaki o Alama ena wai ko Momani, 1949–1951, waiwai ena masonite, 35⅞ ni ono na 48 idi. Brigham Young University Vale ni Maroroi Yaya ni Cakacaka ni Liga, 1969

30 ni Noveba–6 ni Tiseba

Moronai 1–6

“Mera Tiko ga ena Sala Dodonu”

E vola tu o Moronai na veika e nuitaka tiko me “na bau yaga … ena dua na siga mai muri” (Moronai 1:4). Na cava o sa raica ena Moronai 1 – 6 sa ka e yaga sara vei iko? Vola na veika o sa kila, ka sa rawa mo wasea kina vua e dua e raica talega ni sa yaga sara.

Vola na Veika o Uqeti Kina

Ni oti nona vakacavara na itukutuku nei tamana baleti ira na Nifaiti ka semata vata na kedra itukutuku na Jeretaiti, sa nanuma taumada kina ko Moronai ni sa mai cava na nona cakacaka ni maroroi itukutuku (raica na Moronai 1:1). Na cava tale beka me na tukuni baleti rau e rua na matanitu a vakarusai sara vakadua? Ia ni sa raica ko Moronai na noda gauna oqo (raica na Momani 8:35), ka sa dau vakauqeti vakayalo me “vola e vica tale na ka e rairai me yaga … ena dua na siga mai muri” (Moronai 1:4). E kila o koya na vakaitamera ni Vukitani e sa lako tiko mai, kauta vata mai na veilecayaki me baleta na cakacaka vakalotu ni matabete kei na Lotu raraba. Oqo beka na vuna a vakamacalataka vakamatata kina na veika e baleta na sakaramede, papitaiso, vakatikori na isolisoli ni Yalo Tabu, kei na veivakalougatataki ni soqoni vata kei ira na dauvakadinata mera “tiko ga kina [vakai ira] ena sala dodonu, … vakararavi tabakidua ki na loloma i Karisito, o koya sa vakatekivuna ka sauma tale ga na [noda] vakabauta” (Moronai 6:4). Taleitaki na vakasama vakaoqo e solia vei keda na vuni nona vakavinavinaka ni sa maroroya na Turaga bula nei Moronai me rawa ni o koya me “na vola e vica tale na ka” (Moronai 1:4).

Vakasama eso ni Vuli iVolanikalou Yadua

Moronai 1

O ira na tisaipeli i Jisu Karisito yalodina era yalodina tikoga se cava ga na veisaqasaqa.

Vei ira eso, e rawarawa cake mera yalodina tikoga ena veigauna rawarawa kei na logavinaka. Ia me vaka na tisaipeli i Jisu Karisito, eda na yalodina tikoga ena gauna mada ga eda sotava kina na veivakatovolei kei na veisaqasaqa. Ena nomu wilika na Moronai 1, na cava e vakauqeti iko me baleta na yalodina nei Moronai vua na Turaga kei na nona ilesilesi? O na rawa ni muria vakacava na Nona ivakaraitaki?

Moronai 2–6

Sa dodonu me vakayacori na cakacaka vakalotu ni matabete me vaka na ivakaro ni Turaga.

Ena gauna ni nona veiqaravi e vuravura, a ciqoma na iVakabula kei na qaravi ni cakacaka tabu vakalotu, me vaka na papitaiso (raica na Maciu 3:13–17; Joseph Smith Translation, Joni 4:1–3. [ena appendix ni iVola Tabu]), veitabaki ki na matabete (raica Marika 3:13–19), kei na sakaramede (raica na Maciu 26: 26–28). Ia, ena vuku ni Vukitani levu, e vuqa na tamata era sa lecava tiko na kena cakacaka vakalotu e vakayacori—kei na gauna mada ga era sa gadrevi sara kina. Ena Moronai 2–6, sa vakarautaka kina ko Moronai na itukutuku matailalai bibi me baleta eso na cakacaka vakalotu ni matabete e rawa ni vukea me kauta laivi na veilecayaki o ya. Na veivakauqeti vakayalo cava ena yaco mai ni ko vulica na cakacaka vakalotu ena wase oqo? Oqo e so na taro o na taroga beka me vukei iko mo vulica:

Veivakadeitaki (Moronai 2; 6:4).Na cava e vakavulica na ivakasala ni iVakabula ena Moronai 2:2 vei iko me baleta na cakacaka vakalotu ni veivakadeitaki? Na cava o nanuma ni ibalebale mo “curumi ira ka vakasavasavataki ena kaukauwa ni Yalo Tabu”? (Moronai 6:4).

Veitabaki ki na matabete (Moronai 3).Na cava o sa raica ena wase ni ivola oqo e rawa ni vukei e dua na vakavakarau ki na veitabaki ki na matabete? Na cava beka o raica ni na vukea kina e dua e qarava na veitabaki vakabete?

Na sakaramede (Moronai 4–5; 6:6).Vola na yalayala ena masu ni sakaramede (raica na Moronai 4:3; 5:2), ka vakasamataka vakatitobu na veika o sa cakava tiko mo maroroya na nomu yalayala. Na cava e rawa ni o cakava mo sureta na veivakauqeti ni Yalotabu ka levu cake vakaukauwa ni o dau vakaitavi ena sakaramede?

Papitaiso (Moronai 6:1–3).Na cava o rawa ni cakava me tomani tale mo sotava na veika e lavaki me baleta na papitaiso era soli ena veitikina oqo, ni oti mada ga nomu papitaiso? Na cava era tukuna tiko na veitikina oqo kivei iko na ibalebale ni nomu sa lewena na Lotu i Jisu Karisito?

Vakayavutaki ena veika o sa vulica, o na veisautaka vakacava na sala o vakasamataka, vakaitavi se vakarautaki ira eso tale me baleta na cakacaka vakalotu oqo? Na cava na vuna e bibi kina na cakacaka vakalotu oqo me “vakayacori … me vaka na ivakaro i Karisito”? (Moronai 4:1).

Raica talega na “Cakacaka Vakalotu,” iUlutaga Vakosipeli, topics.ChurchofJesusChrist.org.

E vakavulica o Jisu na sala me qaravi kina na cakacaka vakalotu.

Moronai 6:4–9

Era raica na tisaipeli i Jisu Karisito na nodra tiko vinaka na tamata vakai ira.

E dina ni da “cakacakataka na [noda] vakabulai” (Momani 9:27), a vakavulica tale ga ko Moronai meda “dausoqoni vata wasoma” kei ira sa dauvakabauta ka na vukea meda tiko ga kina “ena sala dodonu” (Moronai 6:4–5). Ni o wilika na Moronai 6:4–9, vakasamataka vakatitobu na veivakalougatataki e yaco mai ni sa “wili vata kei ira na lewe ni Lotu i Karisito” (Moronai 6:4). O na veivuke vakacava mo cakava na veika o sa sotava kei ira tale eso e valenilotu me vaka e vakamacalataka o Moronai, ke o ni dua na iliuliu se dua a vakaitavi?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo e vica na vakasama.

Moronai 1; Moronai 6:3

Na cava na ibalebale ni “cakitaka na Karisito”? (Moronai 1:2–3). E rawa vakacava ni da vakaraitaka na noda na “yalodina ka qaravi koya me yacova na ivakataotioti”? (Moronai 6:3). Wasea na ivakaraitaki ni tamata ko ni sa kila tu era sa yalodina mera qaravi Koya.

Moronai 4:3; Moronai 5:2

Wilika na masu ni sakaramede vakamatavuvale ena rawa ni laki veivosakitaki kina na kena dodonu me rokovi vakalevu tiko na sakaramede. Sa rawa ki na lewe ni matavuvale mera veivosakitaka na malanivosa ni masu oqo e vakaibalebale vakalevu vei ira. Era rawa talega ni vola na nodra vakanananu na veimalanivosa oqo se droinitaka e dua na iyaloyalo me vukei ira mera vakasamataka na iVakabula. Era rawa ni ra kauta mai na veika era sa vola se droinitaka ki na soqoni ni sakaramede me vukei ira me vakanamata Vua na nodra nanuma. Tukuna vei ira nomu matavuvale na nomu nanuma me baleta na sakaramede kei na solibula ni iVakabula.

Moronai 6:1–4

Na cava na ibalebale me tiko kei keda na “yalo raramusumusu kei na yalo bibivoro”? (Moronai 6:2). E vukea vakacava oqo meda vakavakarau ki na papitaiso? E vukei keda vakacava ni da sa papitaiso oti?

Moronai 6:4–9

Me vaka e tukuna tiko na veitikina oqo, na cava soti eso na veivakalougatataki e yaco mai ni sa “wili me lewe ni lotu i Karisito”? (Moronai 6:4). Na cava eda gadreva kina na Lotu?

Moronai 6:8

Na cava eda vulica eke baleta na veivutuni? Na cava na kena ibalebale meda vakasaqara na veivosoti ena “yalodina”? (Moronai 6:8). Vakasamataka na kena lagati e dua na sere me baleta na veivosoti, me vaka na “Help Me, Dear Father” (Children’s Songbook, 99).

Ni levu cake na vakasama ni kena vakavulici na luveda, raica na ituvatuva ena macawa oqo ena Lako Mai, Mo Muri Au—Me Baleta na Lalai.

Vakavinakataki ni Vuli Yadudua

Kunea na ivakadinadina ni loloma ni Kalou. E vakatavulica o Peresitedi M. Russell Ballard, “Na kosipeli e kosipeli ni loloma—vua na Kalou kei ira na wekamu” (“God’s Love for His Children,” Ensign, Me 1988, 59). Ni ko wilika na ivolanikalou, tovolea mo vola se makataka na ivakadinadina ni loloma ni Kalou vei iko kei ira kece na luvena.

O Moronai ena loma ni Qaravatu, mai vei Jorge Cocco